[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.30 # Kurmapurana 1.30 Kūrmapurāṇa 1.30 - **Language:** Sanskrit ## Contents - [1.30.29](https://indike.org/pramana/in.purana.kurma.1.30.29) — 1 part ### [1.30.1](https://indike.org/pramana/in.purana.kurma.1.30.1) sūta uvāca sa śiṣyaiḥ saṃvṛto dhīmān gururdvaipāyano muniḥ / jagāma vipulaṃ liṅgamoṅkāraṃ muktidāyakam // ### [1.30.2](https://indike.org/pramana/in.purana.kurma.1.30.2) tatrābhyarcya mahādevaṃ śiṣyaiḥ saha mahāmuniḥ / provāca tasya māhātmyaṃ munīnāṃ bhāvitātmanām // ### [1.30.3](https://indike.org/pramana/in.purana.kurma.1.30.3) idaṃ tad vimalaṃ liṅgamoṅkāraṃ nāma śobhanam / asya smaraṇamātreṇa mucyate sarvapātakaiḥ // ### [1.30.4](https://indike.org/pramana/in.purana.kurma.1.30.4) etat parataraṃ jñānaṃ pañcayatanamuttamam / sevitaṃ sūribhirnityaṃ vārāṇasyāṃ vimokṣadam // ### [1.30.5](https://indike.org/pramana/in.purana.kurma.1.30.5) atra sākṣānmahādevaḥ pañcāyatanavigrahaḥ / ramate bhagavān rudro jantūnāmapavargadaḥ // ### [1.30.6](https://indike.org/pramana/in.purana.kurma.1.30.6) yat tat pāśupataṃ jñānaṃ pañcārthamiti śabdyate / tadetad vimalaṃ liṅgamoṅkāre samavasthitam // ### [1.30.7](https://indike.org/pramana/in.purana.kurma.1.30.7) śāntyatītā tathā śāntirvidyā caiva parā kalā / pratiṣṭhā ca nivṛttiśca pañcārthaṃ liṅgamaiśvaram // ### [1.30.8](https://indike.org/pramana/in.purana.kurma.1.30.8) pañcānāmapi devānāṃ brahmādīnāṃ sadāśrayam / oṅkārabodhakaṃ liṅgaṃ pañcāyatanamucyate // ### [1.30.9](https://indike.org/pramana/in.purana.kurma.1.30.9) saṃsmaredaiśvaraṃ liṅgaṃ pañcāyatanamavyayam / dehānte tatparaṃ jyotirānandaṃ viśate budhaḥ // ### [1.30.10](https://indike.org/pramana/in.purana.kurma.1.30.10) atra devarṣayaḥ pūrvaṃ siddhā brahmarṣayastathā / upāsya devamīśānaṃ prāptavantaḥ paraṃ padam // ### [1.30.11](https://indike.org/pramana/in.purana.kurma.1.30.11) matsyodaryāstaṭe puṇyaṃ sthānaṃ guhyatamaṃ śubham / gocarmamātraṃ viprendrā oṅkāreśvaramuttamam // ### [1.30.12](https://indike.org/pramana/in.purana.kurma.1.30.12) kṛttivāseśvaraṃ liṅgaḥ madhyameśvaramuttamam / viśveśvaraṃ tathoṅkāraṃ kapardeśvarameva ca // ### [1.30.13](https://indike.org/pramana/in.purana.kurma.1.30.13) etāni guhyaliṅgāni vārāṇasyāṃ dvijottamāḥ / na kaścidiha jānāti vinā śaṃbhoranugrahāt // ### [1.30.14](https://indike.org/pramana/in.purana.kurma.1.30.14) evamuktvā yayau kṛṣṇaḥ pārāśaryo mahāmuniḥ / kṛttivāseśvaraṃ liṅgaṃ draṣṭuṃ devasya śūlinaḥ // ### [1.30.15](https://indike.org/pramana/in.purana.kurma.1.30.15) samabhyarcya tathā śiṣyairmāhātmyaṃ kṛttivāsasaḥ / kathayāmāsa śiṣyebhyo bhagavān brahmavittamaḥ // ### [1.30.16](https://indike.org/pramana/in.purana.kurma.1.30.16) asmin sthāne purā daityo hastī bhūtvā bhavāntikam / brāhmaṇān hantumāyāto ye 'tra nityamupāsate // ### [1.30.17](https://indike.org/pramana/in.purana.kurma.1.30.17) teṣāṃ liṅgānmahādevaḥ prādurāsīt trilocanaḥ / rakṣaṇārthaṃ dvijaśreṣṭhā bhaktānāṃ bhaktavatsalaḥ // ### [1.30.18](https://indike.org/pramana/in.purana.kurma.1.30.18) hatvā gajākṛtiṃ daityaṃ śūlenāvajñayā haraḥ / vasastasyākarot kṛttiṃ kṛttivāseśvarastataḥ // ### [1.30.19](https://indike.org/pramana/in.purana.kurma.1.30.19) atra siddhiṃ parāṃ prāptā munayo munipuṅgavāḥ / tenaiva ca śarīreṇa prāptāstat paramaṃ padam // ### [1.30.20](https://indike.org/pramana/in.purana.kurma.1.30.20) vidyā vidyeśvarā rudrāḥ śivāye ca prakīrtitāḥ / kṛttivāseśvaraṃ liṅgaṃ nityamāvṛtya saṃsthitāḥ // ### [1.30.21](https://indike.org/pramana/in.purana.kurma.1.30.21) jñātvā kaliyugaṃ ghoramadharmabahulaṃ janāḥ / kṛttivāsaṃ na muñcanti kṛtārthāste na saṃśayaḥ // ### [1.30.22](https://indike.org/pramana/in.purana.kurma.1.30.22) janmāntarasahastreṇa mokṣo 'nyatrāpyate na vā / ekena janmanā mokṣaḥ kṛttivāse tu labhyate // ### [1.30.23](https://indike.org/pramana/in.purana.kurma.1.30.23) ālayaḥ sarvasiddhānāmetat sthānaṃ vadanti hi / gopitaṃ devadevena mahādevena śaṃbhunā // ### [1.30.24](https://indike.org/pramana/in.purana.kurma.1.30.24) yuge yuge hyatra dāntā brāhmaṇā vedapārāgāḥ / upāsate mahādevaṃ japanti śatarudriyam // ### [1.30.25](https://indike.org/pramana/in.purana.kurma.1.30.25) stuvanti satataṃ devaṃ tryambakaṃ kṛttivāsasam / dhyāyanti hṛdaye devaṃ sthāṇuṃ sarvāntaraṃ śivam // ### [1.30.26](https://indike.org/pramana/in.purana.kurma.1.30.26) gāyanti siddhāḥ kila gītakāni ye vārāṇasyāṃ nivasanti viprāḥ / teṣāmathaikena bhavena muktir ye kṛttivāsaṃ śaraṇaṃ prapannāḥ // ### [1.30.27](https://indike.org/pramana/in.purana.kurma.1.30.27) saṃprāpya loke jagatāmabhīṣṭaṃ sudurlabhaṃ viprakuleṣu janma / dhyāne samādhāya japanti rudraṃ dhyāyanti citte yatayo maheśam // ### [1.30.28](https://indike.org/pramana/in.purana.kurma.1.30.28) ārādhayanti prabhumīśitāraṃ vārāṇasīmadhyagatā munindrāḥ / yajanti yajñairabhisaṃdhihīnāḥ stuvanti rudraṃ praṇamanti śaṃbhum // ### [1.30.29](https://indike.org/pramana/in.purana.kurma.1.30.29) namo bhavāyāmalayogadhāmne sthāṇuṃ prapadye giriśaṃ purāṇam / smarāmi rudraṃ hṛdaye niviṣṭaṃ jāne mahādevamanekarūpam // ### [1.30.29.p1](https://indike.org/pramana/in.purana.kurma.1.30.29.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāgetriṃśo 'dhyāyaḥ ## Linked texts (7) - [Padmapurāṇa](https://indike.org/pramana/in.purana.padma.3.34.3) — Vyāsa, Sanskrit - [Brāhmī Saṃhitā](https://indike.org/pramana/in.purana.brahmisamhita.32.2) — Sanskrit - [Brahmisamhita (gurumandalseries1962)](https://indike.org/pramana/in.sampradaya.vaisnava.pancaratra.brahmisamhita*gurumandalseries1962.32.2) — Sanskrit - [Kūrmapurāṇa (Ananta Gokhale)](https://indike.org/pramana/in.purana.kurmapurana.21.p12) — Ananta Gokhale, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p73) — Mitramiśra, Sanskrit - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c7.s11.10) — R. C. Hazra, English - [Tīrthakāṇḍa](https://indike.org/pramana/in.niti.dharma.tirtha.tirthakanda.8.p1) — Lakṣmīdhara, Sanskrit --- Source: [https://indike.org/pramana/in.purana.kurma.1.30](https://indike.org/pramana/in.purana.kurma.1.30) · Pramāṇa