[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 1.9 # Kurmapurana 1.9: navamo'dhyāyaḥ Kūrmapurāṇa 1.9 - **Language:** Sanskrit ## Contents - [1.9.87](https://indike.org/pramana/in.purana.kurma.1.9.87) — 1 part ### navamo'dhyāyaḥ ### [1.9.1](https://indike.org/pramana/in.purana.kurma.1.9.1) sūta uvāca etacchrutvā tu vacanaṃ nāradādyā maharṣayaḥ / praṇamya varadaṃ viṣṇuṃ papracchuḥ saṃśayānvitā // ### [1.9.2](https://indike.org/pramana/in.purana.kurma.1.9.2) ṛṣaya ūcuḥ kathito bhavatā sargo mukhyādīnāṃ janārdana / idānīṃ saṃśayaṃ cemamasmākaṃ chettumarhasi // ### [1.9.3](https://indike.org/pramana/in.purana.kurma.1.9.3) kathaṃ sa bhagavānīśaḥ pūrvajo 'pi pinākadhṛk / putratvamagacchaṃbhurbrahmaṇo 'vyaktajanmanaḥ // ### [1.9.4](https://indike.org/pramana/in.purana.kurma.1.9.4) kathaṃ ca bhagavāñjajñe brahmā lokapitāmahaḥ / aṇḍajo jagatāmīśastanno vaktumihārhasi // ### [1.9.5](https://indike.org/pramana/in.purana.kurma.1.9.5) śrīkūrma uvāca śṛṇudhvamṛṣayaḥ sarve śaṅkarasyāmitaujasaḥ / putratvaṃ brahmaṇastasya padmayonitvameva ca // ### [1.9.6](https://indike.org/pramana/in.purana.kurma.1.9.6) atītakalpāvasāne tamobhūtaṃ jagat trayam / āsīdekārṇavaṃ sarvaṃ na devādyā na carṣayaḥ // ### [1.9.7](https://indike.org/pramana/in.purana.kurma.1.9.7) tatra nārāyaṇo devo nirjane nirupaplave / āśritya śeṣaśayanaṃ suṣvāpa puruṣottamaḥ // ### [1.9.8](https://indike.org/pramana/in.purana.kurma.1.9.8) sahastraśīrṣā bhūtvā sa sahastrākṣaḥ sahastrapāt / sahastrabāhuḥ sarvajñaścintyamāno manīṣibhiḥ // ### [1.9.9](https://indike.org/pramana/in.purana.kurma.1.9.9) pītavāsā viśālākṣo nīlajimūtasannibhaḥ / mahāvibhūtiryogātmā yogināṃ hṛdayālayaḥ // ### [1.9.10](https://indike.org/pramana/in.purana.kurma.1.9.10) kadācit tasya suptasya līlārthaṃ divyamadbhutam / trailokyasāraṃ vimalaṃ nābhyāṃ paṅkajamudvabhau // ### [1.9.11](https://indike.org/pramana/in.purana.kurma.1.9.11) śatayojanavistīrṇaṃ taruṇādityasannibham / divyagandhamayaṃ puṇyaṃ karṇikākesarānvitam // ### [1.9.12](https://indike.org/pramana/in.purana.kurma.1.9.12) tasyaivaṃ suciraṃ kālaṃ vartamānasya śārṅgiṇaḥ / hiraṇyagarbho bhagavāṃstaṃ deśamupacakrame // ### [1.9.13](https://indike.org/pramana/in.purana.kurma.1.9.13) sa taṃ kareṇa viśvātmā samutthāpya sanātanam / provāca madhuraṃ vākyaṃ māyayā tasya mohitaḥ // ### [1.9.14](https://indike.org/pramana/in.purana.kurma.1.9.14) asminnekārṇave ghore nirjane tamasāvṛte / ekākī ko bhavāñchete brūhi me puruṣarṣabha // ### [1.9.15](https://indike.org/pramana/in.purana.kurma.1.9.15) tasya tad vacanaṃ śrutvā vihasya garuḍadhvajaḥ / uvāca devaṃ brahmāṇaṃ meghagambhīraniḥ svanaḥ // ### [1.9.16](https://indike.org/pramana/in.purana.kurma.1.9.16) bho bho nārāyaṇaṃ devaṃ lokānāṃ prabhavāpyayam / mahāyogeśvaraṃ māṃ tvaṃ jānīhi puruṣottamam // ### [1.9.17](https://indike.org/pramana/in.purana.kurma.1.9.17) mayi paśya jagat kṛtsnaṃ tvāṃ ca lokapitāmaham / saparvatamahādvīpaṃ samudraiḥ saptabhirvṛtam // ### [1.9.18](https://indike.org/pramana/in.purana.kurma.1.9.18) evamābhāṣya viścātmā provāca puruṣaṃ hariḥ / jānannapi mahāyogī ko bhavāniti vedhasam // ### [1.9.19](https://indike.org/pramana/in.purana.kurma.1.9.19) tataḥ prahasya bhagavān brahmā vedanidhiḥ prabhuḥ / pratyuvācāmbujābhākṣaṃ sasmitaṃ ślakṣṇayā girā // ### [1.9.20](https://indike.org/pramana/in.purana.kurma.1.9.20) ahaṃ dhātā vidhātā ca svayaṃbhūḥ prapitāmahaḥ / mayyeva saṃsthitaṃ viśvaṃ brahmāhaṃ viśvatomukhaḥ // ### [1.9.21](https://indike.org/pramana/in.purana.kurma.1.9.21) śrutvā vācaṃ sa bhagavān viṣṇuḥ satyaparākramaḥ / anujñāpyātha yogena praviṣṭo brahmaṇastanum // ### [1.9.22](https://indike.org/pramana/in.purana.kurma.1.9.22) tralokyametat sakalaṃ sadevāsuramānuṣam / udare tasya devasya dṛṣṭvā vismayamāgataḥ // ### [1.9.23](https://indike.org/pramana/in.purana.kurma.1.9.23) tadāsya vaktrānniṣkramya pannagendraniketanaḥ / ajātaśatrurbhagavān pitāmahamathābravīt // ### [1.9.24](https://indike.org/pramana/in.purana.kurma.1.9.24) bhavānapyevamevādya śāśvataṃ hi mamoharam / praviśya lokān paśyaitān vicitrān puruṣarṣabha // ### [1.9.25](https://indike.org/pramana/in.purana.kurma.1.9.25) tataḥ prahlādanīṃ vāṇī śrutvā tasyābhinandya ca / śrīpaterudaraṃ bhūyaḥ praviveśa kuśadhvajaḥ // ### [1.9.26](https://indike.org/pramana/in.purana.kurma.1.9.26) tāneva lokān garbhasthānapaśyat satyavikramaḥ / paryaṭitvā tu devasya dadṛśe 'ntaṃ na vai hareḥ // ### [1.9.27](https://indike.org/pramana/in.purana.kurma.1.9.27) tato dvārāṇi sarvāṇi pihitāni mahātmanā / janārdanena brahmāsau nābhyāṃ dvāramavindata // ### [1.9.28](https://indike.org/pramana/in.purana.kurma.1.9.28) tatra yogabalenāsau praviśya kanakāṇḍajaḥ / ujjahārātmano rūpaṃ puṣkarāccaturānanaḥ // ### [1.9.29](https://indike.org/pramana/in.purana.kurma.1.9.29) virarājāravindasthaḥ padmagarbhasamadyutiḥ / brahmā svayaṃbhūrbhagavān jagadyoniḥ pitāmahaḥ // ### [1.9.30](https://indike.org/pramana/in.purana.kurma.1.9.30) samanyamāno viśveśamātmānaṃ paramaṃ padam / provāca puruṣaṃ viṣṇuṃ meghagambhīrayā girā // ### [1.9.31](https://indike.org/pramana/in.purana.kurma.1.9.31) kiṃ kṛtaṃ bhavatedānīmātmano jayakāṅkṣayā / eko 'haṃ prabalo nānyo māṃ vai ko 'bibhaviṣyati // ### [1.9.32](https://indike.org/pramana/in.purana.kurma.1.9.32) śrutvā nārāyaṇo vākyaṃ brahmaṇo lokatantriṇaḥ / sāntvapūrvamidaṃ vākyaṃ babhāṣe madhuraṃ hariḥ // ### [1.9.33](https://indike.org/pramana/in.purana.kurma.1.9.33) bhavān dhātā vidhātā ca svayaṃbhūḥ prapitāmahaḥ / na mātsaryābhiyogena dvārāṇi pihitāni me // ### [1.9.34](https://indike.org/pramana/in.purana.kurma.1.9.34) kintu līlārthamevaitanna tvāṃ bādhitumicchayā / ko hi bādhitumanvicched devadevaṃ pitāmaham // ### [1.9.35](https://indike.org/pramana/in.purana.kurma.1.9.35) na te 'nyathāvagantavyaṃ mānyo me sarvathā bhavān / sarvamanvaya kalyāṇaṃ yanmayāpahṛtaṃ tava // ### [1.9.36](https://indike.org/pramana/in.purana.kurma.1.9.36) asmācca kāraṇād brahman putro bhavatu me bhavān / padmayoniriti khyāto matpriyārthaṃ jaganmaya // ### [1.9.37](https://indike.org/pramana/in.purana.kurma.1.9.37) tataḥ sa bhagavān devo varaṃ dattvā kirīṭine / praharṣamatulaṃ gatvā punarviṣṇumabhāṣata // ### [1.9.38](https://indike.org/pramana/in.purana.kurma.1.9.38) bhavān sarvātmako 'nantaḥ sarveṣāṃ parameśvaraḥ / sarvabhūtāntarātmā vai paraṃ bahma sanātanam // ### [1.9.39](https://indike.org/pramana/in.purana.kurma.1.9.39) ahaṃ vai sarvalokānāmātmā lokamaheśvaraḥ / manmayaṃ sarvamevedaṃ brahmāhaṃ puruṣaḥ paraḥ // ### [1.9.40](https://indike.org/pramana/in.purana.kurma.1.9.40) nāvābhyāṃ vidyate hyanyo lokānāṃ parameśvaraḥ / ekā mūrtirdvidhā bhinnā nārāyaṇapitāmahau // ### [1.9.41](https://indike.org/pramana/in.purana.kurma.1.9.41) tenaivamukto brahmāṇaṃ vāsudevo 'bravīdidam / iyaṃ pratijñā bhavato vināśāya bhaviṣyati // ### [1.9.42](https://indike.org/pramana/in.purana.kurma.1.9.42) kiṃ na paśyasi yogeśaṃ brahmādhipatimavyayam / pradhānapuruṣeśānaṃ vedāhaṃ parameśvaram // ### [1.9.43](https://indike.org/pramana/in.purana.kurma.1.9.43) yaṃ na paśyanti yogīndrāḥ sāṃkhyā api maheśvaram / anādinidhanaṃ brahma tameva śaraṇaṃ vraja // ### [1.9.44](https://indike.org/pramana/in.purana.kurma.1.9.44) tataḥ kruddho 'mbujābhākṣaṃ brahmā provāca keśavam / bhavān na nūnamātmānaṃ vetti tat paramakṣaram // ### [1.9.45](https://indike.org/pramana/in.purana.kurma.1.9.45) brahmāṇaṃ jagatāmekamātmānaṃ paramaṃ padam / nāvābhyāṃ vidyate hyanyo lokānāṃ parameśvaraḥ // ### [1.9.46](https://indike.org/pramana/in.purana.kurma.1.9.46) saṃtyajya nidrāṃ vipulāṃ svamātmānaṃ vilokaya / tasya tat krodhajaṃ vākyaṃ śrutvā viṣṇurabhāṣata // ### [1.9.47](https://indike.org/pramana/in.purana.kurma.1.9.47) mā maivaṃ vada kalyāṇa parivādaṃ mahātmanaḥ / na me 'styaviditaṃ brahman nānyathāhaṃ vadāmite // ### [1.9.48](https://indike.org/pramana/in.purana.kurma.1.9.48) kintu mohayati brahman bhavantaṃ pārameśvarī / māyāśeṣaviśeṣāṇāṃ heturātmasamudbhāvā // ### [1.9.49](https://indike.org/pramana/in.purana.kurma.1.9.49) etāvaduktvā bhagavān viṣṇustūṣṇīṃ babhūva ha / jñātvā tat paramaṃ tattvaṃ svamātmānaṃ maheśvaram // ### [1.9.50](https://indike.org/pramana/in.purana.kurma.1.9.50) kuto 'pyaparimeyātmā bhūtānāṃ parameśvaraḥ / prasādaṃ brahmaṇe kartuṃ prādurāsīt tato haraḥ // ### [1.9.51](https://indike.org/pramana/in.purana.kurma.1.9.51) lalāṭanayano 'nanto jaṭāmaṇḍalamaṇḍitaḥ / triśūlapāṇirbhagavāṃstejasāṃ paramo nidhiḥ // ### [1.9.52](https://indike.org/pramana/in.purana.kurma.1.9.52) divyāṃ viśālāṃ grathitāṃ grahaiḥ sārkendutārakaiḥ / mālāmatyadbhutākārāṃ dhārayan pādalambinīm // ### [1.9.53](https://indike.org/pramana/in.purana.kurma.1.9.53) taṃ dṛṣṭvā devamīśānaṃ brahmā lokapitāmahaḥ / mohito māyayātyarthaṃ pītavāsasamabvīt // ### [1.9.54](https://indike.org/pramana/in.purana.kurma.1.9.54) ka eṣa puruṣo 'nantaḥ śūlapāṇistrilocanaḥ / tejorāśirameyātmā samāyāti janārdana // ### [1.9.55](https://indike.org/pramana/in.purana.kurma.1.9.55) tasya tad vacanaṃ śrutvā viṣṇurdānavamardanaḥ / apaśyadīśvaraṃ devaṃ jvalantaṃ vimale 'mbhasi // ### [1.9.56](https://indike.org/pramana/in.purana.kurma.1.9.56) jñātvā tatparamaṃ bhāvamaiśvaraṃ brahmabhāvanam / provācotthāya bhagavān devadevaṃ pitāmaham // ### [1.9.57](https://indike.org/pramana/in.purana.kurma.1.9.57) ayaṃ devo mahādevaḥ svayañjyotiḥ sanātanaḥ / anādinidhano 'cintyo lokānāmīśvaro mahān // ### [1.9.58](https://indike.org/pramana/in.purana.kurma.1.9.58) śaṅkaraḥ śaṃbhurīśānaḥ sarvātmā parameśvaraḥ / bhūtānāmadhipo yogī maheśo vimalaḥ śivaḥ // ### [1.9.59](https://indike.org/pramana/in.purana.kurma.1.9.59) eṣa dhātā vidhātā ca pradhānapuruṣeśvaraḥ / yaṃ prapaśyanti yatayo brahmabhāvena bhāvitāḥ // ### [1.9.60](https://indike.org/pramana/in.purana.kurma.1.9.60) sṛjatyeṣa jagat kṛtsnaṃ pāti saṃharate tathā / kālo bhūtvā mahādevaḥ kevalo niṣkalaḥ śivaḥ // ### [1.9.61](https://indike.org/pramana/in.purana.kurma.1.9.61) brahmāṇaṃ vidadhe pūrvaṃ bhavantaṃ yaḥ sanātanaḥ / vedāṃśca pradadau tubhyaṃ so 'yamāyāti śaṅkaraḥ // ### [1.9.62](https://indike.org/pramana/in.purana.kurma.1.9.62) asyaiva cāparāṃ mūrti viśvayoniṃ sanātanīm / vāsudevābhidhānāṃ māmavehi prapitāmaha // ### [1.9.63](https://indike.org/pramana/in.purana.kurma.1.9.63) kiṃ na paśyasi yogeśaṃ brahmādhipatimavyayam / divyaṃ bhavatu te cakṣuryena drakṣyasi tatparam // ### [1.9.64](https://indike.org/pramana/in.purana.kurma.1.9.64) labdhvā śaivaṃ tadā cakṣurviṣṇorlokapitāmahaḥ / bubudhe parameśānaṃ purataḥ samavasthitam // ### [1.9.65](https://indike.org/pramana/in.purana.kurma.1.9.65) sa labdhvā paramaṃ jñānamaiśvaraṃ prapitāmahaḥ / prapede śaraṇaṃ devaṃ tameva pitaraṃ śivam // ### [1.9.66](https://indike.org/pramana/in.purana.kurma.1.9.66) oṅkāraṃ samanusmṛtya saṃstabhyātmānamātmanā / atharvaśirasā devaṃ tuṣṭāva ca kṛtāñjaliḥ // ### [1.9.67](https://indike.org/pramana/in.purana.kurma.1.9.67) saṃstutastena bhagavān brahmaṇā parameśvaraḥ / avāpa paramāṃ prītiṃ vyājahāra smayanniva // ### [1.9.68](https://indike.org/pramana/in.purana.kurma.1.9.68) matsamastvaṃ na saṃdeho madbhaktaśca yato bhavān / mayaivotpāditaḥ pūrvaṃ lokasṛṣṭyarthamavyayam // ### [1.9.69](https://indike.org/pramana/in.purana.kurma.1.9.69) tvamātmā hyādipuruṣo mama dehasamudbhavaḥ / varaṃ varaya viśvātman varado 'haṃ tavānagha // ### [1.9.70](https://indike.org/pramana/in.purana.kurma.1.9.70) sa devadevavacanaṃ niśamya kamalodbhavaḥ / nirīkṣya viṣṇuṃ puruṣaṃ praṇamyāha vṛṣadhvajam // ### [1.9.71](https://indike.org/pramana/in.purana.kurma.1.9.71) bhagavan bhūtabhavyeśa mahādevāmbikāpate / tvāmeva putramicchāmi tvayā vā sadṛśaṃ satam // ### [1.9.72](https://indike.org/pramana/in.purana.kurma.1.9.72) mohito 'smi mahādeva māyayā sūkṣmayā tvayā / na jāne paramaṃ bhāvaṃ yāthātathyena te śiva // ### [1.9.73](https://indike.org/pramana/in.purana.kurma.1.9.73) tvameva deva bhaktānāṃ bhrātā mātā pitā suhṛt / prasīda tava pādābjaṃ namāmi śaraṇaṃ gataḥ // ### [1.9.74](https://indike.org/pramana/in.purana.kurma.1.9.74) sa tasya vacanaṃ śrutvā jagannātho vṛṣadhvajaḥ / vyājahāra tadā putraṃ samālokya janārdanam // ### [1.9.75](https://indike.org/pramana/in.purana.kurma.1.9.75) yadarthitaṃ bhagavatā tat kariṣyāmi putraka / vijñānamaiśvaraṃ divyamutpatsyati tavānagha // ### [1.9.76](https://indike.org/pramana/in.purana.kurma.1.9.76) tvameva sarvabhūtānāmādikartā niyojitaḥ / tathā kuruṣva deveśa mayā lokapitāmaha // ### [1.9.77](https://indike.org/pramana/in.purana.kurma.1.9.77) eṣa nārāyaṇo 'nanto mamaiva paramā tanuḥ / bhaviṣyati taveśāno yogakṣemavaho hariḥ // ### [1.9.78](https://indike.org/pramana/in.purana.kurma.1.9.78) evaṃ vyāhṛtya hastābhyāṃ prītātmā parameśvaraḥ / saṃspṛśya devaṃ brahmāṇaṃ hariṃ vacanamabravīt // ### [1.9.79](https://indike.org/pramana/in.purana.kurma.1.9.79) tṛṣṭo 'smi sarvathāhante bhaktyā tava jaganmaya / varaṃ vṛṇīṣvaṃ nahyāvāṃ vibhinnau paramārthataḥ // ### [1.9.80](https://indike.org/pramana/in.purana.kurma.1.9.80) śrutvātha devavacanaṃ viṣṇurviśvajaganmayaḥ / prāha prasannayā vācā samālokya caturmukham // ### [1.9.81](https://indike.org/pramana/in.purana.kurma.1.9.81) eṣa eva varaḥ śloghyo yadahaṃ parameśvaram / paśyāmi paramātmānaṃ bhaktirbhavatu me tvayi // ### [1.9.82](https://indike.org/pramana/in.purana.kurma.1.9.82) tathetyuktvā mahādevaḥ punarviṣṇumabhāṣata / bhavān sarvasya kāryasya kartāha'madhidaivatam // ### [1.9.83](https://indike.org/pramana/in.purana.kurma.1.9.83) manmayaṃ tvanmayaṃ caiva sarvametanna saṃśayaḥ / bhavān somastvahaṃ sūryo bhavān rātrirahaṃ dinam // ### [1.9.84](https://indike.org/pramana/in.purana.kurma.1.9.84) bhavān prakṛtiravyaktamahaṃ puruṣa eva ca / bhavān jñānamahaṃ jñātā bhavān māyāhamīśvaraḥ // ### [1.9.85](https://indike.org/pramana/in.purana.kurma.1.9.85) bhavān vidyātmikā śaktiḥ śaktimānahamīśvaraḥ / yo 'haṃ suniṣkalo devaḥ so 'pi nārāyaṇaḥ paraḥ // ### [1.9.86](https://indike.org/pramana/in.purana.kurma.1.9.86) ekībhāvena paśyanti yogino brahmavādinaḥ / tvāmanāśritya viśvātman na yogī māmupaiṣyati / pālayaitajjagat kṛtsnaṃ sadevāsuramānuṣam // ### [1.9.87](https://indike.org/pramana/in.purana.kurma.1.9.87) itīdamuktvā bhagavānanādiḥ svamāyayā mohitabhūtabhedaḥ / jagāma janmardhivināśahīnaṃ dhāmaikamavyaktamanantaśaktiḥ // ### [1.9.87.p1](https://indike.org/pramana/in.purana.kurma.1.9.87.p1) iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge navamo 'dhyāyaḥ ## Linked texts (5) - [Liṅgapurāṇa](https://indike.org/pramana/in.purana.linga.1.20.27) — Vyāsa, Sanskrit - [Vāyupurāṇa](https://indike.org/pramana/in.purana.vayu.1.24.28) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.App.I.41.324) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.24.27) — Ativīrarāma Pāṇṭiyar 1500, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.9.p2) — Ativīrarāma Pāṇṭiyar, Sanskrit --- Source: [https://indike.org/pramana/in.purana.kurma.1.9](https://indike.org/pramana/in.purana.kurma.1.9) · Pramāṇa