[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.46 # Kurmapurana 1.46 Kūrmapurāṇa 1.46 - **Language:** Sanskrit ## Contents - [1.46.60](https://indike.org/pramana/in.purana.kurma.1.46.60) — 1 part ### [1.46.1](https://indike.org/pramana/in.purana.kurma.1.46.1) sūta uvāca hemakūṭagireḥ śṛṅge mahākūṭaiḥ suśobhanam / sphāṭikaṃ devadevasya vimānaṃ parameṣṭhinaḥ // ### [1.46.2](https://indike.org/pramana/in.purana.kurma.1.46.2) atha devādidevasya bhūteśasya triśūlinaḥ / devāḥ siddhagaṇā yakṣāḥ pūjāṃ nityaṃ prakurvate // ### [1.46.3](https://indike.org/pramana/in.purana.kurma.1.46.3) sa devo giriśaḥ sārdhaṃ mahādevyā maheśvaraḥ / bhūtaiḥ parivṛto nityaṃ bhāti tatra pinākadhṛk // ### [1.46.4](https://indike.org/pramana/in.purana.kurma.1.46.4) vibhaktacāruśikharaḥ kailāso yatra parvataḥ / nivāsaḥ koṭiyakṣāṇāṃ kuberasya ca dhīmataḥ / tatrāpi devadevasya bhavasyāyatanaṃ mahat // ### [1.46.5](https://indike.org/pramana/in.purana.kurma.1.46.5) mandākinī tatra divyā ramyā suvimalodakā / nadī nānāvidhaiḥ padmairanekaiḥ samalaṅkṛtā // ### [1.46.6](https://indike.org/pramana/in.purana.kurma.1.46.6) devadānavagandharvayakṣarākṣasakiṃnaraiḥ / upaspṛṣṭajalā nityaṃ supuṇyā sumanoramā // ### [1.46.7](https://indike.org/pramana/in.purana.kurma.1.46.7) anyāśca nadyaḥ śataśaḥ svarṇapadmairalaṅkṛtāḥ / tāsāṃ kūleṣu devasya sthānāni parameṣṭhinaḥ / devarṣigaṇajuṣṭāni tathā nārāyaṇasya ca // ### [1.46.8](https://indike.org/pramana/in.purana.kurma.1.46.8) sitāntaśikhare cāpi pārijātavanaṃ śubham / tatra śakrasya vipulaṃ bhavanaṃ ratnamaṇḍitam / sphāṭikastambhasaṃyuktaṃ hemagopurasaṃyutam // ### [1.46.9](https://indike.org/pramana/in.purana.kurma.1.46.9) tatrātha devadevasya viṣṇorviśvāmareśituḥ / supuṇyaṃ bhavanaṃ ramyaṃ sarvaratnopaśobhitam // ### [1.46.10](https://indike.org/pramana/in.purana.kurma.1.46.10) tatra nārāyaṇaḥ śrīmān lakṣmyā saha jagatpatiḥ / āste sarvāmaraśreṣṭhaḥ pūjyamānaḥ sanātanaḥ // ### [1.46.11](https://indike.org/pramana/in.purana.kurma.1.46.11) tathā ca vasudhāre tu vasūnāṃ ratnamaṇḍitam / sthānānāmaṣṭakaṃ puṇyaṃ durādharṣaṃ suradviṣām // ### [1.46.12](https://indike.org/pramana/in.purana.kurma.1.46.12) ratnadhāre girivare saptarṣoṇāṃ mahātmanām / saptāśramāṇi puṇyāni siddhāvāsayutāni tu // ### [1.46.13](https://indike.org/pramana/in.purana.kurma.1.46.13) tatra haimaṃ caturdvāraṃ vajranīlādimaṇḍitam / supuṇyaṃ sumahat sthānaṃ brahmaṇo 'vyaktajanmanaḥ // ### [1.46.14](https://indike.org/pramana/in.purana.kurma.1.46.14) tatra devarṣayo viprāḥ siddhā brahmarṣayo 'pare / upāsate sadā devaṃ pitāmahamajaṃ param // ### [1.46.15](https://indike.org/pramana/in.purana.kurma.1.46.15) sa taiḥ saṃpūjito nityaṃ devyā saha caturmukhaḥ / āste hitāya lokānāṃ śāntānāṃ paramā gatiḥ // ### [1.46.16](https://indike.org/pramana/in.purana.kurma.1.46.16) athaikaśṛṅgaśikhare mahāpadmairalaṅkṛtam / svacchāmṛtajalaṃ puṇyaṃ sugandhaṃ sumahat saraḥ // ### [1.46.17](https://indike.org/pramana/in.purana.kurma.1.46.17) jaigīṣavyāśramaṃ tatra yogīndrairupaśobhitam / tatrāsau bhagavān nityamāste śiṣyaiḥ samāvṛtaḥ / praśāntadoṣairakṣudrairbrahmavidbhirmahātmabhiḥ // ### [1.46.18](https://indike.org/pramana/in.purana.kurma.1.46.18) śaṅkho manoharaścaiva kauśikaḥ kṛṣṇa eva ca / sumanā vedanādaśca śiṣyāstasya pradhānataḥ // ### [1.46.19](https://indike.org/pramana/in.purana.kurma.1.46.19) sarve yogaratāḥ śāntā bhasmoddhūlitavigrahāḥ / upāsate mahāvīryā brahmavidyāparāyaṇāḥ // ### [1.46.20](https://indike.org/pramana/in.purana.kurma.1.46.20) teṣāmanugrihārthāya yatīnāṃ śāntacetasām / sānnidhyaṃ kurute bhūyo devyā saha maheśvaraḥ // ### [1.46.21](https://indike.org/pramana/in.purana.kurma.1.46.21) anyānicāśramāṇi syustasmin girivarottame / munīnāṃ yuktamanasāṃ sarāṃsi saritastathā // ### [1.46.22](https://indike.org/pramana/in.purana.kurma.1.46.22) teṣu yogaratā viprā jāpakāḥ saṃyatendriyāḥ / brahmaṇyāsaktamanaso ramante jñānatatparāḥ // ### [1.46.23](https://indike.org/pramana/in.purana.kurma.1.46.23) ātmanyātmānamādhāya śikhāntāntaramāsthitam / dhāyāyanti devamīśānaṃ yena sarvamidaṃ tatam // ### [1.46.24](https://indike.org/pramana/in.purana.kurma.1.46.24) sumeghe vāsavasthānaṃ sahastrādityasaṃnibham / tatrāste bhagavānindraḥ śacyā saha sureśvaraḥ // ### [1.46.25](https://indike.org/pramana/in.purana.kurma.1.46.25) gajaśaile tu durgāyā bhavanaṃ maṇitāraṇam / āste bhagavatī durgā tatra sākṣānmaheśvarī // ### [1.46.26](https://indike.org/pramana/in.purana.kurma.1.46.26) upāsyamānā vividhaiḥ śaktibhedairitastataḥ / pītvā yogāmṛtaṃ labdhvā sākṣādānandamaiśvaram // ### [1.46.27](https://indike.org/pramana/in.purana.kurma.1.46.27) sunīlasya gireḥ śṛṅge nānādhātusamujjvale / rākṣasānāṃ purāṇi syuḥ sarāṃsi śataśo dvijāḥ // ### [1.46.28](https://indike.org/pramana/in.purana.kurma.1.46.28) tathā puraśataṃ viprāḥ śataśṛṅge mahācale / sphāṭikastambhasaṃyuktaṃ yakṣāṇāmamitaujasām // ### [1.46.29](https://indike.org/pramana/in.purana.kurma.1.46.29) śvetodaragireḥ śṛṅge suparṇasya mahātmanaḥ / prākāragopuropetaṃ maṇitoraṇamaṇḍitam // ### [1.46.30](https://indike.org/pramana/in.purana.kurma.1.46.30) sa tatra garuḍaḥ śrīmān sākṣād viṣṇurivāparaḥ / dhyātvāste tat paraṃ jyotirātmānaṃ viṣṇumavyayam // ### [1.46.31](https://indike.org/pramana/in.purana.kurma.1.46.31) anyacca bhavanaṃ puṇyaṃ śrīśṛṅge munipuṅgavāḥ / śrīdevyāḥ sarvaratnāḍhyaṃ haimaṃ sumaṇitoraṇam // ### [1.46.32](https://indike.org/pramana/in.purana.kurma.1.46.32) tatra sā paramā śaktirviṣṇoratimanoramā / anantavibhavā lakṣmīrjagatsaṃmohanotsukā // ### [1.46.33](https://indike.org/pramana/in.purana.kurma.1.46.33) adhyāste devagandharvasiddhacāraṇavanditā / vicintya jagatoyoniṃ svaśaktikiraṇojjvalā // ### [1.46.34](https://indike.org/pramana/in.purana.kurma.1.46.34) tatraiva devadevasya viṣṇorāyatanaṃ mahat / sarāṃsi tatra catvāri vicitrakamalāśrayā // ### [1.46.35](https://indike.org/pramana/in.purana.kurma.1.46.35) tathā sahastraśikhare vidyādharapurāṣṭakam / ratnasopānasaṃyuktaṃ sarobhiścopaśobhitam // ### [1.46.36](https://indike.org/pramana/in.purana.kurma.1.46.36) nadyo vimalapānīyāścitranīlotpalākarāḥ / karṇikāravanaṃ dvivyaṃ tatrāste śaṅkaromayā // ### [1.46.37](https://indike.org/pramana/in.purana.kurma.1.46.37) pāriyātre mahāśaile mahālakṣmyāḥ puraṃ śubham / ramyaprāsādasaṃyuktaṃ ghaṇṭācāmarabhūṣitam // ### [1.46.38](https://indike.org/pramana/in.purana.kurma.1.46.38) nṛtyadbhirapsaraḥ saṅghairitaścetaśca śobhitam / mṛdaṅgamurajodghuṣṭaṃ vīṇāveṇunināditam // ### [1.46.39](https://indike.org/pramana/in.purana.kurma.1.46.39) gandharvakiṃnarākīrṇaṃ saṃvṛtaṃ siddhapuṅgavaiḥ / bhāsvadbhittisamākīrṇaṃ mahāprāsādasaṃkulam // ### [1.46.40](https://indike.org/pramana/in.purana.kurma.1.46.40) gaṇeśvarāṅganājuṣṭaṃ dhārmikāṇāṃ sudarśanam / tatra sā vasate devī nityaṃ yogaparāyaṇā // ### [1.46.41](https://indike.org/pramana/in.purana.kurma.1.46.41) mahālakṣmīrmahādevī triśūlavaradhāriṇī / trinetrā sarvaśasaktībhiḥ saṃvṛtā sadasanmayā / paśyanti tatra munayaḥ siddhā ye brahmavādinaḥ // ### [1.46.42](https://indike.org/pramana/in.purana.kurma.1.46.42) supārśvasyottare bhāge sarasvatyāḥ purottamam / sarāṃsi siddhajuṣṭāni devabhogyāni sattamāḥ // ### [1.46.43](https://indike.org/pramana/in.purana.kurma.1.46.43) pāṇḍurasya gireḥ śṛṅge vicitradrumasaṃkule / sandharvāṇāṃ puraśataṃ divyastrībhiḥ samāvṛtam // ### [1.46.44](https://indike.org/pramana/in.purana.kurma.1.46.44) teṣu nityaṃ madotsiktā varanāryastathaiva ca / krīḍanti muditā nityaṃ vilāsairbhogatatparāḥ // ### [1.46.45](https://indike.org/pramana/in.purana.kurma.1.46.45) añjanasya gireḥ śṛṅge nārīṇāṃ puramuttamam / vasanti tatrāpsaraso rambhādyā ratilālasāḥ // ### [1.46.46](https://indike.org/pramana/in.purana.kurma.1.46.46) citrasenādayo yatra samāyāntyarthinaḥ sadā / sā purī sarvaratnāḍhyā naikaprastravaṇairyutā // ### [1.46.47](https://indike.org/pramana/in.purana.kurma.1.46.47) anekāni purāṇi syuḥ kaumude cāpi suvratāḥ / rudrāṇāṃ śāntarajasāmīśvarārpitacetasām // ### [1.46.48](https://indike.org/pramana/in.purana.kurma.1.46.48) teṣu rudrā mahāyogā maheśāntaracāriṇaḥ / samāsate paraṃ jyotirārūḍhāḥ sthānamuttamam // ### [1.46.49](https://indike.org/pramana/in.purana.kurma.1.46.49) piñjarasya gireḥ śṛṅge gaṇeśānāṃ puratrayam / nandīśvarasya kapile tatrāste suyaśā yatiḥ // ### [1.46.50](https://indike.org/pramana/in.purana.kurma.1.46.50) tathā ca jārudhaiḥ śṛṅge devadevasya dhīmataḥ / dīptamāyatanaṃ puṇyaṃ bhāskarasyāmitaujasaḥ // ### [1.46.51](https://indike.org/pramana/in.purana.kurma.1.46.51) tasyaivottaradigbhāge candrasthānamanuttamam / ramate tatra ramyo 'sau bhagavān śītadīdhitiḥ // ### [1.46.52](https://indike.org/pramana/in.purana.kurma.1.46.52) anyacca bhavanaṃ divyaṃ haṃsaśaile maharṣayaḥ / sahastrayojanāyāmaṃ suvarṇamaṇitoraṇam // ### [1.46.53](https://indike.org/pramana/in.purana.kurma.1.46.53) tatrāste bhagavān brahmā siddhasaṅghairabhiṣṭutaḥ / sāvitryā saha viśvātmā vāsudevādibhiryutaḥ // ### [1.46.54](https://indike.org/pramana/in.purana.kurma.1.46.54) tasya dakṣiṇadigbhāge siddhānāṃ puramuttamam / sanandanādayo yatra vasanti munipuṅgavāḥ // ### [1.46.55](https://indike.org/pramana/in.purana.kurma.1.46.55) pañcaśailasya śikhare dānavānāṃ puratrayam / nātidūreṇa tasyātha daityacāryasya dhīmataḥ // ### [1.46.56](https://indike.org/pramana/in.purana.kurma.1.46.56) sugandhaśailaśikhare saridbhirupaśobhitam / kardamasyāśramaṃ puṇyaṃ tatrāste bhagavānṛṣiḥ // ### [1.46.57](https://indike.org/pramana/in.purana.kurma.1.46.57) tasyaiva pūrvadigbhāge kiñcid vai dakṣiṇāśrite / sanatkumāro bhagavāṃstatrāste brahmavittamaḥ // ### [1.46.58](https://indike.org/pramana/in.purana.kurma.1.46.58) sarveṣveteṣu śaileṣu tatānyeṣu munīśvarāḥ / sarāṃsi vimalā nadyo devānāmālayāni ca // ### [1.46.59](https://indike.org/pramana/in.purana.kurma.1.46.59) siddhaliṅgāni puṇyāni munibhiḥ sthāpitāni tu / vanyānyāśramavaryāṇi saṃkhyātuṃ naiva śaknuyām // ### [1.46.60](https://indike.org/pramana/in.purana.kurma.1.46.60) eṣa saṃkṣepataḥ prokto jambūdvīpasya vistaraḥ / na śakyaṃ vistarād vaktuṃ mayā varṣaśatairapi // ### [1.46.60.p1](https://indike.org/pramana/in.purana.kurma.1.46.60.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge ṣaṭcatvāriśo 'dhyāyaḥ ## Linked texts (7) - [Vāyupurāṇa](https://indike.org/pramana/in.purana.vayu.1.39.45) — Vyāsa, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.12.32) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.12.32) — Basava, Sanskrit - [Brāhmī Saṃhitā](https://indike.org/pramana/in.purana.brahmisamhita.48.6) — Sanskrit - [Brahmisamhita (gurumandalseries1962)](https://indike.org/pramana/in.sampradaya.vaisnava.pancaratra.brahmisamhita*gurumandalseries1962.48.6) — Sanskrit - [Kūrmapurāṇa (Ananta Gokhale)](https://indike.org/pramana/in.purana.kurmapurana.30.p10) — Ananta Gokhale, Sanskrit - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v5.c74.123) — P. V. Kane, English --- Source: [https://indike.org/pramana/in.purana.kurma.1.46](https://indike.org/pramana/in.purana.kurma.1.46) · Pramāṇa