Krishnajanmakhanda 73
Kṛṣṇajanmakhaṇḍa 73
- Language
- Sanskrit
73.1
iti śrībrahmavaivartte mahāpurāṇe nārāyaṇanāradasaṃvāde
śrīkṛṣṇajanmakhaṇḍe śrīrāmacaritaṃ nāma
dviṣaṣṭitamo'dhyāyaḥ
viṣaṣṭitamo'dhyāyaḥ
nārada uvāca
atha kaṃso vicintyaivaṃ dṛṣṭvā duḥsvapnameva ca
samudvigno mahābhīto nirāhāro nirutsukaḥ
73.2
putraṃ mitraṃ bandhugaṇaṃ bāndhavāñca purohitam
samānīya sabhāmadhye tānuvāca suduḥkhitaḥ
73.3
kaṃsa uvāca
mayā dṛṣṭo niśīthe yo duḥsvapno hi bhayapradaḥ
nibodhata budhāḥ sarve bāndhavāśca purohitāḥ
73.4
bibhratī raktapuṣpāṇāṃ mālāṃ sā raktacandanam
raktāmbaraṃ khaḍgatīkṣṇaṃ kharparañca bhayaṅkaram
73.5
prakṛtyāṭṭāṭṭahāsañca lolajihvā bhayaṅkarī
atīvavṛddhā kṛṣṇāṅgī nagare mama nṛtyati
73.6
muktakeśī chinnanāsā kṛṣṇā kṛṣṇāmbarāpi yā
vidhavā sā mahāśūdrī māmāliṅgitumicchati
73.7
malinaṃ cailakhaṇḍañca bibhratī rukṣamūrddhajān
dadhatīṃ cūrṇatilakaṃ kapāle mama vakṣasi
73.8
kṛṣṇavarṇāni pakvāni bhinnabhinnāni satyaka
patanti kṛtvā śabdāṃśca śaśvattālaphalāni ca
73.9
kucailo vikṛtākāro mleccho hi rukṣamūrddhajaḥ
dadāti mahyaṃ bhūṣāyāṃ chinnabhinnakaparyaṃ kān
73.10
mahāruṣṭā ca divyā strī patiputravatī satī
babhañja pūrṇakumbhañca sābhiśapya punaḥ punaḥ
73.11
amlānā mūr̤hamālāñca raktacandanacarcitām
dadāti mahyaṃ vipraśca mahāruṣṭo'tiśapya ca
73.12
kṣaṇamaṅgāravṛṣṭiśca bhasmavṛṣṭiḥ kṣaṇaṃ kṣaṇam
kṣaṇaṃ kṣaṇaṃ raktavṛṣṭirbhavecca nagare mama
73.13
vānaraṃ vāyasaṃ śvānaṃ bhallūkaṃ śūkaraṃ kharam
paśyāmi vikaṭākāraṃ śabdaṃ kurvantamulbaṇam
73.14
paśyāmi śuṣkakāṣṭhānāṃ rāśmi mamlānakajjalam
aruṇodayavelāyāṃ kapīn chinnanakhāni ca
73.15
pītavastraparīdhānā śuklacandanacarcitā
bibhratī mālatīmālāṃ ratnabhūṣaṇabhūṣitā
73.16
krīr̤ākamalahastā sā sindūravinduśobhitā
kṛtvābhiśāpaṃ māṃ ruṣṭā yāti manmandirāt satī
73.17
pāśahastāṃśca puruṣān muktakeśān bhayaṅkarān
atiruṣṭāṃśca paśyāmi viśato nagaraṃ mama
73.18
nagnanārīṃ muktakeśīṃ nṛtyantīñca gṛhe gṛhe
atīvavikṛtākārāṃ paśyāmi sasmitāṃ sadā
73.19
chinnanāsā ca vidhavā mahāśūdrī digambarī
sā tailābhyaṅgitaṃ māñca karotyatibhayaṅkarī
73.20
nirvāṇāṅgārayuktāśca bhasmapūrṇā digambarāḥ
atiprabhātasamaye citāḥ paśyāmi sasmitāḥ
73.21
paśyāmi ca vivāhañca nṛtyagītamanoharam
raktavastraparidhānān puruṣān raktamūrddhajān
73.22
raktaṃ vamantaṃ puruṣaṃ nṛtyantaṃ nagnamulbaṇam
dhāvantañca śayānañca paśyāmi sasmitaṃ sadā
73.23
rāhugrastañca gagane maṇḍalaṃ candrasūryyayoḥ
ekakāle ca paśyāmi sarvagrāsañca bāndhavāḥ
73.24
ulkāpātaṃ dhūmaketuṃ bhūkampaṃ rāṣṭraviplavam
jhañjhāvātaṃ mahotpātaṃ paśyāmi ca purohita
73.25
vāyunā ghūrṇyamānāṃśca chinnaskandhān mahīruhān
patitān parvatāṃścaiva paśyāmi pṛthivītale
73.26
puruṣaṃ chinnaśirasaṃ nṛtyantaṃ nagnamucchritam
muṇḍamālākaraṃ ghoraṃ paśyāmi ca gṛhe gṛhe
73.27
dagdhaṃ sarvāśramaṃ bhasmapūrṇamaṅgārasaṅkulam
hāhākārañca kurvvantaṃ sarvaṃ paśyāmi sarvataḥ
73.28
ityevamuktvā rājā sa virarāma sabhātale
śrutvā svapnaṃ bāndhavāśca natavaktrāniśaśvasuḥ
73.29
jahāra cetanāṃ sadyaḥ satyakaśca purohitaḥ
matvā vināśaṃ kaṃsasya yajamānasya nārada
73.30
ruroda nārīvargaśca pitā mātā ca śokataḥ
mene vināśakālañca sadyaḥ svayamupasthitam
Linked texts (1)
- Brahmavaivartapurāṇa — Vyāsa, Sanskrit