[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.41 # Kurmapurana 1.41 Kūrmapurāṇa 1.41 - **Language:** Sanskrit ## Contents - [1.41.42](https://indike.org/pramana/in.purana.kurma.1.41.42) — 1 part ### [1.41.1](https://indike.org/pramana/in.purana.kurma.1.41.1) sūta uvāca evameṣa mahādevo devadevaḥ pitāmahaḥ / karoti niyataṃ kālaṃ kālātmā hyaiśvarī tanuḥ // ### [1.41.2](https://indike.org/pramana/in.purana.kurma.1.41.2) tasya ye raśmayo viprāḥ sarvalokapradīpakāḥ / teṣāṃ śreṣṭhāḥ punaḥ sapta raśmayo grahayonayaḥ // ### [1.41.3](https://indike.org/pramana/in.purana.kurma.1.41.3) suṣumno harikeśaśca viśvakarmā tathaiva ca / viśvavyacāḥ punaścānyaḥ saṃyadvasurataḥ paraḥ // ### [1.41.4](https://indike.org/pramana/in.purana.kurma.1.41.4) arvāvasuriti khyātaḥ svarāḍanyaḥ prakīrtitaḥ / supumnaḥ sūryaraśmistu puṣṇāti śiśiradyutim // ### [1.41.5](https://indike.org/pramana/in.purana.kurma.1.41.5) tiryagūrdhvapracāro 'sau suṣumnaḥ paripaṭhyate / harikeśastu yaḥ prokto raśmirnakṣatrapoṣakaḥ // ### [1.41.6](https://indike.org/pramana/in.purana.kurma.1.41.6) viśvakarmā tathā raśmirbudhaṃ puṣṇāti sarvadā / viśvavyacāstu yo raśmiḥ śukraṃ puṣṇāti nityadā // ### [1.41.7](https://indike.org/pramana/in.purana.kurma.1.41.7) saṃyadvasuriti khyātaḥ sa puṣṇāti ca lohitam / vṛhaspatiṃ prapuṣṇāti raśmirarvāvasuḥ prabhoḥ / śanaiścaraṃ prapuṣṇāti saptamastu surāṭ tathā // ### [1.41.8](https://indike.org/pramana/in.purana.kurma.1.41.8) evaṃ sūryaprabhāvena sarvā nakṣatratārakāḥ / vardhante vardhitā nityaṃ nityamāpyāyayanti ca // ### [1.41.9](https://indike.org/pramana/in.purana.kurma.1.41.9) divyānāṃ pārthivānāṃ ca naiśānāṃ caiva sarvaśaḥ / ādānānnityamādityastejasāṃ tamasāṃ prabhuḥ // ### [1.41.10](https://indike.org/pramana/in.purana.kurma.1.41.10) ādatte sa tu nāḍīnāṃ sahastreṇa samantataḥ / nādeyāṃścaiva sāmudrān kūpyāṃścaiva sahastradṛk / sthāvarāñjaṅgamāṃścaiva yacca kulyādikaṃ payaḥ // ### [1.41.11](https://indike.org/pramana/in.purana.kurma.1.41.11) tasya raśmisahastraṃ tacchītavarṣoṣṇanistravam / tāsāṃ catuḥ śataṃ nāḍyo varṣante citramūrtayaḥ // ### [1.41.12](https://indike.org/pramana/in.purana.kurma.1.41.12) vandanāścaiva yājyāśca ketanā bhūtanāstathā / amṛtā nāma tāḥ sarvā raśmayo vṛṣṭisarjanāḥ // ### [1.41.13](https://indike.org/pramana/in.purana.kurma.1.41.13) himodvāhāśca tā nāḍyo raśmayastriśataṃ punaḥ / raśmyo meṣyaśca pauṣyaśca hlādinyo himasarjanāḥ / candrāstā nāmataḥ sarvāḥ pītābhāḥ syurgabhastayaḥ // ### [1.41.14](https://indike.org/pramana/in.purana.kurma.1.41.14) śukrāśca kakubhaścaiva gāvo viśvabhṛtastathā / śukrāstā nāmataḥ sarvāstrividhā gharmasarjanāḥ // ### [1.41.15](https://indike.org/pramana/in.purana.kurma.1.41.15) samaṃ bibharti tābhiḥ sa manuṣyapitṛdevatāḥ / manuṣyānauṣadheneha svadhayā ca pitṝnapi / amṛtena surān sarvāṃstribhistrariṃstarpayatyasau // ### [1.41.16](https://indike.org/pramana/in.purana.kurma.1.41.16) vasante graiṣmike caiva śataiḥ sa tapati tribhiḥ / śaradyapi ca varṣāsu caturbhaiḥ saṃpravarṣati / hemante śiśire caiva himamutsṛjati tribhiḥ // ### [1.41.17](https://indike.org/pramana/in.purana.kurma.1.41.17) varuṇo māghamāse tu sūryaḥ pūṣā tu phalgune / caitre māsi bhavedaṃśo dhātā vaiśākhatāpanaḥ // ### [1.41.18](https://indike.org/pramana/in.purana.kurma.1.41.18) jyeṣṭhāmūle bhavedindraḥ āṣāḍhe savitā raviḥ / vivasvān śrāvaṇe māsi prauṣṭhapadyāṃ bhagaḥ smṛtaḥ // ### [1.41.19](https://indike.org/pramana/in.purana.kurma.1.41.19) parjanyo 'śvayuji tvaṣṭākārtike māsi bhāskaraḥ / mārgaśīrṣa bhavenmitraḥ pauṣe viṣṇuḥ sanātanaḥ // ### [1.41.20](https://indike.org/pramana/in.purana.kurma.1.41.20) pañcaraśmisahastrāṇi varuṇasyārkakarmaṇi / ṣaḍbhiḥ sahastraiḥ pūṣā tu devoṃśaḥ saptabhistathā // ### [1.41.21](https://indike.org/pramana/in.purana.kurma.1.41.21) dhātāṣṭabhiḥ sahastraistu navabhistu śatakratuḥ / vivasvān daśabhiḥ pāti pātyekādaśabhirbhagaḥ // ### [1.41.22](https://indike.org/pramana/in.purana.kurma.1.41.22) saptabhistapate mitrastvaṣṭā caivāṣṭabhistapet / aryamā daśabhaiḥ pāti parjanyo navabhistapet / ṣaḍbhī raśmisahastraistu viṣṇustapati viśvasṛk // ### [1.41.23](https://indike.org/pramana/in.purana.kurma.1.41.23) vasante kapilaḥ sūryo grīṣme kāñcanasaprabhaḥ / śveto varṣāsu varṇena pāṇḍuraḥ śaradi prabhuḥ / hemante tāmravarṇaḥ syācchiśire lohito raviḥ // ### [1.41.24](https://indike.org/pramana/in.purana.kurma.1.41.24) oṣadhīṣu balaṃ dhatte svadhāmapi pitṛṣvatha / sūryo 'maratvamamṛte trayaṃ triṣu niyacchati // ### [1.41.25](https://indike.org/pramana/in.purana.kurma.1.41.25) anye cāṣṭau grahā jñeyāḥ sūryeṇādhiṣṭhitā dvijāḥ / candramāḥ somaputraśca śukraścaiva bṛhaspatiḥ / bhaumo mandastathā rāhuḥ ketumānapi cāṣṭamaḥ // ### [1.41.26](https://indike.org/pramana/in.purana.kurma.1.41.26) sarve dhruve nibaddhā vai grahāste vātaraśmibhiḥ / bhrāmyamāṇā yathāyogaṃ bhramantyanudivākaram // ### [1.41.27](https://indike.org/pramana/in.purana.kurma.1.41.27) alātacakravad yānti vātacakreritā dvijāḥ / yasmād vahati tān vāyuḥ pravahastena sa smṛtaḥ // ### [1.41.28](https://indike.org/pramana/in.purana.kurma.1.41.28) rathastricakraḥ somasya kundābhāstasya vājinaḥ / vāmadakṣiṇato yuktā daśa tena niśākaraḥ // ### [1.41.29](https://indike.org/pramana/in.purana.kurma.1.41.29) vīthyāśrayāṇi carati nakṣatrāṇi raviryathā / hrāsavṛddhī ca viprendrā dhruvādhārāṇi sarvadā // ### [1.41.30](https://indike.org/pramana/in.purana.kurma.1.41.30) sa somaḥ śuklapakṣe tu bhāskare parataḥ sthite / āpūryate parasyāntaḥ satataṃ divasakramāt // ### [1.41.31](https://indike.org/pramana/in.purana.kurma.1.41.31) kṣīṇāyitaṃ suraiḥ somamāpyāyati nityadā / ekena raśminā viprāḥ suṣumnākhyena bhāskaraḥ // ### [1.41.32](https://indike.org/pramana/in.purana.kurma.1.41.32) eṣā sūryasya vīryeṇa somasyāpyāyitā tanuḥ / paurṇamāsyāṃ sa dṛśyeta saṃpūrṇe divasakramāt // ### [1.41.33](https://indike.org/pramana/in.purana.kurma.1.41.33) saṃpūrṇamardhamāsena taṃ somamamṛtātmakam / pibanti devatā viprā yataste 'mṛtabhojanāḥ // ### [1.41.34](https://indike.org/pramana/in.purana.kurma.1.41.34) tataḥ pañcadaśe bhāge kiñcicchiṣṭe kalātmake / aparāhṇe pitṛgaṇā jaghanyaṃ paryupāsate // ### [1.41.35](https://indike.org/pramana/in.purana.kurma.1.41.35) pibanti dvikalaṃ kālaṃ śiṣṭā tasya kalā tuyā / sudhāmṛtamayīṃ puṇyāṃ tāmandoramṛtātmikām // ### [1.41.36](https://indike.org/pramana/in.purana.kurma.1.41.36) niḥ sṛtaṃ tadamāvāsyāṃ gabhastibhyaḥ svadhāmṛtam / māsatṛptimapāpyagryāṃ pitaraḥ santi nirvṛtāḥ // ### [1.41.37](https://indike.org/pramana/in.purana.kurma.1.41.37) na somasya vināśaḥ syāt sudhā devaistu pīyate / evaṃ sūryanimittasya kṣayo vṛddhiśca sattamāḥ // ### [1.41.38](https://indike.org/pramana/in.purana.kurma.1.41.38) somaputrasya cāṣṭābhirvājibhirvāyuvegibhiḥ / vārijaiḥ syandano yuktastenāsau yāti sarvataḥ // ### [1.41.39](https://indike.org/pramana/in.purana.kurma.1.41.39) śukrasya bhūmijairaśvaiḥ syandano daśabhirvṛtaḥ / aṣṭabiścātha bhaumasya ratho haimaḥ suśobhanaḥ // ### [1.41.40](https://indike.org/pramana/in.purana.kurma.1.41.40) bṛhaspaterathāṣṭāśvaḥ syandano hemanirmitaḥ / rathastamomayo 'ṣṭāśvo mandasyāyasanirmitaḥ / svarbhānorbhāskarāreśca tathā ṣaḍbhirhayairvṛtaḥ // ### [1.41.41](https://indike.org/pramana/in.purana.kurma.1.41.41) ete mahāgrahāṇāṃ vai samākhyātā rathā nava / sarve dhruve mahābhāgā nibaddhā vātaraśmibhiḥ // ### [1.41.42](https://indike.org/pramana/in.purana.kurma.1.41.42) graharkṣatārādhiṣṇyāni dhruve baddhānyeśeṣataḥ / bhramanti bhrāmayantyenaṃ sarvāṇyanilaraśmibhiḥ // ### [1.41.42.p1](https://indike.org/pramana/in.purana.kurma.1.41.42.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge ekacatvāriṃśo 'dhyāyaḥ ## Linked texts (8) - [Mudgalapurāṇa](https://indike.org/pramana/in.purana.upa.surya.mudgala.2.13.31) — Sanskrit - [Brahmāṇḍapurāṇa](https://indike.org/pramana/in.purana.brahmanda.1.24.27) — Vyāsa, Sanskrit - [Matsyapurāṇa](https://indike.org/pramana/in.purana.matsya.128.19) — Vyāsa, Sanskrit - [Brāhmī Saṃhitā](https://indike.org/pramana/in.purana.brahmisamhita.43.4) — Sanskrit - [Brahmisamhita (gurumandalseries1962)](https://indike.org/pramana/in.sampradaya.vaisnava.pancaratra.brahmisamhita*gurumandalseries1962.43.4) — Sanskrit - [Kūrmapurāṇa (Ananta Gokhale)](https://indike.org/pramana/in.purana.kurmapurana.27.p2) — Ananta Gokhale, Sanskrit - [Matsya](https://indike.org/pramana/in.astro.samhita.matsya.129.19) — Sanskrit - [Prabhāsakṣetramāhātmyam](https://indike.org/pramana/in.purana.sthala.prabhasakshetramahatmyam.137.14) — Sanskrit --- Source: [https://indike.org/pramana/in.purana.kurma.1.41](https://indike.org/pramana/in.purana.kurma.1.41) · Pramāṇa