Krishnajanmakhanda 78
Kṛṣṇajanmakhaṇḍa 78
- Language
- Sanskrit
78.1
iti śrībrahmavaivartte mahāpurāṇe nārāyaṇanāradasaṃvāde
śrīkṛṣṇajanmakhaṇḍe ādhyātmikayogakathanaṃ
nāma saptaṣaṣṭitamo'dhyāyaḥ
aṣṭaṣaṣṭitamo'dhyāyaḥ
śrīnārāyaṇa uvāca
kṛtvā krīr̤āṃ samutthāya puṣpaśayyāt purātanaḥ
nidritāṃ prāṇasadṛśoṃ bodhaṃyāmāsa tatkṣaṇam
78.2
vastrāñcalena saṃsmṛtya kṛtvā tannirmalaṃ mukham
uvāca madhuraṃ śāntaṃ śāntāñca madhusūdanaḥ
78.3
śrīkṛṣṇa uvāca
ayi tiṣṭha kṣaṇaṃ rāse rāseśvari śucismite
vraja vṛndāvanaṃ vāpi vrajaṃ vraja vrajeśvari
78.4
rāsādhiṣṭhātṛdevi tvaṃ rāsaṃ rāse kuru kṣaṇam
grāme grāme yathā santi sarvatra grāmadevatāḥ
78.5
priyālinivahaiḥ sārddhaṃ kṣaṇaṃ candanakānanam
kṣaṇaṃ vā campakavanaṃ gaccha vā tiṣṭha sundari
78.6
kṣaṇaṃ gṛhañca yāsyāmi viśiṣṭaṃ kāryyamasti me
virāmaṃ dehi me prītyā kṣaṇaṃ māṃ prāṇavallabhe
78.7
prāṇādhiṣṭhātṛdevī tvaṃ prāṇāśca tvayi santi me
prāṇī vihāya prāṇāṃśca kutra sthātuṃ kṣamaḥ priye
78.8
tvayi me mānasaṃ śaśvattvaṃ me saṃsāravāsanā
tvatto mama priyā nāsti tvameva śaṅkarāt priyā
78.6-2
prāṇā me śaṅkaraḥ satyaṃ tvañca prāṇādhikā sati
ityuktā tāṃ samāśliṣya bhagavān gantumudyataḥ
78.10
akrūrāgamanaṃ jñātvā sarvajñaḥ sarvasādhanaḥ
ātmā pātā ca sarveṣāṃ sarvopakārakārakaḥ
78.11
dṛṣṭvā tameva gacchantamutsukaṃ bhinnamānasam
uvāca rādhikā devī hṛdayena vidūyatā
78.12
rādhikovāca
he nātha ramaṇaśreṣṭha śreṣṭhaśca preyasāṃ mama
he kṛṣṇa he ramānātha vrajeśa mā vraja vrajam
78.13
adhunā tvāṃ prāṇanātha paśyāmi bhinnamānasam
gate tvayi mama prema gataṃ saubhāgyameva ca
78.14
kva yāsi māṃ vinikṣipya gambhīre śokasāgare
virahavyākulāṃ dīnāṃ tvayyeva śaraṇāgatām
78.15
na yāsyāmi punargehaṃ yāsyāmi kānanāntaram
kṛṣṇa kṛṣṇeti kṛṣṇeti gāyaṃ gāyaṃ divāniśam
78.16
na yāsyāmyathavāraṇyaṃ yāsyāmi kāmasāgare
tatra tvatkāmanāṃ kṛtvā tyakṣyāmi ca kalevaram
78.17
yathākāśo yathātmā ca yathā candro yathā raviḥ
tathā tvaṃ yāsi matpārśve nibaddho vasanāñcale
78.18
adhunā yāsi nairāśyaṃ kṛtvā me dīnavatsala
na yuktaṃ hi parityaktuṃ dīnāṃ māṃ śaraṇāgatām
78.16-2
yatpādapadmaṃ dhyāyante brahmaviṣṇuśivādayaḥ
tvāṃ māyayā gopaveśaṃ kathaṃ jānāmi matsarī
78.20
kṛtaṃ yaddeva durnītamaparādhasahasrakam
yaduktaṃ patibhāvena cābhimānena tat kṣama
78.21
cūrṇībhūtaśca madgarvo dūrībhūto manorathaḥ
vijñaptamātmasaubhāgyaṃ kimanyat kathayāmi te
78.22
jñātvā gargamukhācchrutvā mohitā tava māyayā
tvāñca vaktuṃ na śaknomi premṇā vā bhaktibhāvataḥ
78.23
yāsi cenmāṃ parityajya sakalaṅko bhaviṣyasi
tvatputrapautrā naśyanti brahmakopānalena ca
78.24
kṣaṇaṃ yugaśataṃ manye tvāṃ vinā prāṇavallabham
kathaṃ śatābdaṃ tvāṃ tyaktā bibharmi jīvanaṃ prabho
78.25
ityuktā rādhikā kopātyapāta dharaṇītale
mūrcchāṃ saṃprāpa sahasā jahāra cetanāṃ mune
78.26
kṛṣṇastāṃ mūrcchitāṃ dṛṣṭvā kṛpayā ca kṛpānidhiḥ
cetanāṃ kārayitvā ca vāsayāmāsa vakṣasi
78.27
bodhayāmāsa vividhaṃ yogaiḥ śokavikhaṇḍanaiḥ
tathāpi śokaṃ tyaktuñca na śaśāka śucismitā
78.28
sāmānyavastuviśleṣo nṛṇāṃ śokāya kevalam
dehātmanośca vicchedaḥ kva sukhāya prakalpate
78.29
na yayau tatra divase vrajarājo vrajaṃ pati
krīr̤āsarovarābhyāsaṃ prayayau rādhayā saha
78.30
tatra gatvā punaḥ krīr̤āṃ cakāra ca tayā saha
vijahau virahajvālāṃ rāse rāseśvarī mudā
78.31
rādhā sā svāminā sārddhaṃ puṣpacandanacarcitā
puṣpacandanatalpe ca tasthau rahasi nārada
Linked texts (1)
- Brahmavaivartapurāṇa — Vyāsa, Sanskrit