[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.26 # Kurmapurana 2.26: ṣaḍviṃśo'dhyāyaḥ Kūrmapurāṇa 2.26 - **Language:** Sanskrit ## Contents - [2.26.79](https://indike.org/pramana/in.purana.kurma.2.26.79) — 1 part ### ṣaḍviṃśo'dhyāyaḥ ### [2.26.1](https://indike.org/pramana/in.purana.kurma.2.26.1) vyāsa uvāca athātaḥ saṃpravakṣyāmi dānadharmamanuttamam / brahmaṇābhihitaṃ pūrvamṛṣīṇāṃ brahmavādinām // ### [2.26.2](https://indike.org/pramana/in.purana.kurma.2.26.2) arthānāmudite pātre śraddhayā pratipādanam / dānamityabhinirdiṣṭaṃ bhuktimuktiphalapradam // ### [2.26.3](https://indike.org/pramana/in.purana.kurma.2.26.3) yad dadāti viśiṣṭebhyaḥ śraddhayā parayā yutaḥ / tad vai vittamahaṃ manye śeṣaṃ kasyāpi rakṣati // ### [2.26.4](https://indike.org/pramana/in.purana.kurma.2.26.4) nityaṃ naimittikaṃ kāmyaṃ trividhaṃ dānamucyate / caturthaṃ vimalaṃ proktaṃ sarvadānottamottamam // ### [2.26.5](https://indike.org/pramana/in.purana.kurma.2.26.5) ahanyahani yat kiñcid dīyate 'nupakāriṇe / anuddiśya phalaṃ tasmād brāhmaṇāya tu nityakam // ### [2.26.6](https://indike.org/pramana/in.purana.kurma.2.26.6) yat tu pāpopaśāntyarthaṃ dīyate viduṣāṃ kare / naimittikaṃ taduddiṣṭaṃ dānaṃ sadbhiranuṣṭhitam // ### [2.26.7](https://indike.org/pramana/in.purana.kurma.2.26.7) apatyavijayaiśvaryasvargārthaṃ yat pradīyate / dānaṃ tat kāmyamākhyātamṛṣibhirdharmacintakaiḥ // ### [2.26.8](https://indike.org/pramana/in.purana.kurma.2.26.8) yadīśvaraprīṇanārthaṃ brahmavitsu pradīyate / cetasā dharmayuktena dānaṃ tad vimalaṃ śivam // ### [2.26.9](https://indike.org/pramana/in.purana.kurma.2.26.9) dānadharmaṃ niṣeveta pātramāsādya śaktitaḥ / utpatsyate hi tatpātraṃ yat tārayati sarvataḥ // ### [2.26.10](https://indike.org/pramana/in.purana.kurma.2.26.10) kuṭumbabhaktavasanād deyaṃ yadatiricyate / anyathā dīyate yaddhi na tad dānaṃ phalapradam // ### [2.26.11](https://indike.org/pramana/in.purana.kurma.2.26.11) śrotriyāya kulīnāya vinītāya tapasvine / vṛttasthāya daridrāya pradeyaṃ bhaktipūrvakam // ### [2.26.12](https://indike.org/pramana/in.purana.kurma.2.26.12) yastu dadyānmahīṃ bhaktyā brāhmaṇāyāhitāgnaye / sa yāti paramaṃ sthānaṃ yatra gatvā na śocati // ### [2.26.13](https://indike.org/pramana/in.purana.kurma.2.26.13) ikṣubhiḥ saṃtatāṃ bhumiṃ yavagodhūmaśalinīm / dadāti vedaviduṣe yaḥ sa bhūyo na jāyate // ### [2.26.14](https://indike.org/pramana/in.purana.kurma.2.26.14) gocarmamātrāmapi vā yo bhūmiṃ saṃprayacchati / brāhmaṇāya daridrāya sarvapāpaiḥ pramucyate // ### [2.26.15](https://indike.org/pramana/in.purana.kurma.2.26.15) bhūmidānāt paraṃ dānaṃ vidyate neha kiñcana / annadānaṃ tena tulyaṃ vidyādānaṃ tato 'dhikam // ### [2.26.16](https://indike.org/pramana/in.purana.kurma.2.26.16) yo brāhmaṇāya śāntāya śucaye dharmaśāline / dadāti vidyāṃ vidhinā brahmaloke mahīyate // ### [2.26.17](https://indike.org/pramana/in.purana.kurma.2.26.17) dadyādaharahastvannaṃ śraddhayā brahmacāriṇe / sarvapāpavinirmukto brahmaṇaḥ sthānamāpnuyāt // ### [2.26.18](https://indike.org/pramana/in.purana.kurma.2.26.18) gṛhasthāyānnadānena phalaṃ prāpnoti mānavaḥ / āmamevāsya dātavyaṃ dattvāpnoti parāṃ gatim // ### [2.26.19](https://indike.org/pramana/in.purana.kurma.2.26.19) vaiśākhyāṃ paurṇamāsyāṃ tu brāhmaṇān sapta pañca vā / upoṣya vidhinā śāntaḥ śuciḥ prayatamānasaḥ // ### [2.26.20](https://indike.org/pramana/in.purana.kurma.2.26.20) pūjayitvā tilaiḥ kṛṣṇairmadhunā na viśeṣataḥ / gandhādibhiḥ samabhyarcya vācayed vā svyaṃ vadet // ### [2.26.21](https://indike.org/pramana/in.purana.kurma.2.26.21) prīyatāṃ dharmarājeti yad vā manasi vartate / yāvajjīvakṛtaṃ pāpaṃ tatkṣaṇādeva naśyati // ### [2.26.22](https://indike.org/pramana/in.purana.kurma.2.26.22) kṛṣṇājine tilān kṛttvā hiraṇyaṃ madhusarpiṣī / dadāti yastu viprāya sarvaṃ tarati duṣkṛtam // ### [2.26.23](https://indike.org/pramana/in.purana.kurma.2.26.23) kṛtānnamudakumbhaṃ ca vaiśākhyāṃ ca viśeṣataḥ / nirdiśya dharmarājāya viprebhyo mucyate bhayāt // ### [2.26.24](https://indike.org/pramana/in.purana.kurma.2.26.24) suvarṇatilayuktaistu brāhmaṇān sapta pañca vā / tarpayedudapātraistu brahmahatyāṃ vyapohati // ### [2.26.25](https://indike.org/pramana/in.purana.kurma.2.26.25) māghamāse tu viprastu dvādaśyāṃ samupoṣitaḥ / śuklāmvaradharaḥ kṛṣṇaistilairhutvā hutāśanam // ### [2.26.26](https://indike.org/pramana/in.purana.kurma.2.26.26) pradadyād brāhmaṇebhyastu tilāneva samāhitaḥ / janmaprabhṛti yatpāpaṃ sarvaṃ tarati vai dvijaḥ // ### [2.26.27](https://indike.org/pramana/in.purana.kurma.2.26.27) amāvasyāmanuprāpya brāhmaṇāya tapasvine / yatkicid devadeveśaṃ dadyāccoddiśya śaṅkaram // ### [2.26.28](https://indike.org/pramana/in.purana.kurma.2.26.28) prīyatāmīśvaraḥ somo mahādevaḥ sanātanaḥ / saptajanmakṛtaṃ pāpaṃ tatkṣaṇādeva naśyati // ### [2.26.29](https://indike.org/pramana/in.purana.kurma.2.26.29) yastu kṛṣṇacaturdaśyāṃ snātvā devaṃ pinākinam / ārādhayed dvijamukhe na tasyāsti punarbhavaḥ // ### [2.26.30](https://indike.org/pramana/in.purana.kurma.2.26.30) kṛṣṇāṣṭamyāṃ viśeṣeṇa dhārmikāya dvijātaye / snātvābhyarcya yathānyāyaṃ pādaprakṣālanādibhiḥ // ### [2.26.31](https://indike.org/pramana/in.purana.kurma.2.26.31) prīyatāṃ me mahādevo dadyād dravyaṃ svakīyakam / sarvapāpavinirmuktaḥ prāpnoti paramāṃ gatim // ### [2.26.32](https://indike.org/pramana/in.purana.kurma.2.26.32) dvijaiḥ kṛṣṇacaturdaśyāṃ kṛṣṇāṣṭamyāṃ viśeṣataḥ / amāvāsyāyāṃ bhaktaistu pūjanīyastrilocanaḥ // ### [2.26.33](https://indike.org/pramana/in.purana.kurma.2.26.33) ekādaśyāṃ nirāhāro dvādaśyāṃ puruṣottamam / arcayed bāhmaṇamukhe sa gacchet paramaṃ padam // ### [2.26.34](https://indike.org/pramana/in.purana.kurma.2.26.34) eṣā tithirvaiṣṇavīṃ syād dvādaśī śuklapakṣake / tasyāmārādhayed devaṃ prayatnena janārdanam // ### [2.26.35](https://indike.org/pramana/in.purana.kurma.2.26.35) yatkiñcid devamīśānamuddiśya brāhmaṇe śucau / dīyate viṣṇave vāpi tadanantaphalapradam // ### [2.26.36](https://indike.org/pramana/in.purana.kurma.2.26.36) yo hi yāṃ devatāmicchet samārādhayituṃ naraḥ / brāhmaṇān pūjayed yatnāt satasyāṃ toṣayet tataḥ // ### [2.26.37](https://indike.org/pramana/in.purana.kurma.2.26.37) dvijānāṃ vapurāsthāya nityaṃ tiṣṭhanti devatāḥ / pūjyante brāhmaṇālābhe pratimādiṣvapi kvacit // ### [2.26.38](https://indike.org/pramana/in.purana.kurma.2.26.38) tasmāt sarvaprayatnena tat tat phalamabhīpsatā / dvijeṣu devatā nityaṃ pūjanīyā viśeṣataḥ // ### [2.26.39](https://indike.org/pramana/in.purana.kurma.2.26.39) vibhūtikāmaḥ satataṃ pūjayed vai purandaram / brahmavarcasakāmastu brahmāṇaṃ brahmakāmukaḥ // ### [2.26.40](https://indike.org/pramana/in.purana.kurma.2.26.40) ārogyakāmo 'tha raviṃ dhanakāmo hutāśanam / karmaṇāṃ siddhikāmastu pūjayed vai vināyakam // ### [2.26.41](https://indike.org/pramana/in.purana.kurma.2.26.41) bhogakāmastu śaśinaṃ balakāmaḥ samīraṇam / mumukṣuḥ sarvasaṃsārāt prayatnenārcayeddharim // ### [2.26.42](https://indike.org/pramana/in.purana.kurma.2.26.42) yastu yogaṃ tathā mokṣamanvicchejjñānamaiśvaram / sor'cayed vai virūpākṣaṃ prayatneneśvareśvaram // ### [2.26.43](https://indike.org/pramana/in.purana.kurma.2.26.43) ye vāñchanti mahāyogān jñānāni ca maheśvaram / te pūjayanti bhūteśaṃ keśavaṃ cāpi bhoginaḥ // ### [2.26.44](https://indike.org/pramana/in.purana.kurma.2.26.44) vāridastṛptimāpnoti sukhamakṣayyamannadaḥ / tilapradaḥ prajāmiṣṭāṃ dīpadaścakṣuruttamam // ### [2.26.45](https://indike.org/pramana/in.purana.kurma.2.26.45) bhūmidaḥ sarvamāpnoti dīrghamāyurhiraṇyadaḥ / gṛhado 'gryāṇi veśmāni rūpyado rūpamuttamam // ### [2.26.46](https://indike.org/pramana/in.purana.kurma.2.26.46) vāsodaścandrasālokyamaśvisālokyamaśvadaḥ / anaḍudaḥ śriyaṃ puṣṭāṃ godo vradhnasya viṣṭapam // ### [2.26.47](https://indike.org/pramana/in.purana.kurma.2.26.47) yānaśayyāprado bhāryāmaiśvaryamabhayapradaḥ / dhānyadaḥ śāśvataṃ saukhyaṃ brahmado brahmasātmyatām // ### [2.26.48](https://indike.org/pramana/in.purana.kurma.2.26.48) dhānyānyapi yathāśakti vipreṣu pratipādayet / vedavitsu viśiṣṭeṣu pretya svargaṃ samaśnute // ### [2.26.49](https://indike.org/pramana/in.purana.kurma.2.26.49) gavāṃ ghāsapradānena sarvapāpaiḥ pramucyate / indhanānāṃ pradānena dīptāgnirjāyate naraḥ // ### [2.26.50](https://indike.org/pramana/in.purana.kurma.2.26.50) phalamūlāni śākāni bhojyāni vividhāni ca / pradadyād brāhmaṇebhyastu mudā yuktaḥ sadā bhavet // ### [2.26.51](https://indike.org/pramana/in.purana.kurma.2.26.51) auṣadhaṃ snehamāhāraṃ rogiṇe rogaśāntaye / dadāno rogarahitaḥ sukhī dīrghāyureva ca // ### [2.26.52](https://indike.org/pramana/in.purana.kurma.2.26.52) asipatravanaṃ mārgaṃ kṣuradhārāsamanvitam / tīvritāpaṃ ca tarati chatropānatprado naraḥ // ### [2.26.53](https://indike.org/pramana/in.purana.kurma.2.26.53) yad yadiṣṭatamaṃ loke yaccāpi dayitaṃ gṛhe / tattad guṇavate deyaṃ tadevākṣyamicchatā // ### [2.26.54](https://indike.org/pramana/in.purana.kurma.2.26.54) apane viṣuve caiva grahaṇe candrasūryayoḥ / saṃkrāntyādiṣu kāleṣu dattaṃ bhavati cākṣayam // ### [2.26.55](https://indike.org/pramana/in.purana.kurma.2.26.55) prayāgādiṣu tīrtheṣu puṇyeṣvāyataneṣu ca / dattvā cākṣayamāpnoti nadīṣu ca vaneṣu ca // ### [2.26.56](https://indike.org/pramana/in.purana.kurma.2.26.56) dānadharmāt paro dharmo bhūtānāṃ neha vidyate / tasmād viprāya dātavyaṃ śrotriyāya dvijātibhiḥ // ### [2.26.57](https://indike.org/pramana/in.purana.kurma.2.26.57) svagāyurbhūtikāmena tathā pāpopaśāntaye / mumukṣuṇā ca dātavyaṃ brāhmaṇebhyastathānvaham // ### [2.26.58](https://indike.org/pramana/in.purana.kurma.2.26.58) dīyamānaṃ tu yo mohād goviprāgnisureṣu ca / nivārayati pāpātmā tiryagyoniṃ vrajet tu saḥ // ### [2.26.59](https://indike.org/pramana/in.purana.kurma.2.26.59) yastu dravyārjanaṃ kṛtvā nārcayed brāhmaṇān surān / sarvasvamapahṛtyainaṃ rājā rāṣṭrāt pravāsayet // ### [2.26.60](https://indike.org/pramana/in.purana.kurma.2.26.60) yastu durbhikṣavelāyāmannādyaṃ na prayacchati / mriyamāṇeṣu vipreṣu brāhmaṇaḥ sa tu garhitaḥ // ### [2.26.61](https://indike.org/pramana/in.purana.kurma.2.26.61) na tasmāt pratigṛhṇīyurna viśeyuśca tena hi / aṅkayitvā svakād rāṣṭrāt taṃ rājā vipravāsayet // ### [2.26.62](https://indike.org/pramana/in.purana.kurma.2.26.62) yastvasadbhyo dadātīha svadravyaṃ dharmasādhanam / sa pūrvābhyadhikaḥ pāpī narake pacyate naraḥ // ### [2.26.63](https://indike.org/pramana/in.purana.kurma.2.26.63) svādhyāyavanto ye viprā vidyāvanto jitendriyāḥ / satyasaṃyamasaṃyuktāstebhyo dadyād dvijottamāḥ // ### [2.26.64](https://indike.org/pramana/in.purana.kurma.2.26.64) subhuktamapi vidvāṃsaṃ dhārmikaṃ bhojayed dvijam / na tu mūrkhamavṛttasthaṃ daśarātramupoṣitam // ### [2.26.65](https://indike.org/pramana/in.purana.kurma.2.26.65) sannikṛṣṭamatikramya śrotriyaṃ yaḥ prayacchati / sa tena karmaṇā pāpī dahatyāsaptamaṃ kulam // ### [2.26.66](https://indike.org/pramana/in.purana.kurma.2.26.66) yadisyādadhiko vipraḥ śīlavidyādibhiḥ svayam / tasmai yatnena dātavyaṃ atikramyāpi sannidhim // ### [2.26.67](https://indike.org/pramana/in.purana.kurma.2.26.67) yo 'rcitaṃ pratigṛhṇīyād dadyādarcitameva ca / tāvubhau gacchataḥ svargaṃ narakaṃ tu viparyaye // ### [2.26.68](https://indike.org/pramana/in.purana.kurma.2.26.68) na vāryapi prayaccheta nāstike haituke 'pi ca / pāṣaṇḍeṣu ca sarveṣu nāvedavidi dharmavit // ### [2.26.69](https://indike.org/pramana/in.purana.kurma.2.26.69) apūpaṃ ca hiraṇyaṃ ca gāmaśvaṃ pṛthivīṃ tilān / avidvān pratigṛhṇāno bhasmī bhavati kāṣṭhavat // ### [2.26.70](https://indike.org/pramana/in.purana.kurma.2.26.70) dvijātibhyo dhanaṃ lipset praśastebhyo dvijottamaḥ / api vā jātimātrebhyo na tu śūdrāt kathañcana // ### [2.26.71](https://indike.org/pramana/in.purana.kurma.2.26.71) vṛttisaṅkocamanvicchenneheta dhanavistaram / dhanalobhe prasaktastu brāhmaṇyādeva hīyate // ### [2.26.72](https://indike.org/pramana/in.purana.kurma.2.26.72) vedānadhītya sakalān yajñāṃścāvāpya sarvaśaḥ / na tāṃ gatimavāpnoti saṅkocād yāmavāpnuyāt // ### [2.26.73](https://indike.org/pramana/in.purana.kurma.2.26.73) pratigraharucirna syāt yātrārthaṃ tu samāharet / sthityarthādadhikaṃ gṛhṇan brāhmaṇo yātyadhogatim // ### [2.26.74](https://indike.org/pramana/in.purana.kurma.2.26.74) yastu yācanako nityaṃ na sa svargasya bhājanam / udvejayati bhūtāni yathā caurastathaiva saḥ // ### [2.26.75](https://indike.org/pramana/in.purana.kurma.2.26.75) gurūn bhṛtyāṃścojjihīrṣurarciṣyan devatātithīn / sarvataḥ pratigṛhṇīyānna tu tṛpyet svayaṃ tataḥ // ### [2.26.76](https://indike.org/pramana/in.purana.kurma.2.26.76) evaṃ gṛhastho yuktātmā devatātithipūjakaḥ / vartamānaḥ saṃyātātmā yāti tat paramaṃ padam // ### [2.26.77](https://indike.org/pramana/in.purana.kurma.2.26.77) putre nidhāya vā sarvaṃ gatvāraṇyaṃ tu tattvavit / ekākī vicarennityamudāsīnaḥ samāhitaḥ // ### [2.26.78](https://indike.org/pramana/in.purana.kurma.2.26.78) eṣa vaḥ kathito dharmo gṛhasthānāṃ dvijottamāḥ / jñātvānutiṣṭhenniyataṃ tathānuṣṭhāpayed dvijān // ### [2.26.79](https://indike.org/pramana/in.purana.kurma.2.26.79) iti devamanādimekamīśaṃ gṛhadharmeṇa samarcayedajastram / samatītya sa sarvabhūtayoniṃ prakṛtiṃ yāti paraṃ na yāti janma // ### [2.26.79.p1](https://indike.org/pramana/in.purana.kurma.2.26.79.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge ṣaḍviṃśo 'dhyāyaḥ ## Linked texts (14) - [Padmapurāṇa](https://indike.org/pramana/in.purana.padma.3.57.1) — Vyāsa, Sanskrit - [Garuḍapurāṇa](https://indike.org/pramana/in.purana.garuda.1.51.5) — Vyāsa, Sanskrit - [Mānava Dharmaśāstra](https://indike.org/pramana/in.niti.dharma.manu.4.229) — Manu & Bhṛgu, Sanskrit - [Varāhapurāṇa](https://indike.org/pramana/in.purana.varaha.115.7) — Vyāsa, Sanskrit - [Caturvargacintāmaṇi](https://indike.org/pramana/in.niti.dharma.nibandha.mahanibandha.caturvargacintamani.1.p6) — Hemādri, Sanskrit - [Ṣoḍaśamahādānavidhi (Hemādri)](https://indike.org/pramana/in.niti.dharma.dana.mahadana.sodasamahadanavidhi-hemadri.1.p6) — Hemādri, Sanskrit - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.1.p4) — Hemādri, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.11.p215) — Lakṣmīdhara Bhaṭṭa, Sanskrit - [Dānasāgara](https://indike.org/pramana/in.niti.dharma.nibandha.danasagara.72.12) — Ballālasena, Sanskrit - [Bhagavantabhāskara](https://indike.org/pramana/in.niti.dharma.nibandha.mahanibandha.bhagavantabhaskara.45.p4) — Nīlakaṇṭha Dīkṣita 1625, Sanskrit - [Nityācārapaddhati (Vidyākara vājapeyin)](https://indike.org/pramana/in.niti.dharma.acara.ahnika.nityacarapaddhati-vidyakara-vajapeyin.10.p63) — Vidyākara vājapeyin, Sanskrit - [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.6.p4) — Nārāyaṇa (Mahiṣamaṅgalam) 1513, Sanskrit - [Smṛtiratnākara](https://indike.org/pramana/in.niti.dharma.acara.smrtiratnakara.2.p114.2) — Veṅkaṭanātha, Sanskrit - [Smṛtiratnākara (Viṭṭhalanātha)](https://indike.org/pramana/in.niti.dharma.nibandha.smrtiratnakara-vitthala.2.p114.2) — Viṭṭhalanātha, Sanskrit --- Source: [https://indike.org/pramana/in.purana.kurma.2.26](https://indike.org/pramana/in.purana.kurma.2.26) · Pramāṇa