[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.14 # Kurmapurana 2.14: caturdaśo'dhyāyaḥ Kūrmapurāṇa 2.14 - **Language:** Sanskrit ## Contents - [2.14.89](https://indike.org/pramana/in.purana.kurma.2.14.89) — 1 part ### caturdaśo'dhyāyaḥ ### [2.14.1](https://indike.org/pramana/in.purana.kurma.2.14.1) vyāsa uvāca evaṃ daṇḍādibhiryuktaḥ śaucācārasamanvitaḥ / āhūto 'dhyayanaṃ kuryād vīkṣamāṇo gurormukham // ### [2.14.2](https://indike.org/pramana/in.purana.kurma.2.14.2) nityamudyatapāṇiḥ syāt sādhvācāraḥ susaṃyataḥ / āsyatāmiti coktaḥ sannāsītābhimukhaṃ guroḥ // ### [2.14.3](https://indike.org/pramana/in.purana.kurma.2.14.3) pratiśravaṇasaṃbhāṣe śayāno na samācaret / nāsīno na ca bhuñjāno na tiṣṭhanna parāṅmukhaḥ // ### [2.14.4](https://indike.org/pramana/in.purana.kurma.2.14.4) nīcaṃ śayyāsanaṃ cāsya sarvadā gurusannidhau / gurostu cakṣurviṣaye na yatheṣṭāsano bhavet // ### [2.14.5](https://indike.org/pramana/in.purana.kurma.2.14.5) nodāharedasya nāma parokṣamapi kevalam / na caivāsyānukurvota gatibhāṣaṇaceṣṭitam // ### [2.14.6](https://indike.org/pramana/in.purana.kurma.2.14.6) guroryatra parīvādo nindā cāpi pravartate / karṇaiṃ tatra pidhātavyau gantavyaṃ vā tato 'nyataḥ // ### [2.14.7](https://indike.org/pramana/in.purana.kurma.2.14.7) dūrastho nārcayedenaṃ na kruddho nāntike striyāḥ / na caivāsyottaraṃ brūyāt sthito nāsīta sannidhau // ### [2.14.8](https://indike.org/pramana/in.purana.kurma.2.14.8) udakumbhaṃ kuśān puṣpaṃ samidho 'syāharet sadā / mārjanaṃ lepanaṃ nityamaṅgānāṃ vai samācaret // ### [2.14.9](https://indike.org/pramana/in.purana.kurma.2.14.9) nāsya nirmālyaśayanaṃ pādukopānahāvapi / ākramedāsanaṃ cāsya chāyādīn vā kadācana // ### [2.14.10](https://indike.org/pramana/in.purana.kurma.2.14.10) sādhayed dantakāṣṭhādīn labdhaṃ cāsmai nivedayet / anāpṛcchya na gantavyaṃ bhavet priyahite rataḥ // ### [2.14.11](https://indike.org/pramana/in.purana.kurma.2.14.11) na pādau sārayedasya saṃnidhāne kadācana / jṛmbhitaṃ hasitaṃ caiva kaṇṭhaprāvaraṇaṃ tathā / varjayet sannidhau nityamavasphocanameva ca // ### [2.14.12](https://indike.org/pramana/in.purana.kurma.2.14.12) yathākālamadhīyīta yāvanna vimanā guruḥ / āsītādho guroḥ kūrce phalake vā samāhitaḥ // ### [2.14.13](https://indike.org/pramana/in.purana.kurma.2.14.13) āsane śayane yāne naiva tiṣṭhet kadācana / dhāvantamanudhāveta gacchantamanugacchati // ### [2.14.14](https://indike.org/pramana/in.purana.kurma.2.14.14) go 'śvoṣṭrayānaprāsādaprastareṣu kaṭeṣu ca / āsīta guruṇā sārdhaṃ śilāphalakanauṣu ca // ### [2.14.15](https://indike.org/pramana/in.purana.kurma.2.14.15) jitendriyaḥ syāt satataṃ vaśyātmākrodhanaḥ śuciḥ / prayuñjīta sadā vācaṃ madhurāṃ hitabhāṣiṇīm // ### [2.14.16](https://indike.org/pramana/in.purana.kurma.2.14.16) gandhamālyaṃ rasaṃ kalyāṃ śuktaṃ prāṇivihiṃsanam / abhyaṅgaṃ cāñcanopānacchatradhāraṇameva ca // ### [2.14.17](https://indike.org/pramana/in.purana.kurma.2.14.17) kāmaṃ lobhaṃ bhayaṃ nidrāṃ gītavāditranartanam / ātarjanaṃ parīvādaṃ strīprekṣālambhanaṃ tathā / paropaghātaṃ paiśunyaṃ prayatnena vivarjayet // ### [2.14.18](https://indike.org/pramana/in.purana.kurma.2.14.18) udakumbhaṃ sumanaso gośakṛnmṛttikāṃ kuśān / āhared yāvadarthāni bhaikṣyaṃ cāharahaścaret // ### [2.14.19](https://indike.org/pramana/in.purana.kurma.2.14.19) kṛtaṃ ca lavaṇaṃ sarvaṃ varjyaṃ paryuṣitaṃ ca yat / anṛtyadarśo satataṃ bhaved gītādiniḥ spṛhaḥ // ### [2.14.20](https://indike.org/pramana/in.purana.kurma.2.14.20) nādityaṃ vai samīkṣeta na cared dantadhāvanam / ekāntamaśucistrībhiḥ śūdrāntyairabhibhāṣaṇam // ### [2.14.21](https://indike.org/pramana/in.purana.kurma.2.14.21) gurūcchiṣṭaṃ bheṣajārthaṃ prayuñjīta na kāmataḥ / kalāpakarṣaṇasnānaṃ nācareddhi kadācana // ### [2.14.22](https://indike.org/pramana/in.purana.kurma.2.14.22) na kuryānmānasaṃ vipro gurostyāge kadācana / mohādvā yadi vā lobhāt tyaktena patito bhavet // ### [2.14.23](https://indike.org/pramana/in.purana.kurma.2.14.23) laukikaṃ vaidikaṃ cāpi tathādhyātmikameva ca / ādadīta yato jñānaṃ na taṃ druhyet kadācana // ### [2.14.24](https://indike.org/pramana/in.purana.kurma.2.14.24) gurorapyavaliptasya kāryākāryamajānataḥ / utpathapratipannasya manustyāgaṃ samabravīt // ### [2.14.25](https://indike.org/pramana/in.purana.kurma.2.14.25) gurorgurau sannihite guruvad bhaktimācaret / na cātisṛṣṭo guruṇā svān gurūnabivādayet // ### [2.14.26](https://indike.org/pramana/in.purana.kurma.2.14.26) vidyāguruṣvetadeva nityā vṛttiḥ svayoniṣu / pratiṣedhatsu cādharmāddhitaṃ copadiśatsvapi // ### [2.14.27](https://indike.org/pramana/in.purana.kurma.2.14.27) śreyaḥsu guruvad vṛttiṃ nityameva samācaret / guruputreṣu dāreṣu guroścaiva svabandhuṣu // ### [2.14.28](https://indike.org/pramana/in.purana.kurma.2.14.28) bālaḥ samānajanmā vā śiṣyo vā yajñakarmaṇi / adhyāpayan gurusuto guruvanmānamarhati // ### [2.14.29](https://indike.org/pramana/in.purana.kurma.2.14.29) utsādanaṃ vai gātrāṇāṃ snāpanocchiṣṭabhojane / na kuryād guruputrasya pādayoḥ śaucameva ca // ### [2.14.30](https://indike.org/pramana/in.purana.kurma.2.14.30) guruvat paripūjyāstu savarṇā guruyoṣitaḥ / asavarṇāstu saṃpūjyāḥ pratyutthānābhivādanaiḥ // ### [2.14.31](https://indike.org/pramana/in.purana.kurma.2.14.31) abhyañjanaṃ snāpanaṃ ca gātrotsādanameva ca / gurupatnyā na kāryāṇi keśānāṃ ca prasādhanam // ### [2.14.32](https://indike.org/pramana/in.purana.kurma.2.14.32) gurupatnī tu yuvatī nābhivādyeha pādayoḥ / kurvota vandanaṃ bhūmyāmasāvahamiti bruvan // ### [2.14.33](https://indike.org/pramana/in.purana.kurma.2.14.33) viproṣya pādagrahaṇamanvahaṃ cābhivādanam / gurudāreṣu kurvota satāṃ dharmamanusmaran // ### [2.14.34](https://indike.org/pramana/in.purana.kurma.2.14.34) mātṛṣvasā mātulānī śvaśrūścātha pitṛṣvasā / saṃpūjyā gurupatnīva samāstā gurubhāryayā // ### [2.14.35](https://indike.org/pramana/in.purana.kurma.2.14.35) bhrāturbhāryopasaṃgrāhyā savarṇāhanyahanyapi / viproṣya tūpasaṃgrāhyā jñātisaṃbandhiyoṣitaḥ // ### [2.14.36](https://indike.org/pramana/in.purana.kurma.2.14.36) piturbhaginyāṃ mātuśca jyāyasyāṃ ca svasaryapi / mātṛvad vṛttimātiṣṭhenmāt tābhyo garīyasī // ### [2.14.37](https://indike.org/pramana/in.purana.kurma.2.14.37) evamācārasaṃpannamātmavantamadāmbhikam / vedamadhyāpayed dharmaṃ purāṇāṅgāni nityaśaḥ // ### [2.14.38](https://indike.org/pramana/in.purana.kurma.2.14.38) saṃvatsaroṣite śiṣye gururjñānamanirdiśan / harate duṣkṛtaṃ tasya śiṣyasya vasato guruḥ // ### [2.14.39](https://indike.org/pramana/in.purana.kurma.2.14.39) ācāryaputraḥ śuśrūṣurjñānado dhārmikaḥ śuciḥ / śakto 'nnador'tho svaḥsādhuradhyāpyā daśa dharmataḥ // ### [2.14.40](https://indike.org/pramana/in.purana.kurma.2.14.40) kṛtajñaśca tathādrohī medhāvī śubhakṛnnaraḥ / āptaḥ priyo 'tha vidhivat ṣaḍadhyāpyā dvijātayaḥ / eteṣu brahmaṇo dānamanyatra tu yathoditān // ### [2.14.41](https://indike.org/pramana/in.purana.kurma.2.14.41) ācamya saṃyato nityamadhīyīta udaṅmukhaḥ / upasaṃgṛhya tatpādau vīkṣamāṇo gurormukham / adhīṣva bho iti brūyād virāmo 'stviti cāramet // ### [2.14.42](https://indike.org/pramana/in.purana.kurma.2.14.42) prākkūlān paryupāsīnaḥ pavitraiścaiva pāvitaḥ / prāṇāyāmaistribhiḥ pūtastata oṅkāramarhati // ### [2.14.43](https://indike.org/pramana/in.purana.kurma.2.14.43) brāhmaṇaḥ praṇavaṃ kuryādante ca vidhivad dvijaḥ / kuryādadhyayanaṃ nityaṃ sa brahmāñjalipūrvataḥ // ### [2.14.44](https://indike.org/pramana/in.purana.kurma.2.14.44) sarveṣāmeva bhūtānāṃ vedaścakṣuḥ sanātanam / adhīyītāpyayaṃ nityaṃ brāhmaṇyāccyavate 'nyathā // ### [2.14.45](https://indike.org/pramana/in.purana.kurma.2.14.45) yo 'dhīyīta ṛco nityaṃ kṣīrāhutyā sa devatāḥ / prīṇāti tarpayantyenaṃ kāmaistṛptāḥ sadaiva hi // ### [2.14.46](https://indike.org/pramana/in.purana.kurma.2.14.46) yajūṃṣyadhīte niyataṃ dadhnā prīṇāti devatāḥ / sāmānyadhīte prīṇāti ghṛtāhutibhiranvaham // ### [2.14.47](https://indike.org/pramana/in.purana.kurma.2.14.47) atharvāṅgiraso nityaṃ madhvā prīṇāti devatāḥ / dharmāṅgāni purāṇāni māṃsaistarpayate surān // ### [2.14.48](https://indike.org/pramana/in.purana.kurma.2.14.48) apāṃ samīpe niyato naityakaṃ vidhimāśritaḥ / gāyatrīmapyadhīyīta gatvāraṇyaṃ samāhitaḥ // ### [2.14.49](https://indike.org/pramana/in.purana.kurma.2.14.49) sahasraparamāṃ devīṃ śatamadhyāṃ daśāvarām / gāyatrīṃ vai japennityaṃ japayajñaḥ prakīrtitaḥ // ### [2.14.50](https://indike.org/pramana/in.purana.kurma.2.14.50) gāyatrīṃ caiva vedāṃśca tulayātolayat prabhuḥ / ekataścaturo vedān gāyatrīṃ ca tathaikataḥ // ### [2.14.51](https://indike.org/pramana/in.purana.kurma.2.14.51) oṅkāramāditaḥ kṛtvā vyāhṛtīstadanantaram / tato 'dhīyīta sāvitrīmekāgraḥ śraddhayānvitaḥ // ### [2.14.52](https://indike.org/pramana/in.purana.kurma.2.14.52) purākalpe samutpannā bhūrbhuvaḥsvaḥ sanātanāḥ / mahāvyāhṛtayastistraḥ sarvāśubhanibarhaṇāḥ // ### [2.14.53](https://indike.org/pramana/in.purana.kurma.2.14.53) pradhānaṃ puruṣaḥ kālo viṣṇurbrahmā maheśvaraḥ / sattvaṃ rajastamastistraḥ kramād vyāhṛtayaḥ smṛtāḥ // ### [2.14.54](https://indike.org/pramana/in.purana.kurma.2.14.54) oṅkārastat paraṃ brahma sāvitrī syāt tadakṣaram / eṣa mantro mahāyogaḥ sārāt sāra udāhṛtaḥ // ### [2.14.55](https://indike.org/pramana/in.purana.kurma.2.14.55) yo 'dhīte 'hanyahanyetāṃ gāyatrīṃ vedamātaram / vijñāyārthaṃ brahmacārī sa yāti paramāṃ gatim // ### [2.14.56](https://indike.org/pramana/in.purana.kurma.2.14.56) gāyatrī vedajananī gāyatrī lokapāvanī / na gāyatryāḥ paraṃ japyametad vijñāya mucyate // ### [2.14.57](https://indike.org/pramana/in.purana.kurma.2.14.57) śrāvaṇasya tu māsasya paurṇamāsyāṃ dvijottamāḥ / āṣāḍhyāṃ proṣṭhapadyāṃ vā vedopākaraṇaṃ smṛtam // ### [2.14.58](https://indike.org/pramana/in.purana.kurma.2.14.58) utsṛjya grāmanagaraṃ māsān vipror'ddhapañcamān / adhīyīta śucau deśe brahmacārī samāhitaḥ // ### [2.14.59](https://indike.org/pramana/in.purana.kurma.2.14.59) puṣye tu chandasāṃ kuryād bahirutsarjanaṃ dvijaḥ / māghaśuklasya vā prāpte pūrvāhne prathame 'hani // ### [2.14.60](https://indike.org/pramana/in.purana.kurma.2.14.60) chandāṃsyūrdhvamathobhyasyecchuklapakṣeṣu vai dvijaḥ / vedāṅgāni purāṇāni kṛṣṇapakṣe ca mānavam // ### [2.14.61](https://indike.org/pramana/in.purana.kurma.2.14.61) imān nityamanadhyāyānadīyāno vivarjayet / adhyāpanaṃ ca kurvāṇo hyabhyasyannapi yatnataḥ // ### [2.14.62](https://indike.org/pramana/in.purana.kurma.2.14.62) karṇaśrave 'nile rātrau divā pāṃśusamūhane / vidyutstanitavarṣeṣu maholkānāṃ ca saṃplave / ākālikamanadhyāyameteṣvāha prajāpatiḥ // ### [2.14.63](https://indike.org/pramana/in.purana.kurma.2.14.63) etānabhyuditān vidyād yadā prāduṣkṛtāgniṣu / tadā vidyādanadhyāyamanṛtau cābhradarśane // ### [2.14.64](https://indike.org/pramana/in.purana.kurma.2.14.64) nirghāte bhūmicalane jyotiṣāṃ copasarjane / etānākālikān vidyādanadhyāyānṛtāvapi // ### [2.14.65](https://indike.org/pramana/in.purana.kurma.2.14.65) prāduṣkṛteṣvagniṣu tu vidyutstanitanisvane / sajyotiḥ syādanadhyāyaḥ śeṣarātrau yathā divā // ### [2.14.66](https://indike.org/pramana/in.purana.kurma.2.14.66) nityānadhyāya eva syād grāmeṣu nagareṣu ca / dharmanaipuṇyakāmānāṃ pūtigandhe ca nityaśaḥ // ### [2.14.67](https://indike.org/pramana/in.purana.kurma.2.14.67) antaḥ śavagate grāme vṛṣalasya ca sannidhau / anadhyāyo rudyamāne samavāye janasya ca // ### [2.14.68](https://indike.org/pramana/in.purana.kurma.2.14.68) udake madhyarātre ca viṇmūtre ca visarjane / ucchiṣṭaḥ śrāddhabuk caiva manasāpi na cintayet // ### [2.14.69](https://indike.org/pramana/in.purana.kurma.2.14.69) pratigṛhya dvijo vidvānekodiṣṭasya ketanam / tryahaṃ na kīrtayed brahma rājño rāhośca sūtake // ### [2.14.70](https://indike.org/pramana/in.purana.kurma.2.14.70) yāvadeko 'nudiṣṭasya sneho gandhaśca tiṣṭhati / viprasya viduṣo dehe tāvad brahma na kīrtayet // ### [2.14.71](https://indike.org/pramana/in.purana.kurma.2.14.71) śayānaḥ prauḍhapādaśca kṛtvā caivāvasakthikām / nādhīyītāmiṣaṃ jagdhvā sūtakānnādyameva ca // ### [2.14.72](https://indike.org/pramana/in.purana.kurma.2.14.72) nīhāre bāṇaśabde ca saṃdhyayorubhayorapi / amāvāsyāṃ caturdaśyāṃ paurṇamāsyaṣṭamīṣu ca // ### [2.14.73](https://indike.org/pramana/in.purana.kurma.2.14.73) upākarmaṇi cotsarge trirātraṃ kṣapaṇaṃ smṛtam / aṣṭakāsu tvahorātraṃ ṛtvantyāsu ca rātriṣu // ### [2.14.74](https://indike.org/pramana/in.purana.kurma.2.14.74) mārgaśīrṣe tathā pauṣe māghamāse tathaiva ca / tistro 'ṣṭakāḥ samākhyātā kṛṣṇapakṣetu sūribhiḥ // ### [2.14.75](https://indike.org/pramana/in.purana.kurma.2.14.75) śleṣmātakasya chāyāyāṃ śālmalermadhukasya ca / kadācidapi nādhyeyaṃ kovidārakapitthayoḥ // ### [2.14.76](https://indike.org/pramana/in.purana.kurma.2.14.76) samānavidye ca mṛte tathā sabrahmacāriṇi / ācārye saṃsthite vāpi trirātraṃ kṣapaṇaṃ smṛtam // ### [2.14.77](https://indike.org/pramana/in.purana.kurma.2.14.77) chidrāṇyetāni viprāṇāṃye 'nadhyāyaḥ prakīrtitāḥ / hiṃsanti rākṣasāsteṣu tasmādetān vivarjayet // ### [2.14.78](https://indike.org/pramana/in.purana.kurma.2.14.78) naityake nāstyanadhyāyaḥ saṃdhyopāsana eva ca / upākarmaṇi karmānte homamantreṣu caiva hi // ### [2.14.79](https://indike.org/pramana/in.purana.kurma.2.14.79) ekāmṛcamathaikaṃ vā yajuḥ sāmāthavā punaḥ / aṣṭakādyāsvadhīyīta mārute cātivāyati // ### [2.14.80](https://indike.org/pramana/in.purana.kurma.2.14.80) anadhyāyastu nāṅgeṣu netihāsapurāṇayoḥ / na dharmaśāstreṣvanyeṣu parvaṇyetāni varjayet // ### [2.14.81](https://indike.org/pramana/in.purana.kurma.2.14.81) eṣa dharmaḥ samāsena kīrtito brahmacāriṇām / brahmaṇābhihitaḥ pūrvamṛṣīṇāṃ bhāvitātmanām // ### [2.14.82](https://indike.org/pramana/in.purana.kurma.2.14.82) yo 'nyatra kurute yatnamanadhītya śrutiṃ dvijaḥ / sa saṃmūḍho na saṃbhāṣyo vedabāhyo dvijātibhiḥ // ### [2.14.83](https://indike.org/pramana/in.purana.kurma.2.14.83) na vedapāṭhamātreṇa saṃtuṣṭo vai bhaved dvijaḥ / pāṭhamātrāvasannastu paṅke gauriva sīdati // ### [2.14.84](https://indike.org/pramana/in.purana.kurma.2.14.84) yo 'dhītya vidhivad vedaṃ vedārthaṃ na vicārayet / sasānvayaḥ śūdrakalpaḥ pātratāṃ na prapadyate // ### [2.14.85](https://indike.org/pramana/in.purana.kurma.2.14.85) yadi tvātyantikaṃ vāsaṃ kartumicchati vai gurau / yuktaḥ paricaredenamāśarīravimokṣaṇāt // ### [2.14.86](https://indike.org/pramana/in.purana.kurma.2.14.86) gatvā vanaṃ vā vidhivajjuhuyājjātavedasam / adhīyīta sadā nityaṃ brahmaniṣṭhaḥ samāhitaḥ // ### [2.14.87](https://indike.org/pramana/in.purana.kurma.2.14.87) sāvitrīṃ śatarudrīyaṃ vedāntāṃśca viśeṣataḥ / abhyaset satataṃ yukte bhasmasnānaparāyaṇaḥ // ### [2.14.88](https://indike.org/pramana/in.purana.kurma.2.14.88) etad vidhānaṃ paramaṃ purāṇaṃ vedāgame samyagiheritaṃ vaḥ / purā maharṣipravarābhipṛṣṭaḥ svāyaṃbhuvo yanmanurāha devaḥ // ### [2.14.89](https://indike.org/pramana/in.purana.kurma.2.14.89) evamīśvarasamarpitāntaro yo 'nutiṣṭhati vidhiṃ vidhānavit / mohajālamapahāya so 'mṛto yāti tat padamanāmayaṃ śivam // ### [2.14.89.p1](https://indike.org/pramana/in.purana.kurma.2.14.89.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge caturdaśo 'dhyāyaḥ ## Linked texts (19) - [Padmapurāṇa](https://indike.org/pramana/in.purana.padma.3.53.1) — Vyāsa, Sanskrit - [Mānava Dharmaśāstra](https://indike.org/pramana/in.niti.dharma.manu.2.193) — Manu & Bhṛgu, Sanskrit - [Haribhaktivilāsa](https://indike.org/pramana/in.sampradaya.vaisnava.gaudiya.acara.haribhaktivilasa.1.79) — Gopāla Bhaṭṭa Gosvāmin & Sanātana Gosvāmin 1535, Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.28.23) — Viṣṇu, Sanskrit - [Śaṅkhasmṛti](https://indike.org/pramana/in.niti.dharma.upasmrti.sankhalikhita.sankha.12.24) — Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.2.p44) — Lakṣmīdhara Bhaṭṭa, Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.28.p122) — Devaṇṇabhaṭṭa, Sanskrit - [Bhagavantabhāskara](https://indike.org/pramana/in.niti.dharma.nibandha.mahanibandha.bhagavantabhaskara.3.p19) — Nīlakaṇṭha Dīkṣita 1625, Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.2.p3.10) — Viśveśvarabhaṭṭa, Sanskrit - [Dānasāgara](https://indike.org/pramana/in.niti.dharma.nibandha.danasagara.6.13) — Ballālasena, Sanskrit - [Gadādharapaddhati](https://indike.org/pramana/in.niti.dharma.nibandha.mahanibandha.gadadharapaddhati.6.p1) — Gadādhara Rājaguru 1725, Sanskrit - [Saṃskāraratnamālā (Gopīnātha Dīkṣita Oka)](https://indike.org/pramana/in.niti.dharma.samskara.samskararatnamala.18.7.10) — Gopīnātha Dīkṣita Oka, Sanskrit - [Kālasāra](https://indike.org/pramana/in.astro.muhurta.kala.kalasara.6.p35) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.6.p35) — Gadādhara (Pāraskara commentator), Sanskrit - [Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī)](https://indike.org/pramana/in.vedanga.kalpa.srauta.hiranyakesi*agase.24.2.103-2) — Sanskrit - [Ācārasāra (Gadādhara)](https://indike.org/pramana/in.niti.dharma.acara.acarasara-gadadhara.8.p27) — Gadādhara (Pāraskara commentator), Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.35.2-2) — Kamalākarabhaṭṭa 1612, Sanskrit - [Ācāracintāmaṇi](https://indike.org/pramana/in.niti.dharma.acara.ahnika.acaracintamani.1.p416) — Vācaspatimiśra, Sanskrit - [Ācārabhūṣaṇa](https://indike.org/pramana/in.niti.dharma.acara.acarabhusana.14.p1.19) — Tryambaka rāma oka 1794, Sanskrit --- Source: [https://indike.org/pramana/in.purana.kurma.2.14](https://indike.org/pramana/in.purana.kurma.2.14) · Pramāṇa