[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.23 # Kurmapurana 2.23: trayoviṃśo'dhyāyaḥ Kūrmapurāṇa 2.23 - **Language:** Sanskrit ## Contents - [2.23.93](https://indike.org/pramana/in.purana.kurma.2.23.93) — 1 part ### trayoviṃśo'dhyāyaḥ ### [2.23.1](https://indike.org/pramana/in.purana.kurma.2.23.1) vyāsa uvāca daśāhaṃ prāhurāśaucaṃ sapiṇḍeṣu vipaścitaḥ / mṛteṣu vātha jāteṣu brāhmaṇānāṃ dvijottamāḥ // ### [2.23.2](https://indike.org/pramana/in.purana.kurma.2.23.2) nityāni caiva karmāṇi kāmyāni ca viśeṣataḥ / nakuryād vihitaṃ kiñcit svādhyāyaṃ manasāpica // ### [2.23.3](https://indike.org/pramana/in.purana.kurma.2.23.3) śucīnakrodhanān bhūmyān śālāgnau bhāvayed dvijān / śuṣkānnena phalairvāpi vaitānaṃ juhuyāt tathā // ### [2.23.4](https://indike.org/pramana/in.purana.kurma.2.23.4) na spṛśeyurimānanye na ca tebhyaḥ samāharet / caturthe pañcame vāhni saṃsparśaḥ kathito budhaiḥ // ### [2.23.5](https://indike.org/pramana/in.purana.kurma.2.23.5) sūtake tu sapiṇḍānāṃ saṃsparśo na praduṣyati / sūtakaṃ sūtikāṃ caiva varjayitvā nṛṇāṃ punaḥ // ### [2.23.6](https://indike.org/pramana/in.purana.kurma.2.23.6) adhīyānastathā yajvā vedavicca pitā bhavet / saṃspṛśyāḥ sarva evaite snānānmātā daśāhataḥ // ### [2.23.7](https://indike.org/pramana/in.purana.kurma.2.23.7) daśāhaṃ nirguṇe proktamaśaucaṃ cātinirguṇe / ekadvitriguṇairyuktaṃ catustryekadinaiḥ śuciḥ // ### [2.23.8](https://indike.org/pramana/in.purana.kurma.2.23.8) daśāhāt tu paraṃ samyagadhīyīta juhoti ca / caturthe tasya saṃsparśaṃ manurāha prajāpatiḥ // ### [2.23.9](https://indike.org/pramana/in.purana.kurma.2.23.9) kriyāhīnasya mūrkhasya mahārogiṇa eva ca / yatheṣṭācaraṇasyāhurmaraṇāntamaśauvakam // ### [2.23.10](https://indike.org/pramana/in.purana.kurma.2.23.10) trirātraṃ daśarātraṃ vā brāhmaṇānāmaśaucakam / prāksaṃskārāt trirātraṃ syāt tasmādūrdhvaṃ daśāhakam // ### [2.23.11](https://indike.org/pramana/in.purana.kurma.2.23.11) ūnadvivārṣike prete mātāpitrostadiṣyate / trirātreṇa śucistvanyo yadi hyatyantanirguṇaḥ // ### [2.23.12](https://indike.org/pramana/in.purana.kurma.2.23.12) adantajātamaraṇe pitrorekāhamiṣyate / jātadante trirātraṃ syād yadi syātāṃ tu nirguṇau // ### [2.23.13](https://indike.org/pramana/in.purana.kurma.2.23.13) ādantajananāt sadya ācaulādekarātrakam / trirātramaupanayanāt sapiṇḍānāmudāhṛtam // ### [2.23.14](https://indike.org/pramana/in.purana.kurma.2.23.14) jātamātrasya bālasya yadi syānmaraṇaṃ pituḥ / mātuśca sūtakaṃ tat syāt pitā syāt spṛśya eva ca // ### [2.23.15](https://indike.org/pramana/in.purana.kurma.2.23.15) sadyaḥ śaucaṃ sapiṇḍānāṃ kartavyaṃ sodarasya ca / ūrdhvaṃ daśāhādekāhaṃ sodaro yadi nirguṇaḥ // ### [2.23.16](https://indike.org/pramana/in.purana.kurma.2.23.16) athordhvaṃ dantajananāt sapiṇḍānāmaśaucakam / ekarātraṃ nirguṇānāṃ cailādūrdhvaṃ trirātrakam // ### [2.23.17](https://indike.org/pramana/in.purana.kurma.2.23.17) adantajātamaraṇaṃ saṃbhaved yadi sattamāḥ / ekarātraṃ sapiṇḍānāṃ yadi te 'tyantanirguṇāḥ // ### [2.23.18](https://indike.org/pramana/in.purana.kurma.2.23.18) vratādeśāt sapiṇḍānāmarvāk snānaṃ vidhīyate / sarveṣāmeva guṇināmūrdhvaṃ tu viṣamaṃ punaḥ // ### [2.23.19](https://indike.org/pramana/in.purana.kurma.2.23.19) arvāk ṣaṇmāsataḥ strīṇāṃ yadi syād garbhasaṃstravaḥ / tadā māsasamaistāsāmaśaucaṃ divasaiḥ smṛtam // ### [2.23.20](https://indike.org/pramana/in.purana.kurma.2.23.20) tata ūrdhvaṃ tu patane strīṇāṃ dvādaśarātrikam / sadyaḥ śaucaṃ sapiṇḍānāṃ garbhastrāvācca vā tataḥ // ### [2.23.21](https://indike.org/pramana/in.purana.kurma.2.23.21) garbhacyutāvahorātraṃ sapiṇḍe 'tyantanirguṇe / yatheṣṭācaraṇe jñātau trirātramiti niścayaḥ // ### [2.23.22](https://indike.org/pramana/in.purana.kurma.2.23.22) yadi syāt sūtake sūtirmaraṇe vā mṛtirbhavet / śeṣeṇaiva bhavecchuddhirahaḥ śeṣe trirātrakam // ### [2.23.23](https://indike.org/pramana/in.purana.kurma.2.23.23) maraṇotpattiyoge tu maraṇācchuddhiriṣyate / aghavṛddhimadāśaucamūrghvaṃ cet tena śudhyati // ### [2.23.24](https://indike.org/pramana/in.purana.kurma.2.23.24) atha cet pañcamīrātrimatītya parato bhavet / aghavṛddhimadāśaucaṃ tadā pūrveṇa śudhyati // ### [2.23.25](https://indike.org/pramana/in.purana.kurma.2.23.25) deśāntaragataṃ śrutvā sūtakaṃ śāvameva tu / tāvadaprayato martyo yāvaccheṣaḥ samāpyate // ### [2.23.26](https://indike.org/pramana/in.purana.kurma.2.23.26) atīte sūtake proktaṃ sapiṇḍānāṃ trirātrakam / tathaiva maraṇe snānamūrdhvaṃ saṃvatsarād yadi // ### [2.23.27](https://indike.org/pramana/in.purana.kurma.2.23.27) vedāntaviccādhīyāno yo 'gnimān vṛttikarṣitaḥ / sadyaḥ śaucaṃ bhavet tasya sarvāvasthāsu sarvadā // ### [2.23.28](https://indike.org/pramana/in.purana.kurma.2.23.28) strīṇāmasaṃskṛtānāṃ tu pradānāt pūrvataḥ sadā / sapiṇḍānāṃ trirātraṃ syāt saṃskāre bhartureva hi // ### [2.23.29](https://indike.org/pramana/in.purana.kurma.2.23.29) ahastvadattakanyānāmaśaucaṃ maraṇe smṛtam / ūnadvivarṣānmaraṇe sadyaḥ śaucamudāhṛtam // ### [2.23.30](https://indike.org/pramana/in.purana.kurma.2.23.30) ādantāt sodare sadya ācaulādekarātrakam / āpradānāt trirātraṃ syād daśarātramataḥ param // ### [2.23.31](https://indike.org/pramana/in.purana.kurma.2.23.31) mātāmahānāṃ maraṇe trirātraṃ syādaśaucakam / ekodakānāṃ maraṇe sūtake caitadeva hi // ### [2.23.32](https://indike.org/pramana/in.purana.kurma.2.23.32) pakṣiṇī yonisambandhe bāndhaveṣu tathaiva ca / ekarātraṃ samuddiṣṭaṃ gurau sabrahmacāriṇi // ### [2.23.33](https://indike.org/pramana/in.purana.kurma.2.23.33) prete rājani sajyotiryasya syād viṣaye sthitiḥ / gṛhe mṛtāsu dattāsu kanyakāsu tryahaṃ pituḥ // ### [2.23.34](https://indike.org/pramana/in.purana.kurma.2.23.34) parapūrvāsu bhāryāsu putreṣu kṛtakeṣu ca / trirātraṃ syāt tathācārye svabhāryāsvanyagāsu ca // ### [2.23.35](https://indike.org/pramana/in.purana.kurma.2.23.35) ācāryaputre patnyāṃ ca ahorātramudāhṛtam / ekāhaṃ syādupādhyāye svagrāme śrotriye 'pi ca // ### [2.23.36](https://indike.org/pramana/in.purana.kurma.2.23.36) trirātramasapiṇḍeṣu svagṛhe saṃsthiteṣu ca / ekāhaṃ cāsvavarye syādekarātraṃ tadiṣyate // ### [2.23.37](https://indike.org/pramana/in.purana.kurma.2.23.37) trirātraṃ śvaśrūmaraṇe śvaśure vai tadeva hi / sadyaḥ śaucaṃ samuddiṣṭaṃ sagotre saṃsthite sati // ### [2.23.38](https://indike.org/pramana/in.purana.kurma.2.23.38) śuddhyed vipro daśāhena dvādaśāhena bhūmipaḥ / vaiśyaḥ pañcadaśāhena śūdro māsena śudyati // ### [2.23.39](https://indike.org/pramana/in.purana.kurma.2.23.39) kṣatraviṭśūdradāyādā ye syurviprasya bāndhavāḥ / teṣāmaśauce viprasya daśāhācchuddhiriṣyate // ### [2.23.40](https://indike.org/pramana/in.purana.kurma.2.23.40) rājanyavaiśyāvapyevaṃ hīnavarṇāsu yoniṣu / svameva śaucaṃ kuryātāṃ viśuddhyarthamasaṃśayam // ### [2.23.41](https://indike.org/pramana/in.purana.kurma.2.23.41) sarve tūttaravarṇānāmaśaucaṃ kuryurādṛtāḥ / tadvarṇavidhidṛṣṭena svaṃ tu śaucaṃ svayoniṣu // ### [2.23.42](https://indike.org/pramana/in.purana.kurma.2.23.42) ṣaḍrātraṃ vā trirātraṃ syādekarātraṃ krameṇa hi / vaiśyakṣatriyaviprāṇāṃ śūdreṣvāśaucameva tu // ### [2.23.43](https://indike.org/pramana/in.purana.kurma.2.23.43) ardhamāso 'tha ṣaḍrātraṃ trirātraṃ dvijapuṅgavāḥ / śūdrakṣatriyaviprāṇāṃ vaiśyeṣvāśaucamiṣyate // ### [2.23.44](https://indike.org/pramana/in.purana.kurma.2.23.44) ṣaḍrātraṃ vai daśāhaṃ ca viprāṇāṃ vaiśyaśūdrayoḥ / aśaucaṃ kṣatriye proktaṃ krameṇa dvijapuṅgavāḥ // ### [2.23.45](https://indike.org/pramana/in.purana.kurma.2.23.45) śūdraviṭkṣatriyāṇāṃ tu brāhmaṇe saṃsthite sati / daśarātreṇa śuddhiḥ syādityāha kamalodbhavaḥ // ### [2.23.46](https://indike.org/pramana/in.purana.kurma.2.23.46) asapiṇḍaṃ dvijaṃ pretaṃ vipro nirhṛtya bandhuvat / aśitvā ca sahoṣitvā daśarātreṇa śudhyati // ### [2.23.47](https://indike.org/pramana/in.purana.kurma.2.23.47) yadyannamatti teṣāṃ tu trirātreṇa tataḥ śuciḥ / anadannannamahnaiva na ca tasmin gṛhe vaset // ### [2.23.48](https://indike.org/pramana/in.purana.kurma.2.23.48) sodakeṣvetadeva syānmāturāpteṣu bandhuṣu / daśāhena śavasparśe sapiṇḍaścaiva śudhyati // ### [2.23.49](https://indike.org/pramana/in.purana.kurma.2.23.49) yadi nirharati pretaṃ prolabhākrāntamānasaḥ / daśāhena dvijaḥ śudhyed dvādaśāhena bhūmipaḥ // ### [2.23.50](https://indike.org/pramana/in.purana.kurma.2.23.50) ardhamāsena vaiśyastu śūdro māsena śudhyati / ṣaḍrātreṇāthavā sarve trirātreṇāthavā punaḥ // ### [2.23.51](https://indike.org/pramana/in.purana.kurma.2.23.51) anāthaṃ caiva nirhṛtya brāhmaṇaṃ dhanavarjitam / snātvā saṃprāśya tu ghṛtaṃ śudhyanti brāhmaṇādayaḥ // ### [2.23.52](https://indike.org/pramana/in.purana.kurma.2.23.52) avaraśced varaṃ varṇamavaraṃ vā varo yadi / aśauce saṃspṛśet snehāt tadāśaucena śudhyati // ### [2.23.53](https://indike.org/pramana/in.purana.kurma.2.23.53) pretībhūtaṃ dvijaṃ vipro yo 'nugacchata kāmataḥ / snātvā sacailaṃ spṛṣṭvāgniṃ ghṛtaṃ prāśya viśudhyati // ### [2.23.54](https://indike.org/pramana/in.purana.kurma.2.23.54) ekāhāt kṣatriye śuddhirvaiśye syācca dvyahena tu / śūdre dinatrayaṃ proktaṃ prāṇāyāmaśataṃ punaḥ // ### [2.23.55](https://indike.org/pramana/in.purana.kurma.2.23.55) anasthisaṃcite śūdre rauti ced brāhmaṇaḥ svakaiḥ / trirātraṃ syāt tathāśaucamekāhaṃ tvanyathā smṛtam // ### [2.23.56](https://indike.org/pramana/in.purana.kurma.2.23.56) asthisaṃcayanādarvāgekāhaṃ kṣatravaiśyayoḥ / anyathā caiva sajyotirbrāhmaṇe snānameva tu // ### [2.23.57](https://indike.org/pramana/in.purana.kurma.2.23.57) anasthisaṃcit vipre brāhmaṇo rauti cet tadā / snānenaiva bhavecchuddhiḥ sacailena na saṃśayaḥ // ### [2.23.58](https://indike.org/pramana/in.purana.kurma.2.23.58) yastaiḥ sahāśanaṃ kuryācchayanādīni caiva hi / bāndhavo vāparo vāpi sa daśāhena śudhyati // ### [2.23.59](https://indike.org/pramana/in.purana.kurma.2.23.59) yasteṣāmannamaśnāti sakṛdevāpi kāmataḥ / tadāśauce nivṛtte 'sau snānaṃ kṛtvā viśudhyati // ### [2.23.60](https://indike.org/pramana/in.purana.kurma.2.23.60) yāvattadannamaśnāti durbhikṣopahato naraḥ / tāvantyahānyaśaucaṃ syāt prāyaścittaṃ tataścaret // ### [2.23.61](https://indike.org/pramana/in.purana.kurma.2.23.61) dāhādyaśaucaṃ kartavyaṃ dvijānāmagnihotriṇām / sapiṇḍānāṃ tu maraṇe maraṇāditareṣu ca // ### [2.23.62](https://indike.org/pramana/in.purana.kurma.2.23.62) sapiṇḍatā ca puruṣe saptame vinivartate / samānodakabhāvastu janmanāmnoravedane // ### [2.23.63](https://indike.org/pramana/in.purana.kurma.2.23.63) pitā pitāmahaścaiva tathaiva prapitāmahaḥ / lepabhājastrayaścātmā sāpiṇḍyaṃ sāptapauruṣaṇ // ### [2.23.64](https://indike.org/pramana/in.purana.kurma.2.23.64) aprattānāṃ tathā strīṇāṃ sāpiṇḍyaṃ sāptapauruṣam / ūḍhānāṃ bhartusāpiṇḍyaṃ prāha devaḥ pitāmahaḥ // ### [2.23.65](https://indike.org/pramana/in.purana.kurma.2.23.65) ye caikajātā bahavo bhinnayonaya eva ca / bhinnavarṇāstu sāpiṇḍyaṃ bhavet teṣāṃ tripūruṣam // ### [2.23.66](https://indike.org/pramana/in.purana.kurma.2.23.66) kāravaḥ śilpino vaidyā dāsīdāsāstathaiva ca / dātāro niyamī caiva brahmavidbrahmacāriṇau // ### [2.23.67](https://indike.org/pramana/in.purana.kurma.2.23.67) satriṇo vratinastāvat sadyaḥ śaucā udāhṛtāḥ / rājā caivābhiṣiktaśca prāṇasatriṇa eva ca // ### [2.23.68](https://indike.org/pramana/in.purana.kurma.2.23.68) yajñe vivāhakāle ca devayāge tathaiva ca / sadyaḥ śaucaṃ samākhyātaṃ durbhikṣe cāpyupadrave // ### [2.23.69](https://indike.org/pramana/in.purana.kurma.2.23.69) ḍimbāhavahatānāṃ ca vidyutā pārthivairdvijaiḥ / sadyaḥ śaucaṃ samākhyātaṃ sarpādimaraṇe tathā // ### [2.23.70](https://indike.org/pramana/in.purana.kurma.2.23.70) agnau maruprapatane vīrādhvanyapyanāśake / brāhmaṇārthe ca saṃnyaste sadyaḥ śaucaṃ vidhīyate // ### [2.23.71](https://indike.org/pramana/in.purana.kurma.2.23.71) naiṣṭhikānāṃ vanasthānāṃ yatīnāṃ brahmacāriṇām / nāśaucaṃ kīrtyate sadbhiḥ patite ca tathā mṛte // ### [2.23.72](https://indike.org/pramana/in.purana.kurma.2.23.72) patitānāṃ na dāhaḥ syānnāntyeṣṭirnāsthisaṃcayaḥ / na cāśrupātapiṇḍau vā kāryaṃ śrāddhādi kaṅkvacit // ### [2.23.73](https://indike.org/pramana/in.purana.kurma.2.23.73) vyāpādayet tathātmānaṃ svayaṃ yo 'gniviṣādibhiḥ / vihitaṃ tasya nāśaucaṃ nāgnirnāpyudakādikam // ### [2.23.74](https://indike.org/pramana/in.purana.kurma.2.23.74) atha kaścit pramādena mriyate 'gniviṣādibhiḥ / tasyāśaucaṃ vidhātavyaṃ kāryaṃ caivodakādikam // ### [2.23.75](https://indike.org/pramana/in.purana.kurma.2.23.75) jāte kumāre tadahaḥ kāmaṃ kuryāt pratigraham / hiraṇyadhānyagovāsastilānnaguḍasarpiṣām // ### [2.23.76](https://indike.org/pramana/in.purana.kurma.2.23.76) phalāni puṣpaṃ śākaṃ ca lavaṇaṃ kāṣṭhameva ca / toyaṃ dadhi ghṛtaṃ tailamauṣadhaṃ kṣīrameva ca / āśaucināṃ gṛhād grāhyaṃ śuṣkānnaṃ caiva nityaśaḥ // ### [2.23.77](https://indike.org/pramana/in.purana.kurma.2.23.77) āhitāgniryathānyāyaṃ dagdhavyastribhiragnibhiḥ / anāhitāgnirgṛhyeṇa laukikenetaro janaḥ // ### [2.23.78](https://indike.org/pramana/in.purana.kurma.2.23.78) dehābhāvāt palāśaistu kṛtvā pratikṛtiṃ punaḥ / dāhaḥ kāryo yathānyāyaṃ sapiṇḍaiḥ śraddhayānvitaiḥ // ### [2.23.79](https://indike.org/pramana/in.purana.kurma.2.23.79) sakṛtprasiñcantyudakaṃ nāmagotreṇa vāgyatāḥ / daśāhaṃ bāndhavaiḥ sārdhaṃ sarve caivārdravāsasaḥ // ### [2.23.80](https://indike.org/pramana/in.purana.kurma.2.23.80) piṇḍaṃ pratidinaṃ dadyuḥ sāyaṃ prātaryathāvidhi / pretāya ca gṛhadvāri caturthe bhojayed dvijān // ### [2.23.81](https://indike.org/pramana/in.purana.kurma.2.23.81) dvitīye 'hani kartavyaṃ kṣurakarma sabāndhavaiḥ / caturthe bāndhavaiḥ sarvairasthanāṃ saṃcayanaṃ bhavet / pūrvaṃ tu bhojayed viprānayugmān śraddhayā śucīn // ### [2.23.82](https://indike.org/pramana/in.purana.kurma.2.23.82) pañcame navame caiva tathaivaikādaśe 'hani / ayugmān bhojayed viprān navaśrāddhaṃ tu tadviduḥ // ### [2.23.83](https://indike.org/pramana/in.purana.kurma.2.23.83) ekādaśe 'hni kurvota pretamuddiśya bhāvataḥ / dvādaśe vātha kartavyamanindye tvathavāhani / ekaṃ pavitramekor'ghaḥ piṇḍapātraṃ tathaiva ca // ### [2.23.84](https://indike.org/pramana/in.purana.kurma.2.23.84) evaṃ mṛtāhni kartavyaṃ pratimāsaṃ tu vatsaram / sapiṇḍīkaraṇaṃ proktaṃ pūrṇe saṃvatsare punaḥ // ### [2.23.85](https://indike.org/pramana/in.purana.kurma.2.23.85) kuryāccatvāri pātrāṇi pretādīnāṃ dvijottamāḥ / pretārthaṃ pitṛpātreṣu pātramāsecayet tataḥ // ### [2.23.86](https://indike.org/pramana/in.purana.kurma.2.23.86) ye samānā iti dvābhyāṃ piṇḍānapyevameva hi / sapiṇḍīkaraṇaṃ śrāddhaṃ devapūrvaṃ vidhīyate // ### [2.23.87](https://indike.org/pramana/in.purana.kurma.2.23.87) pitṝnāvāhayet tatra punaḥ pretaṃ ca nirdiśet / ye sapiṇḍīkṛtāḥ pretāna teṣāṃ syāt pṛthakkriyāḥ / yastu kuryāt pṛthak piṇḍaṃ pitṛhā so 'bhijāyate // ### [2.23.88](https://indike.org/pramana/in.purana.kurma.2.23.88) mṛte pitari vai putraḥ piṇḍamabdaṃ samācaret / dadyāccānnaṃ sodakumbhaṃ pratyahaṃ pretadharmataḥ // ### [2.23.89](https://indike.org/pramana/in.purana.kurma.2.23.89) pārvaṇena vidhānena saṃvatsarikamiṣyate / pratisaṃvatsaraṃ kāryaṃ vidhireṣa sanātanaḥ // ### [2.23.90](https://indike.org/pramana/in.purana.kurma.2.23.90) mātāpitroḥ sutaiḥ kāryaṃ piṇḍadānādikaṃ ca yat / patnī kuryāt sutābhāve patnya bhāve sahodahaḥ // ### [2.23.91](https://indike.org/pramana/in.purana.kurma.2.23.91) anenaiva vidhāne jīvan vā śrāddhamācaret / kṛtvā dānādikaṃ sarvaṃ śraddhāyuktaḥ samāhitaḥ // ### [2.23.92](https://indike.org/pramana/in.purana.kurma.2.23.92) eṣa vaḥ kathitaḥ samyag gṛhasthānāṃ kriyāvidhiḥ / strīṇāṃ tu bhartṛśuśrūṣā dharmo nānya iheṣyate // ### [2.23.93](https://indike.org/pramana/in.purana.kurma.2.23.93) svadharmaparamo nityamīśvirārpitamānasaḥ / prāpnoti tat paraṃ sthānaṃ yaduktaṃ vedavādibhiḥ // ### [2.23.93.p1](https://indike.org/pramana/in.purana.kurma.2.23.93.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge trayoviṃśo 'dhyāyaḥ ## Linked texts (5) - [Śuddhikaumudī (Govindānanda Kavikaṅkaṇācārya)](https://indike.org/pramana/in.niti.dharma.asauca.suddhi.suddhikaumudi.1.p68) — Govindānanda Kavikaṅkaṇācārya 1510, Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.72.1.p1.8) — Kamalākarabhaṭṭa 1612, Sanskrit - [Gūḍhārthadīpikā](https://indike.org/pramana/in.niti.dharma.nibandha.nirnaya.gudharthadipika.2.p474) — Vāmadeva, Sanskrit - [Śūdrakamalākara](https://indike.org/pramana/in.niti.dharma.jati.sudrakamalakara.36.1-30) — Kamalākarabhaṭṭa, Sanskrit - [Śrāddhakaumudī](https://indike.org/pramana/in.niti.dharma.sraddha.mithila_bengal.sraddhakaumudi.10.p47) — Govindānanda 1500, Sanskrit --- Source: [https://indike.org/pramana/in.purana.kurma.2.23](https://indike.org/pramana/in.purana.kurma.2.23) · Pramāṇa