[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.26 # Kurmapurana 1.26 Kūrmapurāṇa 1.26 - **Language:** Sanskrit ## Contents - [1.26.22](https://indike.org/pramana/in.purana.kurma.1.26.22) — 1 part ### [1.26.1](https://indike.org/pramana/in.purana.kurma.1.26.1) sūta uvāca tato labdhavaraḥ kṛṣṇo jāmbavatyāṃ maheśvarāt / ajījananmahātmānaṃ sāmbamātmajamuttamam // ### [1.26.2](https://indike.org/pramana/in.purana.kurma.1.26.2) pradyumnasyāpyabhūt putro hyaniruddho mahābalaḥ / tāvubhau guṇasaṃpannau kṛṣṇasyaivāpare tanū // ### [1.26.3](https://indike.org/pramana/in.purana.kurma.1.26.3) hatvā ca kaṃsaṃ narakamanyāṃśca śataśo 'surān / vijitya līlayā śakraṃ jitvā bāṇaṃ mahāsuram // ### [1.26.4](https://indike.org/pramana/in.purana.kurma.1.26.4) sthāpayitvā jagat kṛtsnaṃ loke dharmāṃśca śāśvatān / cakre nārāyaṇo gantuṃ svasthānaṃ buddhimuttamām // ### [1.26.5](https://indike.org/pramana/in.purana.kurma.1.26.5) etasminnantare viprā bhṛgvādyāḥ kṛṣṇamīśvaram / ājagmurdvārakāṃ draṣṭuṃ kṛtakāryaṃ sanātanam // ### [1.26.6](https://indike.org/pramana/in.purana.kurma.1.26.6) sa tānuvāca viśvātmā praṇipatyābhipūjya ca / āsaneṣūpaviṣṭān vai saha rāmeṇa dhīmatā // ### [1.26.7](https://indike.org/pramana/in.purana.kurma.1.26.7) gamiṣye tat paraṃ sthānaṃ svakīyaṃ viṣṇusaṃjñitam / kṛtāni sarvakāryāṇi prasīdadhvaṃ munīśvarāḥ // ### [1.26.8](https://indike.org/pramana/in.purana.kurma.1.26.8) idaṃ kaliyugaṃ ghoraṃ saṃprāptamadhunāśubham / bhaviṣyanti janāḥ sarve hyasmin pāpānuvartinaḥ // ### [1.26.9](https://indike.org/pramana/in.purana.kurma.1.26.9) pravartayadhvaṃ majjñānaṃ brāhmaṇānāṃ hitāvaham / yeneme kalijaiḥ pāpairmucyante hi dvijottamāḥ // ### [1.26.10](https://indike.org/pramana/in.purana.kurma.1.26.10) ye māṃ janāḥ saṃsmaranti kalau sakṛdapi prabhum / teṣāṃ naśyatu tat pāpaṃ bhaktānāṃ puruṣottame // ### [1.26.11](https://indike.org/pramana/in.purana.kurma.1.26.11) yer'cayiṣyantimāṃ bhaktyā nityaṃ kaliyuge dvijāḥ / vidhānā vedadṛṣṭena te gamiṣyanti tat padam // ### [1.26.12](https://indike.org/pramana/in.purana.kurma.1.26.12) ye brāhmaṇā vaṃśajātā yuṣmākaṃ vai sahastraśaḥ / teṣāṃ nārāyaṇe bhaktirbhaviṣyati kalau yuge // ### [1.26.13](https://indike.org/pramana/in.purana.kurma.1.26.13) parāt parataraṃ yānti nārāyaṇaparāyaṇāḥ / na te tatra gamiṣyanti ye dviṣanti maheśvaram // ### [1.26.14](https://indike.org/pramana/in.purana.kurma.1.26.14) dhyānaṃ homaṃ tapastaptaṃ jñānaṃ yajñādiko vidhiḥ / teṣāṃ vinaśyati kṣipraṃ ye nindanti pinākinam // ### [1.26.15](https://indike.org/pramana/in.purana.kurma.1.26.15) yo māṃ samāśrayennityamekāntaṃ bhāvamāśritaḥ / vinindya devamīśānaṃ sa yāti narakāyutam // ### [1.26.16](https://indike.org/pramana/in.purana.kurma.1.26.16) tasmāt sā parihartavyā nindā paśupatau dvijāḥ / karmaṇā manasā vācā tadbhakteṣvapi yatnataḥ // ### [1.26.17](https://indike.org/pramana/in.purana.kurma.1.26.17) ye tu dakṣādhvare śaptā dadhīyena dvijottamāḥ / bhaviṣyanti kalau bhaktaiḥ parihāryāḥ prayatnataḥ // ### [1.26.18](https://indike.org/pramana/in.purana.kurma.1.26.18) dviṣanto devamīśānaṃ yuṣmākaṃ vaṃśasaṃbhavāḥ / śaptāśca gautamenorvyāṃ na saṃbhāṣyā dvijottamaiḥ // ### [1.26.19](https://indike.org/pramana/in.purana.kurma.1.26.19) ityevamuktāḥ kṛṣṇena sarva eva maharṣayaḥ / omityuktvā yayustūrṇaṃsvāni sthānāni sattamāḥ // ### [1.26.20](https://indike.org/pramana/in.purana.kurma.1.26.20) tato nārāyaṇaḥ kṛṣṇo līlayaiva jaganmayaḥ / saṃhṛtya svakulaṃ sarvaṃ yayau tat paramaṃ padam // ### [1.26.21](https://indike.org/pramana/in.purana.kurma.1.26.21) ityeṣa vaḥ samāsena rājñāṃ vaṃśo 'nukīrtitaḥ / na śakyo vistarād vaktuṃ kiṃ bhūyaḥ śrotumicchatha // ### [1.26.22](https://indike.org/pramana/in.purana.kurma.1.26.22) yaḥ paṭhecchṛṇuyād vāpi vaṃśānāṃ kathanaṃ śubham / sarvapāpavinirmuktaḥ svargaloke mahīyate // ### [1.26.22.p1](https://indike.org/pramana/in.purana.kurma.1.26.22.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge ṣaḍviṃśo 'dhyāyaḥ ## Linked texts (2) - [Laukikanyāyasaṃgraha](https://indike.org/pramana/in.darsana.visistadvaita.later.laukikanyayasamgraha.3.45.28) — Raghunātha Varman 1825, Sanskrit - [Śabdakalpadruma](https://indike.org/pramana/in.art.kosa.sabdakalpadruma.156.p1) — Rājā Sir Rādhākānta Deb, Sanskrit --- Source: [https://indike.org/pramana/in.purana.kurma.1.26](https://indike.org/pramana/in.purana.kurma.1.26) · Pramāṇa