[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.11 # Kurmapurana 2.11: ekādaśo'dhyāyaḥ Kūrmapurāṇa 2.11 - **Language:** Sanskrit ## Contents - [2.11.146](https://indike.org/pramana/in.purana.kurma.2.11.146) — 1 part ### ekādaśo'dhyāyaḥ ### [2.11.1](https://indike.org/pramana/in.purana.kurma.2.11.1) īśvara uvāca ataḥ paraṃ pravakṣyāmi yogaṃ paramadurlabham / yenātmānaṃ prapaśyanti bhānumantamiveśvaram // ### [2.11.2](https://indike.org/pramana/in.purana.kurma.2.11.2) yogāgnirdahati kṣipramaśeṣaṃ pāpapañjaram / prasannaṃ jāyate jñānaṃ sākṣānnirvāṇasiddhidam // ### [2.11.3](https://indike.org/pramana/in.purana.kurma.2.11.3) yogātsaṃjāyate jñānaṃ jñānād yogaḥ pravartate / yogajñānābhiyuktasya prasīdati maheśvaraḥ // ### [2.11.4](https://indike.org/pramana/in.purana.kurma.2.11.4) ekakālaṃ dvikālaṃ vā trikālaṃ nityameva vā / ye yuñjantīha madyogaṃ te vijñeyā maheśvarāḥ // ### [2.11.5](https://indike.org/pramana/in.purana.kurma.2.11.5) yogastu dvividho jñeyo hyabhāvaḥ prathamo mataḥ / aparastu mahāyogaḥ sarvayogottamottamaḥ // ### [2.11.6](https://indike.org/pramana/in.purana.kurma.2.11.6) śūnyaṃ sarvanirābhāsaṃ svarūpaṃ yatra cintyate / abhāvayogaḥ sa prokto yenātmānaṃ prapaśyati // ### [2.11.7](https://indike.org/pramana/in.purana.kurma.2.11.7) yatra paśyati cātmānaṃ nityānandaṃ nirañjanam / mayaikyaṃ sa mahāyogo bhāṣitaḥ parameśvaraḥ // ### [2.11.8](https://indike.org/pramana/in.purana.kurma.2.11.8) ye cānye yogināṃ yogāḥ śrūyante granthavistare / sarve te brahmayogasya kalāṃ nārhanti ṣoḍaśīm // ### [2.11.9](https://indike.org/pramana/in.purana.kurma.2.11.9) yatra sākṣāt prapaśyanti vimuktā viśvamīśvaram / sarveṣāmeva yogānāṃ sa yogaḥ paramo mataḥ // ### [2.11.10](https://indike.org/pramana/in.purana.kurma.2.11.10) sahasraśo 'tha śataśo ye ceśvarabahiṣkṛtāḥ / na te paśyanti māmekaṃ yogino yatamānasāḥ // ### [2.11.11](https://indike.org/pramana/in.purana.kurma.2.11.11) prāṇāyāmastathā dhyānaṃ pratyāhāro 'tha dhāraṇā / samādhiśca muniśreṣṭhā yamo niyama āsanam // ### [2.11.12](https://indike.org/pramana/in.purana.kurma.2.11.12) mayyekacittatāyogo vṛttyantaranirodhataḥ / tatsādhanānyaṣṭadhā tu yuṣmākaṃ kathitāni tu // ### [2.11.13](https://indike.org/pramana/in.purana.kurma.2.11.13) ahiṃsā satyamasteyaṃ brahmacaryāparigrahau / yamāḥ saṃkṣepataḥ proktāścittaśuddhipradā nṛṇām // ### [2.11.14](https://indike.org/pramana/in.purana.kurma.2.11.14) karmaṇā manasā vācā sarvabhūteṣu sarvadā / akleśajananaṃ proktaṃ tvahiṃsā paramarṣibhiḥ // ### [2.11.15](https://indike.org/pramana/in.purana.kurma.2.11.15) ahiṃsāyāḥ paro dharmo nāstyahiṃsā paraṃ sukham / vidhinā yā bhaveddhiṃsā tvahiṃsaiva prakīrtitā // ### [2.11.16](https://indike.org/pramana/in.purana.kurma.2.11.16) satyena sarvamāpnoti satye sarvaṃ pratiṣṭhitam / yathārthakathanācāraḥ satyaṃ proktaṃ dvijātibhiḥ // ### [2.11.17](https://indike.org/pramana/in.purana.kurma.2.11.17) paradravyāpaharaṇaṃ cauryād vātha balena vā / steyaṃ tasyānācaraṇādasteyaṃ dharmasādhanam // ### [2.11.18](https://indike.org/pramana/in.purana.kurma.2.11.18) karmaṇā manasā vācā sarvāvasthāsu sarvadā / sarvatra maithunatyāgaṃ brahmacaryaṃ pracakṣate // ### [2.11.19](https://indike.org/pramana/in.purana.kurma.2.11.19) dravyāṇāmapyanādānamāpadyapi yathecchayā / aparigraha ityāhustaṃ prayatnena pālayet // ### [2.11.20](https://indike.org/pramana/in.purana.kurma.2.11.20) tapaḥ svādhyāyasaṃtoṣāḥ śaucamīśvarapūjanam / samāsānniyamāḥ proktā yogasiddhipradāyinaḥ // ### [2.11.21](https://indike.org/pramana/in.purana.kurma.2.11.21) upavāsaparākādikṛcchracāndrāyaṇādibhiḥ / śarīraśoṣaṇaṃ prāhustāpasāstapa uttamam // ### [2.11.22](https://indike.org/pramana/in.purana.kurma.2.11.22) vedāntaśatarudrīyapraṇavādijapaṃ budhāḥ / sattvaśuddhikaraṃ puṃsāṃ svādhyāyaṃ paricakṣate // ### [2.11.23](https://indike.org/pramana/in.purana.kurma.2.11.23) svādhyāyasya trayo bhedā vācikopāṃśumānasāḥ / uttarottaravaiśiṣṭyaṃ prāhurvedārthavedinaḥ // ### [2.11.24](https://indike.org/pramana/in.purana.kurma.2.11.24) yaḥ śabdabodhajananaḥ pareṣāṃ śṛṇvatāṃ sphuṭam / svādhyāyo vācikaḥ prokta upāṃśoratha lakṣaṇam // ### [2.11.25](https://indike.org/pramana/in.purana.kurma.2.11.25) oṣṭhayoḥ spandamātreṇa parasyāśabdabodhakaḥ / upāṃśureṣa nirdiṣṭaḥ sāhasro vācikājjapaḥ // ### [2.11.26](https://indike.org/pramana/in.purana.kurma.2.11.26) yatpadākṣarasaṅgatyā parispandanavarjitam / cintanaṃ sarvaśabdānāṃ mānasaṃ taṃ japaṃ viduḥ // ### [2.11.27](https://indike.org/pramana/in.purana.kurma.2.11.27) yadṛcchālābhato nityamalaṃ puṃso bhavediti / yā dhīstāmṛṣayaḥ prāhuḥ saṃtoṣaṃ sukhalakṣaṇam // ### [2.11.28](https://indike.org/pramana/in.purana.kurma.2.11.28) bāhyamābhyantaraṃ śaucaṃ dvidhā proktaṃ dvijottamāḥ / mṛjjalābhyāṃ smṛtaṃ bāhyaṃ manaḥśuddhirathāntaram // ### [2.11.29](https://indike.org/pramana/in.purana.kurma.2.11.29) stutismaraṇapūjābhirvāṅmanaḥkāyakarmabhiḥ / suniścalā śive bhaktiretadīśvarapūjanam // ### [2.11.30](https://indike.org/pramana/in.purana.kurma.2.11.30) yamāḥ saniyamāḥ proktāḥ prāṇāyāmaṃ nibodhata / prāṇaḥ svadehajo vāyurāyāmastannirodhanam // ### [2.11.31](https://indike.org/pramana/in.purana.kurma.2.11.31) uttamādhamamadhyatvāt tridhāyaṃ pratipāditaḥ / sa eva dvividhaḥ proktaḥ sagarbho 'garbha eva ca // ### [2.11.32](https://indike.org/pramana/in.purana.kurma.2.11.32) mātrādvādaśako mandaścaturviṃśatimātrikaḥ / madhyamaḥ prāṇasaṃrodhaḥ ṣaṭtriṃśanmātrikottamaḥ // ### [2.11.33](https://indike.org/pramana/in.purana.kurma.2.11.33) prasvedakampanotthānajanakatvaṃ yathākramam / mandamadhyamamukhyānāmānandāduttamottamaḥ // ### [2.11.34](https://indike.org/pramana/in.purana.kurma.2.11.34) sagarbhamāhuḥ sajapamagarbhaṃ vijapaṃ budhāḥ / etad vai yogināmuktaṃ prāṇāyāmasya lakṣaṇam // ### [2.11.35](https://indike.org/pramana/in.purana.kurma.2.11.35) savyāhṛtiṃ sapraṇavāṃ gāyatrīṃ śirasā saha / trirjapedāyataprāṇaḥ prāṇāyāmaḥ sa ucyate // ### [2.11.36](https://indike.org/pramana/in.purana.kurma.2.11.36) recakaḥ pūrakaścaiva prāṇāyāmo 'tha kumbhakaḥ / procyate sarvaśāstreṣu yogibhiryatamānasaiḥ // ### [2.11.37](https://indike.org/pramana/in.purana.kurma.2.11.37) recako 'jastraniśvāsāt pūrakastannirodhataḥ / sāmyena saṃsthitiryā sā kumbhakaḥ parigīyate // ### [2.11.38](https://indike.org/pramana/in.purana.kurma.2.11.38) indriyāṇāṃ vicaratāṃ viṣayeṣu svabhāvataḥ / nigrahaḥ procyate sadbhiḥ pratyāhārastu sattamāḥ // ### [2.11.39](https://indike.org/pramana/in.purana.kurma.2.11.39) hṛtpuṇḍarīke nābhyāṃ vā mūrdhni parvatamastake / evamādiṣu deśeṣu dhāraṇā cittabandhanam // ### [2.11.40](https://indike.org/pramana/in.purana.kurma.2.11.40) deśāvasthitimālambya buddheryā vṛttisaṃtatiḥ / vṛttyantarairasaṃsṛṣṭā taddhyānaṃ sūrayo viduḥ // ### [2.11.41](https://indike.org/pramana/in.purana.kurma.2.11.41) ekākāraḥ samādhiḥ syād deśālambanavarjitaḥ / pratyayo hyarthamātreṇa yogasādhanamuttamam // ### [2.11.42](https://indike.org/pramana/in.purana.kurma.2.11.42) dhāraṇā dvādaśāyāmā dhyānaṃ dvādaśadhāraṇāḥ / dhyānaṃ dvādaśakaṃ yāvat samādhirabhidhīyate // ### [2.11.43](https://indike.org/pramana/in.purana.kurma.2.11.43) āsanaṃ svastikaṃ proktaṃ padmamardhāsanaṃ tathā / sādhanānāṃ ca sarveṣāmetatsādhanamuttamam // ### [2.11.44](https://indike.org/pramana/in.purana.kurma.2.11.44) ūrvorupari viprendrāḥ kṛtvā pādatale ubhe / samāsītātmanaḥ padmametadāsanamuttamam // ### [2.11.45](https://indike.org/pramana/in.purana.kurma.2.11.45) ekaṃ pādamathaikasmin vinyasyoruṇi sattamāḥ / āsītārdhāsanamidaṃ yogasādhanamuttamam // ### [2.11.46](https://indike.org/pramana/in.purana.kurma.2.11.46) ubhe kṛtvā pādatale jānūrvorantareṇa hi / samāsītātmanaḥ proktamāsanaṃ svastikaṃ param // ### [2.11.47](https://indike.org/pramana/in.purana.kurma.2.11.47) adeśakāle yogasya darśanaṃ hi na vidyate / agnyabhyāse jale vāpi śuṣkaparṇacaye tathā // ### [2.11.48](https://indike.org/pramana/in.purana.kurma.2.11.48) jantuvyāpte śmaśāne ca jīrṇagoṣṭhe catuṣpathe / saśabde sabhaye vāpi caityavalmīkasaṃcaye // ### [2.11.49](https://indike.org/pramana/in.purana.kurma.2.11.49) aśubhe durjanākrānte maśakādisamanvite / nācared dehabādhe vā daurmanasyādisaṃbhave // ### [2.11.50](https://indike.org/pramana/in.purana.kurma.2.11.50) sugupte suśubhe deśe guhāyāṃ parvatasya tu / nadyāstīre puṇyadeśe devatāyatane tathā // ### [2.11.51](https://indike.org/pramana/in.purana.kurma.2.11.51) gṛhe vā suśubhe ramye vijane jantuvarjite / yuñjīta yogī satatamātmānaṃ matparāyaṇaḥ // ### [2.11.52](https://indike.org/pramana/in.purana.kurma.2.11.52) namaskṛtya tu yogīndrān saśiṣyāṃśca vināyakam / guruṃ caivātha māṃ yogī yuñjīta susamāhitaḥ // ### [2.11.53](https://indike.org/pramana/in.purana.kurma.2.11.53) āsanaṃ svastikaṃ baddhvā padmamardhamathāpi vā / nāsikāgre samāṃ dṛṣṭimīṣadunmīlitekṣaṇaḥ // ### [2.11.54](https://indike.org/pramana/in.purana.kurma.2.11.54) kṛtvātha nirbhayaḥ śāntastyaktvā māyāmayaṃ jagat / svātmanyavasthitaṃ devaṃ cintayet parameśvaram // ### [2.11.55](https://indike.org/pramana/in.purana.kurma.2.11.55) śikhāgre dvādaśāṅgulye kalpayitvātha paṅkajam / dharmakandasamudbhūtaṃ jñānanālaṃ suśobhanam // ### [2.11.56](https://indike.org/pramana/in.purana.kurma.2.11.56) aiśvaryāṣṭadalaṃ śvetaṃ paraṃ vairāgyakarṇikam / cintayet paramaṃ kośaṃ karṇikāyāṃ hiraṇmayam // ### [2.11.57](https://indike.org/pramana/in.purana.kurma.2.11.57) sarvaśaktimayaṃ sākṣād yaṃ prāhurdivyamavyayam / oṅkāravācyamavyaktaṃ raśmijālasamākulam // ### [2.11.58](https://indike.org/pramana/in.purana.kurma.2.11.58) cintayet tatra vimalaṃ paraṃ jyotiryadakṣaram / tasmin jyotiṣi vinyasyasvātmānaṃ tadabhedataḥ // ### [2.11.59](https://indike.org/pramana/in.purana.kurma.2.11.59) dhyāyītākāśamadhyasthamīśaṃ paramakāraṇam / tadātmā sarvago bhūtvā na kiñcidapi cintayet // ### [2.11.60](https://indike.org/pramana/in.purana.kurma.2.11.60) etad guhyatamaṃ dhyānaṃ dhyānāntaramathocyate / cintayitvā tu pūrvoktaṃ hṛdaye padmamuttamam // ### [2.11.61](https://indike.org/pramana/in.purana.kurma.2.11.61) ātmānamatha kartāraṃ tatrānalasamatviṣam / madhye vahniśikhākāraṃ puruṣaṃ pañcaviṃśakam // ### [2.11.62](https://indike.org/pramana/in.purana.kurma.2.11.62) cintayet paramātmānaṃ tanmadhye gaganaṃ param / oṅkarabodhitaṃ tattvaṃ śāśvataṃ śivamacyutam // ### [2.11.63](https://indike.org/pramana/in.purana.kurma.2.11.63) avyaktaṃ prakṛtau līnaṃ paraṃ jyotiranuttamam / tadantaḥ paramaṃ tattvamātmādhāraṃ nirañjanam // ### [2.11.64](https://indike.org/pramana/in.purana.kurma.2.11.64) dhyāyīta tanmayo nityamekarūpaṃ maheśvaram / viśodhya sarvatattvāni praṇavenāthavā punaḥ // ### [2.11.65](https://indike.org/pramana/in.purana.kurma.2.11.65) saṃsthāpya mayi cātmānaṃ nirmale parame pade / plāvayitvātmano dehaṃ tenaiva jñānavāriṇā // ### [2.11.66](https://indike.org/pramana/in.purana.kurma.2.11.66) madātmā manmayo bhasma gṛhītvā hyagnihotrajam / tenoddhṛtya tu sarvāṅgamagnirityādimantrataḥ / cintayet svātmanīśānaṃ paraṃ jyotiḥ svarūpiṇam // ### [2.11.67](https://indike.org/pramana/in.purana.kurma.2.11.67) eṣa pāśupato yogaḥ paśupāśavimuktaye / sarvavedāntasāro 'yamatyāśramamiti śrutiḥ // ### [2.11.68](https://indike.org/pramana/in.purana.kurma.2.11.68) etat parataraṃ guhyaṃ matsāyujyopapādakam / dvijātīnāṃ tu kathitaṃ bhaktānāṃ brahmacāriṇām // ### [2.11.69](https://indike.org/pramana/in.purana.kurma.2.11.69) brahmacaryamahiṃsā ca kṣamā śaucaṃ tapo damaḥ / saṃtoṣaḥ satyamāstikyaṃ vratāṅgāni viśeṣataḥ // ### [2.11.70](https://indike.org/pramana/in.purana.kurma.2.11.70) ekenāpyatha hīnena vratamasya tu lupyate / tasmādātmaguṇopeto madvrataṃ voḍhumarhati // ### [2.11.71](https://indike.org/pramana/in.purana.kurma.2.11.71) vītarāgabhayakrodhā manmayā māmupāśritāḥ / bahavo 'nena yogena pūtā madbhāvamāgatāḥ // ### [2.11.72](https://indike.org/pramana/in.purana.kurma.2.11.72) ye yathā māṃ prapadyante tāṃstathaiva bhajāmyaham / jñānayogena māṃ tasmād yajeta parameśvaram // ### [2.11.73](https://indike.org/pramana/in.purana.kurma.2.11.73) athavā bhaktiyogena vairāgyeṇa pareṇa tu / cetasā bodhayuktena pūjayenmāṃ sadā śuciḥ // ### [2.11.74](https://indike.org/pramana/in.purana.kurma.2.11.74) sarvakarmāṇi saṃnyasya bhikṣāśī niṣparigrahaḥ / prāpnoti mama sāyujyaṃ guhyametanmayoditam // ### [2.11.75](https://indike.org/pramana/in.purana.kurma.2.11.75) adveṣṭā sarvabhūtānāṃ maitraḥ karuṇa eva ca / nirmamo nirahaṅkāro yo madbhaktaḥ sa me priyaḥ // ### [2.11.76](https://indike.org/pramana/in.purana.kurma.2.11.76) saṃtuṣṭaḥ satataṃ yogī yatātmā dṛḍhaniścayaḥ / mayyarpitamano buddhiryo madbhaktaḥ sa me priyaḥ // ### [2.11.77](https://indike.org/pramana/in.purana.kurma.2.11.77) yasmānnodvijate loko lokānnodvijate ca yaḥ / harṣāmarṣabhayodvegairmukto yaḥ sa hi me priyaḥ // ### [2.11.78](https://indike.org/pramana/in.purana.kurma.2.11.78) anapekṣaḥ śucirdakṣa udāsīno gatavyathaḥ / sarvārambhaparityāgī bhaktimān yaḥ sa me priyaḥ // ### [2.11.79](https://indike.org/pramana/in.purana.kurma.2.11.79) tulyanindāstutirmaunī saṃtuṣṭo yena kenacit / aniketaḥ sthiramatirmadbhakto māmupaiṣyati // ### [2.11.80](https://indike.org/pramana/in.purana.kurma.2.11.80) sarvakarmāṇyapi sadā kurvāṇo matparāyaṇaḥ / matprasādādavāpnoti śāśvataṃ paramaṃ padam // ### [2.11.81](https://indike.org/pramana/in.purana.kurma.2.11.81) cetasā sarvakarmāṇi mayi saṃnyasya matparaḥ / nirāśīrnirmamo bhūtvā māmekaṃ śaraṇaṃ vrajet // ### [2.11.82](https://indike.org/pramana/in.purana.kurma.2.11.82) tyaktvā karmaphalāsaṅgaṃ nityatṛpto nirāśrayaḥ / karmaṇyabhipravṛtto 'pi naiva tena nibadhyate // ### [2.11.83](https://indike.org/pramana/in.purana.kurma.2.11.83) nirāśīryatacittātmā tyaktasarvaparigrahaḥ / śārīraṃ kevalaṃ karma kurvannāpnoti tatpadam // ### [2.11.84](https://indike.org/pramana/in.purana.kurma.2.11.84) yadṛcchālābhatuṣṭasya dvandvātītasya caiva hi / kurvato matprasādārthaṃ karma saṃsāranāśanam // ### [2.11.85](https://indike.org/pramana/in.purana.kurma.2.11.85) manmanā mannamaskāro madyājī matparāyaṇaḥ / māmupaiṣyati yogīśaṃ jñātvā māṃ parameśvaram // ### [2.11.86](https://indike.org/pramana/in.purana.kurma.2.11.86) madbuddhayo māṃ satataṃ bodhayantaḥ parasparam / kathayantaśca māṃ nityaṃ mama sāyujyamāpnuyuḥ // ### [2.11.87](https://indike.org/pramana/in.purana.kurma.2.11.87) evaṃ nityābhiyuktānāṃ māyeyaṃ karmasānvagam / nāśayāmi tamaḥ kṛtsnaṃ jñānadīpena bhāsvatā // ### [2.11.88](https://indike.org/pramana/in.purana.kurma.2.11.88) madbuddhayo māṃ satataṃ pūjayantīha ye janāḥ / teṣāṃ nityābhiyuktānāṃ yogakṣemaṃ vahāmyaham // ### [2.11.89](https://indike.org/pramana/in.purana.kurma.2.11.89) ye 'nye ca kāmabhogārthaṃ yajante hyanyadevatāḥ / teṣāṃ tadantaṃ vijñeyaṃ devatānugataṃ phalam // ### [2.11.90](https://indike.org/pramana/in.purana.kurma.2.11.90) ye cānyadevatābhaktāḥ pūjayantīha devatāḥ / madbhāvanāsamāyuktā mucyante te 'pi bhāvataḥ // ### [2.11.91](https://indike.org/pramana/in.purana.kurma.2.11.91) tasmādanīśvarānanyāṃstyaktvā devānaśeṣataḥ / māmeva saṃśrayedīśaṃ sa yāti paramaṃ padam // ### [2.11.92](https://indike.org/pramana/in.purana.kurma.2.11.92) tyaktvā putrādiṣu snehaṃ niḥ śoko niṣparigrahaḥ / yajeccāmaraṇālliṅge viraktaḥ parameśvaram // ### [2.11.93](https://indike.org/pramana/in.purana.kurma.2.11.93) ye 'rcayanti sadā liṅgaṃ tyaktvā bhogānaśeṣataḥ / ekena janmanā teṣāṃ dadāmi paramaiśvaram // ### [2.11.94](https://indike.org/pramana/in.purana.kurma.2.11.94) parānandātmakaṃ liṅgaṃ kevalaṃ sannirañjanam / jñānātmakaṃ sarvagataṃ yogināṃ hṛdi saṃsthitam // ### [2.11.95](https://indike.org/pramana/in.purana.kurma.2.11.95) ye cānye niyatā bhaktā bhāvayitvā vidhānataḥ / yatra kvacana talliṅgamarcayanti maheśvaram // ### [2.11.96](https://indike.org/pramana/in.purana.kurma.2.11.96) jale vā vahnimadhye vāvyomni sūrye 'thavānyataḥ / ratnādau bhāvayitveśamarcayelliṅgamaiśvaram // ### [2.11.97](https://indike.org/pramana/in.purana.kurma.2.11.97) sarvaṃ liṅgamayaṃ hyetat sarvaṃ liṅge pratiṣṭhitam / tasmālliṅge 'rcayedīśaṃ yatra kvacana śāśvatam // ### [2.11.98](https://indike.org/pramana/in.purana.kurma.2.11.98) agnau kriyāvatāmapsu vyomni sūrye manīṣiṇām / kāṣṭhādiṣveva mūrkhāṇāṃ hṛdi liṅgantuyoginām // ### [2.11.99](https://indike.org/pramana/in.purana.kurma.2.11.99) yadyanutpannavijñāno viraktaḥ prītisaṃyutaḥ / yāvajjīvaṃ japed yuktaḥ praṇavaṃ brahmaṇo vapuḥ // ### [2.11.100](https://indike.org/pramana/in.purana.kurma.2.11.100) athavā śatarudrīyaṃ japedāmaraṇād dvijaḥ / ekākī yatacittātmā sa yāti paramaṃ padam // ### [2.11.101](https://indike.org/pramana/in.purana.kurma.2.11.101) vased vāmaraṇād vipro vārāṇasyāṃ samāhitaḥ / so 'pīśvaraprasādena yāti tat paramaṃ padam // ### [2.11.102](https://indike.org/pramana/in.purana.kurma.2.11.102) tatrotkramaṇakāle hi sarveṣāmeva dehinām / dadāti tat paraṃ jñānaṃ yena mucyeta bandhanāt // ### [2.11.103](https://indike.org/pramana/in.purana.kurma.2.11.103) varṇāśramavidhiṃ kṛtsnaṃ kurvāṇo matparāyaṇaḥ / tenaiva janmanā jñānaṃ labdhvā yāti śivaṃ padam // ### [2.11.104](https://indike.org/pramana/in.purana.kurma.2.11.104) ye 'pi tatra vasantīha nīcā vā pāpayonayaḥ / sarve taranti saṃsāramīśvarānugrahād dvijāḥ // ### [2.11.105](https://indike.org/pramana/in.purana.kurma.2.11.105) kintu vighnā bhaviṣyanti pāpopahatacetasām / dharmaṃ samāśrayet tasmānmuktaye niyataṃ dvijāḥ // ### [2.11.106](https://indike.org/pramana/in.purana.kurma.2.11.106) etad rahasyaṃ vedānāṃ na deyaṃ yasya kasya cit / dhārmikāyaiva dātavyaṃ bhaktāya brahmacāriṇe // ### [2.11.107](https://indike.org/pramana/in.purana.kurma.2.11.107) vyāsa uvāca ityetaduktvā bhagavānātmayogamanuttamam / vyājahāra samāsīnaṃ nārāyaṇamanāmayam // ### [2.11.108](https://indike.org/pramana/in.purana.kurma.2.11.108) mayaitad bhāṣitaṃ jñānaṃ hitārthaṃ brahmavādinām / dātavyaṃ śāntacittebhyaḥ śiṣyebhyo bhavatā śivam // ### [2.11.109](https://indike.org/pramana/in.purana.kurma.2.11.109) uktvaivamatha yogīndrānabravīd bhagavānajaḥ / hitāya sarvabhaktānāṃ dvijātīnāṃ dvijottamāḥ // ### [2.11.110](https://indike.org/pramana/in.purana.kurma.2.11.110) bhavanto 'pi hi majjñānaṃ śiṣyāṇāṃ vidhipūrvakam / upadekṣyanti bhaktānāṃ sarveṣāṃ vacanānmama // ### [2.11.111](https://indike.org/pramana/in.purana.kurma.2.11.111) ayaṃ nārāyaṇo yo 'hamīśvaro nātra saṃśayaḥ / nāntaraṃ ye prapaśyanti teṣāṃ deyamidaṃ param // ### [2.11.112](https://indike.org/pramana/in.purana.kurma.2.11.112) mamaiṣā paramā mūrtirnārāyaṇasamāhvayā / sarvabhūtātmabhūtasthā śāntā cākṣarasaṃjñitā // ### [2.11.113](https://indike.org/pramana/in.purana.kurma.2.11.113) ye tvanyathā prapaśyanti loke bhedadṛśo janāḥ / na te māṃ saṃprapaśyanti jāyante ca punaḥ punaḥ // ### [2.11.114](https://indike.org/pramana/in.purana.kurma.2.11.114) ye tvimaṃ viṣṇumavyaktaṃ māṃ vā devaṃ maheśvaram / ekībhāvena paśyanti na teṣāṃ punarudbhavaḥ // ### [2.11.115](https://indike.org/pramana/in.purana.kurma.2.11.115) tasmādanādinidhanaṃ viṣṇumātmānamavyayam / māmeva saṃprapaśyadhvaṃ pūjayadhvaṃ tathaiva hi // ### [2.11.116](https://indike.org/pramana/in.purana.kurma.2.11.116) ye 'nyathā māṃ prapaśyanti matvemaṃ devatāntaram / te yānti narakān ghorān nāhaṃ teṣuvyavasthitaḥ // ### [2.11.117](https://indike.org/pramana/in.purana.kurma.2.11.117) mūrkhaṃ vā paṇḍitaṃ vāpi brāhmaṇaṃ vā madāśrayam / mocayāmi śvapākaṃ vā na nārāyaṇanindakam // ### [2.11.118](https://indike.org/pramana/in.purana.kurma.2.11.118) tasmādeṣa mahāyogī madbhaktaiḥ puruṣottamaḥ / arcanīyo namaskāryo matprītijananāya hi // ### [2.11.119](https://indike.org/pramana/in.purana.kurma.2.11.119) evamuktvā samāliṅgya vāsudevaṃ pinākadhṛk / antarhito 'bhavat teṣāṃ sarveṣāmeva paśyatām // ### [2.11.120](https://indike.org/pramana/in.purana.kurma.2.11.120) nārāyaṇo 'pi bhagavāṃstāpasaṃ veṣamuttamam / jagrāha yoginaḥ sarvāṃstyaktvā vai paramaṃ vapuḥ // ### [2.11.121](https://indike.org/pramana/in.purana.kurma.2.11.121) jñātaṃ bhavadbhiramalaṃ prasādāt parameṣṭhinaḥ / sākṣādeva maheśasya jñānaṃ saṃsāranāśanam // ### [2.11.122](https://indike.org/pramana/in.purana.kurma.2.11.122) gacchadhvaṃ vijvarāḥ sarve vijñānaṃ parameṣṭhinaḥ / pravartayadhvaṃ śiṣyebhyo dhārmikebhyo munīśvarāḥ // ### [2.11.123](https://indike.org/pramana/in.purana.kurma.2.11.123) idaṃ bhaktāya śāntāya dhārmikāyāhitāgnaye / vijñānamaiśvaraṃ deyaṃ brāhmaṇāya viśeṣataḥ // ### [2.11.124](https://indike.org/pramana/in.purana.kurma.2.11.124) evamuktvā sa viśvātmā yogināṃ yogavittamaḥ / nārāyaṇo mahāyogī jagāmādarśanaṃ svayam // ### [2.11.125](https://indike.org/pramana/in.purana.kurma.2.11.125) te 'pi devādideveśaṃ namaskṛtya maheśvaram / nārāyaṇaṃ ca bhūtādiṃ svāni sthānāni bhejire // ### [2.11.126](https://indike.org/pramana/in.purana.kurma.2.11.126) sanatkumāro bhagavān saṃvartāya mahāmuniḥ / dattavānaiśvaraṃ jñānaṃ so 'pi satyavratāya tu // ### [2.11.127](https://indike.org/pramana/in.purana.kurma.2.11.127) sanandano 'pi yogīndraḥ pulahāya maharṣaye / pradadau gautamāyātha pulaho 'pi prajāpatiḥ // ### [2.11.128](https://indike.org/pramana/in.purana.kurma.2.11.128) aṅgirā vedaviduṣe bharadvājāya dattavān / jaigīṣavyāya kapilastathā pañcaśikhāya ca // ### [2.11.129](https://indike.org/pramana/in.purana.kurma.2.11.129) parāśaro 'pi sanakāt pitā me sarvatattvadṛk / lebhetatparamaṃ jñānaṃ tasmād vālmīkirāptavān // ### [2.11.130](https://indike.org/pramana/in.purana.kurma.2.11.130) mamovāca purā devaḥ satīdehabhavāṅgajaḥ / vāmadevo mahāyogī rudraḥ kila pinākadhṛk // ### [2.11.131](https://indike.org/pramana/in.purana.kurma.2.11.131) nārāyaṇo 'pi bhagavān devakītanayo hariḥ / arjunāya svayaṃ sākṣāt dattavānidamuttamam // ### [2.11.132](https://indike.org/pramana/in.purana.kurma.2.11.132) yadahaṃ labdhavān rudrād vāmadevādanuttamam / viśeṣād giriśe bhaktistasmādārabhya me 'bhavat // ### [2.11.133](https://indike.org/pramana/in.purana.kurma.2.11.133) śaraṇyaṃ śaraṇaṃ rudraṃ prapanno 'haṃ viśeṣataḥ / bhūteśaṃ giraśaṃ sthāṇuṃ devadevaṃ triśūlinam // ### [2.11.134](https://indike.org/pramana/in.purana.kurma.2.11.134) bhavanto 'pi hi taṃ devaṃ śaṃbhuṃ govṛṣavāhanam / prapadyadhvaṃ sapatnīkāḥ saputrāḥ śaraṇaṃ śivam // ### [2.11.135](https://indike.org/pramana/in.purana.kurma.2.11.135) vartadhvaṃ tatprasādena karmayogena śaṅkaram / pūjayadhvaṃ mahādevaṃ gopatiṃ bhūtibhūṣaṇam // ### [2.11.136](https://indike.org/pramana/in.purana.kurma.2.11.136) evamukte 'tha munayaḥ śaunakādyā maheśvaram / praṇemuḥ śāśvataṃ sthāṇuṃ vyāsaṃ satyavatīsutam // ### [2.11.137](https://indike.org/pramana/in.purana.kurma.2.11.137) abruvan hṛṣṭamanasaḥ kṛṣṇadvaipāyanaṃ prabhum / sākṣādeva hṛṣīkeśaṃ sarvalokamaheśvaram // ### [2.11.138](https://indike.org/pramana/in.purana.kurma.2.11.138) bhavatprasādādacalā śaraṇye govṛṣadhvaje / idānīṃ jāyate bhaktiryā devairapi durlabhā // ### [2.11.139](https://indike.org/pramana/in.purana.kurma.2.11.139) kathayasva muniśreṣṭha karmayogamanuttamam / yenāsau bhagavānīśaḥ samārādhyo mumukṣubhiḥ // ### [2.11.140](https://indike.org/pramana/in.purana.kurma.2.11.140) tvatsaṃnidhāveṣa sūtaḥ śṛṇotu bhagavadvacaḥ / tadvadākhilalokānāṃ rakṣaṇaṃ dharmasaṃgraham // ### [2.11.141](https://indike.org/pramana/in.purana.kurma.2.11.141) yaduktaṃ devadevena viṣṇunā kūrmarūpiṇā / pṛṣṭena munibhiḥ pūrvaṃ śakreṇāmṛtamanthane // ### [2.11.142](https://indike.org/pramana/in.purana.kurma.2.11.142) śrutvā satyavatīsūnuḥ karmayogaṃ sanātanam / munīnāṃ bhāṣitaṃ kṛṣṇaḥ provāca susamāhitaḥ // ### [2.11.143](https://indike.org/pramana/in.purana.kurma.2.11.143) ya imaṃ paṭhate nityaṃ saṃvādaṃ kṛttivāsasaḥ / sanatkumārapramukhaiḥ sarvapāpaiḥ pramucyate // ### [2.11.144](https://indike.org/pramana/in.purana.kurma.2.11.144) śrāvayed vā dvijān śuddhān brahmacaryaparāyaṇān / yo vā vicārayedarthaṃ sa yāti paramāṃ gatim // ### [2.11.145](https://indike.org/pramana/in.purana.kurma.2.11.145) yaścaitacchṛṇuyānnityaṃ bhaktiyukto dṛḍhavrataḥ / sarvapāpavinirmukto brahmaloke mahīyate // ### [2.11.146](https://indike.org/pramana/in.purana.kurma.2.11.146) tasmāt sarvaprayatnena paṭhitavyo manīṣibhiḥ / śrotavyaścātha mantavyo viśeṣād brāhmaṇaiḥ sadā // ### [2.11.146.p1](https://indike.org/pramana/in.purana.kurma.2.11.146.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge (īśvaragītāsu) ekādaśo 'dhyāyaḥ ## Linked texts (10) - [Yogacintāmaṇi (Śivānanda Sarasvatī)](https://indike.org/pramana/in.darsana.yoga.yogacintamani-sivananda-sarasvati.3.1683) — Śivānanda Sarasvatī 1650, Sanskrit - [Vulgate (700 verses)](https://indike.org/pramana/in.darsana.all.gita*vulgate.12.13) — Sanskrit - [Critical edition (BORI, Bhīṣmaparvan 23–40)](https://indike.org/pramana/in.darsana.all.gita*crit.4.20) — Sanskrit - [Devībhāgavatapurāṇa](https://indike.org/pramana/in.purana.upa.sakta.devibhagavata.11.16.31) — Sanskrit - [Saurapurāṇa](https://indike.org/pramana/in.purana.upa.saiva.saura.46.59) — Sanskrit - [Yogasārasaṅgraha](https://indike.org/pramana/in.darsana.yoga.yogasarasangraha.p83) — Vijñānabhikṣu 1550, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.29.115) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.29.115) — Basava, Sanskrit - [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.4.p6) — Nārāyaṇa (Mahiṣamaṅgalam) 1513, Sanskrit - [Smṛtīnāṃ Samuccayaḥ](https://indike.org/pramana/in.niti.dharma.upasmrti.smrtisamuccaya.32.49) — Sanskrit --- Source: [https://indike.org/pramana/in.purana.kurma.2.11](https://indike.org/pramana/in.purana.kurma.2.11) · Pramāṇa