Krishnajanmakhanda 49
Kṛṣṇajanmakhaṇḍa 49
- Language
- Sanskrit
49.1
ekonacatvāriṃśo'dhyāyaḥ
śrīkṛṣṇa uvāca
iti śrutvā himagirirvasataḥ śaṅkarasya ca
uvāsa purato dūre labdhājñaḥ sarvasammataḥ
49.2
madhuparkādikaṃ tasmai pradadau bhaktipūrvakam
munīn sampūjayāmāsa tataḥ śaṅkarapārṣadān
49.3
tadā tatra samāgatya menakā strīgaṇaiḥ saha
dadarśa vaṭamūlasthaṃ śaṅkaraṃ candraśekharam
49.4
īṣaddhāsyaprasannāsyaṃ vasantaṃ vyāghracarmaṇi
madhye munigaṇānāñca jvalantaṃ brahmatejasā
49.5
yathākāśe tārakāṇāṃ dvijarājaṃ virājitam
paramāhlādakaṃ rūpaṃ kandarpakoṭisannibham
49.6
vihāya vārddhakāvasthāṃ dadhataṃ navayauvanam
atīva sundaraṃ ramyaṃ cittacaurañca yoṣitām
49.7
kāmaṃ kāmāturāṇāñca satīnāñca sutaṃ yathā
vaiṣṇavānāṃ mahāviṣṇuṃ śaivānāñca sadāśivam
49.8
śaktisvarūpaṃ śāktānāṃ saurāṇāṃ sūryarūpiṇam
kālasvarūpaṃ duṣṭānāṃ śiṣṭānāṃ paripālakam
49.9
kālakālasamaṃ mṛtyormṛtyuṃ mṛtyuṃ bhayānakam
vyāghracarma cāruvastraṃ babhūva bhasma candanam
49.10
sarpāḥ sundaramālyāni kastūrī yāṃ viṣaprabhā
jaṭā sulalitā cūr̤ā candramelakacandanam
49.11
sucārvī mālatīmālā gaṅgādhārā manoharā
asthimālā ratnamālā dhattūraṃ cāru campakam
49.12
ekībhūtaṃ pañcavaktraṃ netrayugmājaśobhitam
śaratpārvaṇacandrābhaṃ pracchāya dīptamuttamam
49.13
bandhujīvavinindyai kamoṣṭhādharamanoharam
śvetaścandro vṛṣendraśca bhūtādyā nartakā iva
49.14
sadyo vyatikramaṃ sarvaṃ maheśasya maheśvarī
dṛṣṭvaivaṃ śivarūpañca menā tuṣṭā babhūva ha
49.15
kāścinnimeṣarahitāḥ kāmena pulakāñcitāḥ
atikāmāturāḥ satyaḥ prāpurmūrcchāñca kāścana
49.16
kāścidvinindya kāntāṃśca praśaśaṃsurmaheśvaram
manorathena manasā samāśliṣyanti kāścana
49.17
kāścinmānasikaṃ kāmāt kurvanti cumbanaṃ mudā
dhruvaṃ kāmaṃ kariṣyāmo vayañca kāmasāgare
49.18
asmākamevaṃ bharttā ca paratraiva yato bhavet
ihaivaikaṃ kariṣyāmo vayaṃ kāntaṃ ratau ratam
49.18-2
dṛṣṭvā tapasyā suciramiti jalpanti kāścana
kāściddṛṣṭvā śivaṃ kiñcinmukhamācchādya vāsasā
49.20
sasmitā vakranayanāḥ paśyantyevaṃ punaḥ punaḥ
vayaṃ gṛhaṃ na yāsyāmo yāsyāmaḥ śivasannidhim
49.21
śaratsudhāṃśuvadanaṃ drakṣyāmo'harniśaṃ mudā
saṃsāraṃ na kariṣyāmaḥ praviśāmo hutāśanam
49.22
bhavitā naḥ śivaḥ svāmītyevaṃ jalpanti kāścana
aho puṇyavatī durgā ślāghyate janma bhārate
49.23
yasyā hyayaṃ śivaḥ svāmītyevaṃ jalpanti kāścana
mudā menā śivaṃ dṛṣṭvā gṛhantābhirjagāma ha
49.24
śivaṃ sampūjya śailendraḥ praṇamya svagṛhaṃ yayau
kṛtvānumānaṃ rahasi girīśo menayā saha
49.25
durgāṃ prasthāpayāmāsa śivāya śivasannidhim
pārvatī sakhibhiḥ sārddhaṃ veṣaṃ kṛtvā manoharam
49.26
bhāvāduraktā harṣaṇa jagāma śivasannidhim
dṛṣṭvā śivā śivaṃ śāntaṃ prasannavadanekṣaṇam
49.27
saptapradakṣiṇaṃ kṛtvā sasmitā praṇanāma sā
ananyabhājaṃ guṇinamamaraṃ jñānināṃ varam
49.28
sundaraṃ labha bhartāraṃ sundarītyāśiṣaṃ dadau
bhavitā tava saubhāgyaṃ śubhe svāmini santatam
49.26-2
putraste bhavitā sādhvi nārāyaṇasamo guṇaiḥ
bhavitā te parā pūjā trailokye jagadambike
49.30
brahmāṇḍeṣu ca sarveṣu sarveṣāñca parā bhava
saptapradakṣiṇīkṛtya yato bhaktyā tvayā natam
49.31
saptajanmani tuṣṭo'haṃ tatphalaṃ labha sundari
tīrthe kānte'bhīṣṭadeve gurormantre tathauṣadhe
49.32
āsthā ca yādṛśī yāsāṃ siddhistāsāñca tādṛśī
ityuktvā śaṅkarastūrṇaṃ brahmajyotiḥ parañca mām
49.33
dadhyau yogāsanaṃ kṛtvā yogīśo vyāghracarmaṇi
prakṣālya caraṇau devī papau taccaraṇodakam
49.34
cakāra mārjanaṃ bhaktyā vahniśaucena vāsasā
ratnasiṃhāsanaṃ ramyaṃ viśvakarmādinirmitam
49.35
apūrvaṃ kāṃsyapātrasthaṃ naivedyaṃ pradadau kila
arghyaṃ mandākinītoyasaṃyuktañcaraṇe dadau
49.36
sugandhicandanaṃ cāru kastūrīkuṅkumānvitam
pradadau mālatīmālāṃ gale garalasundare
49.37
bhaktyā pūjāñcakārātha puṣpavṛṣṭiñca tuṣṭaye
pīyūṣaṃ svarṇapātrasthaṃ pradadau madhuraṃ madhu
49.38
ratnapradīpaśatakaṃ samantādrūpamuttamam
trailokyadurlabhaṃ vastraṃ svarṇayajñopavītakam
49.36-2
sugandhi śītatoyañca pānārthaṃ pārvatī dadau
atīva sundaraṃ ramyaṃ ratnasārendrabhūṣaṇam
49.40
durlabhāṃ kāmadhenuñca svarṇaśṛṅgasamanvitām
snānīyantīrthatoyañca tāmbūlañca manoharam
49.41
dattvā ṣoḍaśopacāraṃ praṇanāma punaḥ punaḥ
saṃpūjya śūlinaṃ bhaktyā yayau nityaṃ piturgṛham
49.42
śuśrāvāpsarasāṃ vaktrāhde vīmindro maheśvaraḥ
śrutvā vārttāṃ śunāśīro nanartta harṣasaṃyutaḥ
49.43
dūtadvārā kāmadevamānināya tvarānvitaḥ
indrājñayā kāmadevaḥ prajagāmāmarāvatīm
49.44
tūrṇaṃ prasthāpayāmāsa tañca yatra śivaḥ śivā
pañcasāyakasaṃyukto jagāma pañcasāyakaḥ
49.45
prasannavadanaṃ śrīmān yatra śaktiyutaḥ śivaḥ
gatvā dadarśa madanaḥ śivāyukaṃ śivaṃ vibhum
49.46
śāntaṃ trailokyakāntañca prasannavadanekṣaṇam
kāmaḥ sthito'ntarikṣe ca dhṛtvā ca saśaraṃ dhanuḥ
49.47
cikṣepāstraṃ durnivāryyamamoghaṃ śaṅkare mudā
babhūvāmoghamastrañca moghantatparamātmani
49.48
ākāśa iva nirlipte nirlipte paramātmani
moghībhūte ca śastre ca bhayamāpa ca manmathaḥ
49.46-2
cakampe purataḥ sthitvā dṛṣṭvā mṛtyuñjayaṃ vibhum
sasmāra tridaśān kāmaḥ śakrādīn bhayavihvalaḥ
49.50
āyayurdevatāḥ sarvāḥ śambhukopena vepitāḥ
cakruḥ stutiñca stotreṇa śaṅkaraṃ tridaśeśvaram
49.51
kopāgnimugirantaṃ taṃ kapālalocanādaho
stutiṃ kurvatsu deveṣu sa vahniḥ śambhusambhavaḥ
49.52
jajvālordhvaśikho dīptaḥ pralayāgniśikhopamaḥ
utpatya gagane ghūrṇan nipatya dharaṇītale
bhrāmaṃ bhrāmañca paritaḥ papāta madanopari
49.53
babhūva bhasmasātkāmaḥ kṣaṇena harakopataḥ
viṣaṇṇā devatāḥ sarvā natavaktrā ca pārvatī
49.54
vilalāpa bahutaraṃ harasya purato ratiḥ
tuṣṭuvurdevatāḥ sarvāḥ kampitāścandraśekharam
49.55
ratimūcuḥ surāḥ sarve ruruduśca muhurmuhuḥ
kiñcidbhasma gṛhītvā ca rakṣa mātarbhayaṃ tyaja
49.56
vayaṃ taṃ jīvayiṣyāmo labhiṣyasi priyaṃ punaḥ
harakopāpanayane suprasanne dine tathā
49.57
dṛṣṭvā ratervilāpañca mūrcchāṃ saṃprāpa pārvatī
atīndriyaṃ guṇātītaṃ tuṣṭāva candraśekharam
49.58
rudantīṃ pārvatīṃ tyaktvā svasthānaṃ prayayau śivaḥ
sadyo babhūva tatraiva pārvatīdarpamokṣaṇam
49.59
rūpayauvanayogarvaṃ tatyāja śailakanyakā
mukhaṃ darśayituṃ lajjā tadbabhūva sakhīgaṇe
49.60
surāśca ratimāśvāsya sarve jagmuḥ svamandiram
praṇamya daṇḍavadrudraṃ śokādudvignamānasāḥ
49.61
śrutvā ruditvā śokena bhayena kāmakāminī
koparaktekṣaṇaṃ rudraṃ rādhike svālayaṃ yayau
49.62
na jagāma piturgehe pārvatī sā tu lajjayā
svālibhirvāryyamāṇāpi jagāma tapase vanam
49.63
prajagmuḥ sahacāriṇyastatpaścācchokavihvalāḥ
mātṛbhirvāryyamāṇā sā svarṇadītīrajaṃ vanam
49.64
sucirañca tapastaptvā sā saṃprāpa trilocanam
ratiḥ saṃprāpa madanaṃ śaṅkarasya vareṇa ca
49.65
ityevaṃ kathitaṃ sarvvaṃ pārvatīdarpamokṣaṇam
nigūr̤hacaritaṃ rādhe kimbhūyaḥ śrotumicchasi
Linked texts (3)
- Brahmavaivartapurāṇa — Vyāsa, Sanskrit
- Śivapurāṇa (complete text) — Sanskrit
- Janmakhaṇḍa — Sanskrit