[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.22 # Kurmapurana 1.22 Kūrmapurāṇa 1.22 - **Language:** Sanskrit ## Contents - [1.22.47](https://indike.org/pramana/in.purana.kurma.1.22.47) — 1 part ### [1.22.1](https://indike.org/pramana/in.purana.kurma.1.22.1) sūta uvāca jayadhvajasya putro 'bhūt tālājaṅgha iti smṛtaḥ / śataputrāstu tasyāsan tālajaṅghāḥ prakīrtitāḥ // ### [1.22.2](https://indike.org/pramana/in.purana.kurma.1.22.2) teṣāṃ jyeṣṭho mahāvīryo vītihotro 'bhavannṛpaḥ / vṛṣaprabhṛtayaścānye yādavāḥ puṇyakarmiṇaḥ // ### [1.22.3](https://indike.org/pramana/in.purana.kurma.1.22.3) vṛṣo vaṃśakarasteṣāṃ tasya putro 'bhavanmadhuḥ / madhoḥ putraśataṃ tvāsīd vṛṣaṇastasya vaṃśabhāk // ### [1.22.4](https://indike.org/pramana/in.purana.kurma.1.22.4) vītihotrasutaścāpi viśruto 'nanta ityuta / durjayastasya putro 'būt sarvaśāstraviśāradaḥ // ### [1.22.5](https://indike.org/pramana/in.purana.kurma.1.22.5) tasya bhāryā rūpavatī guṇaiḥ sarvairalaṅkṛtā / pativratāsīt patinā svadharmaparipālikā // ### [1.22.6](https://indike.org/pramana/in.purana.kurma.1.22.6) sa kadācinmahābhāgaḥ kālindītīrasaṃsthitām / apaśyadurvaśīṃ devīṃ gāyantīṃ madhurasvanām // ### [1.22.7](https://indike.org/pramana/in.purana.kurma.1.22.7) tataḥ kāmāhatamanāstatsamīpamupetya vai / provāca suciraṃ kālaṃ devi rantuṃ mayār'hasi // ### [1.22.8](https://indike.org/pramana/in.purana.kurma.1.22.8) sā devī nṛpatiṃ dṛṣṭvā rūpalāvaṇyasaṃyutam / reme tena ciraṃ kālaṃ kāmadevamivāparam // ### [1.22.9](https://indike.org/pramana/in.purana.kurma.1.22.9) kālāt prabuddho rājā tāmurvaśīṃ prāha śobhanām / gamiṣyāmi purīṃ ramyāṃ hasantī sābravīd vacaḥ // ### [1.22.10](https://indike.org/pramana/in.purana.kurma.1.22.10) na hyanenopabhogena bhavatā rājasundara / prītiḥ saṃjāyate mahyaṃ sthātavyaṃ vatsaraṃ punaḥ // ### [1.22.11](https://indike.org/pramana/in.purana.kurma.1.22.11) tāmabravīt sa matimān gatvā śīghrataraṃ purīm / āgamiṣyāmi bhūyo 'tra tanme 'nujñātumarhasi // ### [1.22.12](https://indike.org/pramana/in.purana.kurma.1.22.12) tamabravīt sā subhagā tathā kuru viśāṃpate / nānyayāpsarasā tāvad rantavyaṃ bhavat punaḥ // ### [1.22.13](https://indike.org/pramana/in.purana.kurma.1.22.13) omityuktvā yayau tūrṇaṃ purīṃ paramaśobhanām / gatvā pativratāṃ patnīṃ dṛṣṭvā bīto 'bhavannṛpaḥ // ### [1.22.14](https://indike.org/pramana/in.purana.kurma.1.22.14) saṃprekṣya sā guṇavatī bhāryā tasya pativratā / bhītaṃ prasannayā prāha vācā pīnapayodharā // ### [1.22.15](https://indike.org/pramana/in.purana.kurma.1.22.15) svāmin kimatra bhavato bhītiradya pravartate / tad brūhi me yathā tattvaṃ na rājñāṃ kīrtaye tvidam // ### [1.22.16](https://indike.org/pramana/in.purana.kurma.1.22.16) sa tasyā vākyamākarṇya lajjāvanatacetanaḥ / novāca kiñcinnṛpatirjñānadṛṣṭyā viveda sā // ### [1.22.17](https://indike.org/pramana/in.purana.kurma.1.22.17) na bhetavyaṃ tvayā svāmin kāryaṃ pāpaviśodhanam / bhīte tvayi mahārāja rāṣṭraṃ te nāśameṣyati // ### [1.22.18](https://indike.org/pramana/in.purana.kurma.1.22.18) tadā sa rājā dyutimān nirgatya tu purāt tataḥ / gatvā kaṇvāśramaṃ puṇyaṃ dṛṣṭvā tatra mahāmunim // ### [1.22.19](https://indike.org/pramana/in.purana.kurma.1.22.19) niśamya kaṇvavadanāt prāyaścittavidhiṃ śubham / jagāma himavatpṛṣṭhaṃ samuddiśya mahābalaḥ // ### [1.22.20](https://indike.org/pramana/in.purana.kurma.1.22.20) so 'paśyat pathi rājendro gandharvavaramuttamam / bhrājamānaṃ śriyā vyomni bhūṣitaṃ divyamālayā // ### [1.22.21](https://indike.org/pramana/in.purana.kurma.1.22.21) vīkṣya mālāmamitraghnaḥ sasmārāpsarasāṃ varām / urvaśīṃ tāṃ manaścakre tasyā eveyamarhati // ### [1.22.22](https://indike.org/pramana/in.purana.kurma.1.22.22) so 'tīva kāmuko rājā gandharveṇātha tena hi / cakāra sumahad yuddhaṃ mālāmādātumudyataḥ // ### [1.22.23](https://indike.org/pramana/in.purana.kurma.1.22.23) vijitya samare mālāṃ gṛhītvā durjayo dvijāḥ / jagāma tāmapsarasaṃ kālindīṃ draṣṭumādarāt // ### [1.22.24](https://indike.org/pramana/in.purana.kurma.1.22.24) adṛṣṭvāpsarasaṃ tatra kāmabāṇābhipīḍitaḥ / babhrāma sakalāṃ pṛthvīṃ saptadvīpasamanvitām // ### [1.22.25](https://indike.org/pramana/in.purana.kurma.1.22.25) ākramya himavatpārśvamurvaśīdarśanotsukaḥ / jagāma śailapravaraṃ hemakūṭamiti śrutam // ### [1.22.26](https://indike.org/pramana/in.purana.kurma.1.22.26) tatra tatrāpsarovaryā dṛṣṭvā taṃ siṃhavikramam / kāmaṃ saṃdadhire ghoraṃ bhūṣitaṃ citramālayā // ### [1.22.27](https://indike.org/pramana/in.purana.kurma.1.22.27) saṃsmarannurvaśīvākyaṃ tasyāṃ saṃsaktamānasaḥ / na paśyati smatāḥ sarvāgiriśṛṅgāṇijagmivān // ### [1.22.28](https://indike.org/pramana/in.purana.kurma.1.22.28) tatrāpyapsarasaṃ divyāmadṛṣṭvā kāmapīḍitaḥ / devalokaṃ mahāmeruṃ yayau devaparākramaḥ // ### [1.22.29](https://indike.org/pramana/in.purana.kurma.1.22.29) sa tatra mānasaṃ nāma sarastrailokyaviśrutam / bheje śṛṅgāṇyatikramya svabāhubalabhāvitaḥ // ### [1.22.30](https://indike.org/pramana/in.purana.kurma.1.22.30) sa tasya tīre subhagāṃ carantīmatilālasām / dṛṣṭavānanavadyāṅgīṃ tasyai mālāṃ dadau punaḥ // ### [1.22.31](https://indike.org/pramana/in.purana.kurma.1.22.31) sa mālayā tadā devīṃ bhūṣitāṃ prekṣya mohitaḥ / reme kṛtārthamātmānaṃ jānānaḥ suciraṃ tayā // ### [1.22.32](https://indike.org/pramana/in.purana.kurma.1.22.32) athorvaśī rājavaryaṃ ratānte vākyamabravīt / kiṃ kṛtaṃ bhavatā pūrvaṃ purīṃ gatvā vṛthā nṛpa // ### [1.22.33](https://indike.org/pramana/in.purana.kurma.1.22.33) sa tasyai sarvamācaṣṭa patnyā yat samudīritam / kaṇvasya darśanaṃ caiva mālāpaharaṇaṃ tathā // ### [1.22.34](https://indike.org/pramana/in.purana.kurma.1.22.34) śrutvaitad vyāhṛtaṃ tena gacchetyāha hitaiṣiṇī / śāpaṃ dāsyati te kaṇvo mamāpi bhavataḥ priyā // ### [1.22.35](https://indike.org/pramana/in.purana.kurma.1.22.35) tayāsakṛnmahārājaḥ prokto 'pi madamohitaḥ / na tatyajātha tatpārśvaṃ tatra saṃnyastamānasaḥ // ### [1.22.36](https://indike.org/pramana/in.purana.kurma.1.22.36) tatorvaśī kāmarūpā rājñe svaṃ rūpamutkaṭam / suromaśaṃ piṅgalākṣaṃ darśayāmāsa sarvadā // ### [1.22.37](https://indike.org/pramana/in.purana.kurma.1.22.37) tasyāṃ viraktacetaskaḥ smṛtvā kaṇvābhibhāṣitam / dhiṅmāmiti viniścityatapaḥ kartuṃ samārabhat // ### [1.22.38](https://indike.org/pramana/in.purana.kurma.1.22.38) saṃvatsaradvādaśakaṃ kandamūlaphalāśanaḥ / bhūya eva dvādaśakaṃ vāyubhakṣo 'bhavannṛpaḥ // ### [1.22.39](https://indike.org/pramana/in.purana.kurma.1.22.39) gatvā kaṇvāśramaṃ bhītyā tasmai sarvaṃ nyavedayat / vāsamapsarasā bhūyastapoyogamanuttamam // ### [1.22.40](https://indike.org/pramana/in.purana.kurma.1.22.40) vīkṣya taṃ rājaśārdūlaṃ prasanno bhagavānṛṣiḥ / kartukāmo hi nirbojaṃ tasyāghamidamabravīt // ### [1.22.41](https://indike.org/pramana/in.purana.kurma.1.22.41) gaccha vārāṇasīṃ divyāmīśvarādhyuṣitāṃ purīm / āste mocayituṃ lokaṃ tatra devo maheśvaraḥ // ### [1.22.42](https://indike.org/pramana/in.purana.kurma.1.22.42) snātvā saṃtarpya vidhivad gaṅgāyāndevatāḥ pitṝn / dṛṣṭvā viśveśvaraṃ liṅgaṅkilbiṣānmokṣyase 'khilāt // ### [1.22.43](https://indike.org/pramana/in.purana.kurma.1.22.43) praṇamya śirasā kaṇvamanujñāpya ca durjayaḥ / vārāṇasyāṃ haraṃ dṛṣṭvā pāpānmukto 'bhavat tataḥ // ### [1.22.44](https://indike.org/pramana/in.purana.kurma.1.22.44) jagāma svapurīṃ śubhrāṃ pālayāmāsa medinīm / yājayāmāsa taṃ kaṇvo yācito ghṛṇayā muniḥ // ### [1.22.45](https://indike.org/pramana/in.purana.kurma.1.22.45) tasya putro 'tha matimān supratīka iti śrutaḥ / babhūva jātamātraṃ taṃ rājānamupatasthire // ### [1.22.46](https://indike.org/pramana/in.purana.kurma.1.22.46) urvaśyāṃ ca mahāvīryāḥ sapta devasutopamāḥ / kanyā jagṛhire sarvā jandharvadayitā dvijāḥ // ### [1.22.47](https://indike.org/pramana/in.purana.kurma.1.22.47) eṣa va kathitaḥ samyak sahastrajita uttamaḥ / vaṃśaḥ pāpaharo nṛṇāṃ kroṣṭorapi nibodhata // ### [1.22.47.p1](https://indike.org/pramana/in.purana.kurma.1.22.47.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge dvāviśo 'dhyāyaḥ ## Linked texts (3) - [Vulgate](https://indike.org/pramana/in.lit.mahabharata.harivamsa*vulgate.1.33.54) — Sanskrit - [Liṅgapurāṇa](https://indike.org/pramana/in.purana.linga.1.68.13) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.77.13) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.kurma.1.22](https://indike.org/pramana/in.purana.kurma.1.22) · Pramāṇa