[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.2 # Kurmapurana 2.2: dvitīyo'dhyāyaḥ Kūrmapurāṇa 2.2 - **Language:** Sanskrit ## Contents - [2.2.55](https://indike.org/pramana/in.purana.kurma.2.2.55) — 1 part ### dvitīyo'dhyāyaḥ ### [2.2.1](https://indike.org/pramana/in.purana.kurma.2.2.1) īśvara uvāca avācyametad vijñānamātmaguhyaṃ sanātanam / yanna devā vijānanti yatanto 'pi dvijātayaḥ // ### [2.2.2](https://indike.org/pramana/in.purana.kurma.2.2.2) idaṃ jñānaṃ samāśritya brahmabhūtā dvijottamāḥ / na saṃsāraṃ prapadyante pūrve 'pi brahmavādinaḥ // ### [2.2.3](https://indike.org/pramana/in.purana.kurma.2.2.3) guhyād guhyatamaṃ sākṣād gopanīyaṃ prayatnataḥ / vakṣye bhaktimatāmadya yuṣmākaṃ brahmavādinām // ### [2.2.4](https://indike.org/pramana/in.purana.kurma.2.2.4) ātmāyaḥ kevalaḥ svasthaḥ śāntaḥ sūkṣmaḥ sanātanaḥ / asti sarvāntaraḥ sākṣāccinmātrastamasaḥ paraḥ // ### [2.2.5](https://indike.org/pramana/in.purana.kurma.2.2.5) so 'ntaryāmī sa puruṣaḥ sa prāṇaḥ sa maheśvaraḥ / sa kālo 'gnistadavyaktaṃ sa evedamiti śrutiḥ // ### [2.2.6](https://indike.org/pramana/in.purana.kurma.2.2.6) asmād vijāyate viśvamatraiva pravilīyate / sa māyī māyayā baddhaḥ karoti vividhāstanūḥ // ### [2.2.7](https://indike.org/pramana/in.purana.kurma.2.2.7) na cāpyayaṃ saṃsarati na ca saṃsārayet prabhuḥ / nāyaṃ pṛthvī na salilaṃ na tejaḥ pavano nabhaḥ // ### [2.2.8](https://indike.org/pramana/in.purana.kurma.2.2.8) na prāṇe na mano 'vyaktaṃ na śabdaḥ sparśa eva ca / na rūparasagandhāśca nāhaṃ kartā na vāgapi // ### [2.2.9](https://indike.org/pramana/in.purana.kurma.2.2.9) na pāṇipādau no pāyurna copasthaṃ dvijottamāḥ / na kartā na ca bhoktā vā na ca prakṛtipūruṣau / na māyā naiva ca prāścaitanyaṃ paramārthataḥ // ### [2.2.10](https://indike.org/pramana/in.purana.kurma.2.2.10) yathā prakāśatamasoḥ sambandho nopapadyate / tadvadaikyaṃ na saṃbandhaḥ prapañcaparamātmanoḥ // ### [2.2.11](https://indike.org/pramana/in.purana.kurma.2.2.11) chāyātapau yathā loke parasparavilakṣaṇau / tadvat prapañcapuruṣau vibhinnau paramārthataḥ // ### [2.2.12](https://indike.org/pramana/in.purana.kurma.2.2.12) yadyātmā malino 'svastho vikārī syāt svabhāvataḥ / nahi tasya bhavenmuktirjanmāntaraśatairapi // ### [2.2.13](https://indike.org/pramana/in.purana.kurma.2.2.13) paśyanti munayo yuktāḥ svātmānaṃ paramārthataḥ / vikārahīnaṃ nirduḥ khamānandātmānamavyayam // ### [2.2.14](https://indike.org/pramana/in.purana.kurma.2.2.14) ahaṃ kartā sukhī duḥ khī kṛśaḥ sthūleti yā matiḥ / sā cāhaṅkārakartṛtvādātmanyāropyate janaiḥ // ### [2.2.15](https://indike.org/pramana/in.purana.kurma.2.2.15) vadanti vedavidvāṃsaḥ sākṣiṇaṃ prakṛteḥ param / bhoktāramakṣaraṃ śuddhaṃ sarvatra samavasthitam // ### [2.2.16](https://indike.org/pramana/in.purana.kurma.2.2.16) tasmādajñānamūlo hi saṃsāraḥ sarvadehinām / ajñānādanyathā jñānaṃ tacca prakṛtisaṃgatam // ### [2.2.17](https://indike.org/pramana/in.purana.kurma.2.2.17) nityoditaḥ svayaṃ jyotiḥ sarvagaḥ puruṣaḥ paraḥ / ahaṅkārāvivekena kartāhamiti manyate // ### [2.2.18](https://indike.org/pramana/in.purana.kurma.2.2.18) paśyanti ṛṣayo 'vyaktaṃ nityaṃ sadasadātmakam / pradhānaṃ prakṛtiṃ buddhvā kāraṇaṃ brahmavādinaḥ // ### [2.2.19](https://indike.org/pramana/in.purana.kurma.2.2.19) tenāyaṃ saṃgato hyātmā kūṭastho 'pi nirañjanaḥ / svātmānamakṣaraṃ brahma nāvabuddhyeta tattvataḥ // ### [2.2.20](https://indike.org/pramana/in.purana.kurma.2.2.20) anātmanyātmavijñānaṃ tasmād duḥ khaṃ tathetaram / ragadveṣādayo doṣāḥ sarve bhrāntinibandhanāḥ // ### [2.2.21](https://indike.org/pramana/in.purana.kurma.2.2.21) karmaṇyasya bhaved doṣaḥ puṇyāpuṇyamiti sthitiḥ / tadvaśādeva sarveṣāṃ sarvadehasamudbhavaḥ // ### [2.2.22](https://indike.org/pramana/in.purana.kurma.2.2.22) nityaḥ sarvatrago hyātmā kūṭastho doṣavarjitaḥ / ekaḥ sa bhidyate śaktyā māyayā na svabhāvataḥ // ### [2.2.23](https://indike.org/pramana/in.purana.kurma.2.2.23) tasmādadvaitamevāhurmunayaḥ paramārthataḥ / bhedo vyaktasvabhāvena sā ca māyātmasaṃśrayā // ### [2.2.24](https://indike.org/pramana/in.purana.kurma.2.2.24) yathā hi dhūmasaṃparkānnākāśo malino bhavet / antaḥ karaṇajairbhāvairātmā tadvanna lipyate // ### [2.2.25](https://indike.org/pramana/in.purana.kurma.2.2.25) yathā svaprabhayā bhāti kevalaḥ sphaṭiko 'malaḥ / upādhihīno vimalastathaivātmā prakāśate // ### [2.2.26](https://indike.org/pramana/in.purana.kurma.2.2.26) jñānasvūpamevāhurjagadetad vicakṣaṇāḥ / arthasvarūpamevājñāḥ paśyantyanye kudṛṣṭayaḥ // ### [2.2.27](https://indike.org/pramana/in.purana.kurma.2.2.27) kūṭastho nirguṇo vyāpī caitanyātmā svabhāvataḥ / dṛśyate hyartharūpeṇa puruṣairbhrāntidṛṣṭibhiḥ // ### [2.2.28](https://indike.org/pramana/in.purana.kurma.2.2.28) yathā saṃlakṣyate raktaḥ kevalaḥ sphaṭiko janaiḥ / raktikādyupadhānena tadvat paramapūruṣaḥ // ### [2.2.29](https://indike.org/pramana/in.purana.kurma.2.2.29) tasmādātmākṣaraḥ śuddho nityaḥ sarvagato 'vyayaḥ / upāsitavyo mantavyaḥ śrotavyaśca mumukṣubhiḥ // ### [2.2.30](https://indike.org/pramana/in.purana.kurma.2.2.30) yadā manasi caitanyaṃ bhāti sarvatragaṃ sadā / yogino 'vyavadhānena tadā saṃpadyate svayam // ### [2.2.31](https://indike.org/pramana/in.purana.kurma.2.2.31) yadā sarvāṇi būtāni svātmanyevābhipaśyati / sarvabhūteṣu cātmānaṃ brahma saṃpadyate tadā // ### [2.2.32](https://indike.org/pramana/in.purana.kurma.2.2.32) yadā sarvāṇi bhūtāni samādhistho na paśyati / ekībhūtaḥ pareṇāsau tadā bhavati kevalaḥ // ### [2.2.33](https://indike.org/pramana/in.purana.kurma.2.2.33) yadā sarve pramucyante kāmā ye 'sya hṛdi sthitāḥ / tadāsāvamṛtībhūtaḥ kṣemaṃ gacchati paṇḍitaḥ // ### [2.2.34](https://indike.org/pramana/in.purana.kurma.2.2.34) yadā bhūtapṛthagbhāvamekasthamanupaśyati / tata eva ca vistāraṃ brahma saṃpadyate tadā // ### [2.2.35](https://indike.org/pramana/in.purana.kurma.2.2.35) yadā paśyati cātmānaṃ kevalaṃ paramārthataḥ / māyāmātraṃ jagat kṛtsnaṃ tadā bhavati nirvṛtaḥ // ### [2.2.36](https://indike.org/pramana/in.purana.kurma.2.2.36) yadā janmajarāduḥ khavyādhīnāmekabheṣajam / kevalaṃ brahmavijñānaṃ jāyate 'sau tadā śivaḥ // ### [2.2.37](https://indike.org/pramana/in.purana.kurma.2.2.37) yathā nadīnadā loke sāgareṇaikatāṃ yayuḥ / tadvadātmākṣareṇāsau niṣkalenaikatāṃ vrajet // ### [2.2.38](https://indike.org/pramana/in.purana.kurma.2.2.38) tasmād vijñānamevāsti na prapañco na saṃsṛtiḥ / ajñānenāvṛtaṃ loko vijñānaṃ tena muhyati // ### [2.2.39](https://indike.org/pramana/in.purana.kurma.2.2.39) tajjñānaṃ nirmalaṃ sūkṣmaṃ nirvikalpaṃ yadavyayam / ajñānamitarat sarvaṃ vijñānamiti me matam // ### [2.2.40](https://indike.org/pramana/in.purana.kurma.2.2.40) etad vaḥ paramaṃ sāṃkhyaṃ bhāṣitaṃ jñānamuttamam / sarvavedāntasāraṃ hi yogastatraikacittatā // ### [2.2.41](https://indike.org/pramana/in.purana.kurma.2.2.41) yogāt saṃjāyate jñānaṃ jñānād yogaḥ pravartate / yogajñānābhiyuktasya nāvāpyaṃ vidyate kvacit // ### [2.2.42](https://indike.org/pramana/in.purana.kurma.2.2.42) yadeva yogino yānti sāṃkhyaistadadhigamyate / ekaṃ sāṃkhyaṃ ca yogaṃ ca yaḥ paśyati sa tattvavit // ### [2.2.43](https://indike.org/pramana/in.purana.kurma.2.2.43) anye ca yogino viprā aiśvaryāsaktacetasaḥ / majjanti tatra tatraiva na tvātmaiṣāmiti śrutiḥ // ### [2.2.44](https://indike.org/pramana/in.purana.kurma.2.2.44) yattat sarvagataṃ divyamaiśvaryamacalaṃ mahat / jñānayogābhiyuktastu dehānte tadavāpnuyāt // ### [2.2.45](https://indike.org/pramana/in.purana.kurma.2.2.45) eṣa ātmāhamavyakto māyāvī parameśvaraḥ / kīrtitaḥ sarvavedeṣu sarvātmā sarvatomukhaḥ // ### [2.2.46](https://indike.org/pramana/in.purana.kurma.2.2.46) sarvakāmaḥ sarvarasaḥ sarvagandho 'jaro 'maraḥ / sarvataḥ pāṇipādo 'hamantaryāmī sanātanaḥ // ### [2.2.47](https://indike.org/pramana/in.purana.kurma.2.2.47) apāṇipādo javano grahītā hṛdi saṃsthitaḥ / acakṣurapi paśyāmi tathākarṇaḥ śṛṇomyaham // ### [2.2.48](https://indike.org/pramana/in.purana.kurma.2.2.48) vedāhaṃ sarvamevedaṃ na māṃ jānāti kaścana / prāhurmahāntaṃ puruṣaṃ māmekaṃ tattvadarśinaḥ // ### [2.2.49](https://indike.org/pramana/in.purana.kurma.2.2.49) paśyanti ṛṣayo hetumātmanaḥ sūkṣmadarśinaḥ / nirguṇāmalarūpasya yattadaiśvaryamuttamam // ### [2.2.50](https://indike.org/pramana/in.purana.kurma.2.2.50) yanna devā vijānanti mohitā mama māyayā / vakṣye samāhitā yūyaṃ śṛṇudhvaṃ brahmavādinaḥ // ### [2.2.51](https://indike.org/pramana/in.purana.kurma.2.2.51) nāhaṃ praśāstā sarvasya māyātītaḥ svabhāvataḥ / prerayāmi tathāpīdaṃ kāraṇaṃ sūrayo viduḥ // ### [2.2.52](https://indike.org/pramana/in.purana.kurma.2.2.52) yanme guhyatamaṃ dehaṃ sarvagaṃ tattvadarśinaḥ / praviṣṭā mama sāyujyaṃ labhante yogino 'vyayam // ### [2.2.53](https://indike.org/pramana/in.purana.kurma.2.2.53) teṣāṃ hi vaśamāpannā māyā me viśvarūpiṇī / labhante paramāṃ śuddhiṃ nirvāṇaṃ te mayā saha // ### [2.2.54](https://indike.org/pramana/in.purana.kurma.2.2.54) na teṣāṃ punarāvṛttiḥ kalpakoṭiśatairapi / prasādānmama yogīndrā etad vedānuśāsanam // ### [2.2.55](https://indike.org/pramana/in.purana.kurma.2.2.55) nāputraśiṣyayogibhyo dātavyaṃ brahmavādibhiḥ / maduktametad vijñānaṃ sāṃkhyayogasamāśrayam // ### [2.2.55.p1](https://indike.org/pramana/in.purana.kurma.2.2.55.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge (īśvaragītāsu) dvitīyo 'dhyāyaḥ ## Linked texts (2) - [Liṅgapurāṇa](https://indike.org/pramana/in.vernacular.tamil.kappiyam.lingapurana.100.16) — Ativīrarāma Pāṇṭiyar 1500, Sanskrit - [Yogasārasaṅgraha](https://indike.org/pramana/in.darsana.yoga.yogasarasangraha.p77) — Vijñānabhikṣu 1550, Sanskrit --- Source: [https://indike.org/pramana/in.purana.kurma.2.2](https://indike.org/pramana/in.purana.kurma.2.2) · Pramāṇa