Krishnajanmakhanda 48
Kṛṣṇajanmakhaṇḍa 48
- Language
- Sanskrit
Contents
- 48.78 — 1 part
48.1
iti śrībrahmavaivartte mahāpurāṇe nārāyaṇanāradasaṃvāde
śrīkṛṣṇajanmakhaṇḍe haranirmālyaśāpaprasaṅgo
nāma saptatriṃśo'dhyāyaḥ
aṣṭātriṃśo'dhyāyaḥ
śrīkṛṣṇa uvāca
darpabhaṅgaḥ śruto devi śaṅkarasya jagadguroḥ
adhunā śrūyatāṃ matto durgādarpavimocanam
48.2
tejasā sarvadevānāmāvirbhūya jagatprasūḥ
dadhāra kāminīrūpaṃ kamanīyaṃ manoharam
48.3
nihatya dānavendrāṃśca rarakṣa devatākulam
lebhe janma tato devī jaṭhare dakṣayoṣitaḥ
48.4
pinākapāṇiṃ jagrāha sā devī surasādhanam
śaśvat paramabhaktyā ca siṣeve svāminaṃ satī
48.5
dakṣeṇa sārddhaṃ daivena babhūva śivaśatrutā
nirarthakaṃ daivayogāt purā vai surasaṃsadi
48.6
dakṣaścakāra yajñañca tata āgatya kopataḥ
sarvvān vijñāpayāmāsa tatraiva śaṅkaraṃ vinā
48.7
sastrīkā devatāḥ sarvvā ājagmurdakṣamandiram
sagaṇaḥ śaṅkaraḥ kopānnājagāmābhimānataḥ
48.8
satī patiñca mohena bodhayāmāsa yatnataḥ
na tañcālayituṃ śaktā babhūva cañcalā svayam
48.6-2
ājagāma piturgehaṃ darpāttasya vinājñayā
tasya śāpena tasyāśca darpabhaṅgo babhūva ha
48.10
na hi sambhāṣaṇañcakre vāṅmātreṇa pitā ca tām
śrutvā ca nindāṃ bhartuśca dehaṃ tatyāja mānataḥ
48.11
evaṃ priye nigaditaṃ satīdarpavimocanam
tasya janmāntaraṃ nityaṃ darpabhaṅgaśca śrūyatām
48.12
lebhe janma satī śīghraṃ jaṭhare śailayoṣitaḥ
śivastasyāścitābhasma cāsthi jagrāha bhaktitaḥ
48.13
cakāra mālāmasthnāñca bhasmanā tanulepanam
smāraṃ smāraṃ satīṃ premṇā bhrāmaṃ bhrāmaṃ punaḥ punaḥ
48.14
suṣāva menā tāṃ devīmatīva sumanoharām
sṛṣṭau vidhātustasyāśca hyupamā nāsti kutra ca
48.15
guṇaprasūrguṇāṃn sarvān sarvarūpān bibhartti sā
sarvāśca devapatnyastatkalāṃ nārhanti ṣoḍśīm
48.16
babhūva varddhamānā sā śukle candrakalā yathā
atīva yauvanasthā ca śailagehe dine dine
48.17
babhūvākāśavāṇī ca tāṃ sambodhya jagatprasūm
śive śivañca tapasā kaṭhoreṇa labheti ca
48.18
vineśvaraṃ na tapasā prāptā hi garbhasambhavam
prahasya tasthau śrutveti sā ca yauvanagarvitā
48.16-2
mama janmāntarīṇañca bhasmāsthi ca bibharti yaḥ
sa māṃ praur̤hāṃ kathaṃ dṛṣṭvā na gṛhṇātyatra janmani
48.20
yo vidagdhaśca brahmāṇḍaṃ babhrāma mama śokataḥ
sa kathaṃ māṃ na gṛhṇāti dṛṣṭvā paramasundarīm
48.21
dakṣayajñaṃ yo babhañja mama hetoḥ kṛpānidhiḥ
sa kathaṃ māṃ na gṛhṇāti patnīṃ janmani janmani
48.22
yā yasya patnī yo yasyā bharttā prāktanataḥ purā
kuto viśve tayorbhedo niṣeko nānyathā bhavet
48.23
sarvarūpaguṇādhāraṃ matvā svamatimānataḥ
na cakāra tapaḥ sādhvī na vijñāya tameśvaram
48.24
sundarīṣu ca sarvāsu matto nāstyeva sundarī
hṛdīti matvā garveṇa na cakāra tapaḥ śivā
48.25
rūpayauvanaveṣānāṃ pumān grāhī svayoṣitām
śivo macchrutimātreṇa māṃ gṛhṇāti vinā tapaḥ
48.26
hṛdīti matvā girijā tasthau himagirergṛhe
śaśvatsahacarīmadhye krīr̤onmattā divāniśam
48.27
etasminnantare tūrṇaṃ dūtaḥ śailendrasaṃsadi
uvācāgatya madhuraṃ tatpuraḥ saṃpuṭāñjaliḥ
48.28
uttiṣṭhottiṣṭha śailendra gacchākṣayavaṭāntikam
ājagāma mahādevaḥ sagaṇo vṛṣavāhanaḥ
48.29
madhuparkādikaṃ dattvā bhaktinamrātmakandharaḥ
pūjanaṃ kuru śailendra devendrantamatīndriyam
48.30
siddhisrarūpaṃ siddheśaṃ yogīndrāṇāṃ gurorgurum
mṛtyuñjayaṃ kālakālaṃ brahmajyotiḥ sanātanam
48.31
paramātmasvarūpañca saguṇaṃ nirguṇaṃ vibhum
bhaktadhyānārthamamalaṃ dadhānaṃ dehamīśvaram
48.32
śailo dūtavacaḥ śrutvā samuttasthau mudānvitaḥ
madhuparkādikaṃ nītvā jagāma śaṅkarāntikam
48.33
devī dūtavacaḥ śrutvā prasannavadanekṣaṇā
hṛdīti mene maddhetorājagāma maheśvaraḥ
48.34
cakāra veśamatulaṃ dadhāra vastramuttamam
ratnendrasārālaṅkārān ratnamālāṃ manoharām
48.35
pārijātaprasūnānāṃ mālāṃ candanasaṃyutām
cakāra śaṅkarārthañca matvā mālāṃ manoharām
48.36
ratnasiṃhāsanasthā sā dadarśa darpaṇe mukham
kastūrīvindunā sārddhaṃ sindūravindubhūṣitam
48.37
āraktanetrayugalaṃ nirmalāñjanasaṃyutam
śaranmadhyāhṇakamalaṃ yathā liptaṃ triveṣṭitam
48.38
sukomalauṣṭhayugalaṃ tāmbūlarāgasaṃyutam
atīva sundaraṃ ramyaṃ pakvavimbaphalaṃ yathā
48.39
ratnakuṇḍaladīptyā ca gaṇḍasthalavirājitam
sūryodayena jvalitaṃ sumeruśikharaṃ yathā
48.40
atyanirvacanīyañca dantapaṃktimanoharam
yathā muktāsamūhañca sajalaṃ jaladāgame
48.41
gajamuktāsamāyuktaṃ sucārunāsikottamam
suśobhitaṃ yathā meruṃ svarṇadījaladhārayā
48.42
mālatīmālyasaṃyuktakavarībhārasaṃyutam
vakapaṃkti suśobhāḍhyaṃ navīnaṃ jaladaṃ yathā
48.43
taptakāñcanavarṇābhaṃ cāruvakṣaḥsthalojjvalam
ratnendrasārahārāktaṃ kastūrīkuṅkumānvitam
48.44
cārucampakavarṇābhaṃ stanayugmaṃ manoharam
badarīphalatulyañca cārupatrakaśobhitam
48.45
madhyaṃ manoharaṃ kṣīṇaṃ nimnanābhisthalojjvalam
atīva sundaraṃ ramyaṃ sundaraṃ vartulākṛti
48.46
rambhāstambhavinindyaikamūruyugmaṃ manoharam
kāmālayaṃ sukaṭhinaṃ nigūḍhamaṃśukena ca
48.47
sthalapadmaprabhāmṛṣṭapadayugmaṃ manoharam
ratnapāśakasaṃyuktaṃ siddhālaktakabhūṣitam
48.48
dadhataṃ ratnamañjīraṃ rājahaṃsānukāri ca
ratnendrasārābharaṇaṃ nirmitaṃ viśvakarmaṇā
48.49
karaṃ sukomalataraṃ sundaraṃ kanakaprabham
ratnakaṅkaṇakeyūraśaṅkhabhūṣaṇabhūṣitam
48.50
bibhratsadratnamukuṭaṃ līlākamalamujjvalam
ratnāṅgulīyamatulaṃ dadhattatsumanoharam
48.51
dṛṣṭvā svarūpamatulaṃ dadhyau śaṅkaramīśvaram
vigaṇya manasā śaśvadbhartuścaraṇapaṅkajam
48.52
pitaraṃ mātaraṃ bandhuṃ sādhvīvargaṃ sahodaram
antare sā na sasmāra kiñcideva śivaṃ vinā
48.53
atha śaileśvarastatra dadarśa candraśekharam
svarṇadītulinādramyādutpatantañca sasmitam
48.54
dadhataṃ saṃskṛtāṃ mālāṃ japantaṃ mama nāmakam
taptasvarṇaprabhājuṣṭajaṭārāśivirājitam
48.55
vṛṣabhasthaṃ śūlapāṇiṃ sarvabhūṣaṇarājitam
nāgayajñopavītañca sarpabhūṣaṇabhūṣitam
48.56
śuddhasphaṭikasaṅkāśaṃ vyāghracarmadharaṃ param
vibhūtibhūṣitāṅgantamasthimālaṃ digambaram
48.57
pañcavaktraṃ trinayanaṃ sūryyakoṭisamaprabham
dadarśa rudrān parito jvalato brahmatejasā
48.58
śivaṃ vāme mahākālaṃ dakṣiṇe nandikeśvaram
bhūtapretapiśācāṃśca kuṣmāṇḍān brahmarākṣasān
48.59
vetālān kṣetrapālāṃśca bhairavān bhīmavikramān
sanakañca sanandañca kumārañca sanātanam
48.60
jaigīṣavyaṃ devalañca kāṇādaṅgītamaṃ tathā
pippalādaṃ kaṇakhanaṃ voḍhuṃ pañcaśikhaṃ kacam
48.61
jāvāliṃ karathaṃ kaṇvaṃ lomaśaṃ sūryyavarcasam
kātyāyanaṃ pāṇiniñca śṛṅgaṃ durvāsasaṃ tataḥ
48.62
ātātapaṃ pāribhadramaṣṭāvakraṃ marudbhavam
etān purogamānkṛtvā praṇanāma śivaṃ giriḥ
mūrdhnā nipatya bhūmau sa daṇḍavatsaṃ puṭāñjaliḥ
48.63
atho'nalpayā bhaktyā dhṛtvā taccaraṇāmbujam
nanāma cāśrunetraḥ sa pulakāñcitavigrahaḥ
48.64
dharmadattena stotreṇa tuṣṭāva parameśvaram
tuṣṭe brāhme dine'tīte puṣkare sūryyaparvvaṇi
48.65
himālaya uvāca
tvaṃ brahmā sṛṣṭikarttā ca tvaṃ viṣṇuḥ paripālakaḥ
tvaṃ śivaḥ śivado'nantaḥ sarvasaṃhārakārakaḥ
48.66
tvamīśvaro guṇātīto jyotīrūpaḥ sanātanaḥ
prakṛtaḥ prakṛtīśaśca prākṛtaḥ prakṛteḥ paraḥ
48.67
nānārūpavidhātā tvaṃ bhaktānāṃ dhyānahetave
yeṣu rūpeṣu yatprītistattadrūpañca bibharṣi ca
48.68
sūryyastvaṃ sṛṣṭijanaka ādhāraḥ sarvatejasām
somastvaṃ śasyapātā ca satataṃ śītaraśminā
48.69
vāyustvaṃ varuṇastvañca tvamagniḥ sarvadāhakaḥ
indrastvaṃ devarājaśca kāle mṛtyuryamastathā
48.70
mṛtyuñjayo mṛtyumṛtyuḥ kālakālo yamāntakaḥ
vedastvaṃ vedakarttā ca vedavedāṅgapāragaḥ
48.71
viduṣāṃ janakastvañca vidvāṃśca viduṣāṃ guruḥ
mantrastvaṃ hi japastvaṃ hi tapastvaṃ tatphalapradaḥ
48.72
vāk tvaṃ vāgadhidevī tvaṃ tatkarttā tadguruḥ svayam
aho sarasvatībījaṃ kastavāṃ stotumiheśvaraḥ
48.73
ityevamuktvā śailendrastasthau dhṛtvā padāmbujam
tatrovāsa tamābodhya cāvaruhya vṛṣācchivaḥ
48.74
stotrametanmahāpuṇyaṃ trisandhyaṃ yaḥ paṭhennaraḥ
mucyate sarvapāpebhyo bhayebhyaśca bhavārṇave
48.75
aputro labhate putraṃ māsamekaṃ paṭhedyadi
bhāryyāhīno labhedbhāryyāṃ suśīlāṃ sumanoharām
48.76
cirakālagaṃtaṃ vastu labhate sahasā dhruvam
rājyabhraṣṭo labhedrājyaṃ śaṅkarasya prasādataḥ
48.77
kārāgāre śmaśāne ca śatrugraste'tisaṅkaṭe
gabhīre'tijalākīrṇe bhagnapote viṣādane
48.78
raṇamadhye mahābhīte hiṃsrajantusamanvite
sarvato mucyate śrutvā śaṅkarasya prasādataḥ
48.78.p1
iti śrībrahmavaivartte mahāpurāṇe nārāyaṇanāradasaṃvāde śrīkṛṣṇajanmakhaṇḍe aṣṭatriṃśattamo'dhyāyaḥ
Linked texts (3)
- Brahmavaivartapurāṇa — Vyāsa, Sanskrit
- Janmakhaṇḍa — Sanskrit
- Himavatkhaṇḍa — Sanskrit