[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.30 # Kurmapurana 2.30: triṃśo'dhyāyaḥ Kūrmapurāṇa 2.30 - **Language:** Sanskrit ## Contents - [2.30.26](https://indike.org/pramana/in.purana.kurma.2.30.26) — 1 part ### triṃśo'dhyāyaḥ ### [2.30.1](https://indike.org/pramana/in.purana.kurma.2.30.1) vyāsa uvāca ataḥ paraṃ pravalakṣyāmi prāyaścittavidhiṃ śubham / hitāya sarvaviprāṇāṃ doṣāṇāmapanuttaye // ### [2.30.2](https://indike.org/pramana/in.purana.kurma.2.30.2) akṛtvā vihitaṃ karma kṛtvā ninditameva ca / doṣamāpnoti puruṣaḥ prāyaścittaṃ viśodhanam // ### [2.30.3](https://indike.org/pramana/in.purana.kurma.2.30.3) prāyaścittamakṛtvā tu na tiṣṭhed brāhmaṇaḥ kvacit / yad brūyurbrāhmaṇāḥ śāntā vidvāṃsastatsamācaret // ### [2.30.4](https://indike.org/pramana/in.purana.kurma.2.30.4) vedārthavittamaḥ śānto dharmakāmo 'gnimān dvijaḥ / sa eva syāt paro dharmo yameko 'pi vyavasyati // ### [2.30.5](https://indike.org/pramana/in.purana.kurma.2.30.5) anāhitāgnayo viprāstrayo vedārthapāragāḥ / yad brūyurdharmakāmāste tajjñeyaṃ dharmasādhanam // ### [2.30.6](https://indike.org/pramana/in.purana.kurma.2.30.6) anekadharmaśāstrajñā ūhāpohaviśāradāḥ / vedādhyayanasaṃpannāḥ saptaite parikīrtitāḥ // ### [2.30.7](https://indike.org/pramana/in.purana.kurma.2.30.7) mīmāṃsājñānatattvajñā vedāntakuśalā dvijāḥ / ekaviṃśatisaṃkhyātāḥ prayāścittaṃ vadanti vai // ### [2.30.8](https://indike.org/pramana/in.purana.kurma.2.30.8) brahmahā madyapaḥ steno gurutalpaga eva ca / mahāpātakinastvete yaścaitaiḥ saha saṃvaset // ### [2.30.9](https://indike.org/pramana/in.purana.kurma.2.30.9) saṃvatsaraṃ tu patitaiḥ saṃsargaṃ kurute tu yaḥ / yānaśayyāsanairnityaṃ jānan vai patito bhavet // ### [2.30.10](https://indike.org/pramana/in.purana.kurma.2.30.10) yājanaṃ yonisaṃbandhaṃ tathaivādhyāpanaṃ dvijaḥ / kṛtvā sadyaḥ patejjñānāt saha bhojanameva ca // ### [2.30.11](https://indike.org/pramana/in.purana.kurma.2.30.11) avijñāyātha yo mohāt kuryādadhyāpanaṃ dvijaḥ / saṃvatsareṇa patati sahādhyayanameva ca // ### [2.30.12](https://indike.org/pramana/in.purana.kurma.2.30.12) brahmāhā dvādaśābdāni kuṭiṃ kṛtvā vane vaset / bhaikṣamātmaviśuddhyarthaṃ kṛtvā śavaśirodhvajam // ### [2.30.13](https://indike.org/pramana/in.purana.kurma.2.30.13) brāhmaṇāvasathān sarvān devāgārāṇi varjayet / vinindan svayamātmānaṃ brāhmaṇaṃ taṃ ca saṃsmaran // ### [2.30.14](https://indike.org/pramana/in.purana.kurma.2.30.14) asaṃkalpitayogyāni saptāgārāṇi saṃviśet / vidhūme śanakairnityaṃ vyaṅgāre bhuktavajjane // ### [2.30.15](https://indike.org/pramana/in.purana.kurma.2.30.15) ekakālaṃ cared bhaikṣaṃ doṣaṃ vikhyāpayan nṛṇām / vanyamūlaphalairvāpi vartayed dhairyamākṣitaḥ // ### [2.30.16](https://indike.org/pramana/in.purana.kurma.2.30.16) kapālapāṇiḥ khaṭvāṅgī brahmacaryaparāyaṇaḥ / pūrṇe tu dvādaśe varṣe brahmahatyāṃ vyapohati // ### [2.30.17](https://indike.org/pramana/in.purana.kurma.2.30.17) akāmataḥ kṛte pāpe prāyaścittamidaṃ śubham / kāmato maraṇācchuddhirjñeyā nānyena kenacit // ### [2.30.18](https://indike.org/pramana/in.purana.kurma.2.30.18) kuryādanaśanaṃ vātha bhṛgoḥ patanameva vā / jvalantaṃ vā viśedagniṃ jalaṃ vā praviśet svayam // ### [2.30.19](https://indike.org/pramana/in.purana.kurma.2.30.19) brāhmaṇārthe gavārthe vā samyak prāṇān parityajet / brahmahatyāpanodārthamantarā vā mṛtasya tu // ### [2.30.20](https://indike.org/pramana/in.purana.kurma.2.30.20) dīrghāmayānvitaṃ vipraṃ kṛtvānāmayameva tu / dattvā cānnaṃ sa durbhikṣe brahmahatyāṃ vyapohati // ### [2.30.21](https://indike.org/pramana/in.purana.kurma.2.30.21) aśvamedhāvabhṛthake snātvā vā śudhyate dvijaḥ / sarvasvaṃ vā vedavide brāhmaṇāya pradāya tu // ### [2.30.22](https://indike.org/pramana/in.purana.kurma.2.30.22) sarasvatyāstvaruṇayā saṃgame lokaviśrute / śudhyet triṣavaṇasnānāt trirātropoṣito dvijaḥ // ### [2.30.23](https://indike.org/pramana/in.purana.kurma.2.30.23) gatvā rāmeśvaraṃ puṇyaṃ snātvā caiva mahodadhau / brahmacaryādibhiryukto dṛṣṭvā rudraṃ vimucyate // ### [2.30.24](https://indike.org/pramana/in.purana.kurma.2.30.24) kapālamocanaṃ nāma tīrthaṃ devasya śūlinaḥ / snātvābhyarcya pitṝn bhaktyā brahmahatyāṃ vyapohati // ### [2.30.25](https://indike.org/pramana/in.purana.kurma.2.30.25) yatra devādidevena bharaveṇāmitaujasā / kapālaṃ sthāpitaṃ pūrvaṃ brahmaṇaḥ parameṣṭhinaḥ // ### [2.30.26](https://indike.org/pramana/in.purana.kurma.2.30.26) samabhyarcya mahādevaṃ tatra bhairavarūpiṇam / tarpapitvā pitṝn snātvā mucyate brahmahatyayā // ### [2.30.26.p1](https://indike.org/pramana/in.purana.kurma.2.30.26.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge triśo 'dhyāyaḥ ## Linked texts (7) - [Garuḍapurāṇa](https://indike.org/pramana/in.purana.garuda.1.52.4) — Vyāsa, Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.169.2) — Sanskrit - [Mānava Dharmaśāstra](https://indike.org/pramana/in.niti.dharma.manu.11.45) — Manu & Bhṛgu, Sanskrit - [Smṛtimuktāphala](https://indike.org/pramana/in.niti.dharma.nibandha.mahanibandha.smrtimuktaphala.5.20) — Vaidyanātha Dīkṣita 1575, Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.10.3.12) — Viśveśvarabhaṭṭa, Sanskrit - [Smṛtiratnākara](https://indike.org/pramana/in.niti.dharma.acara.smrtiratnakara.2.p118.1) — Veṅkaṭanātha, Sanskrit - [Smṛtiratnākara (Viṭṭhalanātha)](https://indike.org/pramana/in.niti.dharma.nibandha.smrtiratnakara-vitthala.2.p118.1) — Viṭṭhalanātha, Sanskrit --- Source: [https://indike.org/pramana/in.purana.kurma.2.30](https://indike.org/pramana/in.purana.kurma.2.30) · Pramāṇa