[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.2 # Kurmapurana 1.2: dvitīyo'dhyāyaḥ Kūrmapurāṇa 1.2 - **Language:** Sanskrit ## Contents - [1.2.108](https://indike.org/pramana/in.purana.kurma.1.2.108) — 1 part ### dvitīyo'dhyāyaḥ ### [1.2.1](https://indike.org/pramana/in.purana.kurma.1.2.1) śrīkūrma uvāca śṛṇudhvamṛṣayaḥ sarve yatpṛṣṭo 'haṃ jagaddhitam / vakṣyamāṇaṃ mayā sarvamindradyumnāya bhāṣitam // ### [1.2.2](https://indike.org/pramana/in.purana.kurma.1.2.2) bhūtairbhavyairbhaviṣyadbhiścaritairupabṛṃhitam / purāṇaṃ puṇyadaṃ nṛṇāṃ mokṣadharmānukīrtanam // ### [1.2.3](https://indike.org/pramana/in.purana.kurma.1.2.3) ahaṃ nārāyaṇo devaḥ pūrvamāsaṃ na me param / upāsya vipulāṃ nidrāṃ bhogiśayyāṃ samāśritaḥ // ### [1.2.4](https://indike.org/pramana/in.purana.kurma.1.2.4) cintayāmi punaḥ sṛṣṭiṃ niśānte pratibudhya tu / tato me sahasotpannaḥ prasādo munipuṅgavā // ### [1.2.5](https://indike.org/pramana/in.purana.kurma.1.2.5) caturmukhastato jāto brahmā lokapitāmahaḥ / tadantare 'bhavat krodhaḥ kasmāccit kāraṇāt tadā // ### [1.2.6](https://indike.org/pramana/in.purana.kurma.1.2.6) ātmano muniśārdūlāstatra devo maheśvaraḥ / rudraḥ krodhātmajo jajñe śūlapāṇistrilocanaḥ / tejasā sūryasaṃkāśastrailokyaṃ saṃharanniva // ### [1.2.7](https://indike.org/pramana/in.purana.kurma.1.2.7) tataḥ śrīrabhavad devi kamalāyatalocanā / surūpā saumyavadanā mohinī sarvadehinām // ### [1.2.8](https://indike.org/pramana/in.purana.kurma.1.2.8) śucismitā suprasannā maṅgalā mahimāspadā / divyakāntisamāyuktā divyamālyopaśobhitā // ### [1.2.9](https://indike.org/pramana/in.purana.kurma.1.2.9) nārāyaṇī mahāmāyā mūlaprakṛtiravyayā / svadhāmnā pūrayantīdaṃ matpārśvaṃ samupāviśat // ### [1.2.10](https://indike.org/pramana/in.purana.kurma.1.2.10) tāṃ dṛṣṭavā bhagavān brahmā māmuvāca jagatpatiḥ / mohāyāśeṣabhūtānāṃ niyojaya surūpiṇīm / yeneyaṃ vipulā sṛṣṭirvardhate mama mādhava // ### [1.2.11](https://indike.org/pramana/in.purana.kurma.1.2.11) tathokto 'haṃ śriyaṃ devīmabruvaṃ prahasanniva / devīdamakhilaṃ viśvaṃ sadevāsuramānuṣam / mohayitvā mamādeśāt saṃsāre vinipātaya // ### [1.2.12](https://indike.org/pramana/in.purana.kurma.1.2.12) jñānayogaratān dāntān brahmiṣṭhān brahmavādinaḥ / akrodhanān satyaparān dūrataḥ parivarjaya // ### [1.2.13](https://indike.org/pramana/in.purana.kurma.1.2.13) dhyāyino nirmamān śāntān dhārmikān vedapāragān / jāpinastāpasān viprān dūrataḥ parivarjaya // ### [1.2.14](https://indike.org/pramana/in.purana.kurma.1.2.14) vedavedāntavijñānasaṃchinnāśeṣasaṃśayān / mahāyajñaparān viprān dūrataḥ parivarjaya // ### [1.2.15](https://indike.org/pramana/in.purana.kurma.1.2.15) ye yajanti japairhemairdevadevaṃ maheśvaram / svādhyāyenejyayā dūrāt tān prayatnena varjaya // ### [1.2.16](https://indike.org/pramana/in.purana.kurma.1.2.16) bhaktiyogasamāyuktānīśvarārpitamānasān / prāṇāyāmādiṣu ratān dūrāt pariharāmalān // ### [1.2.17](https://indike.org/pramana/in.purana.kurma.1.2.17) praṇavāsaktamanaso rudrajapyaparāyaṇān / atharvaśiraso 'dhyetṛn dharmajñān parivarjaya // ### [1.2.18](https://indike.org/pramana/in.purana.kurma.1.2.18) bahunātra kimuktena svadharmaparipālakān / īśvarārādhanaratān manniyogānna mohaya // ### [1.2.19](https://indike.org/pramana/in.purana.kurma.1.2.19) evaṃ mayā mahāmāyā preritā harivallabhā / yathādeśaṃ cakārāsau tasmāllakṣmīṃ samarcayet // ### [1.2.20](https://indike.org/pramana/in.purana.kurma.1.2.20) śriyaṃ dadāti vipulāṃ puṣṭiṃ medhāṃ yaśo balam / arcitā bhagavatpatnī tasmāllakṣmīṃ samarcayet // ### [1.2.21](https://indike.org/pramana/in.purana.kurma.1.2.21) tato 'sṛjat sa bhagavān brahmā lokapitāmahaḥ / carācarāṇi bhūtāni yathāpūrvaṃ mamājñayā // ### [1.2.22](https://indike.org/pramana/in.purana.kurma.1.2.22) parīcibhṛgvaṅgirasaḥ pulastyaṃ pulahaṃ kratum / dakṣamatriṃ vasiṣṭhaṃ ca so 'sṛjad yogavidyayā // ### [1.2.23](https://indike.org/pramana/in.purana.kurma.1.2.23) navaite brahmaṇaḥ putrā brahmāṇo brāhmaṇottamāḥ / brahmavādina evaite marīcyādyāstu sādhakāḥ // ### [1.2.24](https://indike.org/pramana/in.purana.kurma.1.2.24) sasarja brāhmaṇān vaktrāt kṣatriyāṃśca bhujād vibhuḥ / vaiśyānūrudvayād devaḥ pādārchūdrān pitāmahaḥ // ### [1.2.25](https://indike.org/pramana/in.purana.kurma.1.2.25) yajñaniṣpattaye brahmā śūdravarjaṃ sasarja ha / guptaye sarvavedānāṃ tebhyo yajño hi nirbabhau // ### [1.2.26](https://indike.org/pramana/in.purana.kurma.1.2.26) ṛco yajūṃṣi sāmāni tathaivātharvaṇāni ca / brahmaṇaḥ sahajaṃ rūpaṃ nityaiṣā śaktiravyayā // ### [1.2.27](https://indike.org/pramana/in.purana.kurma.1.2.27) anādinidhanā divyā vāgutsṛṣṭā svayaṃbhuvā / ādau vedamayī bhūtā yataḥ sarvāḥ pravṛttayaḥ // ### [1.2.28](https://indike.org/pramana/in.purana.kurma.1.2.28) ato 'nyānitu śāstrāṇipṛthivyāṃyānikānicit / na teṣu ramate dhīraḥ pāṣaṇḍī tena jāyate // ### [1.2.29](https://indike.org/pramana/in.purana.kurma.1.2.29) vedārthavittamaiḥ kāryaṃ yatsmṛtaṃ munibhiḥ purā / sa jñeyaḥ paramo dharmo nānyaśāstreṣu saṃsthitaḥ // ### [1.2.30](https://indike.org/pramana/in.purana.kurma.1.2.30) yā vedabāhyāḥ smṛtayo yāśca kāśca kudṛṣṭayaḥ / sarvāstā niṣphalāḥ pretyatamoniṣṭhāhitāḥ smṛtāḥ // ### [1.2.31](https://indike.org/pramana/in.purana.kurma.1.2.31) pūrvakalpe prajā jātāḥ sarvabādāvivarjitāḥ / śuddhāntaḥ karaṇāḥ sarvāḥ svadharmaniratāḥ sadā // ### [1.2.32](https://indike.org/pramana/in.purana.kurma.1.2.32) tataḥ kālavaśāt tāsāṃ rāgadveṣādiko 'bhavat / adharmo muniśārdūlāḥ svadharmapratibandhakaḥ // ### [1.2.33](https://indike.org/pramana/in.purana.kurma.1.2.33) tataḥ sā sahajā siddhistāsāṃ nātīva jāyate / rajomātrātmikāstāsāṃ siddhayo 'nyāstadābhavan // ### [1.2.34](https://indike.org/pramana/in.purana.kurma.1.2.34) tāsu kṣīṇāsvaśeṣāsu kālayogena tāḥ punaḥ / vārtopāyaṃ punaścakrurhastasiddhiṃ ca karmajām / tatastāsāṃ vibhurbrahmā karmājīvamakalpayat // ### [1.2.35](https://indike.org/pramana/in.purana.kurma.1.2.35) svāyaṃbhuvo manuḥ pūrvaṃ dharmān provāca dharmadṛk / sākṣāt prajāpatermūrtirnisṛṣṭā brahmaṇā dvijāḥ / bhṛgvādayastadvadanācchrutvā dharmānathocire // ### [1.2.36](https://indike.org/pramana/in.purana.kurma.1.2.36) yajanaṃ yājanaṃ dānaṃ brāhmaṇasya pratigraham / adhyāpanaṃ cādhyayanaṃ ṣaṭ karmāṇi dvijottamāḥ // ### [1.2.37](https://indike.org/pramana/in.purana.kurma.1.2.37) dānamadhyayanaṃ yajño dharmaḥ kṣatriyavaiśyayoḥ / daṇḍo yuddhaṃ kṣatriyasya kṛṣirvaiśyasya śasyate // ### [1.2.38](https://indike.org/pramana/in.purana.kurma.1.2.38) śuśrūṣaiva dvijātīnāṃ śūdrāṇāṃ dharmasādhanam / kārukarma tathājīvaḥ pākayajño 'pi dharmataḥ // ### [1.2.39](https://indike.org/pramana/in.purana.kurma.1.2.39) tataḥ sthiteṣu varṇeṣu sthāpayāmāsa cāśramān / gṛhasthaṃ ca vanasthaṃ ca bhikṣukaṃ brahmacāriṇam // ### [1.2.40](https://indike.org/pramana/in.purana.kurma.1.2.40) agnayo 'tithiśuśrūṣā yajño dānaṃ surārcanam / gṛhasthasya samāsena dharmo 'yaṃ munipuṅgavāḥ // ### [1.2.41](https://indike.org/pramana/in.purana.kurma.1.2.41) homo mūlaphalāśitvaṃ svādhyāyastapa eva ca / saṃvibhāgo yathānyāyaṃ dharmo 'yaṃ vanavāsinām // ### [1.2.42](https://indike.org/pramana/in.purana.kurma.1.2.42) bhaikṣāśanaṃ ca maunitvaṃ tapo dhyānaṃ viśeṣataḥ / samyagjñānaṃ ca vairāgyaṃ dharmo 'yaṃ bhikṣuke mataḥ // ### [1.2.43](https://indike.org/pramana/in.purana.kurma.1.2.43) bhikṣācaryā ca śuśrūṣā guroḥ svādhyāya eva ca / sandhyākarmāgnikāryaṃ ca dharmo 'yaṃ brahmacāriṇām // ### [1.2.44](https://indike.org/pramana/in.purana.kurma.1.2.44) brahmacārivanasthānāṃ bhikṣukāṇāṃ dvijottamāḥ / sādhāraṇaṃ brahmacaryaṃ provāca kamalodbhavaḥ // ### [1.2.45](https://indike.org/pramana/in.purana.kurma.1.2.45) ṛtukālābhigāmitvaṃ svadāreṣu na cānyataḥ / parvavarjaṃ gṛhasthasya brahmacaryamudāhṛtam // ### [1.2.46](https://indike.org/pramana/in.purana.kurma.1.2.46) āgarbhasaṃbhavādādyāt kāryaṃ tenāpramādataḥ / akurvāṇastu viprendrā bhrūṇahā tu prajāyate // ### [1.2.47](https://indike.org/pramana/in.purana.kurma.1.2.47) vedābhyāso 'nvahaṃ śaktyā śrāddhaṃ cātithipūjanam / gṛhasthasya paro dharmo devatābhyarcanaṃ tathā // ### [1.2.48](https://indike.org/pramana/in.purana.kurma.1.2.48) vaivāhmamagnimindhīta sāyaṃ prātaryathāvidhi / deśāntaragato vātha mṛtapatnīka eva vā // ### [1.2.49](https://indike.org/pramana/in.purana.kurma.1.2.49) trayāṇāmāśramāṇāṃ tu gṛhastho yonirucyate / anye tamupajīvanti tasmācchreyān gṛhāśramī // ### [1.2.50](https://indike.org/pramana/in.purana.kurma.1.2.50) aikāśramyaṃ gṛhasthasya trayāṇāṃ śrutidarśanāt / tasmād gārhasthyamevaikaṃ vijñeyaṃ dharmasādhanam // ### [1.2.51](https://indike.org/pramana/in.purana.kurma.1.2.51) parityajedarthakāmau yau syātāṃ dharmavarjitau / sarvalokaviruddhaṃ ca dharmamapyācarenna tu // ### [1.2.52](https://indike.org/pramana/in.purana.kurma.1.2.52) dharmāt saṃjāyate hyartho dharmāt kāmo 'bhijāyate / dharma evāpavargāya tasmād dharmaṃ samāśrayet // ### [1.2.53](https://indike.org/pramana/in.purana.kurma.1.2.53) dharmaścārthaśca kāmaśca trivargastriguṇo mataḥ / sattvaṃ rajastamaśceti tasmāddharmaṃ samāśrayet // ### [1.2.54](https://indike.org/pramana/in.purana.kurma.1.2.54) ūrdhvaṃ gacchanti sattvasthā madhye tiṣṭhanti rājasāḥ / jaghanyaguṇavṛttisthā adho gacchanti tāmasāḥ // ### [1.2.55](https://indike.org/pramana/in.purana.kurma.1.2.55) yasmin dharmasamāyuktāvarthakāmau vyavasthitau / iha loke sukhī bhūtvā pretyānantyāya kalpate // ### [1.2.56](https://indike.org/pramana/in.purana.kurma.1.2.56) dharmāt saṃjāyate mokṣo hyarthāt kāmo 'bhijāyate / evaṃ sādhanasādhyatvaṃ cāturvidhye pradarśitam // ### [1.2.57](https://indike.org/pramana/in.purana.kurma.1.2.57) ya evaṃ veda dharmārthakāmamokṣasya mānavaḥ / māhātmyaṃ cānutiṣṭheta sa cānantyāya kalpate // ### [1.2.58](https://indike.org/pramana/in.purana.kurma.1.2.58) tasmādarthaṃ ca kāmaṃ ca tyaktvā dharmaṃ samāśrayet / dharmāt saṃjāyate sarvamityāhurbrahmavādinaḥ // ### [1.2.59](https://indike.org/pramana/in.purana.kurma.1.2.59) dharmeṇa dhāryate sarvaṃ jagat sthāvarajaṅgamam / anādinidhanā śaktiḥ saiṣā brāhmī dvijottamāḥ // ### [1.2.60](https://indike.org/pramana/in.purana.kurma.1.2.60) karmaṇā prāpyate dharmo jñānena ca na saṃśayaḥ / tasmājjñānena sahitaṃ karmayogaṃ samācaret // ### [1.2.61](https://indike.org/pramana/in.purana.kurma.1.2.61) pravṛttaṃ ca nivṛttaṃ ca dvividhaṃ karma vaidikam / jñānapūrvaṃ nivṛttaṃ syāt pravṛttaṃ yadato 'nyathā // ### [1.2.62](https://indike.org/pramana/in.purana.kurma.1.2.62) nivṛttaṃ sevamānastu yāti tat paramaṃ padam / tasmānnivṛttaṃ saṃsevyamanyathā saṃsaret punaḥ // ### [1.2.63](https://indike.org/pramana/in.purana.kurma.1.2.63) kṣamā damo dayā dānamalobhastyāga eva ca / ārjavaṃ cānasūyā ca tīrthānusaraṇaṃ tathā // ### [1.2.64](https://indike.org/pramana/in.purana.kurma.1.2.64) satyaṃ santoṣa āstikyaṃ śraddhā cendriyanigrahaḥ / devatābhyarcanaṃ pūjā brāhmaṇānāṃ viśeṣataḥ // ### [1.2.65](https://indike.org/pramana/in.purana.kurma.1.2.65) āhiṃsā priyavāditvamapaiśunyamakalkatā / sāmāsikamimaṃ dharmaṃ cāturvarṇye 'bravīnmanuḥ // ### [1.2.66](https://indike.org/pramana/in.purana.kurma.1.2.66) prājāpatyaṃ brāhmaṇānāṃ smṛtaṃ sthānaṃ kriyāvatām / sthānamaindraṃ kṣatriyāṇāṃ saṃgrāmeṣvapalāyinām // ### [1.2.67](https://indike.org/pramana/in.purana.kurma.1.2.67) vaiśyānāṃ mārutaṃ sthānaṃ svadharmamanuvartatām / gāndharvaṃ śūdrajātīnāṃ paricāreṇa vartatām // ### [1.2.68](https://indike.org/pramana/in.purana.kurma.1.2.68) aṣṭāśītisahastrāṇāmṛṣīṇāmūrdhvaretasām / smṛtaṃ teṣāṃ tu yatsthānaṃ tadeva guruvāsinām // ### [1.2.69](https://indike.org/pramana/in.purana.kurma.1.2.69) saptarṣoṇāṃ tu yatsthānaṃ smṛtaṃ tad vai vanaukasām / prājāpatyaṃ gṛhasthānāṃ sthānamuktaṃ svayaṃbhuvā // ### [1.2.70](https://indike.org/pramana/in.purana.kurma.1.2.70) yatīnāṃ yatacittānāṃ nyāsināmūrdhvaretasām / hairaṇyagarbhaṃ tat sthānaṃ yasmānnāvartate punaḥ // ### [1.2.71](https://indike.org/pramana/in.purana.kurma.1.2.71) yogināmamṛtaṃ sthānaṃ vyomākhyaṃ paramākṣaram / ānandamaiśvaraṃ dhāma sā kāṣṭhā sā parāgatiḥ // ### [1.2.72](https://indike.org/pramana/in.purana.kurma.1.2.72) ṛṣaca ūcuḥ bhagavan devatārighna hiraṇyākṣaniṣūdana / catvāro hyāśramāḥ proktā yogināmeka ucyate // ### [1.2.73](https://indike.org/pramana/in.purana.kurma.1.2.73) śrīkūrma ūvāca sarvakarmāṇi saṃnyasya samādhimacalaṃ śritaḥ / ya āste niścalo yogī sa saṃnyāsī na pañcamaḥ // ### [1.2.74](https://indike.org/pramana/in.purana.kurma.1.2.74) sarveṣāmāśramāṇāṃ tu dvaividhyaṃ śrutadarśitam / brahmacāryupakurvāṇo naiṣṭhiko brahmatatparaḥ // ### [1.2.75](https://indike.org/pramana/in.purana.kurma.1.2.75) yo 'dhītyavidhivadvedān gṛhasthāśramamāvrajet / upakurvāṇako jñeyo naiṣṭhiko maraṇāntikaḥ // ### [1.2.76](https://indike.org/pramana/in.purana.kurma.1.2.76) udāsīnaḥ sādhakaśca gṛhastho dvividho bhavet / kuṭumbabharaṇe yattaḥ sādhako 'sau gṛhī bhavet // ### [1.2.77](https://indike.org/pramana/in.purana.kurma.1.2.77) ṛṇānitrīṇyapākṛtyatyaktvā bhāryādhanādikam / ekākī yastu vicaredudāsīnaḥ sa maukṣikaḥ // ### [1.2.78](https://indike.org/pramana/in.purana.kurma.1.2.78) tapastapyati yo 'raṇye yajed devān juhoti ca / svādhyāye caiva nirato vanasthastāpaso mataḥ // ### [1.2.79](https://indike.org/pramana/in.purana.kurma.1.2.79) tapasā karṣito 'tyarthaṃ yastu dhyānaparo bhavet / sāṃnyāsikaḥ sa vijñeyo vānaprasthāśrame sthitaḥ // ### [1.2.80](https://indike.org/pramana/in.purana.kurma.1.2.80) yogābhyāsarato nityamārurukṣurjitendriyaḥ / jñānāya vartate bhikṣuḥ procyate pārameṣṭhikaḥ // ### [1.2.81](https://indike.org/pramana/in.purana.kurma.1.2.81) yastvātmaratireva syānnityatṛpto mahāmuniḥ / samyag darśanasaṃpannaḥ sa yogī bhikṣurucyate // ### [1.2.82](https://indike.org/pramana/in.purana.kurma.1.2.82) jñānasaṃnyāsinaḥ kecid vedasaṃnyāsino 'pare / karmasanyāsinaḥ kecit trividhāḥ parāmeṣṭhikāḥ // ### [1.2.83](https://indike.org/pramana/in.purana.kurma.1.2.83) yogī ca trividho jñeyo bhautikaḥ sāṃkhya eva ca / tṛtīyotyāśramī proktī yogamuttamamāsthitaḥ // ### [1.2.84](https://indike.org/pramana/in.purana.kurma.1.2.84) prathamā bhāvanā pūrve sāṃkhye tvakṣarabhāvanā / tṛtīye cāntimā proktā bhāvanā pārameśvarī // ### [1.2.85](https://indike.org/pramana/in.purana.kurma.1.2.85) tasmādetad vijānīdhvamāśramāṇāṃ catuṣṭayam / sarveṣu vedaśāstreṣu pañcamo nopapadyate // ### [1.2.86](https://indike.org/pramana/in.purana.kurma.1.2.86) evaṃ varṇāśramān sṛṣṭvā devadevo nirañjanaḥ / dakṣādīn prāha viśvātmā sṛjadhvaṃ vividhāḥ prajāḥ // ### [1.2.87](https://indike.org/pramana/in.purana.kurma.1.2.87) brahmaṇo vacanāt putrā dakṣādyā munisattamāḥ / asṛjanta prajāḥ sarvā devamānuṣapūrvikāḥ // ### [1.2.88](https://indike.org/pramana/in.purana.kurma.1.2.88) ityeṣa bhagavān brahmā straṣṭvatve sa vyavasthitaḥ / ahaṃ vai pālayāmīdaṃ saṃhariṣyati śūlabhṛt // ### [1.2.89](https://indike.org/pramana/in.purana.kurma.1.2.89) tistrastu mūrtayaḥ proktā brahmaviṣṇumaheśvarāḥ / rajaḥ sattvatamoyogāt parasya paramātmanaḥ // ### [1.2.90](https://indike.org/pramana/in.purana.kurma.1.2.90) anoyanyamanuraktāste hyanyonyamupajīvinaḥ / anyonyaṃ praṇatāścaiva līlayā parameśvarāḥ // ### [1.2.91](https://indike.org/pramana/in.purana.kurma.1.2.91) brāhmī māheśvarī caiva tathaivākṣarabhāvanā / tistrastu bhāvanā rudre vartante satataṃ dvijāḥ // ### [1.2.92](https://indike.org/pramana/in.purana.kurma.1.2.92) pravartate mayyajastramādyā cākṣarabhāvanā / dvitīyā brahmaṇaḥ proktā devasyākṣarabhāvanā // ### [1.2.93](https://indike.org/pramana/in.purana.kurma.1.2.93) ahaṃ caiva mahādevo na bhinnau paramārthataḥ / vibhajyasvecchayātmānaṃ so 'nyaryāmīśvaraḥ sthitaḥ // ### [1.2.94](https://indike.org/pramana/in.purana.kurma.1.2.94) trailokyamakhilaṃ straṣṭuṃ sadevāsuramānuṣam / puruṣaḥ parato 'vyaktād brahmatvaṃ samupāgamat // ### [1.2.95](https://indike.org/pramana/in.purana.kurma.1.2.95) tasmād brahmā mahādevo viṣṇurviśveśvaraḥ paraḥ / ekasyaiva smṛtāstistrastanūḥ kāryavaśāt prabhoḥ // ### [1.2.96](https://indike.org/pramana/in.purana.kurma.1.2.96) tasmāt sarvaprayatnena vandyāḥ pūjyāḥ prayatnataḥ / yadīcchedacirāt sthānaṃ yattanmokṣākhyamavyayam // ### [1.2.97](https://indike.org/pramana/in.purana.kurma.1.2.97) varṇāśramaprayuktena dharmeṇa prītisaṃyutaḥ / pūjayed bhāvayuktena yāvajjīvaṃ pratijñayā // ### [1.2.98](https://indike.org/pramana/in.purana.kurma.1.2.98) caturṇāmāśramāṇāṃ tu prokto 'yaṃ vidhivaddvijāḥ / āśramo vaiṣṇavo brāhmo harāśrama iti trayaḥ // ### [1.2.99](https://indike.org/pramana/in.purana.kurma.1.2.99) talliṅgadhārī satataṃ tadbhaktajanavatsalaḥ / dhyāyedathārcayedetān brahmavidyāparāyaṇaḥ // ### [1.2.100](https://indike.org/pramana/in.purana.kurma.1.2.100) sarveṣāmeva bhaktānāṃ śaṃbhorliṅgamanuttamam / sitena bhasmanā kāryaṃ lalāṭe tu tripuṇḍrakam // ### [1.2.101](https://indike.org/pramana/in.purana.kurma.1.2.101) yastu nārāyaṇaṃ devaṃ prapannaḥ paramaṃ padam / dhārayet sarvadā śūlaṃ lalāṭe gandhavāribhiḥ // ### [1.2.102](https://indike.org/pramana/in.purana.kurma.1.2.102) prapannā ye jagadbījaṃ brahmāṇaṃ parameṣṭhinam / teṣāṃ lalāṭe tilakaṃ dhāraṇīyaṃ tu sarvadā // ### [1.2.103](https://indike.org/pramana/in.purana.kurma.1.2.103) yo 'sāvanādirbhūtādiḥ kālātmāsau dhṛto bhavet / uparyadho bhāvayogāt tripuṇḍrasya tu dhāraṇāt // ### [1.2.104](https://indike.org/pramana/in.purana.kurma.1.2.104) yattat pradhānaṃ triguṇaṃ brahmaviṣṇuśivātmakam / dhṛtaṃ triśūladharaṇād bhavatyeva na saṃśayaḥ // ### [1.2.105](https://indike.org/pramana/in.purana.kurma.1.2.105) brahmatejomayaṃ śuklaṃ yadetan maṇḍalaṃ raveḥ / bhavatyeva dhṛtaṃ sthānamaiśvaraṃ tilake kṛte // ### [1.2.106](https://indike.org/pramana/in.purana.kurma.1.2.106) tasmāt kāryaṃ triśūlāṅkaṃ tathā ca tilakaṃ śubham / triyāyuṣaṃ ca bhaktānāṃ trayāṇāṃ vidhipūrvakam // ### [1.2.107](https://indike.org/pramana/in.purana.kurma.1.2.107) yajeta juhuyādagnau japed dadyājjitendriyaḥ / śānto dānto jitakrodho varṇāśramavidhānavit // ### [1.2.108](https://indike.org/pramana/in.purana.kurma.1.2.108) evaṃ paricared devān yāvajjīvaṃ samāhitaḥ / teṣāṃ saṃsthānamacalaṃ so 'cirādadhigacchati // ### [1.2.108.p1](https://indike.org/pramana/in.purana.kurma.1.2.108.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge dvitīyo 'dhyāyaḥ ## Linked texts (8) - [Garuḍapurāṇa](https://indike.org/pramana/in.purana.garuda.1.49.2) — Vyāsa, Sanskrit - [Devībhāgavatapurāṇa](https://indike.org/pramana/in.purana.upa.sakta.devibhagavata.5.20.43) — Sanskrit - [Yogacintāmaṇi (Śivānanda Sarasvatī)](https://indike.org/pramana/in.darsana.yoga.yogacintamani-sivananda-sarasvati.2.582) — Śivānanda Sarasvatī 1650, Sanskrit - [Śaṅkhasmṛti](https://indike.org/pramana/in.niti.dharma.upasmrti.sankhalikhita.sankha.1.2) — Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.2.p2) — Ativīrarāma Pāṇṭiyar, Sanskrit - [Vādāvalī](https://indike.org/pramana/in.darsana.suddhadvaita.later.vadavali.3.1-6.10) — Puruṣottama Pītāmbara 1668, Sanskrit - [Pūjāprakāśa](https://indike.org/pramana/in.niti.dharma.pratistha.pujaprakasa.1.p11.1) — Mitramiśra, Sanskrit - [Yogasārasaṅgraha](https://indike.org/pramana/in.darsana.yoga.yogasarasangraha.p39) — Vijñānabhikṣu 1550, Sanskrit --- Source: [https://indike.org/pramana/in.purana.kurma.1.2](https://indike.org/pramana/in.purana.kurma.1.2) · Pramāṇa