Krishnajanmakhanda 84
Kṛṣṇajanmakhaṇḍa 84
- Language
- Sanskrit
84.1
iti śrībrahmavaivartte mahāpurāṇe nārāyaṇanāradasaṃvāde
śrīkṛṣṇajanmakhaṇḍe nandādiśokapramocanaṃ
nāma trisaptatitamo'dhyāyaḥ
catuḥsaptatitamo'dhyāyaḥ
śrīnārāyaṇa uvāca
śrīkṛṣṇaḥ paramānandaḥ paripūrṇatamaḥ prabhuḥ
paramātmā ca paramo bhaktānugrahakātaraḥ
84.2
bhuvo bhārāvataraṇe nirguṇaḥ prakṛteḥ paraḥ
parātparastu bhagavān brahmeśaśeṣavanditaḥ
84.3
tuṣṭo nandastavaṃ śrutvā tamuvāca jagatpatiḥ
āgacchantaṃ gokulācca virahajvarakātaram
84.4
śrībhagavānuvāca
gaccha nanda vrajaṃ nanda tyaja śokaṃ bhramaṃ bhuvi
śṛṇu satyaṃ paraṃ jñānaṃ śokagranthinikṛntanam
84.5
vāyuśca bhūmirākāśo jalaṃ tejaśca pañcakam
uktaḥ śrutigaṇairetaiḥ pañcabhūtaiśca nityaśaḥ
84.6
sarveṣāṃ dehināṃ tāta dehaśca pāñcabhautikaḥ
mithyābhramaḥ kṛtrimaśca svapnavanmāyayānvitaḥ
84.7
dehaṃ gṛhṇanti sarveṣāṃ pañcabhūtāni nityaśaḥ
māyāsaṅke tarūpaṃ tadabhijñānaṃ bhramātmakam
84.8
ko vā kasya sutastāta kā strī kasya patistu vā
karmaṇā bhramaṇaṃ śaśvat sarveṣāṃ bhuvi janmani
84.9
karmaṇā jāyate jantuḥ karmaṇaiva pralīyate
sukhaṃ duḥkhaṃ bhayaṃ śokaṃ karmaṇā ca prapadyate
84.10
keṣāṃ vā janma svargeṣu keṣāṃ vā brahmaṇo gṛhe
keṣāṃ vipreṣu kṣatreṣu keṣāṃ vā vaiśyaśūdrayoḥ
84.11
atinīceṣu keṣāṃ vā keṣāṃ kramiṣu viṭsu ca
paśupakṣiṣu keṣāṃ vā keṣāṃ vā kṣudrajantuṣu
84.12
punaḥ punargramantyeva sarve tāta svakarmaṇā
karoti karma nirmūlaṃ madbhakto matpriyaḥ sadā
84.13
satyaṃ tretā dvāparañca kaliśceti caturyugam
pañcaviṃśatsahasrāṇāṃ yugānte nidhanaṃ manoḥ
84.14
manoḥ samaṃ mahendrasya paramāyurvinirmitam
caturdaśendravicchittau brahmaṇo dinamucyate
84.15
evaṃ parimitā rātriḥ kālavidbhirvinirmitā
evaṃ parimitā māsā varṣañca pariniścitam
84.16
brahmaṇaśca varṣaśataṃ paramāyurvinirmitam
nimeṣamātraṃ kālo'yaṃ brahmaṇo nidhane mama
84.17
brahmāditṛṇaparyyantaṃ sarvaṃ viśve viniścitam
satyo'haṃ paramātmā ca bhaktānugrahavigrahaḥ
84.18
manmantropāsakaḥ satyo dehaṃ tyaktvā dharāsu ca
yāsyatyeva hi golokaṃ chittvā karma purātanam
84.16-2
asaṃkhyabrahmaṇāṃ pāte na bhavettasya patanam
gṛhṇāti nityaṃ svaṃ dehaṃ janmamṛtyujarāpaham
84.20
na nanda mama bhaktānāmaśubhaṃ vidyate kvacit
nityaṃ sudarśanaṃ tān ca parirakṣati sarvataḥ
84.21
matto hi balavān bhaktaścintito'haṃ na cintitaḥ
ahaṃ svāmī ca tasyaiva na me svāmī pitā prasūḥ
84.22
putrabuddhiṃ parityajya bhaja māṃ brahmarūpiṇam
chittvā ca karmanigaḍaṃ golokaṃ tad vraja svayam
84.23
kathayasva yaśodāñca gopīṃ gopagaṇaṃ vraja
taiśca sarvairjanaiḥ śokaṃ tyaja svamandiraṃ vraja
84.24
ityevamuktvā bhagavān virarāma ca saṃsadi
papraccha punarevaṃ taṃ nandaścānandasaṃplutaḥ
84.25
nanda uvāca
vada sāṃsārikaṃ jñānaṃ yena yāsyāmi tvatpadam
mūḍho'haṃ paramānanda śrutīnāṃ janako bhavān
84.26
nandasya vacanaṃ śrutvā sarvajño bhagavān svayam
āhnikaṃ kathayāmāsa śrutibhirna śrutaṃ hi yat
Linked texts (1)
- Brahmavaivartapurāṇa — Vyāsa, Sanskrit