[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.1 # Kurmapurana 2.1: prathamo'dhyāyaḥ Kūrmapurāṇa 2.1 - **Language:** Sanskrit ## Contents - [2.1.53](https://indike.org/pramana/in.purana.kurma.2.1.53) — 1 part ### prathamo'dhyāyaḥ ### [2.1.1](https://indike.org/pramana/in.purana.kurma.2.1.1) ṛṣaya ūcuḥ bhavatā kathitaḥ samyak sargaḥ svāyaṃbhuvastataḥ / brahmāṇḍasyāsya vistāro manvantaraviniścayaḥ // ### [2.1.2](https://indike.org/pramana/in.purana.kurma.2.1.2) tatreśvareśvaro devo varṇibhirdharmatatparaiḥ / jñānayogaratairnityamārādhyaḥ kathitastvayā // ### [2.1.3](https://indike.org/pramana/in.purana.kurma.2.1.3) tadvadāśeṣasaṃsāraduḥ khanāśamanuttamam / jñānaṃ brahmaikaviṣayaṃ yena paśyema tatparam // ### [2.1.4](https://indike.org/pramana/in.purana.kurma.2.1.4) tvaṃ hi nārāyaṇātsākṣāt kṛṣṇadvaipāyanāt prabho / avāptākhilavijñānastattvāṃ pṛcchāmahe punaḥ // ### [2.1.5](https://indike.org/pramana/in.purana.kurma.2.1.5) śrutvā munīnāṃ tad vākyaṃ kṛṣṇadvaipāyanaṃ prabhum / sūtaḥ paurāṇikaḥ smṛtvā bhāṣituṃ hyupacakrame // ### [2.1.6](https://indike.org/pramana/in.purana.kurma.2.1.6) athāsminnantare vyāsaḥ kṛṣṇadvaipāyanaḥ svayam / ājagāma muniśreṣṭhā yatra satraṃ samāsate // ### [2.1.7](https://indike.org/pramana/in.purana.kurma.2.1.7) taṃ dṛṣṭvā vedavidvāṃsaṃ kālameghasamadyutim / vyāsaṃ kamalapatrākṣaṃ praṇemurdvijapuṅgavāḥ // ### [2.1.8](https://indike.org/pramana/in.purana.kurma.2.1.8) papāta daṇḍavad bhūmau dṛṣṭvāsau romaharṣaṇaḥ / pradakṣiṇīkṛtya guruṃ prāñjaliḥ pārśvago 'bhavat // ### [2.1.9](https://indike.org/pramana/in.purana.kurma.2.1.9) pṛṣṭāste 'nāmayaṃ viprāḥ śaunakādyā mahāmunim / samāśvāsyāsanaṃ tasmai tadyogyaṃ samakalpayan // ### [2.1.10](https://indike.org/pramana/in.purana.kurma.2.1.10) athaitānabravīd vākyaṃ parāśarasutaḥ prabhuḥ / kaccinna tapaso hāniḥ svādhyāyasya śrutasya ca // ### [2.1.11](https://indike.org/pramana/in.purana.kurma.2.1.11) tataḥ sa sūtaḥ svaguruṃ praṇamyāha mahāmunim / jñānaṃ tad brahmaviṣayaṃ munīnāṃ vaktumarhasi // ### [2.1.12](https://indike.org/pramana/in.purana.kurma.2.1.12) ime hi munayaḥ śāntāstāpasā dharmatatparāḥ / śuśrūṣā jāyate caiṣāṃ vaktumarhasi tattvataḥ // ### [2.1.13](https://indike.org/pramana/in.purana.kurma.2.1.13) jñānaṃ vimuktidaṃ divyaṃ yanme sākṣāt tvayoditam / munīnāṃ vyāhṛtaṃ pūrvaṃ viṣṇunā kūrmarūpiṇā // ### [2.1.14](https://indike.org/pramana/in.purana.kurma.2.1.14) śrutvā sūtasya vacanaṃ muniḥ satyavatīsutaḥ / praṇamya śirasā rudraṃ vacaḥ prāha sukhāvaham // ### [2.1.15](https://indike.org/pramana/in.purana.kurma.2.1.15) vyāsa uvāca vakṣye devo mahādevaḥ pṛṣṭo yogīśvaraiḥ purā / sanatkumārapramukhaiḥ svayaṃ yatsamabhāṣata // ### [2.1.16](https://indike.org/pramana/in.purana.kurma.2.1.16) sanatkumāraḥ sanakastathaiva ca sanandanaḥ / aṅgirā rudrasahito bhṛguḥ paramadharmavit // ### [2.1.17](https://indike.org/pramana/in.purana.kurma.2.1.17) kaṇādaḥ kapilo yogī vāmadevo mahāmuniḥ / śukro vasiṣṭho bhagavān sarve saṃyatamānasāḥ // ### [2.1.18](https://indike.org/pramana/in.purana.kurma.2.1.18) parasparaṃ vicāryaite saṃśayāviṣṭacetasaḥ / taptavantastapo ghoraṃ puṇye badarikāśrame // ### [2.1.19](https://indike.org/pramana/in.purana.kurma.2.1.19) apaśyaṃste mahāyogamṛṣiṃ dharmasutaṃ śucim / nārāyaṇamanādyantaṃ nareṇa sahitaṃ tadā // ### [2.1.20](https://indike.org/pramana/in.purana.kurma.2.1.20) saṃstūya vividhaiḥ stotraiḥ sarve vedasamudbhavaiḥ / praṇemurbhaktisaṃyuktā yogino yogavittamam // ### [2.1.21](https://indike.org/pramana/in.purana.kurma.2.1.21) vijñāya vāñchitaṃ teṣāṃ bhagavānapi sarvavit / prāha gambhīrayā vācā kimarthaṃ tapyate tapaḥ // ### [2.1.22](https://indike.org/pramana/in.purana.kurma.2.1.22) abruvan hṛṣṭamanaso viśvātmānaṃ sanātanam / sākṣānnārāyaṇaṃ devamāgataṃ siddhisūcakam // ### [2.1.23](https://indike.org/pramana/in.purana.kurma.2.1.23) vayaṃ saṃśayamāpannāḥ sarve vai brahmavādinaḥ / bhavantamekaṃ śaraṇaṃ prapannāḥ puruṣottamam // ### [2.1.24](https://indike.org/pramana/in.purana.kurma.2.1.24) tvaṃ hi tad vettha paramaṃ sarvajño bhagavānṛṣiḥ / nārāyaṇaḥ svayaṃ sākṣāt purāṇo 'vyaktapūruṣaḥ // ### [2.1.25](https://indike.org/pramana/in.purana.kurma.2.1.25) nahyanyo vidyate vettā tvāmṛte parameśvara / śuśrūṣāsmākamakhilaṃ saṃśayaṃ chettumarhasi // ### [2.1.26](https://indike.org/pramana/in.purana.kurma.2.1.26) kiṃ kāraṇamidaṃ kṛtsnaṃ ko 'nusaṃsarate sadā / kaścidātmā ca kā muktiḥ saṃsāraḥ kiṃnimittakaḥ // ### [2.1.27](https://indike.org/pramana/in.purana.kurma.2.1.27) kaḥ saṃsārayatīśānaḥ ko vā sarvaṃ prapaśyati / kiṃ tat parataraṃ brahma sarvaṃ no vaktumarhasi // ### [2.1.28](https://indike.org/pramana/in.purana.kurma.2.1.28) evamukte tu munayaḥ prāpaśyan puruṣottamam / vihāya tāpasaṃ rūpaṃ saṃsthitaṃ svena tejasā // ### [2.1.29](https://indike.org/pramana/in.purana.kurma.2.1.29) vibhrājamānaṃ vimalaṃ prabhāmaṇḍalamaṇḍitam / śrīvatsavakṣasaṃ devaṃ taptajāmbūnadaprabham // ### [2.1.30](https://indike.org/pramana/in.purana.kurma.2.1.30) śaṅkhacakragadāpāṇiṃ śārṅgahastaṃ śriyāvṛtam / na dṛṣṭastatkṣaṇādeva narastasyaiva tejasā // ### [2.1.31](https://indike.org/pramana/in.purana.kurma.2.1.31) tadantare mahādevaḥ śaśāṅkāṅkitaśekharaḥ / prasādābhimukho rudraḥ prādurāsīnmaheśvaraḥ // ### [2.1.32](https://indike.org/pramana/in.purana.kurma.2.1.32) nirīkṣya te jagannāthaṃ trinetraṃ candrabhūṣaṇam / tuṣṭuvurhṛṣṭamanaso bhaktyā taṃ parameśvaram // ### [2.1.33](https://indike.org/pramana/in.purana.kurma.2.1.33) jayeśvara mahādeva jaya bhūtapate śiva / jayāśeṣamunīśāna tapasābhiprapūjita // ### [2.1.34](https://indike.org/pramana/in.purana.kurma.2.1.34) sahasramūrte viśvātman jagadyantrapravartaka / jayānanta jagajjanmatrāṇasaṃhārakāraṇa // ### [2.1.35](https://indike.org/pramana/in.purana.kurma.2.1.35) sahasracaraṇeśāna śaṃbho yogīndravandita / jayāmbikāpate deva namaste parameśvara // ### [2.1.36](https://indike.org/pramana/in.purana.kurma.2.1.36) saṃstuto bhagavānīśastryambako bhaktavatsalaḥ / samāliṅgya hṛṣīkeśaṃ prāha gambhīrayā girā // ### [2.1.37](https://indike.org/pramana/in.purana.kurma.2.1.37) kimarthaṃ puṇḍarīkākṣa munīndrā brahmavādinaḥ / imaṃ samāgatā deśaṃ kiṃ vā kāryaṃ mayācyuta // ### [2.1.38](https://indike.org/pramana/in.purana.kurma.2.1.38) ākarṇya bhagavadvākyaṃ devadevo janārdanaḥ / prāha devo mahādevaṃ prasādābhimukhaṃ sthitam // ### [2.1.39](https://indike.org/pramana/in.purana.kurma.2.1.39) ime hi munayo deva tāpasāḥ kṣīṇakalmaṣāḥ / abhyāgatā māṃ śaraṇaṃ samyagdarśanakāṅkṣiṇaḥ // ### [2.1.40](https://indike.org/pramana/in.purana.kurma.2.1.40) yadi prasanno bhagavān munīnāṃ bhāvitātmanām / sannidhau mama tajjñānaṃ divyaṃ vaktumihārhasi // ### [2.1.41](https://indike.org/pramana/in.purana.kurma.2.1.41) tvaṃ hi vettha svamātmānaṃ na hyanyo vidyate śiva / tatastvamātmanātmānaṃ munīndrebhyaḥ pradarśaya // ### [2.1.42](https://indike.org/pramana/in.purana.kurma.2.1.42) evamuktvā hṛṣīkeśaḥ provāca munipuṅgavān / pradarśayan yogasiddhiṃ nirīkṣya vṛṣabhadhvajam // ### [2.1.43](https://indike.org/pramana/in.purana.kurma.2.1.43) saṃdarśanānmaheśasya śaṅkarasyātha śūlinaḥ / kṛtārthaṃ svayamātmānaṃ jñātumarhatha tattvataḥ // ### [2.1.44](https://indike.org/pramana/in.purana.kurma.2.1.44) praṣṭumarhatha viśveśaṃ pratyakṣaṃ purataḥ sthitam / mamaiva sannidhāveṣa yathāvad vaktumīśvaraḥ // ### [2.1.45](https://indike.org/pramana/in.purana.kurma.2.1.45) niśamya viṣṇuvacanaṃ praṇamya vṛṣabhadhvajam / sanatkumārapramukhāḥ pṛcchanti sma maheśvaram // ### [2.1.46](https://indike.org/pramana/in.purana.kurma.2.1.46) athāsminnantare divyamāsanaṃ vimalaṃ śivam / kimapyacintyaṃ gaganādīśvarārhaṃ samudbabhau // ### [2.1.47](https://indike.org/pramana/in.purana.kurma.2.1.47) tatrāsasāda yogātmā viṣṇunā saha viśvakṛt / tejasā pūrayan viśvaṃ bhāti devo maheśvaraḥ // ### [2.1.48](https://indike.org/pramana/in.purana.kurma.2.1.48) taṃ te devādideveśaṃ śaṅkaraṃ brahmavādinaḥ / vibhrājamānaṃ vimale tasmin dadṛśurāsane // ### [2.1.49](https://indike.org/pramana/in.purana.kurma.2.1.49) yaṃ prapaśyantiyogasthāḥ svātmanyātmānamīśvaramā / ananyatejasaṃ śāntaṃ śivaṃ dadṛśire kila // ### [2.1.50](https://indike.org/pramana/in.purana.kurma.2.1.50) yataḥ prasūtirbhūtānāṃ yatraitat pravilīyate / tamāsanasthaṃ bhūtānāmīśaṃ dadṛśire kila // ### [2.1.51](https://indike.org/pramana/in.purana.kurma.2.1.51) yadantarā sarvametad yato 'bhinnamidaṃ jagat / sa vāsudevamāsīnaṃ tamīśaṃ dadṛśuḥ kila // ### [2.1.52](https://indike.org/pramana/in.purana.kurma.2.1.52) provāca pṛṣṭo bhagavān munīnāṃ parameśvaraḥ / nirīkṣya puṇḍarīkākṣaṃ svātmayogamanuttamam // ### [2.1.53](https://indike.org/pramana/in.purana.kurma.2.1.53) tacchṛṇudhvaṃ yathānyāyamucyamānaṃ mayānaghāḥ / praśāntamānasāḥ sarve jñānamīśvarabhāṣitam // ### [2.1.53.p1](https://indike.org/pramana/in.purana.kurma.2.1.53.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge (īśvaragītāsu) prathamo 'dhyāyaḥ --- Source: [https://indike.org/pramana/in.purana.kurma.2.1](https://indike.org/pramana/in.purana.kurma.2.1) · Pramāṇa