[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.18 # Kurmapurana 2.18: aṣṭādaśo'dhyāyaḥ Kūrmapurāṇa 2.18 - **Language:** Sanskrit ## Contents - [2.18.121](https://indike.org/pramana/in.purana.kurma.2.18.121) — 1 part ### aṣṭādaśo'dhyāyaḥ ### [2.18.1](https://indike.org/pramana/in.purana.kurma.2.18.1) ṛṣaya ūcuḥ ahanyahani kartavyaṃ brāhmaṇānāṃ mahāmune / tadācakṣvākhilaṃ karma yena mucyeta bandhanāt // ### [2.18.2](https://indike.org/pramana/in.purana.kurma.2.18.2) vyāsa uvāca vakṣye samāhitā yūyaṃ śṛṇudhvaṃ gadato mama / ahanyahani kartavyaṃ brāhmaṇānāṃ kramād vidhim // ### [2.18.3](https://indike.org/pramana/in.purana.kurma.2.18.3) brāhme muhūrte tūtthāya dharmamarthaṃ ca cintayet / kāyakleśaṃ tadudbhūtaṃ dhyāyīta manaseśvaram // ### [2.18.4](https://indike.org/pramana/in.purana.kurma.2.18.4) uṣaḥ kāle 'tha saṃprāpte kṛtvā cāvaśyakaṃ budhaḥ / snāyānnadīṣu suddhāsu śaucaṃ kṛtvā yathāvidhi // ### [2.18.5](https://indike.org/pramana/in.purana.kurma.2.18.5) prātaḥ snānena pūyante ye 'pi pāpakṛto janāḥ / tasmāt sarvaprayatnena prātaḥ snānaṃ samācaret // ### [2.18.6](https://indike.org/pramana/in.purana.kurma.2.18.6) prātaḥ snānaṃ praśaṃsanti dṛṣṭādṛṣṭakaraṃ śubham / ṛṣīṇāmṛṣitā nityaṃ prātaḥ snānānna saṃśayaḥ // ### [2.18.7](https://indike.org/pramana/in.purana.kurma.2.18.7) mukhe suptasya satataṃ lālā yāḥ saṃstravanti hi / tato naivācaret karma akṛtvā snānamāditaḥ // ### [2.18.8](https://indike.org/pramana/in.purana.kurma.2.18.8) alakṣmīḥ kālakarṇo ca duḥ svapnaṃ durvicintitam / prātaḥ snānena pāpāni pūyante nātra saṃśayaḥ // ### [2.18.9](https://indike.org/pramana/in.purana.kurma.2.18.9) na ca snānaṃ vinā puṃsāṃ pāvanaṃ karma susmṛtam / home japye viśeṣeṇa tasmāt snānaṃ samācaret // ### [2.18.10](https://indike.org/pramana/in.purana.kurma.2.18.10) aśaktāvaśiraskaṃ vā snānamasya vidhīyate / ārdreṇa vāsasā vātha mārjanaṃ kāpilaṃ smṛtam // ### [2.18.11](https://indike.org/pramana/in.purana.kurma.2.18.11) asāmarthye samutpanne snānamevaṃ samācaret / brāhmādīni yathāśaktau snānānyāhurmanīṣiṇaḥ // ### [2.18.12](https://indike.org/pramana/in.purana.kurma.2.18.12) brāhmamāgneyamuddiṣṭaṃ vāyavyaṃ divyameva ca / vāruṇaṃ yaugikaṃ tadvat ṣoḍhā snānaṃ prakīrtitam // ### [2.18.13](https://indike.org/pramana/in.purana.kurma.2.18.13) brāhmaṃ tu mārjanaṃ mantraiḥ kuśaiḥ sodakabindubhiḥ / āgneyaṃ bhasmanā pādamastakāddehadhūlanam // ### [2.18.14](https://indike.org/pramana/in.purana.kurma.2.18.14) gavāṃ hi rajasā proktaṃ vāyavyaṃ snānamuttamam / yattu sātapavarṣeṇa snānaṃ tad divyamucyate // ### [2.18.15](https://indike.org/pramana/in.purana.kurma.2.18.15) vāruṇaṃ cāvagāhastu mānasaṃ tvātmavedanam / yaugikaṃ snānamākhyātaṃ yogo viṣṇuvicintanam // ### [2.18.16](https://indike.org/pramana/in.purana.kurma.2.18.16) ātmatīrthamiti khyātaṃ sevitaṃ brahmavādibhiḥ / manaḥ śucikaraṃ puṃsāṃ nityaṃ tat snānamācaret // ### [2.18.17](https://indike.org/pramana/in.purana.kurma.2.18.17) śaktaśced vāruṇaṃ vidvān prājāpatyaṃ tathaiva ca / prakṣālya dantakāṣṭhaṃ vai bhakṣayitvā vidhānataḥ // ### [2.18.18](https://indike.org/pramana/in.purana.kurma.2.18.18) ācamya prayato nityaṃ snānaṃ prātaḥ samācaret / madhyāṅgulisamasthaulyaṃ dvādaśāṅgulasaṃmitam // ### [2.18.19](https://indike.org/pramana/in.purana.kurma.2.18.19) satvacaṃ dantakāṣṭhaṃ syāt tadagreṇa tu dhāvayet / kṣīravṛkṣasamudbhūtaṃ mālatīsaṃbhavaṃ śubham / apāmārgaṃ ca bilvaṃ ca karavīraṃ viśeṣataḥ // ### [2.18.20](https://indike.org/pramana/in.purana.kurma.2.18.20) varjayitvā ninditāni gṛhītvaikaṃ yathoditam / parihṛtya dinaṃ pāpaṃ bhakṣayed vai vidhānavit // ### [2.18.21](https://indike.org/pramana/in.purana.kurma.2.18.21) notpāṭayeddantakāṣṭaṃnāṅgulyā dhāvayet kvacit / prakṣālya bhaṅktvā tajjahyācchucaudeśe samāhitaḥ // ### [2.18.22](https://indike.org/pramana/in.purana.kurma.2.18.22) snātvā saṃtarpayed devānṛṣīn pitṛgaṇāṃstathā / ācamya mantravannityaṃ punarācamya vāgyataḥ // ### [2.18.23](https://indike.org/pramana/in.purana.kurma.2.18.23) saṃmārjya mantrairātmānaṃ kuśaiḥ sodakabindubhiḥ / āpo hiṣṭhā vyāhṛtibhiḥ sāvitryā vāruṇaiḥ śubhaiḥ // ### [2.18.24](https://indike.org/pramana/in.purana.kurma.2.18.24) oṅkāravyāhṛtiyutāṃ gāyatrīṃ vedamātaram / japtvā jalāñjaliṃ dadyād bhāskaraṃ prati tanmanāḥ // ### [2.18.25](https://indike.org/pramana/in.purana.kurma.2.18.25) prākkūleṣu samāsīno darbheṣu susamāhitaḥ / prāṇāyāmatrayaṃ kṛtvā dhyāyet saṃdhyāmiti śrutiḥ // ### [2.18.26](https://indike.org/pramana/in.purana.kurma.2.18.26) yā saṃdhyā sā jagatsūtirmāyātītā hi niṣkalā / aiśvarī tu parāśaktistattvatrayasamudbhavā // ### [2.18.27](https://indike.org/pramana/in.purana.kurma.2.18.27) dhyātvār'kamaṇḍalagatāṃ sāvitrīṃ vai japan budhaḥ / prāṅmukhaḥ satataṃ vipraḥ saṃdhyopāsanamācaret // ### [2.18.28](https://indike.org/pramana/in.purana.kurma.2.18.28) saṃdhyāhīno 'śucirnityamanarhaḥ sarvakarmasu / yadanyat kurute kiñcinna tasya phalamāpnuyāt // ### [2.18.29](https://indike.org/pramana/in.purana.kurma.2.18.29) ananyacetasaḥ śāntā brāhmaṇā vedapāragāḥ / upāsya vidhivat saṃdhyāṃ prāptāḥ pūrvaṃ parāṃ gatim // ### [2.18.30](https://indike.org/pramana/in.purana.kurma.2.18.30) yo 'nyatra kurute yatnaṃ dharmakārye dvijottamaḥ / vihāya saṃdhyāpraṇatiṃ sa yāti narakāyutam // ### [2.18.31](https://indike.org/pramana/in.purana.kurma.2.18.31) tasmāt sarvaprayatnena saṃdhyopāsanamācaret / upāsito bhavet tena devo yogatanuḥ paraḥ // ### [2.18.32](https://indike.org/pramana/in.purana.kurma.2.18.32) sahasraparamāṃ nityaṃ śatamadhyāṃ daśāvarām / sāvitrariṃ vai japed vidvān prāṅmukhaḥ prayataḥ sthitaḥ // ### [2.18.33](https://indike.org/pramana/in.purana.kurma.2.18.33) athopatiṣṭhedādityamudayantaṃ samāhitaḥ / mantraistu vividhaiḥ saurerṛgyajuḥ sāmasaṃbhavaiḥ // ### [2.18.34](https://indike.org/pramana/in.purana.kurma.2.18.34) upasthāya mahāyogaṃ devadevaṃ divākaram / kurvota praṇatiṃ bhūmau mūrdhnā tenaiva mantrataḥ // ### [2.18.35](https://indike.org/pramana/in.purana.kurma.2.18.35) oṃ khakholkāya śāntāya kāraṇatrayahetave / nivedayāmi cātmānaṃ namaste jñānarūpiṇe / namaste ghṛṇine tubhyaṃ sūryāya brahmarūpiṇe // ### [2.18.36](https://indike.org/pramana/in.purana.kurma.2.18.36) tvameva brahma paramamāpo jyotī raso 'mṛtam / bhūrbhuvaḥ svastvamoṅkāraḥ sarve rudrāḥ sanātanāḥ / puruṣaḥ sanmaho 'tastvāṃ praṇamāmi kapardinam // ### [2.18.37](https://indike.org/pramana/in.purana.kurma.2.18.37) tvameva viśvaṃ bahudhā sadasat sūyate ca yat / namo rudrāya sūryāya tvāmahaṃ śaraṇaṃ gataḥ // ### [2.18.38](https://indike.org/pramana/in.purana.kurma.2.18.38) pracetase namastubhyaṃ namo mīḍhuṣṭamāya te / namo namaste rudrāya tvāmahaṃ śaraṇaṃ gataḥ // ### [2.18.39](https://indike.org/pramana/in.purana.kurma.2.18.39) hiraṇyabāhave tubhyaṃ hiraṇyapataye namaḥ / ambikāpataye tubhyamumāyāḥ pataye namaḥ // ### [2.18.40](https://indike.org/pramana/in.purana.kurma.2.18.40) namo 'stu nīlagrīvāya namastubhyaṃ pinākine / vilohitāya bhargāya sahasrākṣāya te namaḥ // ### [2.18.41](https://indike.org/pramana/in.purana.kurma.2.18.41) namo haṃsāya te nityamādityāya namo 'stu te / namaste vajrahastāya tryambakāya namo 'stu te // ### [2.18.42](https://indike.org/pramana/in.purana.kurma.2.18.42) prapadye tvāṃ virūpākṣaṃ mahāntaṃ parameśvaram / hiraṇmayaṃ gṛhe guptamātmānaṃ sarvadehinām // ### [2.18.43](https://indike.org/pramana/in.purana.kurma.2.18.43) namasyāmi paraṃ jyotirbrahmāṇaṃ tvāṃ parāṃ gatim / viśvaṃ paśupatiṃ bhīmaṃ naranārīśarīriṇam // ### [2.18.44](https://indike.org/pramana/in.purana.kurma.2.18.44) namaḥ sūryāya rudrāya bhāsvate parameṣṭhine / ugrāya sarvabhaktāya tvāṃ prapadye sadaiva hi // ### [2.18.45](https://indike.org/pramana/in.purana.kurma.2.18.45) etad vai sūryahṛdayaṃ japtvā stavamanuttamam / prātaḥ kāle 'tha madhyāhne namaskuryād divākaram // ### [2.18.46](https://indike.org/pramana/in.purana.kurma.2.18.46) idaṃ putrāya śiṣyāya dhārmikāya dvijātaye / pradeyaṃ sūryahṛdayaṃ brahmaṇā tu pradarśitam // ### [2.18.47](https://indike.org/pramana/in.purana.kurma.2.18.47) sarvapāpapraśamanaṃ vedasārasamudbhavam / brāhmaṇānāṃ hitaṃ puṇyamṛṣisaṅghairniṣevitam // ### [2.18.48](https://indike.org/pramana/in.purana.kurma.2.18.48) athāgamya gṛhaṃ vipraḥ samācamya yathāvidhi / prajvālya vihniṃ vidhivajjuhuyājjātavedasam // ### [2.18.49](https://indike.org/pramana/in.purana.kurma.2.18.49) ṛtvikputro 'tha patnī vā śiṣyo vāpi sahodaraḥ / prāpyānujñāṃ viśeṣeṇa juhuyurvā yatāvidhi // ### [2.18.50](https://indike.org/pramana/in.purana.kurma.2.18.50) pavitrapāṇiḥ pūtātmā śuklāmbaradharottaraḥ / ananyamānaso vahniṃ juhuyāt saṃyatendriyaḥ // ### [2.18.51](https://indike.org/pramana/in.purana.kurma.2.18.51) vinā darbheṇa yatkarma vinā sūtreṇa vā punaḥ / rākṣasaṃ tadbhavet sarvaṃ nāmutreha phalapradam // ### [2.18.52](https://indike.org/pramana/in.purana.kurma.2.18.52) daivatāni namaskuryād deyasārānnivedayet / dadyāt puṣpādikaṃ teṣāṃ vṛddhāṃścaivābhivādayet // ### [2.18.53](https://indike.org/pramana/in.purana.kurma.2.18.53) guruṃ caivāpyupāsīta hitaṃ cāsya samācaret / vedābhyāsaṃ tataḥ kuryāt prayatnācchaktito dvijaḥ // ### [2.18.54](https://indike.org/pramana/in.purana.kurma.2.18.54) japedadhyāpayecchiṣyān dhārayecca vicārayet / avekṣeta ca śāstrāṇi dharmādīni dvijottamaḥ / vaidikāṃścaiva nigamān vedāṅgāni veśiṣataḥ // ### [2.18.55](https://indike.org/pramana/in.purana.kurma.2.18.55) upeyādīśvaraṃ cātha yogakṣemaprasiddhaye / sādhayed vividhānarthān kuṭumbārthe tato dvijaḥ // ### [2.18.56](https://indike.org/pramana/in.purana.kurma.2.18.56) tato madhyāhnasamaye snānārthaṃ mṛdamāharet / puṣpākṣatān kuśatilān gomayaṃ śuddhameva ca // ### [2.18.57](https://indike.org/pramana/in.purana.kurma.2.18.57) nadīṣu devakhāteṣu taḍāgeṣu saraḥsu ca / snānaṃ samācarennityaṃ gartaprastravaṇeṣu ca // ### [2.18.58](https://indike.org/pramana/in.purana.kurma.2.18.58) parakīyanipāneṣu na snāyād vai kadācana / pañcapiṇḍān samuddhṛtya snāyād vāsaṃbhave punaḥ // ### [2.18.59](https://indike.org/pramana/in.purana.kurma.2.18.59) mṛdaikayā śiraḥ kṣālyaṃ dvābhyāṃ nābhestathopari / adhaśca tisṛbhiḥ kāyaṃ pādau ṣaḍbhistathaiva ca // ### [2.18.60](https://indike.org/pramana/in.purana.kurma.2.18.60) mṛttikā ca samuddiṣṭā tvārdrāmalakamātrikā / gomayasya pramāṇaṃ tat tenāṅgaṃ lepayet tataḥ // ### [2.18.61](https://indike.org/pramana/in.purana.kurma.2.18.61) lepayitvā tu tīrasthastalliṅgaireva mantrataḥ / prakṣālyācamya vidhivat tataḥ snāyāt samāhitaḥ // ### [2.18.62](https://indike.org/pramana/in.purana.kurma.2.18.62) abhimantrya jalaṃ mantraistalliṅgairvāruṇaiḥ śubhaiḥ / bhāvapūtastadavyaktaṃ dhyāyan vai viṣṇumavyayam // ### [2.18.63](https://indike.org/pramana/in.purana.kurma.2.18.63) āpo nārāyaṇodbhūtāstā evāsyāyanaṃ punaḥ / tasmānnārāyaṇaṃ devaṃ snānakāle smared budhaḥ // ### [2.18.64](https://indike.org/pramana/in.purana.kurma.2.18.64) procya soṃkāramādityaṃ trirnimajjejjalāśaye / ācāntaḥ punarācāmenmantreṇānena mantravit // ### [2.18.65](https://indike.org/pramana/in.purana.kurma.2.18.65) antaścarasi bhūteṣu guhāyāṃ viśvato mukhaḥ / tvaṃ yajñastvaṃ vaṣaṭkāra āpo jyotī raso 'mṛtam // ### [2.18.66](https://indike.org/pramana/in.purana.kurma.2.18.66) drupadāṃ vā trirabhyasyed vyāhṛtipraṇavānvitām / sāvitrīṃ vā japed vidvān tathā caivāghamarṣaṇam // ### [2.18.67](https://indike.org/pramana/in.purana.kurma.2.18.67) tataḥ saṃmārjanaṃ kuryādāpo hi ṣṭhā mayobhuvaḥ / idamāpaḥ pravahata vyāhṛtibhistathaiva ca // ### [2.18.68](https://indike.org/pramana/in.purana.kurma.2.18.68) tato 'bhimantrya tat tīrthamāpo hiṣṭhādimantrakaiḥ / antarjalagato magno japet triraghamarṣaṇam // ### [2.18.69](https://indike.org/pramana/in.purana.kurma.2.18.69) tripadāṃ vātha sāvitrīṃ tadviṣṇoḥ paramaṃ padam / āvartayed vā praṇavaṃ devaṃ vā saṃsmareddharim // ### [2.18.70](https://indike.org/pramana/in.purana.kurma.2.18.70) drupadādiva yo mantro yajurvede pratiṣṭhitaḥ / antarjale trirāvartya sarvapāpaiḥ pramucyate // ### [2.18.71](https://indike.org/pramana/in.purana.kurma.2.18.71) apaḥ pāṇau samādāya japtvā vai mārjane kṛte / vinyasya mūrdhni tat toyaṃ mucyate sarvapātakaiḥ // ### [2.18.72](https://indike.org/pramana/in.purana.kurma.2.18.72) yathāśvamedhaḥ kraturāṭ sarvapāpāpanodanaḥ / tathāghamarṣaṇaṃ sūktaṃ sarvapāpāpanodanam // ### [2.18.73](https://indike.org/pramana/in.purana.kurma.2.18.73) athopatiṣṭhedādityaṃ mūrdhni puṣpānvitāñjalim / prakṣipyālokayed devamudvayaṃ tamasaspari // ### [2.18.74](https://indike.org/pramana/in.purana.kurma.2.18.74) udutyaṃ citramityete taccakṣuriti mantrataḥ / haṃsaḥ śuciṣadetena sāvitryā ca viśeṣataḥ // ### [2.18.75](https://indike.org/pramana/in.purana.kurma.2.18.75) anyaiśca vaidikairmantraiḥ sauraiḥ pāpapraṇāśanaiḥ / sāvitrīṃ vai japet paścājjapayajñaḥ sa vai smṛtaḥ // ### [2.18.76](https://indike.org/pramana/in.purana.kurma.2.18.76) vividhāni pavitrāṇi guhyavidyāstathaiva ca / śatarudrīyamatharvaśiraḥ saurāṃśca śaktitaḥ // ### [2.18.77](https://indike.org/pramana/in.purana.kurma.2.18.77) prākkūleṣu samāsīnaḥ kuśeṣu prāṅmukhaḥ śuciḥ / tiṣṭhaṃścedīkṣamāṇor'kaṃ japyaṃ kuryāt samāhitaḥ // ### [2.18.78](https://indike.org/pramana/in.purana.kurma.2.18.78) sphāṭikendrākṣarudrākṣaiḥ putrajīvasamudbhavaḥ / kartavyā tvakṣamālā syāduttarāduttamā smṛtā // ### [2.18.79](https://indike.org/pramana/in.purana.kurma.2.18.79) japakāle na bhāṣeta nānyāni prekṣayed budhaḥ / na kampayecchirogrīvāṃ dantānnaiva prakāśayet // ### [2.18.80](https://indike.org/pramana/in.purana.kurma.2.18.80) guhyakā rākṣasā siddhā haranti prasabhaṃ yataḥ / ekānte suśubhe deśe tasmājjapyaṃ samācaret // ### [2.18.81](https://indike.org/pramana/in.purana.kurma.2.18.81) caṇḍālāśaucapatitān dṛṣṭvācamya punarjapet / taireva bhāṣaṇaṃ kṛtvā snātvā caiva japet punaḥ // ### [2.18.82](https://indike.org/pramana/in.purana.kurma.2.18.82) ācamya prayato nityaṃ japedaśucidarśane / saurān mantrān śaktito vai pāvamānīstu kāmataḥ // ### [2.18.83](https://indike.org/pramana/in.purana.kurma.2.18.83) yadi syāt klinnavāsā vai vārimadhyagato japet / anyathā tu śucau bhūmyāṃ darbheṣu susamāhitaḥ // ### [2.18.84](https://indike.org/pramana/in.purana.kurma.2.18.84) pradakṣiṇaṃ samāvṛtya namaskṛtvā tataḥ kṣitau / ācamya ca yathāśāstraṃ śaktyā svādhyāyamācaret // ### [2.18.85](https://indike.org/pramana/in.purana.kurma.2.18.85) tataḥ saṃtarpayed devānṛṣīn pitṛgaṇāṃstathā / adāvoṅkāramuccārya namo 'nte tarpayāmi vaḥ // ### [2.18.86](https://indike.org/pramana/in.purana.kurma.2.18.86) devān brahmaḥṛṣīṃścaiva tarpayedakṣatodakaiḥ / tilodakaiḥ pitṝn bhaktyā svasūtroktavidhānataḥ // ### [2.18.87](https://indike.org/pramana/in.purana.kurma.2.18.87) anvārabdhena savyena pāṇinā dakṣiṇena tu / devarṣostarpayed dhīmānudakāñjalibhiḥ pitan // ### [2.18.88](https://indike.org/pramana/in.purana.kurma.2.18.88) yajñopavītī devānāṃ nivītī ṛṣītarpaṇe / prācīnāvītī pitrye tu svena tīrthena bhāvataḥ // ### [2.18.89](https://indike.org/pramana/in.purana.kurma.2.18.89) niṣpīḍya snānavastraṃ tu samācamya ca vāgyataḥ / svairmantrairarcayed devān puṣpaiḥ patrairathāmbubhiḥ // ### [2.18.90](https://indike.org/pramana/in.purana.kurma.2.18.90) brahmāṇaṃ śaṅkaraṃ sūryaṃ tathaiva madhusūdanam / anyāṃścābhimatān devān bhaktyā cākrodhano 'tvaraḥ // ### [2.18.91](https://indike.org/pramana/in.purana.kurma.2.18.91) pradadyād vātha puṣpāṇi sūktena pauruṣeṇa tu / āpo vā devatāḥ sarvāstena samyak samarcitāḥ // ### [2.18.92](https://indike.org/pramana/in.purana.kurma.2.18.92) dhyātvā praṇavapūrvaṃ vai daivatāni samāhitaḥ / namaskāreṇa puṣpāṇi vinyased vai pṛthak pṛthak // ### [2.18.93](https://indike.org/pramana/in.purana.kurma.2.18.93) na viṣṇvārādhanāt puṇyaṃ vidyate karma vaidikam / tasmādanādimadhyāntaṃ nityamārādhayeddharim // ### [2.18.94](https://indike.org/pramana/in.purana.kurma.2.18.94) tadviṣṇoriti mantreṇa sūktena puruṣeṇa tu / naitābhyāṃ sadṛśo mantro sūktena puruṣeṇa tu / naitābhyāṃ sadṛśo mantro vedeṣūktaścaturṣvapi // ### [2.18.95](https://indike.org/pramana/in.purana.kurma.2.18.95) nivedayeta svātmānaṃ viṣṇāvamalatejasi / tadātmā tanmanāḥ śāntastadviṣṇoriti mantrataḥ // ### [2.18.96](https://indike.org/pramana/in.purana.kurma.2.18.96) athavā devamīśānaṃ bhagavantaṃ sanātanam / ārādhayenmahādevaṃ bhāvapūto maheśvaram // ### [2.18.97](https://indike.org/pramana/in.purana.kurma.2.18.97) mantreṇa rudrāgāyatryā praṇavenātha vā punaḥ / īśānenātha vā rudraistryambakena samāhitaḥ // ### [2.18.98](https://indike.org/pramana/in.purana.kurma.2.18.98) puṣpaiḥ patrairathādbhirvā candanādyairmaheśvaram / uktvā namaḥ śivāyeti mantreṇānena yojayet // ### [2.18.99](https://indike.org/pramana/in.purana.kurma.2.18.99) namaskuryānmahādevaṃ ṛtaṃ satyamitiśvaram / nivedayīta svātmānaṃ yo brahmāṇamitīśvaram // ### [2.18.100](https://indike.org/pramana/in.purana.kurma.2.18.100) pradakṣiṇaṃ dvijaḥ kuryāt pañca brahmāṇi vai japan / dhyāyīta devamīśānaṃ vyomamadhyagataṃ śivam // ### [2.18.101](https://indike.org/pramana/in.purana.kurma.2.18.101) athāvalokayedarkaṃ haṃsaḥ suciṣadityṛcā / kuryāt pañca mahāyajñān gṛhaṃ gatvā samāhitaḥ // ### [2.18.102](https://indike.org/pramana/in.purana.kurma.2.18.102) devayajñaṃ pitṛyajñaṃ bhūtayajñaṃ tathaiva ca / mānuṣyaṃ brahmayajñaṃ ca pañca yajñān pracakṣate // ### [2.18.103](https://indike.org/pramana/in.purana.kurma.2.18.103) yadi syāt tarpaṇādarvāk brahmayajñaḥ kṛto na hi / kṛtvā manuṣyayajñaṃ vai tataḥ svādhyāyamācaret // ### [2.18.104](https://indike.org/pramana/in.purana.kurma.2.18.104) agneḥ paścimato deśe bhūtayajñānta eva vā / kuśapuñje samāsīnaḥ kuśapāṇiḥ samāhitaḥ // ### [2.18.105](https://indike.org/pramana/in.purana.kurma.2.18.105) śālāgnau laukike vāgnau jale bhūbhyāmathāpivā / vaiśvadevaṃ tataḥ kuryād devayajñaḥ sa vai smṛtaḥ // ### [2.18.106](https://indike.org/pramana/in.purana.kurma.2.18.106) yadi syāllaukike pakvaṃ tato 'nnaṃ tatra hūyate / śālāgnau tatra devānnaṃ vidhireṣa sanātanaḥ // ### [2.18.107](https://indike.org/pramana/in.purana.kurma.2.18.107) devebhyastu hutādannāccheṣād bhūtabaliṃ haret / bhūtayajñaḥ sa vai jñeyo bhūtidaḥ sarvadehinām // ### [2.18.108](https://indike.org/pramana/in.purana.kurma.2.18.108) śvabhyaśca śvapacebhyaśca patitādibhya eva ca / dadyād bhūmau baliṃ tvannaṃ pakṣibhyo 'tha dvijottamaḥ // ### [2.18.109](https://indike.org/pramana/in.purana.kurma.2.18.109) sāyaṃ cānnasya siddhasya patnyamantraṃ baliṃ haret / bhūtayajñastvayaṃ nityaṃ sāyaṃ prātarvidhīyate // ### [2.18.110](https://indike.org/pramana/in.purana.kurma.2.18.110) ekaṃ tu bhojayed vipraṃ pitṝnuddiśya sattamam / nityaśrāddhaṃ taduddiṣṭaṃ pitṛyajño gatipradaḥ // ### [2.18.111](https://indike.org/pramana/in.purana.kurma.2.18.111) uddhṛtya vā yathāśakti kiñcidannaṃ samāhitaḥ / vedatattvārthaviduṣe dvijāyaivopapādayet // ### [2.18.112](https://indike.org/pramana/in.purana.kurma.2.18.112) pūjayedatithiṃ nityaṃ namasyedarcayed dvijam / manovākkarmabhiḥ śāntamāgataṃ svagṛha tataḥ // ### [2.18.113](https://indike.org/pramana/in.purana.kurma.2.18.113) hantakāramathāgraṃ vā bhikṣāṃ vā śaktito dvijaḥ / dadyādatithaye nityaṃ budhyeta parameśvaram // ### [2.18.114](https://indike.org/pramana/in.purana.kurma.2.18.114) bhikṣāmāhurgrāsamātramagraṃ tasyāścaturguṇam / puṣkalaṃ hantakāraṃ tu taccaturguṇamucyate // ### [2.18.115](https://indike.org/pramana/in.purana.kurma.2.18.115) godohamātraṃ kālaṃ vai pratīkṣyo hyatithiḥ svayam / abhyāgatān yathāśakti pūjayedatithiṃ yathā // ### [2.18.116](https://indike.org/pramana/in.purana.kurma.2.18.116) bhikṣāṃ vai bhikṣave dadyād vidhivad brahmacāriṇe / dadyādannaṃ yathāśakti tvarthibhyo lobhavarjitaḥ // ### [2.18.117](https://indike.org/pramana/in.purana.kurma.2.18.117) sarveṣāmapyalābhe tu annaṃ gobhyo nivedayet / bhuñjīta bandhubhiḥ sārdhaṃ vāgyato 'nnamakutsayan // ### [2.18.118](https://indike.org/pramana/in.purana.kurma.2.18.118) akṛtvā tu dvijaḥ pañca mahāyajñān dvijottamāḥ / bhṛñjīta cet sa mūḍhātmā tiryagyoniṃ sagacchati // ### [2.18.119](https://indike.org/pramana/in.purana.kurma.2.18.119) vedābhyāso 'nvahaṃ śaktyā mahāyajñakriyā kṣamā / nāśayatyāśu pāpāni devānāmarcanaṃ tathā // ### [2.18.120](https://indike.org/pramana/in.purana.kurma.2.18.120) yo mohādathavālasyādakṛtvā devatārcanam / bhuṅkte sa yāti narakān śūkareṣvabhijāyate // ### [2.18.121](https://indike.org/pramana/in.purana.kurma.2.18.121) tasmāt sarvaprayatnena kṛtvā karmāṇi vai dvijāḥ / bhuñjīta svajanaiḥ sārdhaṃ sayāti paramāṃ gatim // ### [2.18.121.p1](https://indike.org/pramana/in.purana.kurma.2.18.121.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge aṣṭādaśo 'dhyāyaḥ ## Linked texts (15) - [Garuḍapurāṇa](https://indike.org/pramana/in.purana.garuda.1.50.2) — Vyāsa, Sanskrit - [Pāñcarātrarakṣā](https://indike.org/pramana/in.sampradaya.vaisnava.pancaratra.pancaratraraksa.2.390) — Vedāntadeśika, Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.38.p27) — Devaṇṇabhaṭṭa, Sanskrit - [Ācārabhūṣaṇa](https://indike.org/pramana/in.niti.dharma.acara.acarabhusana.14.p1.23) — Tryambaka rāma oka 1794, Sanskrit - [Ācārārka (Divākarabhaṭṭa)](https://indike.org/pramana/in.niti.dharma.acara.bhatta.acararka.4.11.p1.12) — Divākarabhaṭṭa 1686, Sanskrit - [Dānasāgara](https://indike.org/pramana/in.niti.dharma.nibandha.danasagara.16.17) — Ballālasena, Sanskrit - [Bhagavantabhāskara](https://indike.org/pramana/in.niti.dharma.nibandha.mahanibandha.bhagavantabhaskara.13.p3) — Nīlakaṇṭha Dīkṣita 1625, Sanskrit - [Ācāramayūkha](https://indike.org/pramana/in.niti.dharma.acara.bhatta.acaramayukha.6.p3) — Nīlakaṇṭha Dīkṣita 1625, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.4.p899) — Lakṣmīdhara Bhaṭṭa, Sanskrit - [Nityācārapaddhati (Vidyākara vājapeyin)](https://indike.org/pramana/in.niti.dharma.acara.ahnika.nityacarapaddhati-vidyakara-vajapeyin.2.p66) — Vidyākara vājapeyin, Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.3.p1.16) — Viśveśvarabhaṭṭa, Sanskrit - [Pūjāprakāśa](https://indike.org/pramana/in.niti.dharma.pratistha.pujaprakasa.2.p38.5) — Mitramiśra, Sanskrit - [Smṛtiratnākara](https://indike.org/pramana/in.niti.dharma.acara.smrtiratnakara.2.p68.4) — Veṅkaṭanātha, Sanskrit - [Smṛtiratnākara (Viṭṭhalanātha)](https://indike.org/pramana/in.niti.dharma.nibandha.smrtiratnakara-vitthala.2.p68.4) — Viṭṭhalanātha, Sanskrit - [Prāyaścittamayūkha](https://indike.org/pramana/in.niti.dharma.prayascitta.bhatta.prayascittamayukha.2.59.p1) — Nīlakaṇṭha Dīkṣita, Sanskrit --- Source: [https://indike.org/pramana/in.purana.kurma.2.18](https://indike.org/pramana/in.purana.kurma.2.18) · Pramāṇa