Krishnajanmakhanda 65
Kṛṣṇajanmakhaṇḍa 65
- Language
- Sanskrit
65.1
iti śrībrahmavaivartte mahāpurāṇe nārāyaṇanāradasaṃvāde
śrīkṛṣṇajanmakhaṇḍe śrīkṛṣṇarādhikāsaṃvādo
nāma catuḥpañcāśattamo'dhyāyaḥ
nārāyaṇa uvāca
sa eva bhagavān kṛṣṇaḥ sarvātmā puruṣaḥ paraḥ
durārādhyo'tisādhyaśca sarvārādhyaḥ sukhapradaḥ
65.2
nijabhaktātisādhyaśca bhaktasyārādhya eva ca
śaśvad dṛśyaḥ svabhaktasyābhaktasyādṛśya eva ca
65.3
durjñeyaṃ tasya caritaṃ kāryaṃ hṛdayameva ca
brahmāstanmāyayā sarve mohitāśca durantayā
65.4
yadbhayādvāti vāto'yaṃ kūrmo dhatte nirāśrayaḥ
kūrmo'nantaṃ vidhatte ca yadbhayena nirantaram
65.5
bibharti śeṣo viśvañca yadbhayena ca nārada
sahasraśīrṣā puruṣaḥ śirasaścaikadeśataḥ
65.6
saptasāgarasaṃyuktā saptadvīpā vasundharā
śailakānanasaṃyuktā pātālāḥ sapta eva ca
65.7
sapta svargāśca vividhā brahmalokasamanvitāḥ
evaṃ viśvaṃ tribhuvanaṃ kṛtrimaṃ parikīrtitam
65.8
yadbhayena vidhātrā ca pratisṛṣṭau ca nirmitam
evaṃ viśvānyasaṃkhyāni lomakūpermahān virāṭ
65.9
yadbhayena vidhatte ca yadaṃśo dhyāyate hi yam
viṣṇuḥ pāti ca saṃsāraṃ yadbhayena kṛpānidhiḥ
65.10
kālāgnirudro yadbhītataḥ kālaḥ saṃharate prajāḥ
mṛtyuñjayo mahādevo yadbhayādgāyate ca yam
65.11
ṣaḍguṇairanurāgaiśca virāgī virataḥ sadā
yadbhayena dahatyagniḥ sūryyastapati yadbhayāt
65.12
yadbhayādvarṣatīndraśca mṛtyuścarati jantuṣu
yadbhayena yamaḥ śāstā pāpināṃ dharma eva ca
65.13
dhatte ca dharaṇī lokān yadbhayena carācarān
sūyate prakṛtiḥ sṛṣṭau yadbhayānmahadādikam
65.14
durjñeyaṃ tadabhiprāyaṃ ko vā jānāti putraka
yatprabhāvaṃ na jānanti brahmaviṣṇumaheśvarāḥ
65.15
kathaṃ jānāmi tacceṣṭāmahaṃ vatsa sumandadhīḥ
kathaṃ jagāma mathurāṃ tyaktvā vṛndāvanaṃ vanam
65.16
kathaṃ tatyāja gopīśca rādhāṃ prāṇādhikāṃ priyām
yaśodāṃ bāndhavādīṃśca nandaṃ vā nandanandanaḥ
65.17
darpahā darpadaḥ so'pi sarveṣāṃ sarvadaḥ sadā
babhañja rādhādarpañca sudāmnnaḥ śāpakāraṇāt
65.18
anyeṣām bhāvanāhetorbrahma prāptistathā bhavet
evaṃ kiñcidvitarkañca kurute kamalodbhavaḥ
65.16-2
cakāra darpabhaṅgañca mahāviṣṇuḥ purā vibhuḥ
brahmaṇaśca tathā viṣṇoḥ śeṣasya ca śivasya ca
65.20
dharmasya ca yamasyāpi sāmbasya candrasūryyayoḥ
garur̤asya ca vaṅkeśca gurordurvāsasastathā
65.21
dauvārikasya bhaktasya jayasya vijayasya ca
surāṇāmasurāṇāñca bhavataḥ kāmaśakrayoḥ
65.22
lakṣmaṇasyārjunasyāpi bāṇasya ca bhṛgostathā
sumerośca samudrāṇāṃ vāyośca varuṇasya ca
65.23
sarasvatyāśca durgāyāḥ padmāyāśca bhuvastathā
sāvitrāyāścaiva gaṅgāyā manasāyāstathaiva ca
65.24
prāṇādhiṣṭhātṛdevyāśca priyāyāḥ prāṇato'pi ca
prāṇādhikāyā rādhāyā anyeṣāmapi kā kathā
65.25
hṛtvā darpañca sarveṣāṃ prasādañca cakāra saḥ
kartā hartā pālayitā sraṣṭā sṛṣṭeśca sarvataḥ
65.26
yaṃ stotumīśo nālañca pañcavaktreṇa śaṅkaraḥ
stotuṃ nālaṃ caturvaktro vidhātā jagatāmapi
65.27
stotuṃ nālamanantaśca sahasravadanairaho
svayaṃ viṣṇurviśvavyāpī nālaṃ stotuṃ janārdanaḥ
65.28
mahāvirāṭ na śakto'pi yaṃ stotuṃ parameśvaram
kampitā yasya purataḥ prakṛtiḥ paramātmanaḥ
65.26-2
sarasvatī jar̤ībhūtā yaṃ stotuṃ parameśvaram
mahimānaṃ na jānanti vedā yasya ca nārada
65.30
ityevaṃ kathito brahman prabhāvaḥ paramātmanaḥ
nirguṇasya ca kṛṣṇasya kimbhūyaḥ śrotumicchasi
Linked texts (1)
- Brahmavaivartapurāṇa — Vyāsa, Sanskrit