Krishnajanmakhanda 87
Kṛṣṇajanmakhaṇḍa 87
- Language
- Sanskrit
87.1
saptasaptatitamo'dhyāyaḥ
nanda uvāca
kena svapnena kiṃ puṇyaṃ kena mokṣo bhavet sukham
ko'pi ko'pi ca sukhaprastatsarvaṃ kathaya prabho
87.2
śrībhagavānuvāca
vedeṣu sāmavedaśca praśastaḥ sarvakarmasu
tathaiva kāṇvaśākhāyāṃ puṇyakāṇḍe manohare
87.3
sa vyaktī yaśca duḥsvapnaḥ śaśvat puṇyaphalapradaḥ
tasarvaṃ nikhilaṃ tāta kathayāmi niśāmaya
87.4
svapnādhyāyaṃ pravakṣyāmi bahupuṇyaphalapradam
svapnādhyāyaṃ naraḥ śrutvā gaṅgāsnānaphalaṃ labhet
87.5
svapnastu prathame yāme saṃvatsaraphalapradaḥ
dvitīye cāṣṭabhirmāsaistribhirmāsaistṛtīyake
87.6
caturthe cārddhamāsena svapnaḥ svātmaphalapradaḥ
daśāhe phaladaḥ svapno'pyaruṇodayadarśane
87.7
prātaḥsvapnaśca phaladastatkṣaṇaṃ yadi bodhitaḥ
dine manasi yad dṛṣṭaṃ tatsarvañca labhed dhruvam
87.8
cintāvyādhisamāyukto naraḥ svapnañca paśyati
tatsarvaṃ niṣphalaṃ tāta prayātyeva na saṃśayaḥ
87.6-2
jar̤o mūtrapurīṣeṇa pīr̤itaśca bhayākulaḥ
digambaro muktakeśo na labhet svapnajaṃ phalam
87.10
dṛṣṭvā svapnañca nidrāluryadi nidrāṃ prayāti ca
vimūr̤ho vakti cedrātrau na labhet svapnajaṃ phalam
87.11
uktvā kāśyapagotrañca vipattiṃ labhate dhruvam
durgate durgatiṃ yāti nīce vyādhiṃ prayāti ca
87.12
śatrau bhayañca labhate mūrkhe ca kalahaṃ labhet
kāminyāṃ dhanahāniḥ syādrātrau caurabhayaṃ bhavet
87.13
nidrāyāṃ labhate śokaṃ paṇḍite vāñchitaṃ phalam
na prakāśyaśca sa svapnaḥ paṇḍitaiḥ kāśyape vraja
87.14
gavāñca kuñjarāṇāñca hayānāñca vrajeśvara
prāsādānāñca śailānāṃ vṛkṣāṇāñca tathaiva ca
87.15
ārohaṇañca dhanadaṃ bhojanaṃ rodanaṃ tathā
pratigṛhya tathā vīṇāṃ śasyāḍhyāṃ bhūmimālabhet
87.16
śastrāstreṇa yadā viddho vṛṣeṇa kamiṇā tathā
viṣṭhayā rudhireṇaiva sa yukto'pyarthavān bhavet
87.17
svapne'pyagamyagamano bhāryyālābhaṃ karoti yaḥ
mūtrasiktaḥ pibecchukraṃ narakañca viśatyapi
87.18
nagaraṃ praviśedraktaṃ samudraṃ vā sudhāṃ pibet
śubhavārttāmavāpnoti vipulañcārthamālabhet
87.16-2
gajaṃ nṛpaṃ suvarṇañca vṛṣabhaṃ dhenumeva ca
dīpamantraṃ phalaṃ puṣpaṃ kanyāṃ chatraṃ rathaṃ dhvajam
kuṭumbaṃ labhate dṛṣṭvā kīrttiñca vipulāṃ śriyam
87.20
pūrṇakumbhaṃ dvijaṃ vahniṃ puṣpatāmbūlamandiram
śukladhānyaṃ naṭaṃ veśyāṃ dṛṣṭvā śriyamavāpnuyāt
87.21
gokṣīrañca ghṛtaṃ dṛṣṭvā cārthaṃ puṇyadhanaṃ labhet
87.22
pāyasaṃ padmapatre ca dadhidugdhaṃ ghṛtaṃ madhu
miṣṭānnaṃ svastikaṃ bhuktā dhruvaṃ rājā bhaviṣyati
87.23
pakṣiṇāṃ mānuṣāṇāñca bhuṅkte māṃsaṃ naro yadi
bahvarthaṃ śubhavārttāñca labhate vāñchitaṃ phalam
87.24
chatraṃ vā pādukāṃ vāpi labdhvā yānañca gacchati
asiñca nirmalaṃ tīkṣṇaṃ tattathaiva bhaviṣyati
87.25
helayā santaredyo hi sa pradhāno bhaviṣyati
dṛṣṭvā ca phalitaṃ vṛkṣaṃ dhanamāpnoti niścitam
87.26
sarpeṇa bhakṣito yo hi arthalābhaśca tadbhavet
svapne sūryyaṃ vidhuṃ dṛṣṭvā mucyate vyādhibandhanāt
87.27
vaḍavāṃ kukuṭīṃ dṛṣṭvā krauñcīṃ bhāryyāṃ labhedvruvam
svapne yo nigar̤airbaddhaḥ pratiṣṭhāṃ putramālabhet
87.28
dadhyannaṃ pāyasaṃ bhuṅkte padmapatre nadītaṭe
viśīrṇepadmapatre ca so'pi rājā bhaviṣyati
87.26-2
jalaukasaṃ vṛścikañca sarpañca yadi paśyati
dhanaṃ putrañca vijayaṃ pratiṣṭhāṃ vā labhediti
87.30
śṛṅgibhirdaṃṣṭribhiḥ kolairvānaraiḥ pīr̤ito yadi
niścitañca bhavedrājā dhanañca vipulaṃ labhet
87.31
matsyaṃ māṃsaṃ mauktikañca śaṅkhaṃ candanahīra kam
yastu paśyati svapnānte vipulaṃ dhanamālabhet
87.32
surāñca rudhiraṃ svarṇaṃ dṛṣṭvā viṣṭhāṃ dhanaṃ labhet
pratimāṃ śivaliṅgañca labhed dṛṣṭvā jayaṃ dhanam
87.33
phalitaṃ puṣpitaṃ vilvamāmraṃ dṛṣṭvā labhedvanam
dṛṣṭvā ca jvaladagniñca dhanaṃ buddhiṃ śriyaṃ labhet
āmalakaṃ dhātrīphalamutpalañca dhanāgamam
87.34
devatāśca dvijā gāvaḥ pitaro liṅginastathā
yadvadanti mithaḥ svapne tattathaiva bhaviṣyati
87.35
śuklāmbaradharā nāryaḥ śuklamālyānulepanāḥ
samāśriṣyanti yaṃ svapne tasya śrīḥ svapnataḥ sukham
87.36
pītāmbaradharāṃ nārīṃ pītamālyānulepanām
avagūhati yaḥ svapne kalyāṇaṃ tasya jāyate
87.37
sarvāṇi śuklāni praśaṃsitāni
bhasmāsthikārpāsavivarjitāni
sarvāṇi kṛṣṇānyatininditāni
gohastivājidvijadevavarjyam
87.38
divyā strī sasmitā viprā ratnabhūṣaṇabhūṣitā
yasya mandiramāyāti sa priyaṃ labhate dhruvam
87.39
svapne ca brāhmaṇo devo brāhmaṇī devakanyakā
brāhmaṇo brāhmaṇī vāpi santuṣṭā sasmitā satī
phalaṃ dadāti yasmai ca tasya putro bhaviṣyati
87.40
yaṃ svapne brāhmaṇā nanda kurvvanti ca śubhāśiṣam
yadvadanti bhavettasya tasyaiśvaryyaṃ bhavet dhruvam
87.41
parituṣṭo dvijaśreṣṭhaśyāyāti yasya mandiram
nārāyaṇaḥ śivo brahmā praviśet tadāśrayam
87.42
sampattistasya bhavati yaśaśca vipulaṃ śubham
pade pade sukhaṃ tasya sa mānaṃ gauravaṃ labhet
87.43
akasmādapi svapne tu labhate surabhiṃ yadi
bhūmilābho bhavettasya bhāryyā cāpi pativratā
87.44
kareṇa kṛtvā hastī yaṃ mastake sthāpayedyadi
rājyalābho bhavettasya niścitaṃ ca śrutau matam
87.45
svapne tu brāhmaṇastuṣṭaḥ samāśliṣyati yaṃ vraja
tīrthasnāyī bhavetso'pi niścitañca śriyānvitaḥ
87.46
svapne dadāti puṣpañca yasmai puṇyavate dvijaḥ
jayayukto bhavet so'pi yaśasvī ca dhanī sukhī
87.47
svapne dṛṣṭvā ca tīrthāni saudharatnagṛhāṇi ca
jayayuktaśca dhanavān tīrthasnāyī bhavennaraḥ
87.48
svapne tu pūrṇakalaśaṃ kaścitkasmai dadāti ca
putralābho bhavettasya sampattiṃ vā samālabhet
87.46-2
haste kṛtvā tu kuḍavamāḍhakaṃ vārasundarī
yasya mandiramāyāti sa lakṣmīṃ labhate dhruvam
87.50
divyā strī yadgṛhaṃ gatvā purīṣaṃ visṛjed vraja
arthalābho bhavettasya dāridraya prayāti ca
87.51
yasya gehaṃ samāyāti brāhmaṇo bhāryayā saha
pārvatyā saha śambhurvā lakṣmīnārāyaṇo'thavā
87.52
brāhmaṇo brāhmaṇī vāpi svapne yasmai dadāti ca
dhānyaṃ puṣpāñjaliṃ vāpi tasya śrīḥ sarvatomukhī
87.53
muktāhāraṃ puṣpamālyaṃ candanañca labheda vraja
svapne dadāti vipraśca tasya śrīḥ sarvatomukhī
87.54
gorocanaṃ patākāṃ vā haridrāmikṣudaṇḍakam
siddhānnañca labhet svapne tasya śrīḥ sarvatomukhī
87.55
brāhmaṇo brāhmaṇī vāpi dadāti yasya mastake
chatraṃ vā śukladhānyaṃ vā sa ca rājā bhaviṣyati
87.56
svapne rathasthaḥ puruṣaḥ śuklamālyānulepanaḥ
tatrastho dadhi bhuṅkte ca pāyasaṃ vā nṛpo bhavet
87.57
svapne dadāti vipraśca brāhmaṇī vā sudhāṃ dadhi
praśastapātraṃ yasmai vā so'pi rājā bhavet dhruvam
87.58
kumārī cāṣṭavarṣīyā ratnabhūṣaṇabhūṣitā
yasya tuṣṭā bhavet svapne sa bhavetkavipaṇḍitaḥ
87.59
dadāti pustakaṃ svapne yasmai puṇyavate ca sā
sa bhavedvikhavikhyātaḥ kavīndraḥ paṇḍitapravaraḥ
87.60
yaṃ pāṭhayati svapne vā māteva ca sutaṃ yathā
sarasvatīsutaḥ so'pi tatparo nāsti paṇḍitaḥ
87.61
brāhmaṇaḥ pāṭhayedyañca piteva yatnapūrvakam
dadāti pustakaṃ prītyā sa ca tatsadṛśo bhavet
87.62
prāpnoti pustakaṃ svapne pathi vā yatra yatra vā
sa paṇḍito yaśasvī ca vikhyātaśca mahītale
87.63
svapne yasmai mahāmantraṃ viprā vipro dadāti cet
sa bhavet puruṣaḥ prājño dhanavān guṇavān sudhīḥ
87.64
svapne dadāti mantraṃ vā pratimāṃ vā śilāmayīm
yasmai dadāti vipraśca mantrasiddhiśca tadbhavet
87.65
vipro viprasamūhañca dṛṣṭvā natvāśiṣaṃ labhet
rājendraḥ sa bhavedāpi kiṃvā ca kavipaṇḍitaḥ
87.66
śukladhānyayutāṃ bhūmiṃ yasmai vipraḥ samutsṛjet
svapne'pi parituṣṭaśca sa bhavet pṛthivīpatiḥ
87.67
svapne vipro rathe kṛtvā nānāsvargaṃ pradarśayet
cirajīvī bhavedāyurdhanavṛddhirbhavet dhruvam
87.68
viprāya vipraḥ santuṣṭo yasmai kanyāṃ dadāti ca
svapne ca sa bhavennityaṃ dhanāḍhyo bhūpatiḥ svayam
87.69
svapne sarovaraṃ dṛṣṭvā samudraṃ vā nadīṃ nadam
śuklāhiṃ śuklaśailañca dṛṣṭvā śriyamavāpnuyāt
87.70
ya paśyati mṛtaṃ svapne sa bhaveccirajīvī ca
arogo rogiṇaṃ duḥkhī sukhinañca sukhī bhavet
87.71
divyā strī yaṃ pravadati mama svāmī bhavāniti
svapne dṛṣṭvā ca jāgarti sa ca rājā bhaveddṛḍham
87.72
svapne vā kālikāṃ dṛṣṭvā labdhvā sphaṭikamālikām
indracāpaṃ śakravajraṃ sa pratiṣṭhāṃ labhed dhruvam
87.73
svapne vadati yaṃ vipro mama dāso bhaveti ca
haridāsyaṃ ca madbhaktiṃ sa labdhvā vaiṣṇavo bhavet
87.74
svapne vipro hariḥ śumbhurbrāhmaṇī kamalā śivā
śuklā strī vedamātā vā jāhnavī vā sarasvatī
87.75
gopālikāveṣadharā bālikā rādhikā mama
bālaśca bālagopālaḥ svapnavidbhiḥ prakīrtitaḥ
87.76
eṣa te kathito nanda susvapnaḥ puṇyahetukaḥ
śrotumicchasi kiṃvā tvaṃ kiṃ bhūyaḥ kathayāmi te
Linked texts (2)
- Brahmavaivartapurāṇa — Vyāsa, Sanskrit
- Svapnacintāmaṇi — Jagaddēva, Sanskrit