[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.12 # Kurmapurana 2.12: dvādaśo'dhyāyaḥ Kūrmapurāṇa 2.12 - **Language:** Sanskrit ## Contents - [2.12.64](https://indike.org/pramana/in.purana.kurma.2.12.64) — 1 part ### dvādaśo'dhyāyaḥ ### [2.12.1](https://indike.org/pramana/in.purana.kurma.2.12.1) vyāsa uvāca śṛṇudhvamṛṣayaḥ sarve vakṣyamāṇaṃ sanātanam / karmayogaṃ brāhmaṇānāmātyantikaphalapradam // ### [2.12.2](https://indike.org/pramana/in.purana.kurma.2.12.2) āmnāyasiddhamakhilaṃ brihmaṇānupradarśitam / ṛṣīṇāṃ śṛṇvatāṃ pūrvaṃ manurāha prajāpatiḥ // ### [2.12.3](https://indike.org/pramana/in.purana.kurma.2.12.3) sarvapāpaharaṃ puṇyamṛṣisaṅghairniṣevitam / samāhitadhiyo yūyaṃ śṛṇudhvaṃ gadato mama // ### [2.12.4](https://indike.org/pramana/in.purana.kurma.2.12.4) kṛtopanayano vedānadhīyīta dvijottamāḥ / garbhāṣṭame 'ṣṭame vābde svasūtroktavidhānataḥ // ### [2.12.5](https://indike.org/pramana/in.purana.kurma.2.12.5) daṇḍī ca mekhalī sūtrī kṛṣṇājinadharo muniḥ / bhikṣāhāro guruhito vīkṣamāṇo gururmukham // ### [2.12.6](https://indike.org/pramana/in.purana.kurma.2.12.6) kārpāsamupavītārthaṃ nirmitaṃ brahmaṇā purā / brāhmaṇānāṃ trivit sūtraṃ kauśaṃ vā vastrameva vā // ### [2.12.7](https://indike.org/pramana/in.purana.kurma.2.12.7) sadopavītī caiva syāt sadā baddhaśikho dvijaḥ / anyathā yat kṛtaṃ karma tad bhavatyayathākṛtam // ### [2.12.8](https://indike.org/pramana/in.purana.kurma.2.12.8) vasedavikṛtaṃ vāsaḥ kārpāsaṃ vā kaṣāyakam / tadeva paridhānīyaṃ śuklamacchidramuttamam // ### [2.12.9](https://indike.org/pramana/in.purana.kurma.2.12.9) uttaraṃ tu samākhyātaṃ vāsaḥ kṛṣṇājinaṃ śubham / abhāve gavyamajinaṃ rauravaṃ vā vidhīyate // ### [2.12.10](https://indike.org/pramana/in.purana.kurma.2.12.10) uddhṛtya dakṣiṇaṃ bāhuṃ savye bāhau samarpitam / upavītaṃ bhavennityaṃ nivītaṃ kaṇṭhasajjane // ### [2.12.11](https://indike.org/pramana/in.purana.kurma.2.12.11) savyaṃ bāhuṃ samuddhṛtya dakṣiṇe tu dhṛtaṃ dvijāḥ / prācīnāvītamityuktaṃ pitrye karmaṇi yojayet // ### [2.12.12](https://indike.org/pramana/in.purana.kurma.2.12.12) agnyagāre gavāṃ goṣṭhe home japye tathaiva ca / svādhyāye bhojane nityaṃ brāhmaṇānāṃ ca sannidhau // ### [2.12.13](https://indike.org/pramana/in.purana.kurma.2.12.13) upāsane gurūṇāṃ ca saṃdhyayoḥ sādhusaṃgame / upavītī bhavennityaṃ vidhireṣa sanātanaḥ // ### [2.12.14](https://indike.org/pramana/in.purana.kurma.2.12.14) mauñjī trivṛt samā ślakṣaṇā kāryā viprasya mekhalā / muñjābhāve kuśenāhurgranthinaikena vā tribhiḥ // ### [2.12.15](https://indike.org/pramana/in.purana.kurma.2.12.15) dhārayed bailvapālāśau daṇḍau keśāntakau dvijaḥ / yajñārhavṛkṣajaṃ vātha saumyamavraṇameva ca // ### [2.12.16](https://indike.org/pramana/in.purana.kurma.2.12.16) sāyaṃ prātardvijaḥ saṃdhyāmupāsīta samāhitaḥ / kāmāllobhād bhayānmohāt tyaktena patito bhavet // ### [2.12.17](https://indike.org/pramana/in.purana.kurma.2.12.17) agnikāryaṃ tataḥ kuryāt sāyaṃ prātaḥ prasannadhīḥ / snātvā saṃtarpayed devānṛṣīn pitṛgaṇāṃstathā // ### [2.12.18](https://indike.org/pramana/in.purana.kurma.2.12.18) devatābhyarcanaṃ kuryāt puṣpaiḥ patreṇa vāmbubhiḥ / abhivādanaśīlaḥ syānnityaṃ vṛddheṣu dharmataḥ // ### [2.12.19](https://indike.org/pramana/in.purana.kurma.2.12.19) asāvahaṃ bho nāmeti samyak praṇatipūrvakam / āyurārogyasiddhyarthaṃ tandrādiparivarjitaḥ // ### [2.12.20](https://indike.org/pramana/in.purana.kurma.2.12.20) āyuṣṇān bhava saumyeti vācyo vipro 'bhivādane / akāraścāsya nāmno 'nte vācyaḥ pūrvākṣaraḥ plutaḥ // ### [2.12.21](https://indike.org/pramana/in.purana.kurma.2.12.21) na kuryād yo 'bhivādasya dvijaḥ pratyabhivādanam / nābhivādyaḥ sa viduṣā yathā śūdrastathaiva saḥ // ### [2.12.22](https://indike.org/pramana/in.purana.kurma.2.12.22) vyatyastapāṇinā kāryamupasaṃgrahaṇaṃ guroḥ / savyena savyaḥ spraṣṭavyo dakṣiṇena tu dakṣiṇaḥ // ### [2.12.23](https://indike.org/pramana/in.purana.kurma.2.12.23) laukikaṃ vaidikaṃ cāpi tathādhyātmikameva vā / ādadīta yato jñānaṃ taṃ pūrvamabhivādayet // ### [2.12.24](https://indike.org/pramana/in.purana.kurma.2.12.24) nodakaṃ dhārayed bhaikṣaṃ puṣpāṇi samidhastathā / evaṃvidhāni cānyāni na daivādyeṣu karmasu // ### [2.12.25](https://indike.org/pramana/in.purana.kurma.2.12.25) brāhmaṇaṃ kuśalaṃ pṛcchet kṣatrabandhumanāmayam / vaiśyaṃ kṣemaṃ samāgamya śūdramārogyameva tu // ### [2.12.26](https://indike.org/pramana/in.purana.kurma.2.12.26) upādhyāyaḥ pitā jyeṣṭho bhrātā caiva mahīpatiḥ / mātulaḥ śvaśurastrātā mātāmahapitāmahau / varṇajyeṣṭhaḥ pitṛvyaśca puṃso 'tra guravaḥ smṛtāḥ // ### [2.12.27](https://indike.org/pramana/in.purana.kurma.2.12.27) mātā mātāmahī gurvo piturmātuśca sodarāḥ / śvaśrūḥ pitāmahījyeṣṭhā dhātrī ca guravaḥ striyaḥ // ### [2.12.28](https://indike.org/pramana/in.purana.kurma.2.12.28) ityukto guruvargo 'yaṃ mātṛtaḥ pitṛto dvijāḥ / anuvartanameteṣāṃ manovākkāyakarmabhiḥ // ### [2.12.29](https://indike.org/pramana/in.purana.kurma.2.12.29) guruṃ dṛṣṭvā samuttiṣṭhedabhivādya kṛtāñjaliḥ / naitairupaviśet sārdhaṃ vivadennātmakāraṇāt // ### [2.12.30](https://indike.org/pramana/in.purana.kurma.2.12.30) jīvitārthamapi dveṣād gurubhirnaiva bhāṣaṇam / udito 'pi guṇairanyairgurudveṣī patatyadhaḥ // ### [2.12.31](https://indike.org/pramana/in.purana.kurma.2.12.31) gurūṇāmapi sarveṣāṃ pūjyāḥ pañca viśeṣataḥ / teṣāmādyāstrayaḥ śreṣṭhāsteṣāṃ mātā supūjitā // ### [2.12.32](https://indike.org/pramana/in.purana.kurma.2.12.32) yo bhāvayati yā sūte yena vidyopadiśyate / jyeṣṭho bhrātā ca bhartā ca pañcaite guravaḥ smṛtāḥ // ### [2.12.33](https://indike.org/pramana/in.purana.kurma.2.12.33) ātmanaḥ sarvayatnena prāṇatyāgena vā punaḥ / pūjanīyā viśeṣeṇa pañcaite bhūtimicchatā // ### [2.12.34](https://indike.org/pramana/in.purana.kurma.2.12.34) yāvat pitā ca mātā ca dvāvetau nirvikāriṇau / tāvat sarvaṃ parityajya putraḥ syāt tatparāyaṇaḥ // ### [2.12.35](https://indike.org/pramana/in.purana.kurma.2.12.35) pitā mātā ca suprītau syātāṃ putraguṇairyadi / sa putraḥ sakalaṃ dharmamāpnuyāt tena karmaṇā // ### [2.12.36](https://indike.org/pramana/in.purana.kurma.2.12.36) nāsti mātṛsamaṃ daivaṃ nāsti pitṛsamo guruḥ / tayoḥ pratyupakāro 'pi na kathañcana vidyate // ### [2.12.37](https://indike.org/pramana/in.purana.kurma.2.12.37) tayornityaṃ priyaṃ kuryāt karmaṇā manasā girā / na tābhyāmananujñāto dharmamanyaṃ samācaret // ### [2.12.38](https://indike.org/pramana/in.purana.kurma.2.12.38) varjayitvā muktiphalaṃ nityaṃ naimittikaṃ tathā / dharmasāraḥ samuddiṣṭaḥ pretyānantaphalapradaḥ // ### [2.12.39](https://indike.org/pramana/in.purana.kurma.2.12.39) samyagārādhya vaktāraṃ visṛṣṭastadanujñayā / śiṣyo vidyāphalaṃ bhuṅkte pretya cāpadyate divi // ### [2.12.40](https://indike.org/pramana/in.purana.kurma.2.12.40) yo bhrātaraṃ pitṛsamaṃ jyeṣṭhaṃ mūrkho 'vamanyate / tena doṣeṇa sa pretya nirayaṃ ghoramṛcchati // ### [2.12.41](https://indike.org/pramana/in.purana.kurma.2.12.41) puṃsā vartmaniviṣṭena pūjyo bhartā tu sarvadā / yāti dātari loke 'smin upakārāddhi gauravam // ### [2.12.42](https://indike.org/pramana/in.purana.kurma.2.12.42) yenarā bhartṛpiṇḍārthaṃ svān prāṇān saṃtyajanti hi / teṣāmathākṣayāṃllokān provāca bhagavān manuḥ // ### [2.12.43](https://indike.org/pramana/in.purana.kurma.2.12.43) mātulāṃśca pitṛvyāṃśca śvaśurānṛtvijo gurūn / asāvahamiti brūyuḥ pratyutthāya yavīyasaḥ // ### [2.12.44](https://indike.org/pramana/in.purana.kurma.2.12.44) avācyo dīkṣito nāmnā yavīyānapi yo bhavet / bhobhavatpūrvakaṃ tvenamabhibhāṣeta dharmavit // ### [2.12.45](https://indike.org/pramana/in.purana.kurma.2.12.45) abhivādyāśca pūjyaśca śirasā vandya eva ca / brāhmaṇaḥ kṣatriyādyaiśca śrīkāmaiḥ sādaraṃ sadā // ### [2.12.46](https://indike.org/pramana/in.purana.kurma.2.12.46) nābhivādyāstu vipreṇa kṣatriyādyāḥ kathañcana / jñānakarmaguṇopetā yadyapyete bahuśrutāḥ // ### [2.12.47](https://indike.org/pramana/in.purana.kurma.2.12.47) brāhmaṇaḥ sarvavarṇānāṃ svasti kuryāditi sthitiḥ / savarṇeṣu savarṇānāṃ kāryamevābhivādanam // ### [2.12.48](https://indike.org/pramana/in.purana.kurma.2.12.48) gururagnirdvijātīnāṃ varṇānāṃ brāhmaṇo guruḥ / patireko guruḥ strīṇāṃ sarvatrābhyāgato guruḥ // ### [2.12.49](https://indike.org/pramana/in.purana.kurma.2.12.49) vidyā karma vayo bandhurvittaṃ bhavati pañcamam / mānyasthānāni pañcāhuḥ pūrvaṃ pūrvaṃ gurūttarāt // ### [2.12.50](https://indike.org/pramana/in.purana.kurma.2.12.50) pañcānāṃ triṣu varṇeṣu bhūyāṃsi balavanti ca / yatra syuḥ so 'tra mānārhaḥ śūdro 'pi daśamīṃ gataḥ // ### [2.12.51](https://indike.org/pramana/in.purana.kurma.2.12.51) panthā deyo brāhmaṇāya striyai rājñe hyacakṣuṣe / vṛddhāya bhārabugnāya rogiṇe durbalāya ca // ### [2.12.52](https://indike.org/pramana/in.purana.kurma.2.12.52) bhikṣāmāhṛtya śiṣṭānāṃ gṛhebhyaḥ prayato 'nvaham / nivedya gurave 'śnīyād vāgyatastadanujñayā // ### [2.12.53](https://indike.org/pramana/in.purana.kurma.2.12.53) bhavatpūrvaṃ cared bhaikṣyamupanīto dvijottamaḥ / bhavanmadhyaṃ tu rājanyo vaiśyastu bhavaduttaram // ### [2.12.54](https://indike.org/pramana/in.purana.kurma.2.12.54) mātaraṃ vā svasāraṃ vā māturvā bhaginīṃ nijām / bhikṣeta bhikṣāṃ prathamaṃ yā cainaṃ na vimānayet // ### [2.12.55](https://indike.org/pramana/in.purana.kurma.2.12.55) sajātīyagṛheṣveva sārvavarṇikameva vā / bhaikṣyasya caraṇaṃ proktaṃ patitādiṣu varjitam // ### [2.12.56](https://indike.org/pramana/in.purana.kurma.2.12.56) vedayajñairahīnānāṃ praśastānāṃ svakarmasu / brahmacaryāhared bhaikṣaṃ gṛhebhyaḥ prayato 'nvaham // ### [2.12.57](https://indike.org/pramana/in.purana.kurma.2.12.57) guroḥ kule na bhikṣeta na jñātikulabandhuṣu / alābhe tvanyagehānāṃ pūrvaṃ pūrvaṃ vivarjayet // ### [2.12.58](https://indike.org/pramana/in.purana.kurma.2.12.58) sarvaṃ vā vicared grāmaṃ pūrvoktānāmasaṃbhave / niyamya prayato vācaṃ diśastvanavalokayan // ### [2.12.59](https://indike.org/pramana/in.purana.kurma.2.12.59) samāhṛtya tu tad bhaikṣaṃ yāvadarthamamāyayā / bhuñjīta prayato nityaṃ vāgyato 'nanyamānasaḥ // ### [2.12.60](https://indike.org/pramana/in.purana.kurma.2.12.60) bhaikṣyeṇa vartayennityaṃ naikānnādī bhaved vratī / bhaikṣyeṇa vratino vṛttirupavāsasamā smṛtā // ### [2.12.61](https://indike.org/pramana/in.purana.kurma.2.12.61) pūjayedaśanaṃ nityamadyāccaitadakutsayan / dṛṣṭvā hṛṣyet prasīdecca pratinandecca sarvaśaḥ // ### [2.12.62](https://indike.org/pramana/in.purana.kurma.2.12.62) anārogyamanāyuṣyamasvargyaṃ cātibhojanam / apuṇyaṃ lokavidviṣṭaṃ tasmāt tatparivarjayet // ### [2.12.63](https://indike.org/pramana/in.purana.kurma.2.12.63) prāṅmukho 'nnāni bhuñjīta sūryābhimukha eva vā / nādyādudaṅmukho nityaṃ vidhireṣa sanātanaḥ // ### [2.12.64](https://indike.org/pramana/in.purana.kurma.2.12.64) prakṣālya pāṇipādau ca bhuñjāno dvirupaspṛśet / śucau deśe samāsīno bhuktvā ca dvirupaspṛśet // ### [2.12.64.p1](https://indike.org/pramana/in.purana.kurma.2.12.64.p1) itī śrīkūrmapurāṇe ṣaṭsāhastryāṃ saṃhitāyāmuparivibhāge dvādaśo 'dhyāyaḥ ## Linked texts (12) - [Padmapurāṇa](https://indike.org/pramana/in.purana.padma.3.51.5) — Vyāsa, Sanskrit - [Mānava Dharmaśāstra](https://indike.org/pramana/in.niti.dharma.manu.2.42) — Manu & Bhṛgu, Sanskrit - [Vallālacarita](https://indike.org/pramana/in.lit.historical.vallalacarita.2.16.1) — Ānandabhaṭṭa 1510, Sanskrit - [Narasiṃhapurāṇa](https://indike.org/pramana/in.purana.upa.vaisnava.narasimha.58.23) — Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.1.p679) — Lakṣmīdhara Bhaṭṭa, Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.27.p96) — Devaṇṇabhaṭṭa, Sanskrit - [Nityācārapradīpa](https://indike.org/pramana/in.niti.dharma.acara.ahnika.nityacarapradipa.5.p185) — Narasiṃha Vājapeyin, Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.1.31.p1.8) — Viśveśvarabhaṭṭa, Sanskrit - [Ācārasāra (Gadādhara)](https://indike.org/pramana/in.niti.dharma.acara.acarasara-gadadhara.6.p3) — Gadādhara (Pāraskara commentator), Sanskrit - [Saṃskāraratnamālā (Gopīnātha Dīkṣita Oka)](https://indike.org/pramana/in.niti.dharma.samskara.samskararatnamala.16.6.p1.3) — Gopīnātha Dīkṣita Oka, Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.34.4.1) — Kamalākarabhaṭṭa 1612, Sanskrit - [Ācārabhūṣaṇa](https://indike.org/pramana/in.niti.dharma.acara.acarabhusana.6.p1.10) — Tryambaka rāma oka 1794, Sanskrit --- Source: [https://indike.org/pramana/in.purana.kurma.2.12](https://indike.org/pramana/in.purana.kurma.2.12) · Pramāṇa