[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.22 # Kurmapurana 2.22: dvāviṃśo'dhyāyaḥ Kūrmapurāṇa 2.22 - **Language:** Sanskrit ## Contents - [2.22.100](https://indike.org/pramana/in.purana.kurma.2.22.100) — 2 parts ### dvāviṃśo'dhyāyaḥ ### [2.22.1](https://indike.org/pramana/in.purana.kurma.2.22.1) vyāsa uvāca gomayenodakairbhūmiṃ śodhayitvā samāhitaḥ / saṃnipātya dvijān sarvān sādhubhiḥ saṃnimantrayet // ### [2.22.2](https://indike.org/pramana/in.purana.kurma.2.22.2) śvo bhaviṣyati me śrāddhaṃ pūrvedyurabhipūjya ca / asaṃbhave paredyurvā yathoktairlakṣaṇairyutān // ### [2.22.3](https://indike.org/pramana/in.purana.kurma.2.22.3) tasya te pitaraḥ śrutvā śrāddhakālamupasthitam / anyonyaṃ manasā dhyātvā saṃpatanti manojavāḥ // ### [2.22.4](https://indike.org/pramana/in.purana.kurma.2.22.4) brāhmaṇaiste sahāśnanti pitaro hyantarikṣagāḥ / vāyubhūtāstu tiṣṭhanti bhuktvā yānti parāṃ gatim // ### [2.22.5](https://indike.org/pramana/in.purana.kurma.2.22.5) āmantritāśca te viprāḥ śrāddhakāla upasthite / vaseyurniyatāḥ sarve brahmacaryaparāyaṇāḥ // ### [2.22.6](https://indike.org/pramana/in.purana.kurma.2.22.6) akrodhano 'tvaro 'mattaḥ satyavādī samāhitaḥ / bhāraṃ maithunamadhvānaṃ śrāddhakṛd varjayejjapam // ### [2.22.7](https://indike.org/pramana/in.purana.kurma.2.22.7) āmantrito brāhmaṇo vā yo 'nyasmai kurute kṣaṇam / sa yāti narakaṃ ghoraṃ sūkaratvāṃ prāyāti ca // ### [2.22.8](https://indike.org/pramana/in.purana.kurma.2.22.8) āmantrayitvā yo mohādanyaṃ cāmantrayed dvijam / sa tasmādadhikaḥ pāpī viṣṭhākīṭo 'bhijāyate // ### [2.22.9](https://indike.org/pramana/in.purana.kurma.2.22.9) śrāddhe nimantrito vipro maithunaṃ yo 'dhigacchati / brahmahatyāmavāpnoti tiryagyonau ca jāyate // ### [2.22.10](https://indike.org/pramana/in.purana.kurma.2.22.10) nimantritastu yo vipro hyadhvānaṃ yāti durmatiḥ / bhavanti pitarastasya taṃ māsaṃ pāṃśubhojanāḥ // ### [2.22.11](https://indike.org/pramana/in.purana.kurma.2.22.11) nimantritastu yaḥ śrāddhe prakuryāt kalahaṃ dvijaḥ / bhavanti tasya tanmāsaṃ pitaro malabhojanāḥ // ### [2.22.12](https://indike.org/pramana/in.purana.kurma.2.22.12) tasmānnimantritaḥ śrāddhe niyatātmā bhaved dvijaḥ / akrodhanaḥ śaucaparaḥ kartā caiva jitendriyaḥ // ### [2.22.13](https://indike.org/pramana/in.purana.kurma.2.22.13) śvobhūte dakṣiṇāṃ gatvā diśaṃ darbhān samāhitaḥ / samūlānāhared vāri dakṣiṇāgrān sunirmalān // ### [2.22.14](https://indike.org/pramana/in.purana.kurma.2.22.14) dakṣiṇāpravaṇaṃ snigdhaṃ vibhaktaṃ śubhalakṣaṇam / śuciṃ deśaṃ viviktaṃ ca gomayenopalepayet // ### [2.22.15](https://indike.org/pramana/in.purana.kurma.2.22.15) nadītīreṣu tīrtheṣu svabhūmau caiva sānuṣu / vivikteṣu ca tuṣyanti dattena pitaraḥ sadā // ### [2.22.16](https://indike.org/pramana/in.purana.kurma.2.22.16) pārakye bhūmibhāge tu pitṝṇāṃ naiva nirvapet / svāmibhistad vihanyeta mohād yat kriyate naraiḥ // ### [2.22.17](https://indike.org/pramana/in.purana.kurma.2.22.17) aṭavyaḥ parvatāḥ puṇyāstīrthānyāyatanāni ca / sarvāṇyasvāmikānyāhurna hi teṣu parigrahaḥ // ### [2.22.18](https://indike.org/pramana/in.purana.kurma.2.22.18) tilān pravikiret tatra sarvato bandhayedajān / asuropahataṃ sarvaṃ tilaiḥ śuddhyatyajena vā // ### [2.22.19](https://indike.org/pramana/in.purana.kurma.2.22.19) tato 'nnaṃ bahusaṃskāraṃ naikavyañjanamacyutam / coṣyapeyasamṛddhaṃ ca yathāśaktyā prakalpayet // ### [2.22.20](https://indike.org/pramana/in.purana.kurma.2.22.20) tato nivṛtte madhyāhne luptalomanakhān dvijān / abhigamya yathāmārgaṃ prayacched dantadhāvanam // ### [2.22.21](https://indike.org/pramana/in.purana.kurma.2.22.21) tailamabhyañjanaṃ snānaṃ snānīyaṃ ca pṛthagvidham / pātrairaudumbarairdadyād vaiśvadaivatyapūrvakam // ### [2.22.22](https://indike.org/pramana/in.purana.kurma.2.22.22) tataḥ snātvā nivṛttebhyaḥ pratyutthāyakṛtāñjaliḥ / pādyamācamanīyaṃ ca saṃprayacched yathākramam // ### [2.22.23](https://indike.org/pramana/in.purana.kurma.2.22.23) ye cātra viśvedevānāṃ viprāḥ pūrvaṃ nimantritāḥ / prāṅmukhānyāsanānyeṣāṃ tridarbhopahitāni ca // ### [2.22.24](https://indike.org/pramana/in.purana.kurma.2.22.24) dakṣiṇāmukhayuktāni pitṝṇāmāsanāni ca / dakṣiṇāgraikadarbhāṇi prokṣitāni tilodakaiḥ // ### [2.22.25](https://indike.org/pramana/in.purana.kurma.2.22.25) teṣūpaveśayedetānāsanaṃ spṛśya sa dvijam / āsadhvamiti saṃjalpan āsanāste pṛthak pṛthak // ### [2.22.26](https://indike.org/pramana/in.purana.kurma.2.22.26) dvau daive prāṅmukhau pitrye trayaścodaṅmukhāstathā / ekaikaṃ vā bhavet tatra devamātāmaheṣvapi // ### [2.22.27](https://indike.org/pramana/in.purana.kurma.2.22.27) satkriyāṃ deśakālau ca śaucaṃ brāhmaṇasaṃpadam / pañcaitān vistaro hanti tasmānneheta vistaram // ### [2.22.28](https://indike.org/pramana/in.purana.kurma.2.22.28) api vā bhojayedekaṃ brāhmaṇaṃ vedapāragam / śrutaśīlādisaṃpannamalakṣaṇavivarjitam // ### [2.22.29](https://indike.org/pramana/in.purana.kurma.2.22.29) uddhṛtya pātre cānnaṃ tat sarvasmāt prakṛtāt punaḥ / devatāyatane cāsmai nivedyānyatpravartayet // ### [2.22.30](https://indike.org/pramana/in.purana.kurma.2.22.30) prāsyedagnau tadannaṃ tu dadyād vā brahmacāriṇe / tasmādekamapi śreṣṭhaṃ vidvāṃsaṃ bhojayed dvijam // ### [2.22.31](https://indike.org/pramana/in.purana.kurma.2.22.31) bhikṣuko brahmacārī vā bhojanārthamupasthitaḥ / upaviṣṭeṣu yaḥ śrāddhe kāmaṃ tamapi bhojayet // ### [2.22.32](https://indike.org/pramana/in.purana.kurma.2.22.32) atithiryasya nāśnāti na tacchrāddhaṃ praśasyate / tasmāt prayatnācchrāddheṣu pūjyā hyatithayo dvijaiḥ // ### [2.22.33](https://indike.org/pramana/in.purana.kurma.2.22.33) ātithyarahite śrāddhe bhuñjate ye dvijātayaḥ / kākayoniṃ vrajantyete dātā caiva na saṃśayaḥ // ### [2.22.34](https://indike.org/pramana/in.purana.kurma.2.22.34) hīnāṅgaḥ patitaḥ kuṣṭhī vraṇī pukkasanāstikau / kukkuṭāḥ śūkarāḥ śvāno varjyāḥ śrāddheṣu dūrataḥ // ### [2.22.35](https://indike.org/pramana/in.purana.kurma.2.22.35) bībhatsumaśuciṃ nagnaṃ mattaṃ dhūrtaṃ rajasvalām / nīlakāṣāyavasanaṃ pāṣaṇḍāṃśca vivarjayet // ### [2.22.36](https://indike.org/pramana/in.purana.kurma.2.22.36) yat tatra kriyate karma paitṛkaṃ brāhmaṇān prati / tatsarvameva kartavyaṃ vaiśvadaivatyapūrvakam // ### [2.22.37](https://indike.org/pramana/in.purana.kurma.2.22.37) yathopaviṣṭān sarvāṃstānalaṅkuryād vibhūṣaṇaḥ / stragdāmabhiḥ śiroveṣṭairdhūpavāso 'nulepanaiḥ // ### [2.22.38](https://indike.org/pramana/in.purana.kurma.2.22.38) tatastvāvāhayed devān brāhmaṇānāmanujñayā / udaṅmukho yathānyāyaṃ viśve devāsa ityṛcā // ### [2.22.39](https://indike.org/pramana/in.purana.kurma.2.22.39) dve pavitre gṛhītvātha bhājane kṣālite punaḥ / śaṃ no devyā jalaṃ kṣiptvā yavo 'sīti yavāṃstathā // ### [2.22.40](https://indike.org/pramana/in.purana.kurma.2.22.40) yā divyā iti mantraṇa haste tvarghaṃ vinikṣipet / pradadyād gandhamālyāni dhūpādīni ca śaktitaḥ // ### [2.22.41](https://indike.org/pramana/in.purana.kurma.2.22.41) apasavyaṃ tataḥ kṛtvā pitṝṇāṃ dakṣiṇāmukhaḥ / āvāhanaṃ tataḥ kuryāduśantastvetyṛcā budhaḥ // ### [2.22.42](https://indike.org/pramana/in.purana.kurma.2.22.42) āvāhya tadanujñāto japedāyantu nastataḥ / śaṃ no devyodakaṃ pātre tilo 'sīti tilāṃstathā // ### [2.22.43](https://indike.org/pramana/in.purana.kurma.2.22.43) kṣiptvā cārghaṃ yathāpūrvaṃ dattvā hasteṣu vai punaḥ / saṃstravāṃśca tataḥ sarvān pātre kuryāt samāhitaḥ / pitṛbhyaḥ sthānametena nyubjaṃ pātraṃ nidhāpayet // ### [2.22.44](https://indike.org/pramana/in.purana.kurma.2.22.44) agnau kariṣyetyādāya pṛcchatyannaṃ ghṛtaplutam / kuruṣvetyabhyanujñāto juhuyādupavītavān // ### [2.22.45](https://indike.org/pramana/in.purana.kurma.2.22.45) yajñopavītinā homaḥ kartavyaḥ kuśapāṇinā / prācīnāvītinā pitryaṃ vaiśvadevaṃ tu homavat // ### [2.22.46](https://indike.org/pramana/in.purana.kurma.2.22.46) dakṣiṇaṃ pātayejjānuṃ devān paricaran pumān / pitṛṇāṃ paricaryāsu pātayeditaraṃ tathā // ### [2.22.47](https://indike.org/pramana/in.purana.kurma.2.22.47) somāya vai pitṛmate svadhā nama iti bruvan / agnaye kavyavāhanāya svadheti juhuyāt tataḥ // ### [2.22.48](https://indike.org/pramana/in.purana.kurma.2.22.48) agnyabhāve tu viprasya pāṇāvevopapādayet / mahādevāntike vātha goṣṭhe vā susamāhitaḥ // ### [2.22.49](https://indike.org/pramana/in.purana.kurma.2.22.49) tatastairabhyanujñāto gatvā vai dakṣiṇāṃ diśam / gomayenopatipyorvoṃ sthānaṃ kṛtvā tu saikatam // ### [2.22.50](https://indike.org/pramana/in.purana.kurma.2.22.50) maṇḍalaṃ caturastraṃ vā dakṣiṇāvanataṃ śubham / trirullikhet tasya madhyaṃ darbheṇaikena caiva hi // ### [2.22.51](https://indike.org/pramana/in.purana.kurma.2.22.51) tataḥ saṃstīrya tatsthāne darbhān vaidakṣiṇāgrakān / trīn piṇḍān nirvapet tatra haviḥ śeṣātsamāhitaḥ // ### [2.22.52](https://indike.org/pramana/in.purana.kurma.2.22.52) nyupya piṇḍāṃstu taṃ hastaṃ nimṛjyāllepabhāginām / teṣu darbheṣvathācamya trirāyamya śanairasūn / tadannaṃ tu namaskuryāt pitṝneva ca mantravit // ### [2.22.53](https://indike.org/pramana/in.purana.kurma.2.22.53) udakaṃ ninayeccheṣaṃ śanaiḥ piṇḍāntike punaḥ / avajighrecca tān piṇḍān yathānyuptān samāhitaḥ // ### [2.22.54](https://indike.org/pramana/in.purana.kurma.2.22.54) atha piṇḍāvaśiṣṭānnaṃ vidhinā bhojayed dvijān / māṃsānyapūpān vividhān dadyāt kṛsarapāyasam // ### [2.22.55](https://indike.org/pramana/in.purana.kurma.2.22.55) sūpaśākaphalānīkṣūn payo dadhi ghṛtaṃ madhu / annaṃ caiva yathākāmaṃ vividhaṃ bhakṣyapeyakam // ### [2.22.56](https://indike.org/pramana/in.purana.kurma.2.22.56) yad yadiṣṭaṃ dvijendrāṇāṃ tatsarvaṃ vinivedayet / dhānyāṃstilāṃśca vividhān śarkarā vividhāstathā // ### [2.22.57](https://indike.org/pramana/in.purana.kurma.2.22.57) uṣṇamannaṃ dvijātibhyo dātavyaṃ śreya icchatā / anyatra phalamūlebhyaḥ pānakebhyastathaiva ca // ### [2.22.58](https://indike.org/pramana/in.purana.kurma.2.22.58) nāśrūṇi pātayejjātu na kupyennānṛtaṃ vadet / na pādena spṛśedannaṃ na caitadavadhūnayet // ### [2.22.59](https://indike.org/pramana/in.purana.kurma.2.22.59) krodhena caiva yat dattaṃ yad bhuktaṃ tvarayā punaḥ / yātudhānā vilumpanti jalpatā copapāditam // ### [2.22.60](https://indike.org/pramana/in.purana.kurma.2.22.60) svinnagātro na tiṣṭheta sannidhau tu dvijanmanām / na cātra śyenakākādīn pakṣiṇaḥ pratiṣedhayet / tadrūpāḥ pitarastatra samāyānti bubhukṣavaḥ // ### [2.22.61](https://indike.org/pramana/in.purana.kurma.2.22.61) na dadyāt tatra hastena pratyakṣalavaṇaṃ tathā / na cāyasena pātreṇa na caivāśraddhayā punaḥ // ### [2.22.62](https://indike.org/pramana/in.purana.kurma.2.22.62) kāñcanena tu pātreṇa rājataudumbareṇa vā / dattamakṣayatāṃ yāti khaḍgena ca viśeṣataḥ // ### [2.22.63](https://indike.org/pramana/in.purana.kurma.2.22.63) pātre tu mṛṇmaye yo vai śrāddhe bhojayate pitan / sa yāti narakaṃ ghoraṃ bhoktā caiva purodhasaḥ // ### [2.22.64](https://indike.org/pramana/in.purana.kurma.2.22.64) na paṅktyāṃ viṣamaṃ dadyānna yācenna ca dāpayet / yācitā dāpitā dātā narakān yānti dāruṇān // ### [2.22.65](https://indike.org/pramana/in.purana.kurma.2.22.65) bhuñjīran vāgyatāḥ śiṣṭā na brūyuḥ prākṛtān guṇān / tāvaddhi pitaro 'śnanti yāvannoktā havirguṇāḥ // ### [2.22.66](https://indike.org/pramana/in.purana.kurma.2.22.66) nāgrāsanopaviṣṭastu bhuñjota prathamaṃ dvijaḥ / bahūnāṃ paśyatāṃ so 'jñaḥ paṅktyā harati kilbiṣam // ### [2.22.67](https://indike.org/pramana/in.purana.kurma.2.22.67) na kiñcid varjayecchrāddhe niyuktastu dvijottamaḥ / na māṃsaṃ pratiṣedheta na cānyasyānnamīkṣayet // ### [2.22.68](https://indike.org/pramana/in.purana.kurma.2.22.68) yo nāśnāti dvijo māṃsaṃ niyuktaḥ pitṛkarmaṇi / sa pretya paśutāṃ yāti saṃbhavānekaviṃśatim // ### [2.22.69](https://indike.org/pramana/in.purana.kurma.2.22.69) svādhyāyaṃ śrāvayedeṣāṃ dharmaśāstrāṇi caiva hi / itihāsapurāṇāni śrāddhakalpāṃśca śobhanān // ### [2.22.70](https://indike.org/pramana/in.purana.kurma.2.22.70) tato 'nnamutsṛjed bhukte agrato vikiran bhuvi / pṛṣṭvā tṛptāḥ stha ityevaṃ tṛptānācāmayet tataḥ // ### [2.22.71](https://indike.org/pramana/in.purana.kurma.2.22.71) ācāntānanujānīyādabhito ramyatāmiti / svadhāstviti ca taṃ brūyurbrāhmaṇāstadanantaram // ### [2.22.72](https://indike.org/pramana/in.purana.kurma.2.22.72) tato bhuktavatāṃ teṣāmannaśeṣaṃ nivedayet / yathā brūyustathā kuryādanujñātastu vai dvijaiḥ // ### [2.22.73](https://indike.org/pramana/in.purana.kurma.2.22.73) pitrye svadita ityeva vākyaṃ goṣṭheṣu sūnṛtam / saṃpannamityabhyudaye daive rocata ityapi // ### [2.22.74](https://indike.org/pramana/in.purana.kurma.2.22.74) visṛjya brāhmaṇāṃstān vai daivapūrvaṃ tu vāgyataḥ / dakṣiṇāṃ diśamākāṅ kṣanyācetemān varān pitṝn // ### [2.22.75](https://indike.org/pramana/in.purana.kurma.2.22.75) dātāro no 'bhivardhantāṃ vedāḥ saṃtatireva ca / śraddhā ca no mā vyagamad bahudeyaṃ ca nosttviti // ### [2.22.76](https://indike.org/pramana/in.purana.kurma.2.22.76) piṇḍāṃstu go 'javiprebhyo dadyādagnau jale 'pi vā / madhyamaṃ tu tataḥ piṇḍamadyāt patnī sutārthinī // ### [2.22.77](https://indike.org/pramana/in.purana.kurma.2.22.77) prakṣālya hastāvācamya jñātīn śeṣeṇa toṣayet / jñātiṣvapi catuṣṭeṣu svān bhṛtyān bhojayot tataḥ / paścāt svayaṃ ca patnībhiḥ śeṣamannaṃ samācaret // ### [2.22.78](https://indike.org/pramana/in.purana.kurma.2.22.78) nodvāsayet taducchiṣṭaṃ yāvannāstaṅgato raviḥ / brahmacārī bhavetāṃ tu dampatī rajanīṃ tu tām // ### [2.22.79](https://indike.org/pramana/in.purana.kurma.2.22.79) dattvā śrāddhaṃ tathā bhuktvā sevate yastu maithunam / mahārauravamāsādya kīṭayoniṃ vrajet punaḥ // ### [2.22.80](https://indike.org/pramana/in.purana.kurma.2.22.80) śucirakrodhanaḥ śāntaḥ satyavādī samāhitaḥ / svādhyāyaṃ ca tathādhvānaṃ kartā bhoktā ca varjayet // ### [2.22.81](https://indike.org/pramana/in.purana.kurma.2.22.81) śrāddhaṃ bhuktvā paraśrāddhaṃ bhuñjate ye dvijātayaḥ / mahāpātikibhistulyā yānti te narakān bahūn // ### [2.22.82](https://indike.org/pramana/in.purana.kurma.2.22.82) eṣa vo vihitaḥ samyak śrāddhakalpaḥ sanātanaḥ / āmena vartayennityamudāsīno 'tha tattvavit // ### [2.22.83](https://indike.org/pramana/in.purana.kurma.2.22.83) anagniradhvago vāpi tathaiva vyasanānvitaḥ / āmaśrāddhaṃ dvijaḥ kuryād vidhijñaḥ śraddhayānvitaḥ / tenāgnau karaṇaṃ kuryāt piṇḍāṃstenaiva nirvapet // ### [2.22.84](https://indike.org/pramana/in.purana.kurma.2.22.84) yo 'nena vidhinā śrāddhaṃ kuryāt saṃyatamānasaḥ / vyapetakalpaṣo nityaṃ yogināṃ vartate padam // ### [2.22.85](https://indike.org/pramana/in.purana.kurma.2.22.85) tasmāt sarvaprayatnena śrāddhaṃ kuryād dvijottamaḥ / ārādhito bhavedīśastena samyak sanātanaḥ // ### [2.22.86](https://indike.org/pramana/in.purana.kurma.2.22.86) api mūlairphalairvāpi prakuryānnirdhano dvijaḥ / tilodakaistarpayed vā pitṝn snātvā samāhitaḥ // ### [2.22.87](https://indike.org/pramana/in.purana.kurma.2.22.87) na jīvatpitṛko dadyāddhomāntaṃ cābhidhīyate / yeṣāṃ vāpi pitā dadyāt teṣāṃ caike pracakṣate // ### [2.22.88](https://indike.org/pramana/in.purana.kurma.2.22.88) pitā pitāmahaścaiva tathaiva prapitāmahaḥ / yo yasya mriyate tasmai deyaṃ nānyasya tena tu // ### [2.22.89](https://indike.org/pramana/in.purana.kurma.2.22.89) bhojayed vāpi jīvantaṃ yathākāmaṃ tu bhaktitaḥ / na jīvantamatikramya dadāti śrūyate śrutiḥ // ### [2.22.90](https://indike.org/pramana/in.purana.kurma.2.22.90) dvyāmuṣyāyaṇiko dadyād bījikṣetrikayoḥ samam / ṛkyādardhaṃ samādadyānniyogotpādito yadi // ### [2.22.91](https://indike.org/pramana/in.purana.kurma.2.22.91) aniyuktaḥ suto yaśca śulkato jāyate tviha / pradadyād bījine piṇḍaṃ kṣetriṇe tu tato 'nyathā // ### [2.22.92](https://indike.org/pramana/in.purana.kurma.2.22.92) dvau piṇḍau nirvapet tābhyāṃ kṣetriṇe bījine tathā / kīrtayedatha caikasmin bījinaṃ kṣetriṇaṃ tataḥ // ### [2.22.93](https://indike.org/pramana/in.purana.kurma.2.22.93) mṛtāhani tu kartavyamekodiṣṭaṃ vidhānataḥ / aśauce sve parikṣīṇe kāmyaṃ vai kāmataḥ punaḥ // ### [2.22.94](https://indike.org/pramana/in.purana.kurma.2.22.94) pūrvāhne caiva kartavyaṃ śrāddhamabhyudayārthinā / devavatsarvameva syād yavaiḥ kāryā tilakriyā // ### [2.22.95](https://indike.org/pramana/in.purana.kurma.2.22.95) darbhāśca ṛjavaḥ kāryā yugmān vai bhojayed dvijān / nāndīmukhāstu pitaraḥ prīyantāmiti vācayet // ### [2.22.96](https://indike.org/pramana/in.purana.kurma.2.22.96) mātṛśrāddhaṃ tu pūrvaṃ syāt pitṝṇāṃ syādanantaram / tato mātāmahānāṃ tu vṛddhau śrāddhatrayaṃ smṛtam // ### [2.22.97](https://indike.org/pramana/in.purana.kurma.2.22.97) davapūrvaṃ pradadyād vai na kuryādapradakṣiṇam / prāṅmukho nirvapet piṇḍānupavītī samāhitaḥ // ### [2.22.98](https://indike.org/pramana/in.purana.kurma.2.22.98) pūrvaṃ tu mātaraḥ pūjyā bhaktyā vai sagaṇeśvarāḥ / sthaṇḍileṣu vicitreṣu pratimāsu dvijātiṣu // ### [2.22.99](https://indike.org/pramana/in.purana.kurma.2.22.99) puṣperdhūpaiśca naivedyairgandhādyairbhūṣaṇairapi / pūjayitvā mātṛgaṇaṃ kūryācchrāddhatrayaṃ budhaḥ // ### [2.22.100](https://indike.org/pramana/in.purana.kurma.2.22.100) akṛtvā mātṛyāgaṃ tu yaḥ śrāddhaṃ pariveṣayet / tasya krodhasamāviṣṭā hiṃsāmicchanti mātaraḥ // ### [2.22.100.p1](https://indike.org/pramana/in.purana.kurma.2.22.100.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge dvāviśo 'dhyāyaḥ ### [2.22.100.p2](https://indike.org/pramana/in.purana.kurma.2.22.100.p2) IN REE NICHT ZULÄSSIGE ZEICHEN: ## Linked texts (11) - [Mānava Dharmaśāstra](https://indike.org/pramana/in.niti.dharma.manu.3.207) — Manu & Bhṛgu, Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.57.2-3) — Kamalākarabhaṭṭa 1612, Sanskrit - [Gadādharapaddhati](https://indike.org/pramana/in.niti.dharma.nibandha.mahanibandha.gadadharapaddhati.21.p67) — Gadādhara Rājaguru 1725, Sanskrit - [Śrāddhakaumudī](https://indike.org/pramana/in.niti.dharma.sraddha.mithila_bengal.sraddhakaumudi.3.p53) — Govindānanda 1500, Sanskrit - [Kālasāra](https://indike.org/pramana/in.astro.muhurta.kala.kalasara.18.p63) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.18.p63) — Gadādhara (Pāraskara commentator), Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.10.p1.25) — Viśveśvarabhaṭṭa, Sanskrit - [Śrāddhacandrikā (Divākarabhaṭṭa)](https://indike.org/pramana/in.niti.dharma.sraddha.sraddhacandrika.2.p29) — Divākarabhaṭṭa 1655, Sanskrit - [Nṛsiṃhaprasāda](https://indike.org/pramana/in.niti.dharma.nibandha.mahanibandha.nrsimhaprasada.p70) — Dalapatirāja 1511, Sanskrit - [Smṛtīnāṃ Samuccayaḥ](https://indike.org/pramana/in.niti.dharma.upasmrti.smrtisamuccaya.80.26) — Sanskrit - [Śabdakalpadruma](https://indike.org/pramana/in.art.kosa.sabdakalpadruma.276.71.1) — Rājā Sir Rādhākānta Deb, Sanskrit --- Source: [https://indike.org/pramana/in.purana.kurma.2.22](https://indike.org/pramana/in.purana.kurma.2.22) · Pramāṇa