[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.49 # Kurmapurana 1.49 Kūrmapurāṇa 1.49 - **Language:** Sanskrit ## Contents - [1.49.50](https://indike.org/pramana/in.purana.kurma.1.49.50) — 1 part ### [1.49.1](https://indike.org/pramana/in.purana.kurma.1.49.1) ṛṣaya ūcuḥ atītānāgatānīha yāni manvantarāṇi tu / tāni tvaṃ kathayāsmākaṃ vyāsāṃśca dvāpare yuge // ### [1.49.2](https://indike.org/pramana/in.purana.kurma.1.49.2) vedaśākhāpraṇayanaṃ devadevasya dhīmataḥ / tathāvatārān dharmārthamīśānasya kalau yuge // ### [1.49.3](https://indike.org/pramana/in.purana.kurma.1.49.3) kiyanto devadevasya śiṣyāḥ kaliyugeṣu vai / etat sarvaṃ samāsena sūta vaktumihārhasi // ### [1.49.4](https://indike.org/pramana/in.purana.kurma.1.49.4) sūta uvāca manuḥ svāyaṃbhuvaḥ pūrvaṃ tataḥ svārociṣo manuḥ / uttamastāmasaścaiva raivataścākṣuṣastathā // ### [1.49.5](https://indike.org/pramana/in.purana.kurma.1.49.5) ṣaḍete manavo 'tītāḥ sāṃprataṃ tu raveḥ sutaḥ / vaivasvato 'yaṃ yasyaitat saptamaṃ vartate 'ntaram // ### [1.49.6](https://indike.org/pramana/in.purana.kurma.1.49.6) svāyaṃbhuvaṃ tu kathitaṃ kalpādāvantaraṃ mayā / ata ūrdhvaṃ nibodhadhvaṃ manoḥ svārociṣasya tu // ### [1.49.7](https://indike.org/pramana/in.purana.kurma.1.49.7) pārāvatāśca tuṣitā devāḥ svārociṣe 'ntare / vipaścinnāma devendro babhūvāsurasūdanaḥ // ### [1.49.8](https://indike.org/pramana/in.purana.kurma.1.49.8) ūrjastambhastathā prāṇo dānto 'tha vṛṣabhastathā / timiraścārvarīvāṃśca sapta saptarṣayo 'bhavan // ### [1.49.9](https://indike.org/pramana/in.purana.kurma.1.49.9) caitrakiṃpuruṣādyāśca sutāḥ svārociṣasya tu / dvitīyamatadākhyātamantaraṃ śṛṇu cottaram // ### [1.49.10](https://indike.org/pramana/in.purana.kurma.1.49.10) tṛtīye 'pyantare viprā uttamo nāma vai manuḥ / suśāntistatra devendro babhūvāmitrakarṣaṇaḥ // ### [1.49.11](https://indike.org/pramana/in.purana.kurma.1.49.11) sudhāmānastathā satyāḥ śivāścātha pratardanāḥ / vaśavartinaśca pañcaite gaṇā dvādaśakāḥ smṛtāḥ // ### [1.49.12](https://indike.org/pramana/in.purana.kurma.1.49.12) rajordhvaścordhvabāhuśca sabalaścānayastathā / sutapāḥ śukra ityete sapta saptarṣayo 'bhavan // ### [1.49.13](https://indike.org/pramana/in.purana.kurma.1.49.13) tāmasasyāntare devāḥ surā vāharayastathā / satyāśca sudhiyaścaiva saptaviṃśatikā gaṇāḥ // ### [1.49.14](https://indike.org/pramana/in.purana.kurma.1.49.14) śibirindrastathaivāsīcchatayajñopalakṣaṇaḥ / babhūva śaṅkare bhakto mahādevārcane rataḥ // ### [1.49.15](https://indike.org/pramana/in.purana.kurma.1.49.15) jyotirdharmā pṛthuḥ kāvyaścaitrognirvanakastathā / pīvarastvṛṣayo hyete sapta tatrāpi cāntare // ### [1.49.16](https://indike.org/pramana/in.purana.kurma.1.49.16) pañcame cāpi viprendrā raivato nāma nāmataḥ / manurvasuśca tatrendro babhūvāsuramardanaḥ // ### [1.49.17](https://indike.org/pramana/in.purana.kurma.1.49.17) amitābhā bhūtarayā vaikuṇṭhāḥ svacchamedhasaḥ / ete devagaṇāstatra caturdaśa caturdaśa // ### [1.49.18](https://indike.org/pramana/in.purana.kurma.1.49.18) hiraṇyaromā vedaśrīrūrdhvabāhustathaiva ca / vedabāhuḥ sudhāmā ca parjanyaśca mahāmuniḥ / ete saptarṣayo viprāstatrāsan raivate 'ntare // ### [1.49.19](https://indike.org/pramana/in.purana.kurma.1.49.19) svārociṣaścottamaśca tāmaso raivatastathā / priyavratānvayā hyete catvāro manavaḥ smṛtāḥ // ### [1.49.20](https://indike.org/pramana/in.purana.kurma.1.49.20) ṣaṣṭhe manvantare cāsīccākṣuṣastu manurdvijāḥ / manojavastathaivendro devānapi nibodhataḥ // ### [1.49.21](https://indike.org/pramana/in.purana.kurma.1.49.21) ādyāḥ prasūtā bhāvyāśca pṛthugāśca divaukasaḥ / mahānubhāvā lekhyāśca pañcaite hyaṣṭakā gaṇāḥ // ### [1.49.22](https://indike.org/pramana/in.purana.kurma.1.49.22) sumedhā virajāścaiva haviṣmānuttamo madhuḥ / atināmā sahiṣṇuśca saptāsannṛṣayaḥ śubhāḥ // ### [1.49.23](https://indike.org/pramana/in.purana.kurma.1.49.23) vivasvataḥ suto viprāḥ śrāddhadevo mahādyutiḥ / manuḥ sa vartate dhīmān sāṃprataṃ saptame 'ntare // ### [1.49.24](https://indike.org/pramana/in.purana.kurma.1.49.24) ādityā vasavo rudrā devāstatra marudgaṇāḥ / purandarastathaivendro babhūva paravīrahā // ### [1.49.25](https://indike.org/pramana/in.purana.kurma.1.49.25) vasiṣṭhaḥ kaśyapaścātrirjamadagniśca gautamaḥ / viśvāmitro bharadvājaḥ sapta saptarṣayo 'bhavan // ### [1.49.26](https://indike.org/pramana/in.purana.kurma.1.49.26) viṣṇuśaktiranaupamyā sattvodriktā sthitā sthitau / tadaṃśabhūtā rājānaḥ sarve ca tridivaukasaḥ // ### [1.49.27](https://indike.org/pramana/in.purana.kurma.1.49.27) svāyaṃbhuve 'ntare pūrvamākūtyāṃ mānasaḥ sutaḥ / ruceḥ prajāpateryajñastadaṃśenābhavad dvijāḥ // ### [1.49.28](https://indike.org/pramana/in.purana.kurma.1.49.28) tataḥ punarasau devaḥ prāpte svārociṣe 'ntare / tuṣitāyāṃ samutpannastuṣitaiḥ saha daivataiḥ // ### [1.49.29](https://indike.org/pramana/in.purana.kurma.1.49.29) auttame 'pyantare viṣṇuḥ satyaiḥ saha surottamaiḥ / satyāyāmabhavat satyaḥ satyarūpo janārdanaḥ // ### [1.49.30](https://indike.org/pramana/in.purana.kurma.1.49.30) tāmasasyāntare caiva saṃprāpte punareva hi / haryāyāṃ haribhirdevairharirevābhavaddhariḥ // ### [1.49.31](https://indike.org/pramana/in.purana.kurma.1.49.31) raivate 'pyantare caiva saṃbhūtyāṃ mānaso 'bhavat / saṃbhūto mānasaiḥ sārdhaṃ devaiḥ saha mahādyutiḥ // ### [1.49.32](https://indike.org/pramana/in.purana.kurma.1.49.32) cākṣuṣe 'pyantare caiva vaikuṇṭhaḥ puruṣottamaḥ / vikuṇṭhāyāmasau jajñe vaikuṇṭhairdaivataiḥ saha // ### [1.49.33](https://indike.org/pramana/in.purana.kurma.1.49.33) manvantare 'tra saṃprāpte tathā vaivasvate 'ntare / vāmanaḥ kaśyapād viṣṇuradityāṃ saṃbabhūva ha // ### [1.49.34](https://indike.org/pramana/in.purana.kurma.1.49.34) tribhiḥ kramairimāṃllokāñjitvā yena mahātmanā / purandarāya trailokyaṃ dattaṃ nihatakaṇṭakam // ### [1.49.35](https://indike.org/pramana/in.purana.kurma.1.49.35) ityetāstanavastasya sapta manvantareṣu vai / sapta caivābhavan viprā yābhiḥ saṃrakṣitāḥ prajāḥ // ### [1.49.36](https://indike.org/pramana/in.purana.kurma.1.49.36) yasmād viṣṭamidaṃ kṛtsnaṃ vāmanena mahātmanā / tasmāt sa vai smṛto viṣṇurviśerdhātoḥ praveśanāt // ### [1.49.37](https://indike.org/pramana/in.purana.kurma.1.49.37) eṣa sarvaṃ sṛjatyādau pāti hanti ca keśavaḥ / bhūtāntarātmā bhagavān nārāyaṇa iti śrutiḥ // ### [1.49.38](https://indike.org/pramana/in.purana.kurma.1.49.38) ekāṃśena jagat sarvaṃ vyāpya nārāyaṇaḥ sthitaḥ / caturdhā saṃsthito vyāpī saguṇo nirguṇo 'pi ca // ### [1.49.39](https://indike.org/pramana/in.purana.kurma.1.49.39) ekā bhagavato mūrtirjñānarūpā śivāmalā / vāsudevābhidhānā sā guṇātītā suniṣkalā // ### [1.49.40](https://indike.org/pramana/in.purana.kurma.1.49.40) dvitīyā kālasaṃjñānyā tāmasī śeṣasaṃjñitā / nihanti sakalaṃ cānte vaiṣṇavī paramā tanuḥ // ### [1.49.41](https://indike.org/pramana/in.purana.kurma.1.49.41) sattvodriktā tathaivānyā pradyumneti ca saṃjñitā / jagat sthāpayate sarvaṃ sa viṣṇuḥ prakṛtirdhruvā // ### [1.49.42](https://indike.org/pramana/in.purana.kurma.1.49.42) caturtho vāsudevasya mūrtirbrāhmīti saṃjñitā / rājasī cāniruddhākhyā pradyumnaḥ sṛṣṭikārikā // ### [1.49.43](https://indike.org/pramana/in.purana.kurma.1.49.43) yaḥ svapityakhilaṃ bhūtvā pradyumnena saha prabhuḥ / nārāyaṇākhyo brahmāsau prijāsargaṃ karoti saḥ // ### [1.49.44](https://indike.org/pramana/in.purana.kurma.1.49.44) yā sā nārāyaṇatanuḥ pradyumnākhyā munīśvarāḥ / tayā saṃmohayed viśvaṃ sadevāsuramānuṣam // ### [1.49.45](https://indike.org/pramana/in.purana.kurma.1.49.45) saiva sarvajagatsūtiḥ prakṛtiḥ parikīrtitā / vāsudevo hyanantātmā kevalo nirguṇo hariḥ // ### [1.49.46](https://indike.org/pramana/in.purana.kurma.1.49.46) pradhānaṃ puruṣaḥ kālastattvatrayamanuttamam / vāsudevātmakaṃ nityametad vijñāya mucyate // ### [1.49.47](https://indike.org/pramana/in.purana.kurma.1.49.47) ekaṃ cedaṃ catuṣpādaṃ caturdhā punaracyutaḥ / bibheda vāsudevo 'sau pradyumno hariravyayaḥ // ### [1.49.48](https://indike.org/pramana/in.purana.kurma.1.49.48) kṛṣṇadvaipāyano vyāso viṣṇurnārāyaṇaḥ svayam / apāntaratamāḥ pūrvaṃ svecchayā hyabhavaddhariḥ // ### [1.49.49](https://indike.org/pramana/in.purana.kurma.1.49.49) anādyantaṃ paraṃ brahma na devā narṣayo viduḥ / eko 'yaṃ veda bhagavān vyāso nārāyaṇaḥ prabhuḥ // ### [1.49.50](https://indike.org/pramana/in.purana.kurma.1.49.50) ityetad viṣṇumāhātmyamuktaṃ vo munipuṅgavāḥ / etat satyaṃ punaḥ satyamevaṃ jñātvā na muhyati // ### [1.49.50.p1](https://indike.org/pramana/in.purana.kurma.1.49.50.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge ekonapañcāśo 'dhyāyaḥ ## Linked texts (10) - [Viṣṇupurāṇa (critical edition)](https://indike.org/pramana/in.purana.visnu*crit.3.1.7) — Sanskrit - [Brahmāṇḍapurāṇa](https://indike.org/pramana/in.purana.brahmanda.1.36.65) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.74.59) — Vyāsa, Sanskrit - [Southern recension](https://indike.org/pramana/in.lit.mahabharata.vyasa*southern.12.46.19) — Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.150.2) — Sanskrit - [Mānava Dharmaśāstra](https://indike.org/pramana/in.niti.dharma.manu.1.62) — Manu & Bhṛgu, Sanskrit - [Brāhmī Saṃhitā](https://indike.org/pramana/in.purana.brahmisamhita.51.6) — Sanskrit - [Brahmisamhita (gurumandalseries1962)](https://indike.org/pramana/in.sampradaya.vaisnava.pancaratra.brahmisamhita*gurumandalseries1962.51.6) — Sanskrit - [Kūrmapurāṇa (Ananta Gokhale)](https://indike.org/pramana/in.purana.kurmapurana.33.p2) — Ananta Gokhale, Sanskrit - [Nāradopapurāṇa](https://indike.org/pramana/in.purana.upa.vaisnava.naradopapurana.41.25) — Sanskrit --- Source: [https://indike.org/pramana/in.purana.kurma.1.49](https://indike.org/pramana/in.purana.kurma.1.49) · Pramāṇa