Krishnajanmakhanda 44
Kṛṣṇajanmakhaṇḍa 44
- Language
- Sanskrit
44.1
śrīkṛṣṇa uvāca
etasminnantare tatra śaṅkaraḥ samupasthitaḥ
sasmito vṛṣabhendrastho vibhūtibhūṣaṇaḥ svayam
44.2
vyāghracarmāmbaradharo nāgayajñopavītakaḥ
svarṇākārajaṭābhāramardhacandrañca saṃdadhat
44.3
triśūlapaṭṭiśakaro bibhrat khaṭvāṅgamuttamam
sadratnasāraracitasvarayantrakaro mudā
44.4
vāhanādavaruhyāśu bhaktinamrātmakandharaḥ
praṇamya kamalākāntaṃ vāme covāsa bhaktitaḥ
44.5
ājagmurmunayaḥ sarve surāḥ śakrādayastathā
ādityā vasavo rudrā manavaḥ siddhacāraṇāḥ
44.6
pulakāñcitasarvāṅgāstuṣṭuvuḥ puruṣottamam
praṇamya taṃ śivaṃ sarve surāśca namrakandharāḥ
44.7
etasminnantare tatra saṅgītaṃ śaṅkaro jagau
kalātīva sutālañca svarayantrasamanvitaḥ
44.8
āvayośca guṇākhyānaṃ rāsasambandhi sundaram
samayocitarāgeṇa manomohanakāriṇā
44.9
yatna kaṇṭhaikatānena caikamānena cāruṇā
padabherdāvirāmeṇa guruṇā laghunā kramāt
44.10
gamakenātidīrgheṇa madena mathureṇa ca
bhaveti durlabhaṃ sṛṣṭaṃ prītyā svena vinirmitam
44.11
pulakāñcitasarvāṅgaḥ sāśrunetraḥ punaḥ punaḥ
tadeva śrutimātreṇa mūrcchāṃ prāpya vicetanāḥ
44.12
babhūvu rudrarūpāśca munayaḥ purataḥ priye
rudrarūpāḥ surāḥ sarve vidhātṛhripārṣadāḥ
44.13
nārāyaṇaśca lakṣmīśca gāyakaśca śivaḥ svayam
jalapūrṇañca vaikuṇṭhaṃ dṛṣṭvā trasto'hamīśvari
44.14
gatvā mūrtīrvinirmāya sarvāṃśca tādṛśīriva
tatsvarūpāṃstadastrāṃśca tatsvavāhanabhūṣaṇāḥ
44.15
tatsvabhāvāṃstanmanaskāṃstattadviṣayamānasāḥ
sthānaṃ nirmāya parito vaikuṇṭhasya caturdiśi
44.16
tadadhiṣṭhātṛdevī ca ājagāma svamālayam
śarīrajā surāṇāṃ sā babhūva suranimnagā
muktidā ca mumukṣūṇāṃ bhaktānāṃ haribhaktidā
44.17
koṭijanmārjjitaṃ pāpaṃ vividhaṃ pāpināmaho
yasyāśca sparśavāyośca samparkeṇa vinaśyati
44.18
kiṃ vā na jāne prāṇeśi sparśadarśanayoḥ phalam
kimuta snānajanyañca kathayāmi nirūpaṇam
44.16-2
sarvatīrthātparaṃ pṛthāṃ puṣkaraṃ parikīrttitam
vedoktañca tadevākhyāḥ kalāṃ nārhati ṣoḍaśīm
44.20
bhagīrathena cānītā tena bhāgīrathī smṛtā
gāmāgatā srotaso'ṣṭādaśaṅgā tena prakīrttitā
44.21
jānudvārā purā dattā jahnunā toyakopataḥ
tasya kanyāsvarūpā sā jāhnavī tena kīrttitā
44.22
bhīṣmaḥ svayaṃ vasurjātastasyāṃ sā tena bhīṣmasūḥ
44.23
dhārābhistisṛbhiḥ svarge pṛthivīmatalaṃ tathā
mamājñayā ca gacchantī tena tripathagāminī
44.24
pradhānarādhayā svarge sā ca mandākinī smṛtā
yojanāyutavistīrṇā prasthe ca yojanā smṛtā
44.25
kṣīratulyajalā śaśvadatyuttuṅkataraṅgiṇī
vaikuṇṭhād brahmalokañca tataḥ svarge samāgatā
44.26
svargāddhimādrimārgeṇa pṛthivīmāgatā mudā
sā dhārā'lakanandākhyā lavaṇeodena miśritā
44.27
śuddhasphaṭikasaṅkāśā bahuvegavatī satī
pāpināṃ pāpaśuṣkendhanaṃ dagdhuṃ pāvakasūpiṇī
44.28
ato sāgaravaṃśebhyo nirvāṇamuktidāyinī
vaikuṇṭhagāminī sā ca sopānarūpiṇī varā
44.29
ato'pi mṛtyusamaye satāṃ puṇyasvarūpiṇām
ādau pādau ca saṃnyasya mukhe toyaṃ pradīyate
44.30
gaṅgāsopānamāruhya santo yānti nirāmayam
āvrahmalokaṃ saṃlaṅghya rathasthāśca nirāpadaḥ
44.31
daivātpurā prāktanena magne cet kṛtapātakaiḥ
lomapramāṇavarṣañca modante harimandire
44.32
tato bhogo bhavetteṣāṃ niścitaṃ pāpapuṇyayoḥ
ati svalpena kālena kālavyūhañca bibhratām
44.33
tataḥ puṇyavatāṃ gehe labdhvā janma ca bhārate
saṃprāpya niścalāṃ bhaktiṃ bhavanti harirūpiṇaḥ
44.34
mṛtadvijānāṃ dehāṃśca daivācchūdrā vahanti cet
padapramāṇavarṣañca teṣāñca narake sthitiḥ
44.35
tatasteṣāñca sāhāyyaṃ karoti harirūpiṇī
dadāti muktiṃ tebhyo'pi krameṇa ca kṛpāmayī
44.36
janmapuṇyavatāṃ gehe kārayitvā ca bhārate
sthalaṃ dadāti vaikuṇṭhe niścitaṃ janmabhistribhiḥ
44.37
yātrāṃ kṛtvā tu yaḥ śuddhau snātuṃ yāti sureśvarīm
padapramāṇavarṣañca vaikuṇṭhe modate dhruvam
44.38
gaṅgāṃ prāpyānuṣaṅgeṇa snāti cet samalo naraḥ
mucyate sarvapāpebhyaḥ punaryedi na lipyate
44.39
kalau pañcasahasrābdaṃ sthitiratasyāśca bhārate
tasyāñca vidyamānāyāṃ kaḥ prabhāvaḥ kaleraho
44.40
kalau daśasahasrāṇi varṣāṇi pratimā mama
tiṣṭhanti ca purāṇāni prabhāvastava kaḥ kaleḥ
44.41
atalaṃ yāti yā dhārā sā ca bhogavatī smṛtā
payaḥphenanibhā śaśvadativegavatī sadā
44.42
ākarāmūlyaratnānāṃ maṇīndrāṇāñca santatam
nāgakanyāśca tattīre krīr̤anti sthirayauvanāḥ
44.43
svayaṃ devī ca vaikuṇṭhe veṣṭayitvā ca santatam
sahasrayojanā prasthe dairye ca lakṣayojanā
44.44
asyā vināśaḥ pralaye nāstyeva duhiturmama
nānāratnākaraṃ divyaṃ tattīraṃ sumanoharam
44.45
ityevaṃ kathitaṃ sarvaṃ jāhnavījanmapuṇyadam
brahmaṇaśca pratīkāro mohinīśāpataḥ śṛṇu
Linked texts (2)
- Brahmavaivartapurāṇa — Vyāsa, Sanskrit
- Janmakhaṇḍa — Sanskrit