Pramāṇa · Search · About · API

Krishnajanmakhanda 64

Kṛṣṇajanmakhaṇḍa 64

Language
Sanskrit

64.1

catuḥpañcāśattamo'dhyāyaḥ
nārada uvāca
ataḥ paraṃ kiṃ rahasyaṃ babhūva munisattama
kathaṃ jagāma bhagavān madhurāṃ nandamandirāt

64.2

nando dadhāra prāṇāṃśca vicchedena hareḥ katham
gopāṅganā yaśodā ca kṛṣṇaikatānamānasāḥ

64.3

cakṣurnimeṣavicchedād yā rādhā na hi jīvati
kathaṃ dadhāra sā devī prāṇān prāṇeśvaraṃ vinā

64.4

ye ye tatsaṅgino gopāḥ śayanāśanabhogataḥ
kathaṃ visasmaruste ca tādṛśaṃ bāndhavaṃ vraje

64.5

śrīkṛṣṇo madhurāṃ gatvā kiṃ kiṃ karma cakāra saḥ
svargārohaṇaparyyantaṃ tadbhavān vaktumarhati

64.6

śrīnārāyaṇa uvāca
kaṃsaścakāra yajñañca samāhūto dhanurmakham
jagāma tatra bhagavān tena rājñā nimantritaḥ

64.7

rājā prasthāpayāmāsa cākrūraṃ bhagavatpriyam
akrūraḥ prerito rājñā gatvā ca nandamandiram

64.8

śrīkṛṣṇañca gṛhītvā ca sagaṇaṃ mathurāṃ gataḥ
kṛṣṇaḥ śrīmathurāṃ gatvā jaghāna nṛpatiṃ mune

64.6-2

jaghāna rajakañcaiva cāṇūraṃ muṣṭikaṃ gajam
cakāra pitroruddhāraṃ bāndhavānāñca bāndhavaḥ

64.10

kubjayā saha śṛṅgāraṃ kṛtvā ca kautukena ca
tāñca prasthāpayāmāsa golokaṃ gopikāpatiḥ

64.12

cakāra kṛpayā viṣṇurmālākārasya mokṣaṇam
kṛpayā coddhavadvārā bodhayāmāsa gopikāḥ 4 11
tadopanīto bhagavānavantīnagaraṃ yayau
cakāra vidyāgrahaṇaṃ muneḥ sāndīpinerguroḥ

64.13

tato jitvā jarāsandhaṃ nihatya yavaneśvaram
ugrasenañca nṛpatiñcakāra vidhipūrvakam

64.14

gatvā samudranikaṭaṃ nirmāya dvārakāṃ purīm
jahāra rukmiṇīṃ devīṃ jitvā nṛpatisaṅghakam

64.15

kālindīṃ lakṣmaṇāṃ śaivyāṃ satyāṃ jāmbavatīṃ satīm
mitravindāṃ nāgnajitīṃ samudvāhañcakāra saḥ

64.16

nihatya narakaṃ bhūpaṃ raṇena dāruṇena ca
patnīṣor̤aśasāhasraṃ vihārañca cakāra saḥ

64.17

jahāra pārijātañca jitvā śakrañca līlayā
ciccheda bāṇahastāṃśca jitvā ca candraśekharam

64.18

pautrasya mokṣaṇaṃ kṛtvā punarāgatya dvārakām
ātmānaṃ darśayāmāsa lokāṃśca pratimandiram

64.16-2

yoge ca vasudevasya tīrthayātrāprasaṅgataḥ
prāṇādhiṣṭhātṛdevīñca dadarśa tatra rādhikām

64.20

pūrṇe ca śatavarṣe ca sudāmnaḥ śāpamokṣaṇe
punaryayau tayā sārddhaṃ puṇyaṃ vṛndāvanaṃ vanam

64.21

punaścaturdaśābdañca tayā sārdhaṃ jagatpatiḥ
cakāra rāsaṃ rāse ca puṇyakṣetre ca bhārate

64.22

pūrṇamekādaśābdañca nivṛtya nandamandire
mathurāyāṃ dvārakāyāṃ pūrṇamabdaśataṃ vibhuḥ

64.23

cakāra bhāraharaṇaṃ pṛthivyāṃ pṛthuvikramaḥ
pañcaviṃśativarṣañca śatavarṣādhikaṃ mune
tiṣṭhan jagāma golokaṃ pṛthivyāñca purātanaḥ

64.24

yaśodāyai ca nandāya vṛṣabhānāya dhīmate
rādhāmātre kalāvatyai dadau sāmīpyamokṣaṇam

64.25

kṛṣṇena sārddhaṃ gopībhī rādhikā ca kutūhalāt
babandha dharmasetuñca vedoktañca yuge yuge

64.26

ityevaṃ kathitaṃ sarvaṃ samāsena mahāmune
śrīkṛṣṇacaritaṃ ramyaṃ caturvargaphalapradam

64.27

brahmādistambaparyyantaṃ sarvaṃ naśvarameva ca
bhaja taṃ paramānandaṃ sānandaṃ nandanandanam

64.28

svecchāmayaṃ paraṃ brahma paramātmānamīśvaram
paramavyayamavyaktaṃ bhaktānugrahavigraham

64.30

satyaṃ nityaṃ svatantrañca sarveśaṃ prakṛteḥ param
nirguṇañca nirīhañca nirākāraṃ nirañjanam

Linked texts (2)