[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.13 # Kurmapurana 2.13: trayodaśo'dhyāyaḥ Kūrmapurāṇa 2.13 - **Language:** Sanskrit ## Contents - [2.13.45](https://indike.org/pramana/in.purana.kurma.2.13.45) — 1 part ### trayodaśo'dhyāyaḥ ### [2.13.1](https://indike.org/pramana/in.purana.kurma.2.13.1) vyāsa uvāca bhuktvā pītvā ca suptvā ca snātvā rathyopasarpaṇe / oṣṭhāvalamokau spṛṣṭvā vāso viparidhāya ca // ### [2.13.2](https://indike.org/pramana/in.purana.kurma.2.13.2) retomūtrapurīṣāṇāmutsarge 'yuktabhāṣaṇe / ṣṭhīvitvādhyayanārambhe kāsaśvāsāgame tathā // ### [2.13.3](https://indike.org/pramana/in.purana.kurma.2.13.3) catvaraṃ vā śmaśānaṃ vā samākramya dvijottamaḥ / saṃdhyayorubhayostadvadācānto 'pyācamet punaḥ // ### [2.13.4](https://indike.org/pramana/in.purana.kurma.2.13.4) caṇḍālamlecchasaṃbhāṣe strīśūdrocchiṣṭabhāṣaṇe / ucchiṣṭaṃ puruṣaṃ spṛṣṭvā bhojyaṃ cāpi tathāvidham / ācāmedaśrupāte vā lohitasya tathaiva ca // ### [2.13.5](https://indike.org/pramana/in.purana.kurma.2.13.5) bhojane saṃdhyayoḥ snātvā pītvā mūtrapurīṣayoḥ / ācānto 'pyācamet suptvā sakṛtsakṛdathānyataḥ // ### [2.13.6](https://indike.org/pramana/in.purana.kurma.2.13.6) agnergavāmathālambhe spṛṣṭvā prayatameva vā / strīṇāmathātmanaḥ sparśe nīvīṃ vā paridhāya ca // ### [2.13.7](https://indike.org/pramana/in.purana.kurma.2.13.7) upaspṛśejjalaṃ vārdraṃ tṛṇaṃ vā bhūmimeva vā / keśānāṃ cātmanaḥ sparśe vāsaso 'kṣālitasya ca // ### [2.13.8](https://indike.org/pramana/in.purana.kurma.2.13.8) anuṣṇābhiraphenābiraduṣṭābhiśca dharmataḥ / śaucepsuḥ sarvadācāmedāsīnaḥ prāgudaṅmukhaḥ // ### [2.13.9](https://indike.org/pramana/in.purana.kurma.2.13.9) śiraḥ prāvṛtya kaṇṭhaṃ vā muktakacchasikho 'pi vā / akṛtvā pādayoḥ śaucamācānto 'pyaśucirbhavet // ### [2.13.10](https://indike.org/pramana/in.purana.kurma.2.13.10) sopānatko jalastho vā noṣṇīṣī vācamed budhaḥ / na caiva varṣadhārābhirna tiṣṭhan noddhṛtodakaiḥ // ### [2.13.11](https://indike.org/pramana/in.purana.kurma.2.13.11) naikahastārpitajalairvinā sūtreṇa vā punaḥ / na pādukāsanastho vā bahirjānurathāpi vā // ### [2.13.12](https://indike.org/pramana/in.purana.kurma.2.13.12) na jalpan na hasan prekṣan śayānaḥ prahva eva ca / nāvīkṣitābhiḥ phenādyairupetābhirathāpi vā // ### [2.13.13](https://indike.org/pramana/in.purana.kurma.2.13.13) śūdrāśucikaronmuktairna kṣārābhistathaiva ca / na caivāṅgulibhiḥ śabdaṃ na kurvan nānyamānasaḥ // ### [2.13.14](https://indike.org/pramana/in.purana.kurma.2.13.14) na varṇarasaduṣṭābhirna caiva pradarodakaiḥ / na pāṇikṣubhitābhirvā na bahiṣkakṣa eva vā // ### [2.13.15](https://indike.org/pramana/in.purana.kurma.2.13.15) hṛdgābhiḥ pūyate vipraḥ kaṇṭhyābhiḥ kṣatriyaḥ śuciḥ / prāśitābhistathāvaiśyaḥ strīśūdrau sparśato 'ntataḥ // ### [2.13.16](https://indike.org/pramana/in.purana.kurma.2.13.16) aṅguṣṭhamūlāntarato rekhāyāṃ brāhmamucyate / antarāṅguṣṭhadeśinyo pitṝṇāṃ tīrthamuttamam // ### [2.13.17](https://indike.org/pramana/in.purana.kurma.2.13.17) kaniṣṭhāmūlataḥ paścāt prājāpatyaṃ pracakṣate / aṅgulyagre smṛtaṃ daivaṃ tadevārṣaṃ prakīrtitam // ### [2.13.18](https://indike.org/pramana/in.purana.kurma.2.13.18) mūle vā daivamārṣaṃ syādāgneyaṃ madhyataḥ smṛtaṃ / tadeva saumikaṃ tīrthametajjñātvā na muhyati // ### [2.13.19](https://indike.org/pramana/in.purana.kurma.2.13.19) brāhmeṇaiva tu tīrthena dvijo nityamupaspṛśet / kāyena vātha daivena tu pitryeṇa vai dvijāḥ // ### [2.13.20](https://indike.org/pramana/in.purana.kurma.2.13.20) triḥ prāśnīyādapaḥ pūrvaṃ brāhmaṇaḥ prayatastataḥ / saṃmṛjyāṅguṣṭhamūlena mukhaṃ vai samupaspṛśet // ### [2.13.21](https://indike.org/pramana/in.purana.kurma.2.13.21) aṅguṣṭhānāmikābhyāṃ tu spṛśennetradvayaṃ tataḥ / tarjanyaṅguṣṭhayogena spṛśennāsāpṛṭadvayam // ### [2.13.22](https://indike.org/pramana/in.purana.kurma.2.13.22) kaniṣṭhāṅguṣṭhayogena śravaṇe samupaspṛśet / sarvāsāmatha yogena hṛdayaṃ tu talena vā / saṃspṛśed vā śirastadvadaṅguṣṭhenāthavā dvayam // ### [2.13.23](https://indike.org/pramana/in.purana.kurma.2.13.23) triḥ prāśnīyād yadambhastu suprītāstena devatāḥ / brahmā viṣṇurmaheśaśca bhavantītyanuśuśrumaḥ // ### [2.13.24](https://indike.org/pramana/in.purana.kurma.2.13.24) gaṅgā ca yamunā caiva prīyete parimārjanāt / saṃspṛṣṭayorlocanayoḥ prīyete śaśibhāskarau // ### [2.13.25](https://indike.org/pramana/in.purana.kurma.2.13.25) nāsatyadastrau prīyete spṛṣṭe nāsāpuṭadvaye / karṇayoḥ spṛṣṭayostadvat prīyete cānilānalau // ### [2.13.26](https://indike.org/pramana/in.purana.kurma.2.13.26) saṃspṛṣṭe hṛdaye cāsya prīyante sarvadevatāḥ / mūrdhni saṃsparśanādekaḥ prītaḥ sa puruṣo bhavet // ### [2.13.27](https://indike.org/pramana/in.purana.kurma.2.13.27) nocchiṣṭaṃ kurvate mukhyā vipruṣo 'ṅgaṃ nayanti yāḥ / dantavad dantalagneṣu jihvāsparśe 'śucirbhavet // ### [2.13.28](https://indike.org/pramana/in.purana.kurma.2.13.28) spṛśānti bindavaḥ pādau ya ācāmayataḥ parān / bhūmigaiste samā jñeyā na tairaprayato bhavet // ### [2.13.29](https://indike.org/pramana/in.purana.kurma.2.13.29) maduparke ca some ca tāmbūlasya ca bhakṣaṇe / phalamūle cekṣudaṇḍe na doṣaṃ prāha ve manuḥ // ### [2.13.30](https://indike.org/pramana/in.purana.kurma.2.13.30) pracaraṃścānnapāneṣu dravyahasto bhavennaraḥ / bhūmau nikṣipya tad dravyamācamyābhyukṣayet tu tat // ### [2.13.31](https://indike.org/pramana/in.purana.kurma.2.13.31) taijasaṃ vai samādāya yadyucchiṣṭo bhaved dvijaḥ / bhūmau nikṣipya tad dravyamācamyābhyukṣayet tu tat // ### [2.13.32](https://indike.org/pramana/in.purana.kurma.2.13.32) yadyamatraṃ samādāya bhaveduccheṣaṇānvitaḥ / anidhāyaiva tad dravyamācāntaḥ śucitāmiyāt / vastrādiṣu vikalpaḥ syāt tatsaṃspṛṣṭvācamediha // ### [2.13.33](https://indike.org/pramana/in.purana.kurma.2.13.33) araṇye 'nudake rātrau cauravyāghrākule pathi / kṛtvā mūtraṃ purīṣaṃ vā dravyahasto na duṣyati // ### [2.13.34](https://indike.org/pramana/in.purana.kurma.2.13.34) nidhāya dakṣiṇe karṇe brahmasūtramudaṅmukhaḥ / ahni kuryācchakṛnmūtraṃ rātrau ced dakṣiṇāmukhaḥ // ### [2.13.35](https://indike.org/pramana/in.purana.kurma.2.13.35) antardhāya mahīṃ kāṣṭhaiḥ patrairloṣṭhatṛṇena vā / prāvṛtya ca śiraḥ kuryād viṇmūtrasya visarjanam // ### [2.13.36](https://indike.org/pramana/in.purana.kurma.2.13.36) chāyākūpanadīgoṣṭhacaityāmbhaḥ pathi bhasmasu / agnau caiva śmaśāne ca viṇmūtre na samācaret // ### [2.13.37](https://indike.org/pramana/in.purana.kurma.2.13.37) na gomaye na kṛṣṭe vā mahāvṛkṣe na śāḍvale / na tiṣṭhan vā na nirvāsā na ca parvatamastake // ### [2.13.38](https://indike.org/pramana/in.purana.kurma.2.13.38) na jīrṇadevāyatane na valmīke kadācana / na sasattveṣu garteṣu na gacchan vā samācaret // ### [2.13.39](https://indike.org/pramana/in.purana.kurma.2.13.39) tuṣāṅgārakapāleṣu rājamārge tathaiva ca / na kṣetre na vile vāpi na tīrthe na catuṣpathe // ### [2.13.40](https://indike.org/pramana/in.purana.kurma.2.13.40) nodyānodasamīpe vā noṣare na parāśucau / na sopānatpāduko vā chatrī vā nāntarikṣake // ### [2.13.41](https://indike.org/pramana/in.purana.kurma.2.13.41) na caivābhimukhe strīṇāṃ gurubrāhmaṇayorgavām / na devadevālayayorapāmapi kadācana // ### [2.13.42](https://indike.org/pramana/in.purana.kurma.2.13.42) na jyotīṃṣi nirīkṣanvānasaṃdhyābhimukho 'pivā / pratyādityaṃ pratyanalaṃ pratisomaṃ tathaiva ca // ### [2.13.43](https://indike.org/pramana/in.purana.kurma.2.13.43) āhṛtya mṛttikāṃ kūlāllepagandhāpakarṣaṇam / kuryādatandritaḥ śaucaṃ viśuddhairuddhṛtodakaiḥ // ### [2.13.44](https://indike.org/pramana/in.purana.kurma.2.13.44) nāharenmṛttikāṃ vipraḥ pāṃśulānna ca kardamāt / na mārgānnoṣarād deśācchaucaśiṣṭāṃ parasya ca // ### [2.13.45](https://indike.org/pramana/in.purana.kurma.2.13.45) na devāyatanāt kūpād grāmānna ca jalāt tathā / upaspṛśet tato nityaṃ pūrvoktena vidhānataḥ // ### [2.13.45.p1](https://indike.org/pramana/in.purana.kurma.2.13.45.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge trayodaśo 'dhyāyaḥ ## Linked texts (5) - [Padmapurāṇa](https://indike.org/pramana/in.purana.padma.3.52.2) — Vyāsa, Sanskrit - [Ācāracintāmaṇi](https://indike.org/pramana/in.niti.dharma.acara.ahnika.acaracintamani.1.p92) — Vācaspatimiśra, Sanskrit - [Ācāramayūkha](https://indike.org/pramana/in.niti.dharma.acara.bhatta.acaramayukha.2.p8) — Nīlakaṇṭha Dīkṣita 1625, Sanskrit - [Saṃskāraratnamālā (Gopīnātha Dīkṣita Oka)](https://indike.org/pramana/in.niti.dharma.samskara.samskararatnamala.17.19.2) — Gopīnātha Dīkṣita Oka, Sanskrit - [Ācārārka (Divākarabhaṭṭa)](https://indike.org/pramana/in.niti.dharma.acara.bhatta.acararka.4.11.p1.5) — Divākarabhaṭṭa 1686, Sanskrit --- Source: [https://indike.org/pramana/in.purana.kurma.2.13](https://indike.org/pramana/in.purana.kurma.2.13) · Pramāṇa