[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.3 # Kurmapurana 1.3: tṛtīyo'dhyāyaḥ Kūrmapurāṇa 1.3 - **Language:** Sanskrit ## Contents - [1.3.28](https://indike.org/pramana/in.purana.kurma.1.3.28) — 1 part ### tṛtīyo'dhyāyaḥ ### [1.3.1](https://indike.org/pramana/in.purana.kurma.1.3.1) ṛṣaya ūcuḥ varṇā bhagavatoddiṣṭāścatvāro 'pyāśramāstathā / idānīṃ kramamasmākamāśramāṇāṃ vada prabho // ### [1.3.2](https://indike.org/pramana/in.purana.kurma.1.3.2) śrīkūrma uvāca brahmacārī gṛhasthaśca vānaprastho yatistathā / krameṇaivāśramāḥ proktāḥ kāraṇādanyathā bhavet // ### [1.3.3](https://indike.org/pramana/in.purana.kurma.1.3.3) utpannajñānavijñāno vairāgyaṃ paramaṃ gataḥ / pravrajed brahmacaryāt tu yadicchet paramāṃ gatim // ### [1.3.4](https://indike.org/pramana/in.purana.kurma.1.3.4) dārānāhṛtya vidhivadanyathā vividhairmakhaiḥ / yajedutpādayet putrān virakto yadi saṃnyaset // ### [1.3.5](https://indike.org/pramana/in.purana.kurma.1.3.5) aniṣṭvā vidhivad yajñairanutpādya tathātmajam / nagārhasthyaṃ gṛhītyaktvā saṃnyased buddhimān dvijaḥ // ### [1.3.6](https://indike.org/pramana/in.purana.kurma.1.3.6) atha vairāgyavegena sthātuṃ notsahate gṛhe / tatraiva saṃnyased vidvānaniṣṭvāpi dvijottamaḥ // ### [1.3.7](https://indike.org/pramana/in.purana.kurma.1.3.7) anyathā vividhairyajñairiṣṭvā vanamathākṣayet / tapastaptvā tapoyogād viraktaḥ saṃnyased yadi // ### [1.3.8](https://indike.org/pramana/in.purana.kurma.1.3.8) vānaprasthāśramaṃ gatvā na gṛhaṃ praviśet punaḥ / na saṃnyāsī vanaṃ cātha brahmācaryaṃ na sādhakaḥ // ### [1.3.9](https://indike.org/pramana/in.purana.kurma.1.3.9) prājāpatyāṃ nirūpyeṣṭimāgneyīmathavā dvijaḥ / pravrajeta gṛhī vidvān vanād vā śruticodanāt // ### [1.3.10](https://indike.org/pramana/in.purana.kurma.1.3.10) prakartumasamartho 'pi juhotiyajatikriyāḥ / andhaḥ paṅgurdaridro vā viraktaḥ saṃnyased dvijaḥ // ### [1.3.11](https://indike.org/pramana/in.purana.kurma.1.3.11) sarveṣāmeva vairāgyaṃ saṃnyāsāya vidhīyate / patatyevāvirakto yaḥ saṃnyāsaṃ kartumicchati // ### [1.3.12](https://indike.org/pramana/in.purana.kurma.1.3.12) ekasminnathavā samyag vartetāmaraṇaṃ dvijaḥ / śraddhāvanāśrame yuktaḥ so 'mṛtatvāya kalpate // ### [1.3.13](https://indike.org/pramana/in.purana.kurma.1.3.13) nyāyāgatadhanaḥ śānto brahmavidyāparāyaṇaḥ / svadharmapālako nityaṃ so 'mṛtatvāya kalpate // ### [1.3.14](https://indike.org/pramana/in.purana.kurma.1.3.14) brahmaṇyādhāya kramāṇi niḥsaṅgaḥ kāmavarjitaḥ / prasannenaiva manasā kurvāṇo yāti tatpadam // ### [1.3.15](https://indike.org/pramana/in.purana.kurma.1.3.15) brahmaṇā dīyate deyaṃ brahmaṇe saṃpradīyate / brahmaiva dīyate ceti brahmārpaṇamidaṃ param // ### [1.3.16](https://indike.org/pramana/in.purana.kurma.1.3.16) nāhaṃ kartā sarvametad brahmaiva kurute tathā / etad brahmārpaṇaṃ proktamṛṣibhiḥ tattvadarśibhiḥ // ### [1.3.17](https://indike.org/pramana/in.purana.kurma.1.3.17) prīṇātu bhagavānīśaḥ karmaṇānena śāśvataḥ / karoti satataṃ buddhyā brahmārpaṇamidaṃ param // ### [1.3.18](https://indike.org/pramana/in.purana.kurma.1.3.18) yadvā phalānāṃ saṃnyāsaṃ prakuryāt parameśvare / karmaṇāmetadapyāhuḥ brahmārpaṇamanuttamam // ### [1.3.19](https://indike.org/pramana/in.purana.kurma.1.3.19) kāryamityeva yatkarma niyataṃ saṅgavarjitam / kriyate viduṣā karma tadbhavedapi mokṣadam // ### [1.3.20](https://indike.org/pramana/in.purana.kurma.1.3.20) anyathā yadi karmāṇi kuryānnityamapi dvijaḥ / akṛtvā phalasaṃnyāsaṃ badhyate tatphalena tu // ### [1.3.21](https://indike.org/pramana/in.purana.kurma.1.3.21) tasmāt sarvaprayatnena tyaktvā karmāśritaṃ phalam / avidvānapi kurvota karmāpnotyacirāt padam // ### [1.3.22](https://indike.org/pramana/in.purana.kurma.1.3.22) karmaṇā kṣīyate pāpamaihikaṃ paurvikaṃ tathā / manaḥ prasādamanveti brahma vijñāyate tataḥ // ### [1.3.23](https://indike.org/pramana/in.purana.kurma.1.3.23) karmaṇā sahitājjñānāt samyag yogo 'bijāyate / jñānaṃ ca karmasahitaṃ jāyate doṣavarjitam // ### [1.3.24](https://indike.org/pramana/in.purana.kurma.1.3.24) tasmāt sarvaprayatnena tatra tatrāśrame rataḥ / karmāṇīśvaratuṣṭyarthaṃ kuryānnaiṣkarmyamāpnuyāt // ### [1.3.25](https://indike.org/pramana/in.purana.kurma.1.3.25) saṃprāpya paramaṃ jñānaṃ naiṣkarmyaṃ tatprasādataḥ / ekākī nirmamaḥ śānto jīvanneva vimucyate // ### [1.3.26](https://indike.org/pramana/in.purana.kurma.1.3.26) vīkṣate paramātmānaṃ paraṃ brahma maheśvaram / nityānandaṃ nirābhāsaṃ tasminneva layaṃ vrajet // ### [1.3.27](https://indike.org/pramana/in.purana.kurma.1.3.27) tasmāt seveta satataṃ karmayogaṃ prasannadhīḥ / tṛptaye parameśasya tat padaṃ yāti śāśvatam // ### [1.3.28](https://indike.org/pramana/in.purana.kurma.1.3.28) etad vaḥ sathitaṃ sarvaṃ cāturāśramyamuttamam / na hyetat samatikramya siddhiṃ vindati mānavaḥ // ### [1.3.28.p1](https://indike.org/pramana/in.purana.kurma.1.3.28.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge tṛtīyo 'dhyāyaḥ ## Linked texts (3) - [Kūrmapurāṇa](https://indike.org/pramana/in.vernacular.tamil.kappiyam.kurmapurana.3.p3) — Ativīrarāma Pāṇṭiyar, Sanskrit - [Ācāramayūkha](https://indike.org/pramana/in.niti.dharma.acara.bhatta.acaramayukha.1.p10) — Nīlakaṇṭha Dīkṣita 1625, Sanskrit - [Yogasārasaṅgraha](https://indike.org/pramana/in.darsana.yoga.yogasarasangraha.p66) — Vijñānabhikṣu 1550, Sanskrit --- Source: [https://indike.org/pramana/in.purana.kurma.1.3](https://indike.org/pramana/in.purana.kurma.1.3) · Pramāṇa