[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.31 # Kurmapurana 2.31: ekatriṃśo'dhyāyaḥ Kūrmapurāṇa 2.31 - **Language:** Sanskrit ## Contents - [2.31.111](https://indike.org/pramana/in.purana.kurma.2.31.111) — 1 part ### ekatriṃśo'dhyāyaḥ ### [2.31.1](https://indike.org/pramana/in.purana.kurma.2.31.1) ṛṣaya ūcuḥ kathaṃ devena rudreṇa śaṅkareṇāmitaujasā / kapālaṃ brahmaṇaḥ pūrvaṃ sthāpitaṃ dehajaṃ bhuvi // ### [2.31.2](https://indike.org/pramana/in.purana.kurma.2.31.2) sūta uvāca śṛṇudhvamṛṣayaḥ puṇyāṃ kathāṃ pāpapraṇāśanīm / māhātmyaṃ devadevasya mahādevasya dhīmataḥ // ### [2.31.3](https://indike.org/pramana/in.purana.kurma.2.31.3) purā pitāmahaṃ devaṃ meruśṛṅge maharṣayaḥ / procuḥ praṇamya lokādiṃ kimekaṃ tattvamavyayam // ### [2.31.4](https://indike.org/pramana/in.purana.kurma.2.31.4) sa māyayā maheśasya mohito lokasaṃbhavaḥ / avijñāya paraṃ bhāvaṃ svātmānaṃ prāha dharṣiṇam // ### [2.31.5](https://indike.org/pramana/in.purana.kurma.2.31.5) ahaṃ dhātā jagadyoniḥ svayaṃbhūreka īśvaraḥ / anādimatparaṃ brahma māmabhyarcya vimucyate // ### [2.31.6](https://indike.org/pramana/in.purana.kurma.2.31.6) ahaṃ hi sarvadevānāṃ pravartakanivartakaḥ / na vidyate cābhyadhiko matto lokeṣu kaścana // ### [2.31.7](https://indike.org/pramana/in.purana.kurma.2.31.7) tasyaivaṃ manyamānasya jajñe nārāyaṇāṃśajaḥ / provāca prahasan vākyaṃ roṣatāmravilocanaḥ // ### [2.31.8](https://indike.org/pramana/in.purana.kurma.2.31.8) kiṃ kāraṇamidaṃ brahman vartate tava sāṃpratam / ajñānayogayuktasya na tvetaducitaṃ tava // ### [2.31.9](https://indike.org/pramana/in.purana.kurma.2.31.9) ahaṃ dhātā hi lokānāṃ yajño nārāyaṇaḥ prabhuḥ / na māmṛte 'sya jagato jīvanaṃ sarvadā kvacit // ### [2.31.10](https://indike.org/pramana/in.purana.kurma.2.31.10) ahameva paraṃ jyotirahameva parā gatiḥ / matpreritena bhavatā sṛṣṭaṃ bhuvanamaṇḍalam // ### [2.31.11](https://indike.org/pramana/in.purana.kurma.2.31.11) evaṃ vivadatormohāt parasparajayaiṣiṇoḥ / ājagmuryatra tau devau vedāścatvāra eva hi // ### [2.31.12](https://indike.org/pramana/in.purana.kurma.2.31.12) anvīkṣya devaṃ brahmāṇaṃ yajñātmānaṃ ca saṃsthitam / procuḥ saṃvignahṛdayā yāthātmyaṃ parameṣṭhinaḥ // ### [2.31.13](https://indike.org/pramana/in.purana.kurma.2.31.13) ṛgveda uvāca yasyāntaḥ sthāni bhūtāni yasmātsarvaṃ pravartate / yadāhustatparaṃ tattvaṃ sa devaḥ syānmaheśvaraḥ // ### [2.31.14](https://indike.org/pramana/in.purana.kurma.2.31.14) yajurveda uvāca yo yajñairakhilairīśo yogena ca samarcyate / yamāhurīśvaraṃ devaṃ sa devaḥ syāt pinākadhṛk // ### [2.31.15](https://indike.org/pramana/in.purana.kurma.2.31.15) sāmaveda uvāca yenedaṃ bhrāmyate cakraṃ yadākāśāntaraṃ śivam / yogibhirvidyate tattvaṃ mahādevaḥ sa śaṅkaraḥ // ### [2.31.16](https://indike.org/pramana/in.purana.kurma.2.31.16) atharvaveda uvāca yaṃ prapaśyanti yogeśaṃ yatanto yatayaḥ param / maheśaṃ puruṣaṃ rudraṃ sa devo bhagavān bhavaḥ // ### [2.31.17](https://indike.org/pramana/in.purana.kurma.2.31.17) evaṃ sa bhagavān brahmā vedānāmīritaṃ śubham / śrutvāha prahasan vākyaṃ viśvātmāpi vimohitaḥ // ### [2.31.18](https://indike.org/pramana/in.purana.kurma.2.31.18) kathaṃ tatparamaṃ brahma sarvasaṅgavivarjitam / ramate bhāryayā sārdhaṃ pramathaiścātigarvitaiḥ // ### [2.31.19](https://indike.org/pramana/in.purana.kurma.2.31.19) itirite 'tha bhagavān praṇavātmā sanātanaḥ / amūrto mūrtimān bhūtvā vacaḥ prāha pitāmaham // ### [2.31.20](https://indike.org/pramana/in.purana.kurma.2.31.20) praṇava uvāca na hyeṣa bhagavān patnyā svātmano vyatiriktayā / kadācid ramate rudrastādṛśo hi maheśvaraḥ // ### [2.31.21](https://indike.org/pramana/in.purana.kurma.2.31.21) ayaṃ sa bhagavānīśaḥ svayañjyotiḥ sanātanaḥ / svānandabhūtā kathitā devī nāgantukā śivā // ### [2.31.22](https://indike.org/pramana/in.purana.kurma.2.31.22) ityevamukte 'pi tadā yajñamūrterajasya ca / nājñānamagamannāśamīśvarasyaiva māyayā // ### [2.31.23](https://indike.org/pramana/in.purana.kurma.2.31.23) tadantare mahājyotirviriñco viśvabhāvanaḥ / prāpaśyadadbhutaṃ divyaṃ pūrayan gaganāntaram // ### [2.31.24](https://indike.org/pramana/in.purana.kurma.2.31.24) tanmadhyasaṃsthaṃ vimalaṃ maṇḍalaṃ tejasojjvalam / vyomamadhyagataṃ divyaṃ prādurāsīd dvijottamāḥ // ### [2.31.25](https://indike.org/pramana/in.purana.kurma.2.31.25) sa dṛṣṭvā vadanaṃ divyaṃ mūrdhni lokapitāmahaḥ / tena tanmaṇjalaṃ ghoramālokayadaninditam // ### [2.31.26](https://indike.org/pramana/in.purana.kurma.2.31.26) prajajvālātikopena brahmaṇaḥ pañcamaṃ śiraḥ / kṣaṇādadṛśyata mahān puruṣo nīlalohitaḥ // ### [2.31.27](https://indike.org/pramana/in.purana.kurma.2.31.27) triśūlapiṅgalo devo nāgayajñopavītavān / taṃ prāha bhagavān brahmā śaṅkaraṃ nīlalohitam // ### [2.31.28](https://indike.org/pramana/in.purana.kurma.2.31.28) jānāmi bhavataḥ pūrvaṃ lalāṭādeva śaṅkara / prādurbhāvaṃ maheśān māmeva śaraṇaṃ vraja // ### [2.31.29](https://indike.org/pramana/in.purana.kurma.2.31.29) śrutvā sagarvavacanaṃ padmayoneratheśvaraḥ / prāhiṇot puruṣaṃ kālaṃ bhairavaṃ lokadāhakam // ### [2.31.30](https://indike.org/pramana/in.purana.kurma.2.31.30) sa kṛtvā sumahad yuddhaṃ brahmaṇā kālabhairavaḥ / cakarta tasya vadanaṃ viriñcasyātha pañcamam // ### [2.31.31](https://indike.org/pramana/in.purana.kurma.2.31.31) nikṛttavadano devo brahmā devena śaṃbhunā / mamāra ceśayogena jīvitaṃ prāpa viśvasṛk // ### [2.31.32](https://indike.org/pramana/in.purana.kurma.2.31.32) athānupaśyad giriśaṃ maṇḍalāntarasaṃsthitam / samāsīnaṃ mahādevyā mahādevaṃ sanātanam // ### [2.31.33](https://indike.org/pramana/in.purana.kurma.2.31.33) bhujaṅgarājavalayaṃ candrāvayavabhūṣaṇam / koṭisūryapratīkāśaṃ jaṭājūṭavirājitam // ### [2.31.34](https://indike.org/pramana/in.purana.kurma.2.31.34) śārdūlacarmavasanaṃ divyamālāsamanvitam / triśūlapāṇiṃ duṣprekṣyaṃ yoginaṃ bhūtibhūṣaṇam // ### [2.31.35](https://indike.org/pramana/in.purana.kurma.2.31.35) yamantarā yoganiṣṭhāḥ prapaśyanti hṛdīśvaram / tamādidevaṃ brahmāṇaṃ mahādevaṃ dadarśa ha // ### [2.31.36](https://indike.org/pramana/in.purana.kurma.2.31.36) yasya sā paramā devī śaktirākāśasaṃsthitā / so 'nantaiśvaryayogātmā maheśo dṛśyate kila // ### [2.31.37](https://indike.org/pramana/in.purana.kurma.2.31.37) yasyāśeṣajagad bījaṃ vilayaṃ yāti mohanam / sakṛtpraṇāmamātreṇa sa rudraḥ khalu dṛśyate // ### [2.31.38](https://indike.org/pramana/in.purana.kurma.2.31.38) yo 'tha nācāraniratān svabhaktāneva kevalam / vimocayati lokānāṃ nāyako dṛśyate kila // ### [2.31.39](https://indike.org/pramana/in.purana.kurma.2.31.39) yasya vedavidaḥ śāntā nirdvandvā brahmacāriṇaḥ / vidanti vimalaṃ rūpaṃ sa śaṃbhurdṛśyate kila // ### [2.31.40](https://indike.org/pramana/in.purana.kurma.2.31.40) yasya brahmādayo devā ṛṣayo brahmavādinaḥ / arcayanti sadā liṅgaṃ viśveśaḥ khalu dṛśyate // ### [2.31.41](https://indike.org/pramana/in.purana.kurma.2.31.41) yasyāśeṣajagad bījaṃ vilayaṃ yāti mohanam / sakṛtpraṇāmamātreṇa sa rudraḥ khalu dṛśyate // ### [2.31.42](https://indike.org/pramana/in.purana.kurma.2.31.42) vidyāsahāyo bhagavān yasyāsau maṇḍalāntaram / hiraṇyagarbhaputro 'sāvīśvaro dṛśyate kila // ### [2.31.43](https://indike.org/pramana/in.purana.kurma.2.31.43) yasyāśeṣajagatsūtirvijñānatanurīśvarī / na muñcati sadā pārśvaṃ śaṅkaro 'sāvadṛśyata // ### [2.31.44](https://indike.org/pramana/in.purana.kurma.2.31.44) puṣpaṃ vā yadi vā patraṃ yatpādayugale jalam / dattvā tarati saṃsāraṃ rudro 'sau dṛśyate kila // ### [2.31.45](https://indike.org/pramana/in.purana.kurma.2.31.45) tatsannidhāne sakalaṃ niyacchati sanātanaḥ / kālaḥ kila sa yogātmā kālakālo hi dṛśyate // ### [2.31.46](https://indike.org/pramana/in.purana.kurma.2.31.46) jīvanaṃ sarvalokānāṃ trilokasyaiva bhūṣaṇam / somaḥ sa dṛśyate devaḥ somo yasya vibhūṣaṇam // ### [2.31.47](https://indike.org/pramana/in.purana.kurma.2.31.47) devyā saha sadā sākṣād yasya yogaḥ svabhāvataḥ / gīyate paramā muktiḥ sa yogī dṛśyate kila // ### [2.31.48](https://indike.org/pramana/in.purana.kurma.2.31.48) yogino yogatattvajñā viyogābhimukhāniśam / yogaṃ dhyāyanti devyāsau sa yogī dṛśyate kila // ### [2.31.49](https://indike.org/pramana/in.purana.kurma.2.31.49) so 'nuvīkṣya mahādevaṃ mahādevyā sanātanam / varāsane samāsīnamavāpa paramāṃ smṛtim // ### [2.31.50](https://indike.org/pramana/in.purana.kurma.2.31.50) labdhvā māheśvarīṃ divyāṃ saṃsmṛtiṃ bhagavānajaḥ / toṣayāmāsa varadaṃ somaṃ somavibhūṣaṇam // ### [2.31.51](https://indike.org/pramana/in.purana.kurma.2.31.51) brahmovāca namo devāya mahate mahādevyai namo namaḥ / namaḥ śivāya śāntāya śivāyai śāntaye namaḥ // ### [2.31.52](https://indike.org/pramana/in.purana.kurma.2.31.52) oṃ namo brahmaṇe tubhyaṃ vidyāyai te namo namaḥ / namo mūlaprakṛtaye maheśāya namo namaḥ // ### [2.31.53](https://indike.org/pramana/in.purana.kurma.2.31.53) namo vijñānadehāya cintāyai te namo namaḥ / namaste kālakālāya īśvarāyai namo namaḥ // ### [2.31.54](https://indike.org/pramana/in.purana.kurma.2.31.54) namo namo 'stu rudrāya rudrāṇyai te namo namaḥ / namo namaste kāmāya māyāyai ca namo namaḥ // ### [2.31.55](https://indike.org/pramana/in.purana.kurma.2.31.55) niyantre sarvakāryāṇāṃ kṣobhikāyai namo namaḥ / namo 'stu te prakṛtaye namo nārāyaṇāya ca // ### [2.31.56](https://indike.org/pramana/in.purana.kurma.2.31.56) yogādāyai namastubhyaṃ yogināṃ gurave namaḥ / namaḥ saṃsāranāśāya saṃsārotpattaye namaḥ // ### [2.31.57](https://indike.org/pramana/in.purana.kurma.2.31.57) nityānandāya vibhave namo 'stvānandamūrtaye / namaḥ kāryavihīnāya viśvaprakṛtaye namaḥ // ### [2.31.58](https://indike.org/pramana/in.purana.kurma.2.31.58) oṅkāramūrtaye tubhyaṃ tadantaḥ saṃsthitāya ca / namaste vyomasaṃsthāya vyomaśaktyai namo namaḥ // ### [2.31.59](https://indike.org/pramana/in.purana.kurma.2.31.59) iti somāṣṭakeneśaṃ praṇanāma pitāmahaḥ / papāta daṇḍavad bhūmau gṛṇan vai śatarudriyam // ### [2.31.60](https://indike.org/pramana/in.purana.kurma.2.31.60) atha devo mahādevaḥ praṇatārtiharo haraḥ / provācotthāpya hastābhyāṃ prato 'smi tava sāṃpratam // ### [2.31.61](https://indike.org/pramana/in.purana.kurma.2.31.61) dattvāsau paramaṃ yogamaiśvaryamatulaṃ mahat / provācāgre sthitaṃ devaṃ nīlalohitamīśvaram // ### [2.31.62](https://indike.org/pramana/in.purana.kurma.2.31.62) eṣa brahmāsya jagataḥ saṃpūjyaḥ prathamaḥ sutaḥ / ātmano rakṣaṇīyaste gururjyeṣṭhaḥ pitā tava // ### [2.31.63](https://indike.org/pramana/in.purana.kurma.2.31.63) ayaṃ purāṇapuruṣo na hantavyastvayānagha / svayogaiśvaryamāhātmyānmāmeva śaraṇaṃ gataḥ // ### [2.31.64](https://indike.org/pramana/in.purana.kurma.2.31.64) ayaṃ ca yajño bhagavān sagarvo bhavatānagha / śāsitavyo viriñcasya dhāraṇīyaṃ śirastvayā // ### [2.31.65](https://indike.org/pramana/in.purana.kurma.2.31.65) brahmahatyāpanodārthaṃ vrataṃ lokāya darśayan / carasva satataṃ bhikṣāṃ saṃsthāpaya suradvijān // ### [2.31.66](https://indike.org/pramana/in.purana.kurma.2.31.66) ityetaduktvā vacanaṃ bhagavān parameśvaraḥ / sthānaṃ svābhāvikaṃ divyaṃ yayau tatparamaṃ padam // ### [2.31.67](https://indike.org/pramana/in.purana.kurma.2.31.67) tataḥ sa bhagavānīśaḥ kaparde nīlalohitaḥ / grāhayāmāsa vadanaṃ brahmaṇaḥ kālabhairavam // ### [2.31.68](https://indike.org/pramana/in.purana.kurma.2.31.68) cara tvaṃ pāpanāśārthaṃ vrataṃ lokahitāvaham / kapālahasto bhagavān bhikṣāṃ gṛhṇātu sarvataḥ // ### [2.31.69](https://indike.org/pramana/in.purana.kurma.2.31.69) uktvaivaṃ prāhiṇot kanyāṃ brahmahatyāmiti śrutām / daṃṣṭrākarālavadanāṃ jvālāmālāvibhūṣaṇām // ### [2.31.70](https://indike.org/pramana/in.purana.kurma.2.31.70) yāvad vārāṇasīṃ divyāṃ purīmeṣa gamiṣyati / tāvat tvaṃ bhīṣaṇe kālamanugaccha trilocanam // ### [2.31.71](https://indike.org/pramana/in.purana.kurma.2.31.71) evamābhāṣya kālāgniṃ prāha devo maheśvaraḥ / aṭasva nikhilaṃ lokaṃ bhikṣārtho manniyogataḥ // ### [2.31.72](https://indike.org/pramana/in.purana.kurma.2.31.72) yadā drakṣyasi deveśaṃ nārāyaṇamanāmayam / tadāsau vakṣyati spaṣṭamupāyaṃ pāpaśodhanam // ### [2.31.73](https://indike.org/pramana/in.purana.kurma.2.31.73) sa devadevatāvākyamākarṇya bhagavān haraḥ / kapālapāṇirviśvātmā cacāra bhuvanatrayam // ### [2.31.74](https://indike.org/pramana/in.purana.kurma.2.31.74) āsthāya vikṛtaṃ veṣaṃ dīpyamānaṃ svatejasā / śrīmat pavitramatulaṃ jaṭājūṭavirājitam // ### [2.31.75](https://indike.org/pramana/in.purana.kurma.2.31.75) koṭisūryapratīkāśaiḥ pramathaiścātigarvitaiḥ / bhāti kālāgninayano mahādevaḥ samāvṛtaḥ // ### [2.31.76](https://indike.org/pramana/in.purana.kurma.2.31.76) pītvā kadamṛtaṃ divyamānandaṃ parameṣṭhinaḥ / līlāvilāsūbahulo lokānāgacchatīśvaraḥ // ### [2.31.77](https://indike.org/pramana/in.purana.kurma.2.31.77) taṃ dṛṣṭvā kālavadanaṃ śaṅkaraṃ kālabhairavam / rūpalāvaṇyasaṃpannaṃ nārīkulamagādanu // ### [2.31.78](https://indike.org/pramana/in.purana.kurma.2.31.78) gāyanti vividhaṃ gītaṃ nṛtyanti purataḥ prabhoḥ / sasmitaṃ prekṣya vadanaṃ cakrurbhrūbhaṅgameva ca // ### [2.31.79](https://indike.org/pramana/in.purana.kurma.2.31.79) sa devadānavādīnāṃ deśānabhyetya śūladhṛk / jagāma viṣṇorbhavanaṃ yatrāste madhusūdanaḥ // ### [2.31.80](https://indike.org/pramana/in.purana.kurma.2.31.80) nirīkṣya divyabhavanaṃ śaṅkaro lokaśaṅkaraḥ / sahaiva bhūtapravaraiḥ praveṣṭumupacakrame // ### [2.31.81](https://indike.org/pramana/in.purana.kurma.2.31.81) avijñāya paraṃ bhāvaṃ divyaṃ tatpārameśvaram / nyavārayat triśūlāṅkaṃ dvārapālo mahābalaḥ // ### [2.31.82](https://indike.org/pramana/in.purana.kurma.2.31.82) śaṅkhacakragadāpāṇiḥ pītavāsā mahābhujaḥ / viṣvaksena iti khyāto viṣṇoraṃśasamudbhavaḥ // ### [2.31.83](https://indike.org/pramana/in.purana.kurma.2.31.83) athainaṃ śaṅkaragaṇo yuyudhe viṣṇusaṃbhavam / bhīṣaṇo bhairavādeśāt kālavega iti śrutaḥ // ### [2.31.84](https://indike.org/pramana/in.purana.kurma.2.31.84) vijitya taṃ kālavegaṃ krodhasaṃraktalocanaḥ / rudrāyābhimukhaṃ raudraṃ cikṣepa ca sudarśanam // ### [2.31.85](https://indike.org/pramana/in.purana.kurma.2.31.85) atha devo mahādevastripurāristriśūlabhṛt / tamāpatantaṃ sāvajñamālokayadamitrajit // ### [2.31.86](https://indike.org/pramana/in.purana.kurma.2.31.86) tadantare mahadbhūtaṃ yugāntadahanopamam / śūlenorasi nirbhidya pātayāmāsa taṃ bhuvi // ### [2.31.87](https://indike.org/pramana/in.purana.kurma.2.31.87) sa śūlābhihato 'tyarthaṃ tyaktvā svaṃ paramaṃ balam / tatyāja jīvitaṃ dṛṣṭvā mṛtyuṃ vyādhihatā iva // ### [2.31.88](https://indike.org/pramana/in.purana.kurma.2.31.88) nihatya viṣṇupuruṣaṃ sārdhaṃ pramathapuṅgavaiḥ / viveśa cāntaragṛhaṃ samādāya kalevaram // ### [2.31.89](https://indike.org/pramana/in.purana.kurma.2.31.89) nirīkṣya jagato hetumīśvaraṃ bhagavān hariḥ / śiro lalāṭāt saṃbhidya raktadhārāmapātayat // ### [2.31.90](https://indike.org/pramana/in.purana.kurma.2.31.90) gṛhāṇa bhagavan bhikṣāṃ madīyāmamitadyute / na vidyate 'nābhyuditā tava tripuramardana // ### [2.31.91](https://indike.org/pramana/in.purana.kurma.2.31.91) na saṃpūrṇaṃ kapālaṃ tad brahmaṇaḥ parameṣṭhinaḥ / divyaṃ varṣasahasraṃ tu sā ca dhārā pravāhitā // ### [2.31.92](https://indike.org/pramana/in.purana.kurma.2.31.92) athābravīt kālarudraṃ harirnārāyaṇaḥ prabhuḥ / saṃstūya vaidikairmantrairbahumānapuraḥ saram // ### [2.31.93](https://indike.org/pramana/in.purana.kurma.2.31.93) kimarthametad vadanaṃ brahmaṇo bhavatā dhṛtam / provāca vṛttamakhilaṃ bhagavān parameśvaraḥ // ### [2.31.94](https://indike.org/pramana/in.purana.kurma.2.31.94) samāhūya hṛṣīkeśo brahmahatyāmathācyutaḥ / prārthayāmāsa deveśo vimuñceti triśūlinam // ### [2.31.95](https://indike.org/pramana/in.purana.kurma.2.31.95) na tatyājātha sā pārśvaṃ vyāhṛtāpi murāriṇā / ciraṃ dhyātvā jagadyoniḥ śaṅkaraṃ prāha sarvavit // ### [2.31.96](https://indike.org/pramana/in.purana.kurma.2.31.96) vrajasva bhagavan divyāṃ purīṃ vārāṇasīṃ śubhām / yatrākhilajagaddoṣaṃ kṣipraṃ nāśayatāśvaraḥ // ### [2.31.97](https://indike.org/pramana/in.purana.kurma.2.31.97) tataḥ śarvāṇi guhyāni tīrthānyāyatanāni ca / jagāma līlayā devo lokānāṃ hitakāmyayā // ### [2.31.98](https://indike.org/pramana/in.purana.kurma.2.31.98) saṃstūyamānaḥ pramathairmahāyogairitastataḥ / nṛtyamāno mahāyogī hastanyastakalevaraḥ // ### [2.31.99](https://indike.org/pramana/in.purana.kurma.2.31.99) tamabhyadhāvad bhagavān harirnārāyaṇaḥ svayam / athāsthāyāparaṃ rūpaṃ nṛtyadarśanalālasaḥ // ### [2.31.100](https://indike.org/pramana/in.purana.kurma.2.31.100) nirīkṣamāṇo novindaṃ vṛṣendrāṅkitaśāsanaḥ / sasmito 'nantayogātmā nṛtyati sma punaḥ punaḥ // ### [2.31.101](https://indike.org/pramana/in.purana.kurma.2.31.101) atha sānucaro rudraḥ saharirdharmavāhanaḥ / bheje mahādevapurīṃ vārāṇasīmiti śrutām // ### [2.31.102](https://indike.org/pramana/in.purana.kurma.2.31.102) praviṣṭamātre deveśe brahmahatyā kapardini / hā hetyuktvā sanādaṃ sā pātālaṃ prāpa duḥ khitā // ### [2.31.103](https://indike.org/pramana/in.purana.kurma.2.31.103) praviśya paramaṃ sthānaṃ kapālaṃ brahmaṇo haraḥ / gaṇānāmagrato devaḥ sthāpayāmāsa śaṅkaraḥ // ### [2.31.104](https://indike.org/pramana/in.purana.kurma.2.31.104) sthāpayitvā mahādevo dadau tacca kalevaram / uktvā sajīvamastvīśo viṣṇave sa ghṛṇānidhiḥ // ### [2.31.105](https://indike.org/pramana/in.purana.kurma.2.31.105) ye smaranti mamājastraṃ kāpālaṃ veṣamuttamam / teṣāṃ vinaśyati kṣipramihāmutra ca pātakam // ### [2.31.106](https://indike.org/pramana/in.purana.kurma.2.31.106) āgamya tīrthapravare snānaṃ kṛtvā vidhānataḥ / tarpayitvā pitṝn devān mucyate brahmahatyayā // ### [2.31.107](https://indike.org/pramana/in.purana.kurma.2.31.107) aśāśvataṃ jagajjñātvā ye 'smin sthāne vasanti vai / dehānte tat paraṃ jñānaṃ dadāmi paramaṃ padam // ### [2.31.108](https://indike.org/pramana/in.purana.kurma.2.31.108) itīdamuktvā bhagavān samāliṅgya janārdanam / sahaiva pramatheśānaiḥ kṣaṇādantaradhīyata // ### [2.31.109](https://indike.org/pramana/in.purana.kurma.2.31.109) sa labdhvā bhagavān kṛṣṇo viṣvaksenaṃ triśūlinaḥ / svaṃ deśamagat tūrṇaṃ gṛhītvāṃ paramaṃ vapuḥ // ### [2.31.110](https://indike.org/pramana/in.purana.kurma.2.31.110) etad vaḥ kathitaṃ puṇyaṃ mahāpātakanāśanam / kapālamocanaṃ tīrthaṃ sthāṇoḥ priyakaraṃ śubham // ### [2.31.111](https://indike.org/pramana/in.purana.kurma.2.31.111) ya imaṃ paṭhate 'dhyāyaṃ brāhmaṇānāṃ samīpataḥ / vācikairmānasaiḥ pāpaiḥ kāyikaiśca vimucyate // ### [2.31.111.p1](https://indike.org/pramana/in.purana.kurma.2.31.111.p1) iti śrīkūrmapārāṇe ṣaṭsāhastryāṃ saṃhitāyāmuparivibhāge ekatriśo 'dhyāyaḥ ## Linked texts (1) - [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.9.p19.2) — Nārāyaṇa (Mahiṣamaṅgalam) 1513, Sanskrit --- Source: [https://indike.org/pramana/in.purana.kurma.2.31](https://indike.org/pramana/in.purana.kurma.2.31) · Pramāṇa