[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.4 # Kurmapurana 1.4: caturtho'dhyāyaḥ Kūrmapurāṇa 1.4 - **Language:** Sanskrit ## Contents - [1.4.65](https://indike.org/pramana/in.purana.kurma.1.4.65) — 1 part ### caturtho'dhyāyaḥ ### [1.4.1](https://indike.org/pramana/in.purana.kurma.1.4.1) sūta uvāca śrutvā'śramavidhiṃ kṛtsanamṛṣayo hṛṣṭamānasāḥ / namaskṛtya hṛṣīkeśaṃ punarvacanamabruvan // ### [1.4.2](https://indike.org/pramana/in.purana.kurma.1.4.2) munaya ūcuḥ bhāṣitaṃ bhavatā sarvaṃ cāturāśramyamuttamam / idānīṃ śrotumicchāmo yathā saṃbhavate jagat // ### [1.4.3](https://indike.org/pramana/in.purana.kurma.1.4.3) kutaḥ sarvamidaṃ jātaṃ kasmiṃśca layameṣyati / niyantā kaśca sarveṣāṃ vadasva puruṣottama // ### [1.4.4](https://indike.org/pramana/in.purana.kurma.1.4.4) śrutvā nārāyaṇo vākyamṛṣīṇāṃ kūrmarūpadhṛk / prāha gambhīrayā vācā bhūtānāṃ prabhavāpyayau // ### [1.4.5](https://indike.org/pramana/in.purana.kurma.1.4.5) śrīkūrma uvāca maheśvaraḥ paro 'vyaktaścaturvyūhaḥ sanātanaḥ / anantaścāprameyaśca niyantā viśvatomukhaḥ // ### [1.4.6](https://indike.org/pramana/in.purana.kurma.1.4.6) avyaktaṃ kāraṇaṃ yattannityaṃ sadasadātmakam / pradhānaṃ prakṛtiśceti yadāhustattvacintakāḥ // ### [1.4.7](https://indike.org/pramana/in.purana.kurma.1.4.7) gandhavarṇarasairhenaṃ śabdasparśavivarjitam / ajaraṃ dhruvamakṣayyaṃ nityaṃ svātmanyavasthitam // ### [1.4.8](https://indike.org/pramana/in.purana.kurma.1.4.8) jagadyonirmahābhūtaṃ paraṃ brahma sanātanam / vigrahaḥ sarvabhūtānāmātmanādhiṣṭhitaṃ mahat // ### [1.4.9](https://indike.org/pramana/in.purana.kurma.1.4.9) anādyantamajaṃ sūkṣmaṃ triguṇaṃ prabhavāpyayam / asāṃpratamavijñeyaṃ brahmāgre samavartata // ### [1.4.10](https://indike.org/pramana/in.purana.kurma.1.4.10) guṇasāmye tadā tasmin puruṣe cātmani sthite / prākṛtaḥ pralayo jñeyo yāvad viśvasamudbhavaḥ // ### [1.4.11](https://indike.org/pramana/in.purana.kurma.1.4.11) brāhmī rātririyaṃ proktā ahaḥ sṛṣṭirudāhṛtā / aharna vidyate tasya na rātrirhyupacārataḥ // ### [1.4.12](https://indike.org/pramana/in.purana.kurma.1.4.12) niśānte pratibuddho 'sau jagadādiranādimān / sarvabhūtamayo 'vyakto hyantaryāmīśvaraḥ paraḥ // ### [1.4.13](https://indike.org/pramana/in.purana.kurma.1.4.13) prakṛtiṃ puruṣaṃ caiva praviśyāśu maheśvaraḥ / kṣobhayāmāsa yogena pareṇa parameśvaraḥ // ### [1.4.14](https://indike.org/pramana/in.purana.kurma.1.4.14) yathā mado narastrīṇāṃ yathā vā mādhavo 'nilaḥ / anupraviṣṭaḥ kṣobhāya tathāsau yogamūrtimān // ### [1.4.15](https://indike.org/pramana/in.purana.kurma.1.4.15) sa eva kṣobhako viprāḥ kṣobhyaśca parameśvaraḥ / sa saṃkocavikāsābhyāṃ pradhānatve 'pi ca sthitaḥ // ### [1.4.16](https://indike.org/pramana/in.purana.kurma.1.4.16) pradhānāt kṣobhyamāṇācca tathā puṃsaḥ purātanāt / prādurāsīnmahad bījaṃ pradhānapuruṣātmakam // ### [1.4.17](https://indike.org/pramana/in.purana.kurma.1.4.17) mahānātmā matirbrahmā prabuddhiḥ khyātirīśvaraḥ / prajñādhṛtiḥ smṛtiḥ saṃvidetasmāditi tat smṛtam // ### [1.4.18](https://indike.org/pramana/in.purana.kurma.1.4.18) vaikārikastaijasaśca bhūtādiścaiva tāmasaḥ / trividho 'yamahaṅkāro mahataḥ saṃbabhūva ha // ### [1.4.19](https://indike.org/pramana/in.purana.kurma.1.4.19) ahaṅkāro 'bimānaśca kartā mantā ca sa smṛtaḥ / ātmā ca pudgalo jīvo yataḥ sarvāḥ pravṛttayaḥ // ### [1.4.20](https://indike.org/pramana/in.purana.kurma.1.4.20) pañcabhūtānyahaṅkārāt tanmātrāṇi ca jajñire / indriyāṇi tathā devāḥ sarvaṃ tasyātmajaṃ jagat // ### [1.4.21](https://indike.org/pramana/in.purana.kurma.1.4.21) manastvavyaktajaṃ proktaṃ vikāraḥ prathamaḥ smṛtaḥ / yenāsau jāyate kartā bhūtādīṃścānupaśyati // ### [1.4.22](https://indike.org/pramana/in.purana.kurma.1.4.22) vaikārikādahaṅkārāt sargo vaikāriko 'bhavat / taijasānīndriyāṇi syurdevā vaikārikā daśa // ### [1.4.23](https://indike.org/pramana/in.purana.kurma.1.4.23) ekādaśaṃ manastatra svaguṇenobhayātmakam / bhūtatanmātrasargo 'yaṃ bhūtāderabhavan prajāḥ // ### [1.4.24](https://indike.org/pramana/in.purana.kurma.1.4.24) bhūtādistu vikurvāṇaḥ śabdamātraṃ sasarja ha / ākāśaṃ śuṣiraṃ tasmādutpannaṃ śabdalakṣaṇam // ### [1.4.25](https://indike.org/pramana/in.purana.kurma.1.4.25) ākāśastu vikurvāṇaḥ sparśamātraṃ sasarja ha / vāyurutpadyate tasmāt tasya sparśo guṇo mataḥ // ### [1.4.26](https://indike.org/pramana/in.purana.kurma.1.4.26) vāyuścāpi vikurvāṇo rūpamātraṃ sasarja ha / jyotirutpadyate vāyostadrūpaguṇamucyate // ### [1.4.27](https://indike.org/pramana/in.purana.kurma.1.4.27) jyotiścāpi vikurvāṇaṃ rasamātraṃ sasarja ha / saṃbhavanti tato 'mbhāṃsi rasādhārāṇi tāni tu // ### [1.4.28](https://indike.org/pramana/in.purana.kurma.1.4.28) āpaścāpi vikurvantyo gandhamātraṃ sasarjire / saṃghāto jāyate tasmāt tasya gandho guṇo mataḥ // ### [1.4.29](https://indike.org/pramana/in.purana.kurma.1.4.29) ākāśaṃ śabdamātraṃ yat sparśamātraṃ samāvṛṇot / dviguṇastu tato vāyuḥ śabdasparśātmako 'bhavat // ### [1.4.30](https://indike.org/pramana/in.purana.kurma.1.4.30) rūpaṃ tathaivāviśataḥ śabdasparśau guṇāvubhau / triguṇaḥ syāt tato vahniḥ sa śabdasparśarūpavān // ### [1.4.31](https://indike.org/pramana/in.purana.kurma.1.4.31) śabda sparśaśca rūpaṃ ca rasamātraṃ samāviśan / tasmāccaturguṇā āpo vijñeyāstu rasātmikāḥ // ### [1.4.32](https://indike.org/pramana/in.purana.kurma.1.4.32) śabdaḥ sparśaśca rūpaṃ ca raso gandhaṃ samāviśan / tasamāt pañcaguṇā bhūmiḥ sthūlā bhūteṣu śabdyate // ### [1.4.33](https://indike.org/pramana/in.purana.kurma.1.4.33) śāntā ghorāśca mūḍhāśca viśeṣāstena te smṛtāḥ / parasparānupraveśād dhārayanti parasparam // ### [1.4.34](https://indike.org/pramana/in.purana.kurma.1.4.34) ete sapta mahātmāno hyanyonyasya samāśrayāt / nāśaknuvan prajāḥ straṣṭumasamāgamya kṛtsnaśaḥ // ### [1.4.35](https://indike.org/pramana/in.purana.kurma.1.4.35) puruṣādhiṣṭhitātvācca avyaktānugraheṇa ca / mahādādayo viśeṣāntā hmaṇḍamutpādayanti te // ### [1.4.36](https://indike.org/pramana/in.purana.kurma.1.4.36) ekakālasamutpannaṃ jalabudbudavacca tat / viśeṣebhyo 'ṇḍamabhavad bṛhat tadudakeśayam // ### [1.4.37](https://indike.org/pramana/in.purana.kurma.1.4.37) tasmin kāryasya karaṇaṃ saṃsiddhiḥ parameṣṭhinaḥ / prākṛte 'ṇḍe vivṛttaḥ sa kṣetrajño brahmasaṃjñitaḥ // ### [1.4.38](https://indike.org/pramana/in.purana.kurma.1.4.38) sa vai śarīrī prathamaḥ sa vai puruṣa ucyate / ādikartā sa bhūtānāṃ brahmāgre samavartata // ### [1.4.39](https://indike.org/pramana/in.purana.kurma.1.4.39) yamāhuḥ puruṣaṃ haṃsaṃ pradhānāt parataḥ sthitam / hiraṇyagarbhaṃ kapilaṃ chandomūrti sanātanam // ### [1.4.40](https://indike.org/pramana/in.purana.kurma.1.4.40) merurulbamabhūt tasya jarāyuścāpi parvatāḥ / garbhodakaṃ samudrāśca tasyāsan paramātmanaḥ // ### [1.4.41](https://indike.org/pramana/in.purana.kurma.1.4.41) tasminnaṇḍe 'bhavad viśvaṃ sadevāsuramānuṣam / candrādityau sanakṣatrau sagrahau saha vāyunā // ### [1.4.42](https://indike.org/pramana/in.purana.kurma.1.4.42) adbhirdaśaguṇābhiśca bāhyato 'ṇḍaṃ samāvṛtam / āpo daśaguṇenaiva tejasā bāhyato vṛtāḥ // ### [1.4.43](https://indike.org/pramana/in.purana.kurma.1.4.43) tejo daśaguṇenaiva bāhyato vāyunāvṛtam / ākāśenāvṛto vāyuḥ khaṃ tu bhūtādināvṛtam // ### [1.4.44](https://indike.org/pramana/in.purana.kurma.1.4.44) bhūtādirmahatā tadvadavyaktenāvṛto mahān / ete lokā mahātmanaḥ sarvatattvābhimāninaḥ // ### [1.4.45](https://indike.org/pramana/in.purana.kurma.1.4.45) vasanti tatra puruṣāstadātmāno vyavasthitāḥ / īśvarā yogadharmāṇo ye cānye tattvacintakāḥ // ### [1.4.46](https://indike.org/pramana/in.purana.kurma.1.4.46) sarvajñāḥ śāntarajaso nityaṃ muditamānasāḥ / etairāvaraṇairaṇḍaṃ saptabhiḥ prākṛtairvṛtam // ### [1.4.47](https://indike.org/pramana/in.purana.kurma.1.4.47) etāvacchakyate vaktuṃ māyaiṣā gahanā dvijāḥ / etat prādhānikaṃ kāryaṃ yanmayā bījamīritam / prajāpateḥ parā mūrtiritīyaṃ vaidikī śrutiḥ // ### [1.4.48](https://indike.org/pramana/in.purana.kurma.1.4.48) brahmāṇḍametat sakalaṃ saptalokatalānvitam / dvitīyaṃ tasya devasya śarīraṃ parameṣṭhinaḥ // ### [1.4.49](https://indike.org/pramana/in.purana.kurma.1.4.49) hiraṇyagarbho bhagavān brahmā vai kanakāṇḍajaḥ / tṛtīyaṃ bhagavadrūpaṃ prāhurvedārthavedinaḥ // ### [1.4.50](https://indike.org/pramana/in.purana.kurma.1.4.50) rajoguṇamayaṃ cānyad rūpaṃ tasyaiva dhīmataḥ / caturmukhaḥ sa bhagavān jagatsṛṣṭau pravartate // ### [1.4.51](https://indike.org/pramana/in.purana.kurma.1.4.51) sṛṣṭaṃ ca pāti sakalaṃ viśvātmā viśvatomukhaḥ / sattvaṃ guṇamupāśritya viṣṇurviśveśvaraḥ svayam // ### [1.4.52](https://indike.org/pramana/in.purana.kurma.1.4.52) antakāle svayaṃ devaḥ sarvātmā parameśvaraḥ / tamoguṇaṃ samāśritya rudraḥ saṃharate jagat // ### [1.4.53](https://indike.org/pramana/in.purana.kurma.1.4.53) eko 'pi sanmahādevastridhāsau samavasthitaḥ / sargarakṣālayaguṇairnirguṇo 'pi nirañjanaḥ / ekadhā sa dvidhā caiva tridhā ca bahudhā punaḥ // ### [1.4.54](https://indike.org/pramana/in.purana.kurma.1.4.54) yogeśvaraḥ śarīrāṇi karoti vikaroti ca / nānākṛtikriyārūpanāmavanti svalīlayā // ### [1.4.55](https://indike.org/pramana/in.purana.kurma.1.4.55) hitāya caiva bhaktānāṃ sa eva grasate punaḥ / tridhā vibhajya cātmānaṃ traikālye saṃpravartate / sṛjate grasate caiva vīkṣate ca viśeṣataḥ // ### [1.4.56](https://indike.org/pramana/in.purana.kurma.1.4.56) yasmāt sṛṣṭvānugṛhṇāti grasate ca punaḥ prajāḥ / guṇātmakatvāt traikālye tasmādekaḥ sa ucyate // ### [1.4.57](https://indike.org/pramana/in.purana.kurma.1.4.57) agre hiraṇyagarbhaḥ sa prādurbhūtaḥ sanātanaḥ / āditvādādidevo 'sau ajātatvādajaḥ smṛtaḥ // ### [1.4.58](https://indike.org/pramana/in.purana.kurma.1.4.58) pātiyasmāt prajāḥ sarvāḥ prajāpatiriti smṛtaḥ / deveṣu ca mahādevo māhadeva iti smṛtaḥ // ### [1.4.59](https://indike.org/pramana/in.purana.kurma.1.4.59) bṛhattvācca smṛto brahmā paratvāt parameśvaraḥ / vaśitvādapyavaśyatvādīśvaraḥ paribhāṣitaḥ // ### [1.4.60](https://indike.org/pramana/in.purana.kurma.1.4.60) ṛṣiḥ sarvatragatvena hariḥ sarvaharo yataḥ / anutpādācca pūrvatvāt svayaṃbhūriti sa smṛtaḥ // ### [1.4.61](https://indike.org/pramana/in.purana.kurma.1.4.61) narāṇāmayano yasmāt tena nārāyaṇaḥ smṛtaḥ / haraḥ saṃsāraharaṇād vibhutvād viṣṇurucyate // ### [1.4.62](https://indike.org/pramana/in.purana.kurma.1.4.62) bhagavān sarvavijñānādavanādomiti smṛtaḥ / sarvajñaḥ sarvavijñānāt sarvaḥ sarvamayo yataḥ // ### [1.4.63](https://indike.org/pramana/in.purana.kurma.1.4.63) śivaḥ sa nirmalo yasmād vibhuḥ sarvagato yataḥ / tāraṇāt sarvaduḥ khānāṃ tārakaḥ parigīyate // ### [1.4.64](https://indike.org/pramana/in.purana.kurma.1.4.64) bahunātra kimuktena sarvaṃ brahmamayaṃ jagat / anekabhedabhinnastu krīḍate parameśvaraḥ // ### [1.4.65](https://indike.org/pramana/in.purana.kurma.1.4.65) ityeṣa prākṛtaḥ sargaḥ saṃkṣepāt kathito mayā / abuddhipūrvako viprā brāhmīṃ sṛṣṭiṃ nibodhata // ### [1.4.65.p1](https://indike.org/pramana/in.purana.kurma.1.4.65.p1) iti śrīkūrmapurāṇe ṣaṭsāhastryāṃ saṃhitāyāṃ pūrvaṃvibhāge caturtho 'dhyāyaḥ ## Linked texts (9) - [Vāyupurāṇa](https://indike.org/pramana/in.purana.vayu.1.4.19) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.45.34) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.1.2.31) — Sanskrit - [Saurapurāṇa](https://indike.org/pramana/in.purana.upa.saiva.saura.21.4) — Sanskrit - [Padmapurāṇa](https://indike.org/pramana/in.purana.padma.1.1.97) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.1.3.34) — Vyāsa, Sanskrit - [Narasiṃhapurāṇa](https://indike.org/pramana/in.purana.upa.vaisnava.narasimha.1.47) — Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.4.p2) — Ativīrarāma Pāṇṭiyar, Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.26.2) — Kamalākarabhaṭṭa 1612, Sanskrit --- Source: [https://indike.org/pramana/in.purana.kurma.1.4](https://indike.org/pramana/in.purana.kurma.1.4) · Pramāṇa