[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.35 # Kurmapurana 1.35 Kūrmapurāṇa 1.35 - **Language:** Sanskrit ## Contents - [1.35.38](https://indike.org/pramana/in.purana.kurma.1.35.38) — 1 part ### [1.35.1](https://indike.org/pramana/in.purana.kurma.1.35.1) mārkaṇḍeya uvāca kathayiṣyāmi te vatsa tīrthayātrāvidhikramam / ārṣeṇa tu vidhānena yathā dṛṣṭaṃ yathā śrutam // ### [1.35.2](https://indike.org/pramana/in.purana.kurma.1.35.2) prayāgatīrthayātrārtho yaḥ prayāti naraḥ kvacit / balīvardaṃ samārūḍhaḥ śṛṇu tasyāpi yatphalam // ### [1.35.3](https://indike.org/pramana/in.purana.kurma.1.35.3) narake vasate ghore samāḥ kalpaśatāyutam / tato nivartate ghoro gavāṃ krodho hi dāruṇaḥ / salilaṃ ca na gṛhṇanti pitarastasya dehinaḥ // ### [1.35.4](https://indike.org/pramana/in.purana.kurma.1.35.4) yastu putrāṃstathā bālān snāpayet pāyayet tathā / yathātmanā tathā sarvān dānaṃ vipreṣu dāpayet // ### [1.35.5](https://indike.org/pramana/in.purana.kurma.1.35.5) aiśvaryāllobhamohād vā gacched yānena yo naraḥ / niṣphalaṃ tasya tat tīrthaṃ tasamādyānaṃ vivarjayet // ### [1.35.6](https://indike.org/pramana/in.purana.kurma.1.35.6) gaṅgāyamunayormadhye yastu kanyāṃ prayacchati / ārṣeṇa tu vivāhena yathā vibhavavistaram // ### [1.35.7](https://indike.org/pramana/in.purana.kurma.1.35.7) na sa paśyati taṃ ghoraṃ narakaṃ tena karmaṇā / uttarān sa kurūn gatvā modate kālamakṣayam // ### [1.35.8](https://indike.org/pramana/in.purana.kurma.1.35.8) vaṭamūlaṃ samāśritya yastu prāṇān parityajet / sarvalokānatikramya rudralokaṃ sa gacchati // ### [1.35.9](https://indike.org/pramana/in.purana.kurma.1.35.9) tatra brahmādayo devā diśaśca sadigīśvarāḥ / lokapālāśca siddhāśca pitaro lokasaṃmatāḥ // ### [1.35.10](https://indike.org/pramana/in.purana.kurma.1.35.10) sanatkumārapramukhāstathā brahmarṣayo 'pare / nāgāḥ supārṇāḥ siddhāśca tathā nityaṃ samāsate / hariśca bhagavānāste prajāpatipuraskṛtaḥ // ### [1.35.11](https://indike.org/pramana/in.purana.kurma.1.35.11) gaṅgāyamunayormadhye pṛthivyā jaghanaṃ smṛtam / prayāgaṃ rājaśārdūla triṣu lokeṣu viśrutam // ### [1.35.12](https://indike.org/pramana/in.purana.kurma.1.35.12) tatrābhiṣekaṃ yaḥ kuryāt saṃgame saṃśitavrataḥ / tulyaṃ phalavāpnoti rājasūyāśvamedhayoḥ // ### [1.35.13](https://indike.org/pramana/in.purana.kurma.1.35.13) na mātṛvacanāt tāta na lokavacanādapi / matirutkramaṇīyā te prayāgagāmanaṃ prati // ### [1.35.14](https://indike.org/pramana/in.purana.kurma.1.35.14) daśa tīrtha sahastrāṇi ṣaṣṭikoṭyastathāpare / teṣāṃ sānnidhyamatraiva tīrthānāṃ kurunandana // ### [1.35.15](https://indike.org/pramana/in.purana.kurma.1.35.15) yā gatiryogayuktasya sattvasthasya manīṣiṇaḥ / sā gatistyajataḥ prāṇān gaṅgāyamunasaṃgame // ### [1.35.16](https://indike.org/pramana/in.purana.kurma.1.35.16) na te jīvanti loke 'smin yatra tatra yudhiṣṭhira / ye prayāgaṃ na saṃprāptāstriṣu lokeṣu viśrutam // ### [1.35.17](https://indike.org/pramana/in.purana.kurma.1.35.17) evaṃ dṛṣṭvā tu tat tīrthaṃ prayāgaṃ paramaṃ padam / mucyate sarvapāpebhyaḥ śaśāṅka iva rāhuṇā // ### [1.35.18](https://indike.org/pramana/in.purana.kurma.1.35.18) kambalāśvatarau nāgau yamunādakṣiṇe taṭe / tatra snātvā ca pītvā ca mucyate sarvapātakaiḥ // ### [1.35.19](https://indike.org/pramana/in.purana.kurma.1.35.19) tatra gatvā naraḥ sthānaṃ mahādevasya dhīmataḥ / ātmānaṃ tārayet pūrvaṃ daśātītān daśāparān // ### [1.35.20](https://indike.org/pramana/in.purana.kurma.1.35.20) kṛtvābhiṣekaṃ tu naraḥ so 'śvamedhaphalaṃ labhet / svargalokamavāpnoti yāvadāhūtasaṃplavam // ### [1.35.21](https://indike.org/pramana/in.purana.kurma.1.35.21) pūrvapārśve tu gaṅgāyāstrailokyakhyātimān nṛpa / avacaḥ sarvasāmudraḥ pratiṣṭhānaṃ ca viśrutam // ### [1.35.22](https://indike.org/pramana/in.purana.kurma.1.35.22) brahmacārī jitakrodhastrirātraṃ yadi tiṣṭhati / sarvapāpaviśuddhātmā so 'śvamedhaphalaṃ labhet // ### [1.35.23](https://indike.org/pramana/in.purana.kurma.1.35.23) uttareṇa pratiṣṭhānaṃ bhāgīrathyāstu savyataḥ / haṃsaprapatanaṃ nāma tīrthaṃ trailokyaviśrutam // ### [1.35.24](https://indike.org/pramana/in.purana.kurma.1.35.24) aśvamedhaphalaṃ tatra smṛtamātrāt tu jāyate / yāvaccandraśca sūryaśca tāvat svarge mahīyate // ### [1.35.25](https://indike.org/pramana/in.purana.kurma.1.35.25) urvaśīpuline ramye vipule haṃsapāṇḍure / parityajatiyaḥ prāṇān śṛṇu tasyāpi yat phalam // ### [1.35.26](https://indike.org/pramana/in.purana.kurma.1.35.26) ṣaṣṭivarṣasahastrāṇi ṣaṣṭivarṣaśatāni ca / āste sa pitṛbhiḥ sārdhaṃ svargaloke narādhipa // ### [1.35.27](https://indike.org/pramana/in.purana.kurma.1.35.27) athaṃ saṃdhyāvaṭe ramye brahmacārī jitendriyaḥ / naraḥ śucirupāsīta brahmalokamavāpnuyāt // ### [1.35.28](https://indike.org/pramana/in.purana.kurma.1.35.28) koṭitīrthaṃ samāśritya yastu prāṇān parityajet / koṭivarṣasahastrāṇi svargaloke mahīyate // ### [1.35.29](https://indike.org/pramana/in.purana.kurma.1.35.29) yatra gaṅgā mahābhāgā bahutīrthatapovanā / siddhakṣetraṃ hi tajjñeyaṃ nātra kāryā vicāraṇā // ### [1.35.30](https://indike.org/pramana/in.purana.kurma.1.35.30) kṣitau tārayate martyān nāgāṃstārayate 'pyadhaḥ / divi tārayate devāṃstena tripathagā smṛtā // ### [1.35.31](https://indike.org/pramana/in.purana.kurma.1.35.31) yāvadasthīni gaṅgāyāṃ tiṣṭhanti puruṣasya tu / tāvad varṣasahastrāṇi svargaloke mahīyate // ### [1.35.32](https://indike.org/pramana/in.purana.kurma.1.35.32) tīrthānāṃ paramaṃ tīrthaṃ nadīnāṃ paramā nadī / mokṣadā sarvabhūtānāṃ mahāpātakināmapi // ### [1.35.33](https://indike.org/pramana/in.purana.kurma.1.35.33) sarvatra sulabhā gaṅgā triṣu sthāneṣu durlabhā / gaṅgādvāre prayāge ca gaṅgāsāgarasaṃgame // ### [1.35.34](https://indike.org/pramana/in.purana.kurma.1.35.34) sarveṣāme bhūtānāṃ pāpopahatacetasām / gatimanveṣamāṇānāṃ nāsti gaṅgāsamā gatiḥ // ### [1.35.35](https://indike.org/pramana/in.purana.kurma.1.35.35) pavitrāṇāṃ pavitraṃ ca maṅgalānāṃ ca maṅgalam / māheśvarāt paribhraṣṭā sarvapāpaharā śubhā // ### [1.35.36](https://indike.org/pramana/in.purana.kurma.1.35.36) kṛte yuge tu tīrthāni tretāyāṃ puṣkaraṃ param / dvāpare tu kurukṣetraṃ kalau gaṅgāṃ viśiṣyate // ### [1.35.37](https://indike.org/pramana/in.purana.kurma.1.35.37) gaṅgāmeva niṣeveta prayāge tu viśeṣataḥ / nānyat kaliyugodbhūtaṃ malaṃ hantuṃ suduṣkṛtam // ### [1.35.38](https://indike.org/pramana/in.purana.kurma.1.35.38) akāmo vā sakāmo vā gaṅgāyāṃ yo vipadyate / sa mṛto jāyate svarge narakaṃ ca na paśyati // ### [1.35.38.p1](https://indike.org/pramana/in.purana.kurma.1.35.38.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge pañcatriṃśo 'dhyāyaḥ ## Linked texts (7) - [Matsyapurāṇa](https://indike.org/pramana/in.purana.matsya.106.3) — Vyāsa, Sanskrit - [Padmapurāṇa](https://indike.org/pramana/in.purana.padma.3.43.5) — Vyāsa, Sanskrit - [Southern recension](https://indike.org/pramana/in.lit.mahabharata.vyasa*southern.3.83.83) — Sanskrit - [Nāradapurāṇa](https://indike.org/pramana/in.purana.narada.2.38.20) — Vyāsa, Sanskrit - [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.1.p15) — Nārāyaṇa (Mahiṣamaṅgalam) 1513, Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.2.p2) — Vācaspatimiśra, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p199) — Mitramiśra, Sanskrit --- Source: [https://indike.org/pramana/in.purana.kurma.1.35](https://indike.org/pramana/in.purana.kurma.1.35) · Pramāṇa