[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.28 # Kurmapurana 2.28: aṣṭāviṃśo'dhyāyaḥ Kūrmapurāṇa 2.28 - **Language:** Sanskrit ## Contents - [2.28.30](https://indike.org/pramana/in.purana.kurma.2.28.30) — 1 part ### aṣṭāviṃśo'dhyāyaḥ ### [2.28.1](https://indike.org/pramana/in.purana.kurma.2.28.1) vyāsa uvāca evaṃ vanāśrame sthitvā tṛtīyaṃ bhāgamāyuṣaḥ / caturthamāyuṣo bhāgaṃ saṃnyāsena nayet kramāt // ### [2.28.2](https://indike.org/pramana/in.purana.kurma.2.28.2) agnīnātmanī saṃsthāpya dvijaḥ pravrajito bhavet / yogābhyāsarataḥ śānto brahmavidyāparāyaṇaḥ // ### [2.28.3](https://indike.org/pramana/in.purana.kurma.2.28.3) yadā manasi saṃjātaṃ vaitṛṣṇyaṃ sarvavastuṣu / tadā saṃnyāsamicchecca patitaḥ syād viparyaye // ### [2.28.4](https://indike.org/pramana/in.purana.kurma.2.28.4) prājāpatyāṃ nirūpyeṣṭimāgneyīmathavā punaḥ / dāntaḥ pakvakaṣāyo 'sau brahmāśramamupāśrayet // ### [2.28.5](https://indike.org/pramana/in.purana.kurma.2.28.5) jñānasaṃnyāsinaḥ kecid vedasaṃnyāsinaḥ pare / karmasaṃnyāsinastvanye trividhāḥ parikīrtitāḥ // ### [2.28.6](https://indike.org/pramana/in.purana.kurma.2.28.6) yaḥ sarvasaṅganirmukto nirdvandvaścaiva nirbhayaḥ / procyate jñānasaṃnyāsī svātmanyeva vyavasthitaḥ // ### [2.28.7](https://indike.org/pramana/in.purana.kurma.2.28.7) vedamevābhyasennityaṃ nirāśī niṣparigrahaḥ / procyate vedasaṃnyāsī mumukṣurvijitendriyaḥ // ### [2.28.8](https://indike.org/pramana/in.purana.kurma.2.28.8) yastvagnīnātmasātkṛtvā brahmārpaṇaparo dvijaḥ / jñeyaḥ sa karmasaṃnyāsī mahāyajñaparāyaṇaḥ // ### [2.28.9](https://indike.org/pramana/in.purana.kurma.2.28.9) trayāṇāmapi caiteṣāṃ jñānī tvabhyadhiko mataḥ / na tasya vidyate kāryaṃ na liṅgaṃ vā vipaścitaḥ // ### [2.28.10](https://indike.org/pramana/in.purana.kurma.2.28.10) nirmamo nirbhayaḥ śānto nirdvandvaḥ parṇabhojanaḥ / jīrṇakaupīnavāsāḥ syānnagno vā dhyānatatparaḥ // ### [2.28.11](https://indike.org/pramana/in.purana.kurma.2.28.11) brahmacārī mitāhāro grāmādannaṃ samāharet / adhyātmamatirāsīta nirapekṣo nirāmiṣaḥ // ### [2.28.12](https://indike.org/pramana/in.purana.kurma.2.28.12) ātmanaiva sahāyena sukhārthaṃ vicarediha / nābhinandeta maraṇaṃ nābhinandeta jīvitam // ### [2.28.13](https://indike.org/pramana/in.purana.kurma.2.28.13) kālameva pratīkṣeta nideśaṃ bhṛtako yathā / nādhyetavyaṃ na vaktavyaṃ śrotavyaṃ na kadācana / evaṃ jñātvā paro yogī brahmabhūyāya kalpate // ### [2.28.14](https://indike.org/pramana/in.purana.kurma.2.28.14) ekavāsāthavā vidvān kaupīnācchādanastathā / muṇḍī śikhī vātha bhavet tridaṇḍī niṣparigrahaḥ / kāṣāyavāsāḥ satataṃ dhyānayogaparāyaṇaḥ // ### [2.28.15](https://indike.org/pramana/in.purana.kurma.2.28.15) grāmānte vṛkṣamūle vā vased devālaye 'pi vā / samaḥ śatrau ca mitre ca tathā mānāpamānayoḥ / bhaikṣyeṇa vartayennityaṃ naikānnādī bhavet kvacit // ### [2.28.16](https://indike.org/pramana/in.purana.kurma.2.28.16) yastu mohena vālasyādekānnādī bhaved yatiḥ / na tasya niṣkṛtiḥ kācid dharmaśāstreṣu kathyate // ### [2.28.17](https://indike.org/pramana/in.purana.kurma.2.28.17) rāgadveṣavimuktātmā samaloṣṭāśmakāñcanaḥ / prāṇihaṃsānivṛttaśca maunī syāt sarvanispṛhaḥ // ### [2.28.18](https://indike.org/pramana/in.purana.kurma.2.28.18) dṛṣṭipūtaṃ nyaset pādaṃ vastrapūtaṃ jalaṃ pibet / satyapūtāṃ vaded vāṇīṃ manaḥ pūtaṃ samācaret // ### [2.28.19](https://indike.org/pramana/in.purana.kurma.2.28.19) naikatra nivased deśe varṣābhyo 'nyatra bhikṣukaḥ / snānaśaucarato nityaṃ kamaṇḍalukaraḥ śuciḥ // ### [2.28.20](https://indike.org/pramana/in.purana.kurma.2.28.20) brahmacaryarato nityaṃ vanavāsarato bhavet / mokṣaśāstreṣu nirato brahmasūtrī jitendriyaḥ // ### [2.28.21](https://indike.org/pramana/in.purana.kurma.2.28.21) dambhāhaṅkāranirmukto nindāpaiśunyavarjitaḥ / ātmajñānaguṇopeto yatirmokṣamavāpnuyāt // ### [2.28.22](https://indike.org/pramana/in.purana.kurma.2.28.22) abhyaset satataṃ vedaṃ praṇavākhyaṃ sanātanam / snātvācamya vidhānena śucirdevālayādiṣu // ### [2.28.23](https://indike.org/pramana/in.purana.kurma.2.28.23) yajñopavītī śāntātmā kuśapāṇiḥ samāhitaḥ / dhautakāṣāyavasano bhasmacchannatanūrahaḥ // ### [2.28.24](https://indike.org/pramana/in.purana.kurma.2.28.24) adhiyajñaṃ brahma japedādhidaivikameva ca / ādhyātmikaṃ ca satataṃ vedāntābhihitaṃ ca yat // ### [2.28.25](https://indike.org/pramana/in.purana.kurma.2.28.25) putreṣu vātha nivasan brahmacārī yatirmuniḥ / vedamevābhyasennityaṃ sa yāti paramāṃ gatim // ### [2.28.26](https://indike.org/pramana/in.purana.kurma.2.28.26) ahiṃsā satyamasteyaṃ brahmacaryaṃ tapaḥ param / kṣamā dayā ca satoṣo vratānyasya viśeṣataḥ // ### [2.28.27](https://indike.org/pramana/in.purana.kurma.2.28.27) vedāntajñānaniṣṭho vā pañca yajñān samāhitaḥ / kuryādaharahaḥ snātvā bhikṣānnenaiva tena hi // ### [2.28.28](https://indike.org/pramana/in.purana.kurma.2.28.28) homamantrāñjapennityaṃ kāle kāle samāhitaḥ / svādhyāyaṃ cānvahaṃ kuryāt sāvitrīṃ saṃdhyayorjapet // ### [2.28.29](https://indike.org/pramana/in.purana.kurma.2.28.29) dhyāyīta satataṃ devamekānte parameśvaram / ekānnaṃ varjayennityaṃ kāmaṃ krodhaṃ parigraham // ### [2.28.30](https://indike.org/pramana/in.purana.kurma.2.28.30) ekavāsā dvivāsā vā śikhī yajñopavītavān / kamaṇḍalukaro vidvān tridaṇḍī yāti tatparam // ### [2.28.30.p1](https://indike.org/pramana/in.purana.kurma.2.28.30.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge 'ṣṭāviṃśo 'dhyāyaḥ ## Linked texts (3) - [Padmapurāṇa](https://indike.org/pramana/in.purana.padma.3.59.1) — Vyāsa, Sanskrit - [Mānava Dharmaśāstra](https://indike.org/pramana/in.niti.dharma.manu.6.46) — Manu & Bhṛgu, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p29) — Lakṣmīdhara Bhaṭṭa, Sanskrit --- Source: [https://indike.org/pramana/in.purana.kurma.2.28](https://indike.org/pramana/in.purana.kurma.2.28) · Pramāṇa