[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.33 # Kurmapurana 2.33: trayastriṃśo'dhyāyaḥ Kūrmapurāṇa 2.33 - **Language:** Sanskrit ## Contents - [2.33.153](https://indike.org/pramana/in.purana.kurma.2.33.153) — 1 part ### trayastriṃśo'dhyāyaḥ ### [2.33.1](https://indike.org/pramana/in.purana.kurma.2.33.1) vyāsa uvāca manuṣyāṇāṃ tu haraṇaṃ kṛtvā strīṇāṃ gṛhasya ca / vāpīkūpajalānāṃ ca śudhyeccāndrāyaṇena tu // ### [2.33.2](https://indike.org/pramana/in.purana.kurma.2.33.2) dravyāṇāmalpasārāṇāṃ steyaṃ kṛtvānyaveśmataḥ / caret sāṃtapanaṃ kṛcchraṃ tanniryātyātmaśuddhaye // ### [2.33.3](https://indike.org/pramana/in.purana.kurma.2.33.3) dhānyānnadhanacauryaṃ tu kṛtvā kāmād dvijottamaḥ / svajātīyagṛhādeva kṛcchrārdhena viśuddhyati // ### [2.33.4](https://indike.org/pramana/in.purana.kurma.2.33.4) bhakṣabhojyāpaharaṇe yānaśayyāsanasya ca / puṣpamūlaphalānāṃ ca pañcagavyaṃ viśodhanam // ### [2.33.5](https://indike.org/pramana/in.purana.kurma.2.33.5) tṛṇakāṣṭhadrumāṇāṃ ca śuṣkānnasya guḍasya ca / cailacarmāmiṣāṇāṃ ca trirātraṃ syādabhojanam // ### [2.33.6](https://indike.org/pramana/in.purana.kurma.2.33.6) maṇimuktāpravālānāṃ tāmrasya rajatasya ca / ayaḥ kāṃsyopalānāṃ ca dvādaśāhaṃ kaṇāśanam // ### [2.33.7](https://indike.org/pramana/in.purana.kurma.2.33.7) kārpāsakīṭajorṇānāṃ dviśaphaikaśaphasya ca / pakṣigandhauṣadhīnāṃ ca rajvāścaiva tryahaṃ payaḥ // ### [2.33.8](https://indike.org/pramana/in.purana.kurma.2.33.8) naramāṃsāśanaṃ kṛtvā cāndrāyaṇamathācaret / kākaṃ caiva tathā śvānaṃ jagdhvā hastinameva ca / varāhaṃ kukkuṭaṃ cātha taptakṛcchreṇa śudhyati // ### [2.33.9](https://indike.org/pramana/in.purana.kurma.2.33.9) kravyādānāṃ ca māṃsāni purīṣaṃ mūtrameva ca / gogomāyukapīnāṃ ca tadeva vratamācaret / upoṣya dvādaśāhaṃ tu kūṣmāṇḍairjuhuyād ghṛtam // ### [2.33.10](https://indike.org/pramana/in.purana.kurma.2.33.10) nakulolūkamārjāraṃ jagdhvā sāṃtapanaṃ caret / śvāpadoṣṭrakharāñjagdhvā taptakṛcchreṇa śuddhyati / vratavaccaiva saṃskāraṃ pūrveṇa vidhinaiva tu // ### [2.33.11](https://indike.org/pramana/in.purana.kurma.2.33.11) bakaṃ caiva balākaṃ ca haṃsaṃ kāraṇḍavaṃ tathā / cakravākaṃ plavaṃ jagghvā dvādaśāhamabhojanam // ### [2.33.12](https://indike.org/pramana/in.purana.kurma.2.33.12) kapotaṃ ṭiṭṭibhaṃ caiva śukaṃ sārasameva ca / ulūkaṃ jālapādaṃ ca jagdhvāpyetad vrataṃ caret // ### [2.33.13](https://indike.org/pramana/in.purana.kurma.2.33.13) śiśumāraṃ tathā cāṣaṃ matsyamāṃsaṃ tathaiva ca / jagdhvā caiva kaṭāhārametadeva cared vratam // ### [2.33.14](https://indike.org/pramana/in.purana.kurma.2.33.14) kokilaṃ caiva matsyāṃśca maṇḍukaṃ bhujagaṃ tathā / gomūtrayāvakāhāro māsenaikena śuddhyati // ### [2.33.15](https://indike.org/pramana/in.purana.kurma.2.33.15) jalecarāṃśca jalajān prattudānnakhaviṣkirān / raktapādāṃstathā jagdhvā saptāhaṃ caitadācaret // ### [2.33.16](https://indike.org/pramana/in.purana.kurma.2.33.16) śuno māṃsaṃ śuṣkamāṃsamātmārthaṃ ca tathā kṛtam / bhuktvā māsaṃ caredetat tatpāpasyāpanuttaye // ### [2.33.17](https://indike.org/pramana/in.purana.kurma.2.33.17) vārtākaṃ bhustṛṇaṃ śigruṃ khukhuṇḍaṃ karakaṃ tathā / prājāpatyaṃ carejjagdhvā śaṅkhaṃ kumbhīkameva ca // ### [2.33.18](https://indike.org/pramana/in.purana.kurma.2.33.18) palāṇḍuṃ laśunaṃ caiva bhuktvā cāndrāyaṇaṃ caret / nālikāṃ taṇḍulīyaṃ ca prājāpatyena śuddhyati // ### [2.33.19](https://indike.org/pramana/in.purana.kurma.2.33.19) aśmāntakaṃ tathā potaṃ taptakṛcchreṇa śuddhyati / prājāpatyena śuddhiḥ syāt kakkubhāṇḍasya bhakṣaṇe // ### [2.33.20](https://indike.org/pramana/in.purana.kurma.2.33.20) alābuṃ kiṃśukaṃ caiva bhuktvā caitad vrataṃ caret / udumbaraṃ ca kāmena taptakṛcchreṇa śuddhyati // ### [2.33.21](https://indike.org/pramana/in.purana.kurma.2.33.21) vṛthā kṛsarasaṃyāvaṃ pāyasāpūpasaṃkulam / bhuktvā caivaṃ vidhaṃ tvannaṃ trirātreṇa viśuddhyati // ### [2.33.22](https://indike.org/pramana/in.purana.kurma.2.33.22) pītvā kṣīrāṇyapeyāni brahmacārī samāhitaḥ / gomūtrayāvakāhāro māsenaikena śuddhyati // ### [2.33.23](https://indike.org/pramana/in.purana.kurma.2.33.23) anirdaśāhaṃ gokṣīraṃ māhiṣaṃ cājameva ca / saṃdhinyāśca vivatsāyāḥ piban kṣīramidaṃ caret // ### [2.33.24](https://indike.org/pramana/in.purana.kurma.2.33.24) eteṣāṃ ca vikārāṇi pītvā mohena mānavaḥ / gomūtrayāvakāhāraḥ saptarātreṇa śuddhyati // ### [2.33.25](https://indike.org/pramana/in.purana.kurma.2.33.25) bhuktvā caiva navaśrāddhe mṛtake sūtake tathā / cāndrāyaṇena śuddhyeta brāhmaṇastu samāhitaḥ // ### [2.33.26](https://indike.org/pramana/in.purana.kurma.2.33.26) yasyāgnau hūyate nityaṃ na yasyāgraṃ na dīyate / cāndrāyaṇaṃ caret samyak tasyānnaprāśane dvijaḥ // ### [2.33.27](https://indike.org/pramana/in.purana.kurma.2.33.27) abhojyānāṃ tu sarveṣāṃ bhuktvā cānnamupaskṛtam / antāvasāyināṃ caiva taptakṛcchreṇa śuddhyati // ### [2.33.28](https://indike.org/pramana/in.purana.kurma.2.33.28) cāṇḍālānnaṃ dvijo bhuktvā samyak cāndrāyaṇaṃ caret / buddhipūrvaṃ tu kṛcchrābdaṃ punaḥ saṃskārameva ca // ### [2.33.29](https://indike.org/pramana/in.purana.kurma.2.33.29) asurāmadyapānena kuryāccāndrāyaṇavratam / abhojyānnaṃ tu bhuktvā ca prājāpatyena śuddhyati // ### [2.33.30](https://indike.org/pramana/in.purana.kurma.2.33.30) viṇmūtrapāśanaṃ kṛtvā retasaścaitadācaret / anādiṣṭeṣu caikāhaṃ sarvatra tu yathārthataḥ // ### [2.33.31](https://indike.org/pramana/in.purana.kurma.2.33.31) viḍvarāhakharoṣṭrāṇāṃ gomāyoḥ kapikākayoḥ / prāśya mūtrapurīṣāṇi dvijaścāndrāyaṇaṃ caret // ### [2.33.32](https://indike.org/pramana/in.purana.kurma.2.33.32) ajñānāt prāśya viṇmūtraṃ surāsaṃspṛṣṭameva ca / punaḥ saṃskāramarhanti trayo varṇā dvijātayaḥ // ### [2.33.33](https://indike.org/pramana/in.purana.kurma.2.33.33) kravyādāṃ pakṣiṇāṃ caiva prāśya mūtrapurīṣakam / mahāsāṃtapanaṃ mohāt tathā kuryād dvijottamaḥ / bhāsamaṇḍūkakurare viṣkire kṛcchramācaret // ### [2.33.34](https://indike.org/pramana/in.purana.kurma.2.33.34) prājāpatyena śuddhyeta brāhāmaṇocchiṣṭabhojane / kṣatriye taptakṛcchraṃ syād vaiśye caivātikṛcchrakam / śūdrocchiṣṭaṃ dvijo bhuktvā kuryāccāndrāyaṇavratam // ### [2.33.35](https://indike.org/pramana/in.purana.kurma.2.33.35) surābhāṇḍodare vāri pītvā cāndrāyaṇaṃ caret / śunocchiṣṭaṃ dvijo bhuktvā trirātreṇa viśuddhyati / gomūtrayāvakāhāraḥ pītaśeṣaṃ ca rāgavān // ### [2.33.36](https://indike.org/pramana/in.purana.kurma.2.33.36) apo mūtrapurīṣādyairdūṣitāḥ prāśayed yadā / tadā sāṃtapanaṃ proktaṃ vrataṃ pāpaviśodhanam // ### [2.33.37](https://indike.org/pramana/in.purana.kurma.2.33.37) cāṇḍālakūpabhāṇḍeṣu yadi jñānāt pibejjalam / caret sāṃtapanaṃ kṛcchraṃ brāhmaṇaḥ pāpaśodhanam // ### [2.33.38](https://indike.org/pramana/in.purana.kurma.2.33.38) cāṇḍālena tu saṃspṛṣṭaṃ pītvā vāri dvijottamaḥ / trirātreṇa viśuddhyeta pañcagavyena caiva hi // ### [2.33.39](https://indike.org/pramana/in.purana.kurma.2.33.39) mahāpātakisaṃsparśe bhuṅkte 'snātvā dvijo yadi / buddhipūrvaṃ tu mūḍhātmā taptakṛcchraṃ samācaret // ### [2.33.40](https://indike.org/pramana/in.purana.kurma.2.33.40) spṛṣṭvā mahāpātakinaṃ cāṇḍālaṃ vā rajasvalām / pramādād bhojanaṃ kṛtvā trirātreṇa viśuddhyati // ### [2.33.41](https://indike.org/pramana/in.purana.kurma.2.33.41) snānārhe yadi bhuñjīta ahorātreṇa śuddhyati / buddhipūrvaṃ tu kṛcchreṇa bhagavānāha padmajaḥ // ### [2.33.42](https://indike.org/pramana/in.purana.kurma.2.33.42) śuṣkaparyuṣitādīni gavādipratidūṣitam / bhuktvopavāsaṃ kurvota kṛcchrapādamathāpi vā // ### [2.33.43](https://indike.org/pramana/in.purana.kurma.2.33.43) saṃvatsarānte kṛcchraṃ tu cared vipraḥ punaḥ punaḥ / ajñātabhuktaśuddhyarthaṃ jñātasya tu viśeṣataḥ // ### [2.33.44](https://indike.org/pramana/in.purana.kurma.2.33.44) vrātyānāṃ yajanaṃ kṛtvā pareṣāmantyakarma ca / abhicāramahīnaṃ ca tribhiḥ kṛcchrairviśuddhyati // ### [2.33.45](https://indike.org/pramana/in.purana.kurma.2.33.45) brāhmaṇādihatānāṃ tu kṛtvā dāhādikāḥ kriyāḥ / gomūtrayāvakāhāraḥ prājāpatyena śuddhyati // ### [2.33.46](https://indike.org/pramana/in.purana.kurma.2.33.46) tailābhyakto 'thavā kuryād yadi mūtrapurīṣake / ahorātreṇa śuddhyeta śmaśrukarma ca maithunam // ### [2.33.47](https://indike.org/pramana/in.purana.kurma.2.33.47) ekāhena vivāhāgniṃ parihārya dvijottamaḥ / trirātreṇa viśaddhyeta trirātrāt ṣaḍahaṃ punaḥ // ### [2.33.48](https://indike.org/pramana/in.purana.kurma.2.33.48) daśāhaṃ dvādaśāhaṃ vā parihārya pramādataḥ / kṛcchraṃ cāndrāyaṇaṃ kuryāt tatpāpasyāpanuttaye // ### [2.33.49](https://indike.org/pramana/in.purana.kurma.2.33.49) patitād dravyamādāya tadutsargeṇa śuddhyati / caret sāṃtapanaṃ kṛcchramityāha bhagavān prabhuḥ // ### [2.33.50](https://indike.org/pramana/in.purana.kurma.2.33.50) anāśakanivṛttāstu pravrajyāvasitāstathā / careyustrīṇi kṛcchrāṇi trīṇi cāndrāyaṇāni ca // ### [2.33.51](https://indike.org/pramana/in.purana.kurma.2.33.51) punaśca jātakarmādisaṃkāraiḥ saṃskṛtā dvijāḥ / śuddhyeyustad vrataṃ samyak careyurdharmavardhanāḥ // ### [2.33.52](https://indike.org/pramana/in.purana.kurma.2.33.52) anupāsitasaṃdhyastu tadaharyāpako vaset / anaśnan saṃyatamanā rātrau ced rātrimeva hi // ### [2.33.53](https://indike.org/pramana/in.purana.kurma.2.33.53) akṛtvā samidādhānaṃ śuciḥ snātvā samāhitaḥ / gāyatryaṣṭasahasrasya japyaṃ kuryād viśuddhaye // ### [2.33.54](https://indike.org/pramana/in.purana.kurma.2.33.54) upāsīta na cet saṃdhyāṃ gṛhastho 'pi pramādataḥ / snātvā viśuddhyate sadyaḥ pariśrāntastu saṃyamāt // ### [2.33.55](https://indike.org/pramana/in.purana.kurma.2.33.55) vedoditāni nityāni karmāṇi ca vilopya tu / snātakavratalopaṃ tu kṛtvā copavased dinam // ### [2.33.56](https://indike.org/pramana/in.purana.kurma.2.33.56) saṃvatsaraṃ caret kṛcchramagnyutsādī dvijottamaḥ / cāndrāyaṇaṃ cared vrātyo gopradānena śuddhyati // ### [2.33.57](https://indike.org/pramana/in.purana.kurma.2.33.57) nāstikyaṃ yadi kurvota prājāpatyaṃ cared dvijaḥ / devadrohaṃ gurudrohaṃ taptakṛcchreṇa śuddhyati // ### [2.33.58](https://indike.org/pramana/in.purana.kurma.2.33.58) uṣṭrayānaṃ samāruhya kharayānaṃ ca kāmataḥ / trirātreṇa viśuddhyet tu nagno vā praviśejjalam // ### [2.33.59](https://indike.org/pramana/in.purana.kurma.2.33.59) ṣaṣṭhānnakālatāmāsaṃ saṃhitājapa eva ca / homāśca śākalā nityamapāṅktānāṃ viśodhanam // ### [2.33.60](https://indike.org/pramana/in.purana.kurma.2.33.60) nīlaṃ raktaṃ vasitvā ca brāhmaṇo vastrameva hi / ahorātroṣitaḥ snātaḥ pañcagavyena śuddhyati // ### [2.33.61](https://indike.org/pramana/in.purana.kurma.2.33.61) vedadharmapurāṇānāṃ caṇḍālasya tu bhāṣaṇe / cāndrāyaṇena śuddhiḥ syānna hyanyā tasya niṣkṛtiḥ // ### [2.33.62](https://indike.org/pramana/in.purana.kurma.2.33.62) udbandhanādinihataṃ saṃspṛśya brāhmaṇaḥ kvacit / cāndrāyaṇena śuddhiḥ syāt prājāpatyena vā punaḥ // ### [2.33.63](https://indike.org/pramana/in.purana.kurma.2.33.63) ucchiṣṭo yadyanācāntaścāṇḍālādīn spṛśed dvijaḥ / pramādād vai japet snātvā gāyatryaṣṭasahasrakam // ### [2.33.64](https://indike.org/pramana/in.purana.kurma.2.33.64) drupadānāṃ śataṃ vāpi brahmacārī samāhitaḥ / trirātropoṣitaḥ samyak pañcagavyena śuddhyati // ### [2.33.65](https://indike.org/pramana/in.purana.kurma.2.33.65) caṇḍālapatitādīṃstu kāmād yaḥ saṃspṛśed dvijaḥ / ucchiṣṭastatra kurvota prājāpatyaṃ viśuddhaye // ### [2.33.66](https://indike.org/pramana/in.purana.kurma.2.33.66) cāṇḍālasūtakaśavāṃstathā nārīṃ rajasvalām / spṛṣṭvā snāyād viśuddhyarthaṃ tatspṛṣṭaṃ patitiṃ tathā // ### [2.33.67](https://indike.org/pramana/in.purana.kurma.2.33.67) cāṇḍālasūtakaśavaiḥ saṃspṛṣṭaṃ saṃspṛśed yadi / pramādāt tata ācamya japaṃ kuryāt samāhitaḥ // ### [2.33.68](https://indike.org/pramana/in.purana.kurma.2.33.68) tat spṛṣṭasparśinaṃ spṛṣṭvā buddhipūrvaṃ dvijottamaḥ / ācamet tad viśuddhyarthaṃ prāha devaḥ pitāmahaḥ // ### [2.33.69](https://indike.org/pramana/in.purana.kurma.2.33.69) bhuñjānasya tu viprasya kadācit saṃstraved gudam / kṛtvā śaucaṃ tataḥ snāyādupoṣya juhuyād ghṛtam // ### [2.33.70](https://indike.org/pramana/in.purana.kurma.2.33.70) cāṇḍālāntyaśavaṃ spṛṣṭvā kṛcchraṃ kuryād viśuddhaye / spṛṣṭvābhyaktastvasaṃspṛśyamahorātreṇa śuddhyati // ### [2.33.71](https://indike.org/pramana/in.purana.kurma.2.33.71) surāṃ spṛṣṭvā dvijaḥ kuryāt prāṇāyāmatrayaṃ śuciḥ / palāṇḍuṃ laśunaṃ caiva ghṛtaṃ prāśya tataḥ śuciḥ // ### [2.33.72](https://indike.org/pramana/in.purana.kurma.2.33.72) brāhmaṇastu śunā daṣṭastryahaṃ sāyaṃ payaḥ pibet / nābherūrdhvaṃ tu daṣṭasya tadeva dviguṇaṃ bhavet // ### [2.33.73](https://indike.org/pramana/in.purana.kurma.2.33.73) syādetat triguṇaṃ bāhvormūrdhni ca syāccaturguṇam / snātvā japed vā sāvitrīṃ śvabhirdaṣṭo dvijottamaḥ // ### [2.33.74](https://indike.org/pramana/in.purana.kurma.2.33.74) anirvartya mahāyajñān yo bhuṅkte tu dvijottamaḥ / anāturaḥ sati dhane kṛcchrārdhena sa śuddhyati // ### [2.33.75](https://indike.org/pramana/in.purana.kurma.2.33.75) āhitāgnirupasthānaṃ na kuryād yastu parvaṇi / ṛtau na gacched bhāryāṃ vā so 'pi kṛcchrārdhamācaret // ### [2.33.76](https://indike.org/pramana/in.purana.kurma.2.33.76) vinādbhirapsu nāpyārtaḥ śarīraṃ sanniveśya ca / sacailo jalamāplutya gāmālabhya viśuddhyati // ### [2.33.77](https://indike.org/pramana/in.purana.kurma.2.33.77) buddhipūrvaṃ tvabhyudito japedantarjale dvijaḥ / gāyatryaṣṭasahasraṃ tu tryahaṃ copavased vratī // ### [2.33.78](https://indike.org/pramana/in.purana.kurma.2.33.78) anugamyecchayā śūdraṃ pretībhūtaṃ dvijottamaḥ / gāyatryaṣṭasahasraṃ ca japyaṃ kuryānnadīṣu ca // ### [2.33.79](https://indike.org/pramana/in.purana.kurma.2.33.79) kṛtvā tu śapathaṃ vipro viprasya vadhasaṃyutam / mṛṣaiva yāvakānnena kuryāccāndrāyaṇaṃ vratam // ### [2.33.80](https://indike.org/pramana/in.purana.kurma.2.33.80) paṅktyāṃ viṣamadānaṃ tu kṛtvā kṛcchreṇa śuddhyati / chāyāṃ śvapākasyāruhya snātvā saṃprāśayed ghṛtam // ### [2.33.81](https://indike.org/pramana/in.purana.kurma.2.33.81) īkṣedādityamaśucirdṛṣṭvāgniṃ candrameva vā / mānuṣaṃ cāsthi saṃspṛśya snānaṃ kṛtvā viśuddhyati // ### [2.33.82](https://indike.org/pramana/in.purana.kurma.2.33.82) kṛtvā tu mithyādhyayanaṃ cared bhaikṣaṃ tu vatsaram / kṛtaghno brāhmaṇagṛhe pañca saṃvatsaraṃ vratī // ### [2.33.83](https://indike.org/pramana/in.purana.kurma.2.33.83) huṅkāraṃ brāhmaṇasyoktvā tvaṅkāraṃ ca garīyasaḥ / snātvānaśnannahaḥ śeṣaṃ praṇipatya prasādayet // ### [2.33.84](https://indike.org/pramana/in.purana.kurma.2.33.84) tāḍayitvā tṛṇenāpi kaṇṭhaṃ baddhvāpi vāsasā / vivāde vāpi nirjitya praṇipatya prasādayet // ### [2.33.85](https://indike.org/pramana/in.purana.kurma.2.33.85) avagūrya caret kṛcchramatikṛcchraṃ nipātane / kṛcchrātikṛcchrau kurvota viprasyotpādya śoṇitam // ### [2.33.86](https://indike.org/pramana/in.purana.kurma.2.33.86) gurorākrośamanṛtaṃ kṛtvā kuryād viśodhanam / ekarātraṃ trirātraṃ vā tatpāpasyāpanuttaye // ### [2.33.87](https://indike.org/pramana/in.purana.kurma.2.33.87) devarṣoṇāmabhimukhaṃ ṣṭhīvanākrośane kṛte / ulmukena dahejjihvāṃ dātavyaṃ ca hiraṇyakam // ### [2.33.88](https://indike.org/pramana/in.purana.kurma.2.33.88) devodyāne tu yaḥ kuryānmūtroccāraṃ sakṛd dvijaḥ / chindyācchiśnaṃ tu śuddhyarthaṃ careccāndrāyaṇaṃ tu vā // ### [2.33.89](https://indike.org/pramana/in.purana.kurma.2.33.89) devatāyatane mūtraṃ kṛtvā mohād dvijottamaḥ / śiśnasyotkartanaṃ kṛtvā cāndrāyaṇamathācaret // ### [2.33.90](https://indike.org/pramana/in.purana.kurma.2.33.90) devatānāmṛṣīṇāṃ ca devānāṃ caiva kutsanam / kṛtvā samyak prakurvota prājāpatyaṃ dvijottamaḥ // ### [2.33.91](https://indike.org/pramana/in.purana.kurma.2.33.91) taistu saṃbhāṣaṇaṃ kṛtvā snātvā devān samarcayet / dṛṣṭvā vīkṣeta bhāsvantaṃ smvatvā viśeśvaraṃ smaret // ### [2.33.92](https://indike.org/pramana/in.purana.kurma.2.33.92) yaḥ sarvabhūtādhipatiṃ viśveśānaṃ vinindati / na tasya niṣkṛtiḥ śakyā kartuṃ varṣaśatairapi // ### [2.33.93](https://indike.org/pramana/in.purana.kurma.2.33.93) cāndrāyaṇaṃ caret pūrvaṃ kṛcchraṃ caivātikṛcchrakam / prapannaḥ śaraṇaṃ devaṃ tasmāt pāpād vimucyate // ### [2.33.94](https://indike.org/pramana/in.purana.kurma.2.33.94) sarvasvadānaṃ vidhivat sarvapāpaviśodhanam / cāndrāyaṇaṃ cavidhinā kṛcchraṃ caivātikṛcchrakam // ### [2.33.95](https://indike.org/pramana/in.purana.kurma.2.33.95) puṇyakṣetrābhigamanaṃ sarvapāpavināśanam / devatābhyarcanaṃ nṝṇāmaśeṣāghavināśanam // ### [2.33.96](https://indike.org/pramana/in.purana.kurma.2.33.96) amāvasyāṃ tithiṃ prāpya yaḥ samārādhayecchivam / brāhmaṇān bhojayitvā tu sarvapāpaiḥ pramucyate // ### [2.33.97](https://indike.org/pramana/in.purana.kurma.2.33.97) kṛṣṇāṣṭamyāṃ mahādevaṃ tathā kṛṣṇacaturdaśīm / saṃpūjya brāhmaṇamukhe sarvapāpaiḥ pramucyate // ### [2.33.98](https://indike.org/pramana/in.purana.kurma.2.33.98) trayodaśyāṃ tathā rātrau sopahāraṃ trilocanam / dṛṣṭveśaṃ prathame yāme mucyate sarvapātakaiḥ // ### [2.33.99](https://indike.org/pramana/in.purana.kurma.2.33.99) upoṣitaścaturdaśyāṃ kṛṣṇapakṣe samāhitaḥ / yamāca dharmarājāya mṛtyave cāntakāya ca // ### [2.33.100](https://indike.org/pramana/in.purana.kurma.2.33.100) vaivasvatāya kālāya sarvabhūtakṣayāya ca / pratyekaṃ tilasaṃyuktān dadyāt saptodakāñjalīn / snātvā nadyāṃ tu pūrvāhne mucyate sarvapātakaiḥ // ### [2.33.101](https://indike.org/pramana/in.purana.kurma.2.33.101) brahmacaryamadhaḥ śayyāmupavāsaṃ dvijārcanam / vrateṣveteṣu kurvota śāntaḥ saṃyatamānasaḥ // ### [2.33.102](https://indike.org/pramana/in.purana.kurma.2.33.102) amāvasyāyāṃ brahmāṇaṃ samuddiśya pitāmaham / brāhmaṇāṃstrīn samabhyarcya mucyate sarvapātakaiḥ // ### [2.33.103](https://indike.org/pramana/in.purana.kurma.2.33.103) ṣaṣṭhyāmupoṣito devaṃ śuklapakṣe samāhitaḥ / saptamyāmarcayed bhānuṃ mucyate sarvapātakaiḥ // ### [2.33.104](https://indike.org/pramana/in.purana.kurma.2.33.104) bharaṇyāṃ ca caturthyāṃ ca śanaiścaradine yamam / pūjayet saptajanmotthairmucyate pātakairnaraḥ // ### [2.33.105](https://indike.org/pramana/in.purana.kurma.2.33.105) ekādaśyāṃ nirāhāraḥ samabhyarcya janārdanam / dvādaśyāṃ śuklapakṣasya mahāpāpaiḥ pramucyate // ### [2.33.106](https://indike.org/pramana/in.purana.kurma.2.33.106) tapo japastīrthasevā devabrāhmaṇapūjanam / grahaṇādiṣu kāleṣu mahāpātakaśodhanam // ### [2.33.107](https://indike.org/pramana/in.purana.kurma.2.33.107) yaḥ sarvapāpayukto 'pi puṇyatīrtheṣu mānavaḥ / niyamena tyajet prāṇān sa mucyet sarvapātakaiḥ // ### [2.33.108](https://indike.org/pramana/in.purana.kurma.2.33.108) brahmaghnaṃ vā kṛtaghnaṃ vā mahāpātakadūṣitam / bhartāramuddharennārī praviṣṭā saha pāvakam // ### [2.33.109](https://indike.org/pramana/in.purana.kurma.2.33.109) etadeva paraṃ strīṇāṃ prāyaścittaṃ vidurbudhāḥ / sarvapāpasamudbhūtau nātra kāryā vicāraṇā // ### [2.33.110](https://indike.org/pramana/in.purana.kurma.2.33.110) pativratā tu yā nārī bhartṛśuśrūṣaṇotsukā / na tasyā vidyate pāpamiha loke paratra ca // ### [2.33.111](https://indike.org/pramana/in.purana.kurma.2.33.111) pativratā dharmaratā rudrāṇyeva na saṃśayaḥ / nāsyāḥ parābhavaṃ kartuṃ śaknotīha janaḥ kvacit // ### [2.33.112](https://indike.org/pramana/in.purana.kurma.2.33.112) yathā rāmasya subhagā sītā trailokyaviśrutā / patnī dāśaratherdevī vijigye rākṣaseśvaram // ### [2.33.113](https://indike.org/pramana/in.purana.kurma.2.33.113) rāmasya bhāryāṃ vimalāṃ rāvaṇo rākṣaseśvaraḥ / sītāṃ viśālanayanāṃ cakame kālacoditaḥ // ### [2.33.114](https://indike.org/pramana/in.purana.kurma.2.33.114) gṛhītvā māyayā veṣaṃ carantīṃ vijane vane / samāhartuṃ matiṃ cakre tāpasaḥ kila kāminīm // ### [2.33.115](https://indike.org/pramana/in.purana.kurma.2.33.115) vijñāya sā ca tadbhāvaṃ smṛtvā dāśarathiṃ patim / jagāma śaraṇaṃ vahnimāvasathyaṃ śucismitā // ### [2.33.116](https://indike.org/pramana/in.purana.kurma.2.33.116) upatasthe mahāyogaṃ sarvadoṣavināśanam / kṛtāñjalī rāmapatnī śākṣāt patimivācyutam // ### [2.33.117](https://indike.org/pramana/in.purana.kurma.2.33.117) namasyāmi mahāyogaṃ kṛtāntaṃ gahanaṃ param / dāhakaṃ sarvabhūtānāmīśānaṃ kālarūpiṇam // ### [2.33.118](https://indike.org/pramana/in.purana.kurma.2.33.118) namasye pāvakaṃ devaṃ sākṣiṇaṃ viśvatomukham / ātmānaṃ dīptavapuṣaṃ sarvabhūtahṛdī sthitam // ### [2.33.119](https://indike.org/pramana/in.purana.kurma.2.33.119) prapadye śaraṇaṃ vahniṃ brahmaṇyaṃ brahmarūpiṇam / bhūteśaṃ kṛttivasanaṃ śaraṇyaṃ paramaṃ padam // ### [2.33.120](https://indike.org/pramana/in.purana.kurma.2.33.120) oṃ prapadye jaganmūrtiṃ prabhavaṃ sarvatejasām / mahāyogeśvaraṃ vahnimādityaṃ parameṣṭhinam // ### [2.33.121](https://indike.org/pramana/in.purana.kurma.2.33.121) prapadye śaraṇaṃ rudraṃ mahāgrāsaṃ triśūlinam / kālāgniṃ yogināmīśaṃ bhogamokṣaphalapradam // ### [2.33.122](https://indike.org/pramana/in.purana.kurma.2.33.122) prapadye tvāṃ virūpākṣaṃ bhurbhuvaḥ svaḥ svarūpiṇam / hiraṇyamaye gṛhe guptaṃ mahāntamamitaujasam // ### [2.33.123](https://indike.org/pramana/in.purana.kurma.2.33.123) vaiśvānaraṃ prapadye 'haṃ sarvabhūteṣvavasthitam / havyakavyavahaṃ devaṃ prapadye vahnimīśvaram // ### [2.33.124](https://indike.org/pramana/in.purana.kurma.2.33.124) prapadye tatparaṃ tattvaṃ vareṇyaṃ savituḥ svayam / bhargamagniparaṃ jyotī rakṣa māṃ havyavāhana // ### [2.33.125](https://indike.org/pramana/in.purana.kurma.2.33.125) iti vahnyaṣṭakaṃ japtvā rāmapatnī yaśasvinī / dhyāyantī manasā tasthau rāmamunmīlitekṣaṇā // ### [2.33.126](https://indike.org/pramana/in.purana.kurma.2.33.126) athāvasathyād bhagavān havyavāho maheśvaraḥ / āvirāsīt sudīptātmā tejasā pradahanniva // ### [2.33.127](https://indike.org/pramana/in.purana.kurma.2.33.127) svaṣṭvā māyāmayīṃ sītāṃ sa rāvaṇavadhepsayā / sītāmādāya dharmiṣṭhāṃ pāvako 'ntaradhīyata // ### [2.33.128](https://indike.org/pramana/in.purana.kurma.2.33.128) tāṃ dṛṣṭvā tādṛśīṃ sītāṃ rāvaṇo rākṣaseśvaraḥ / samādāya yayau laṅkāṃ sāgarāntarasaṃsthitām // ### [2.33.129](https://indike.org/pramana/in.purana.kurma.2.33.129) kṛtvātha rāvaṇavadhaṃ rāmo lakṣmaṇasaṃyutaḥ / masādāyābhavat sītāṃ śaṅkākulitamānasaḥ // ### [2.33.130](https://indike.org/pramana/in.purana.kurma.2.33.130) sā pratyayāya bhūtānāṃ sītā māyāmīya punaḥ / viveśa pāvakaṃ dīptaṃ dadāha jvalano 'pi tām // ### [2.33.131](https://indike.org/pramana/in.purana.kurma.2.33.131) dagdhvā māyāmayīṃ sītāṃ bhagavānugradīdhitiḥ / rāmāyādarśayat sītāṃ pāvako 'bhūt surapriyaḥ // ### [2.33.132](https://indike.org/pramana/in.purana.kurma.2.33.132) pragṛhya bhartuścaraṇau karābhyāṃ sā sumadhyamā / cakāra praṇatiṃ bhūmau rāmāya janakātmajā // ### [2.33.133](https://indike.org/pramana/in.purana.kurma.2.33.133) dṛṣṭvā hṛṣṭamanā rāmo vismayākulalocanaḥ / nanāma vahniṃ sirasā toṣayāmāsa rāghavaḥ // ### [2.33.134](https://indike.org/pramana/in.purana.kurma.2.33.134) uvāca vahnerbhagavān kimeṣā varavarṇinī / dagdhā bhagavatā pūrvaṃ dṛṣṭā matpārśvamāgatā // ### [2.33.135](https://indike.org/pramana/in.purana.kurma.2.33.135) tamāha devo lokānāṃ dāhako havyavāhanaḥ / yathāvṛttaṃ dāśarathiṃ bhūtānāmeva sannidhau // ### [2.33.136](https://indike.org/pramana/in.purana.kurma.2.33.136) iyaṃ sā mithileśena pārvatīṃ rudravallabhām / ārādhya labdhā tapasā devyāścātyantavallabhā // ### [2.33.137](https://indike.org/pramana/in.purana.kurma.2.33.137) bhartuḥ śuśrūṣaṇopetā suśīleyaṃ pativratā / bhavānīpārśvamānītā mayā rāvaṇakāmitā // ### [2.33.138](https://indike.org/pramana/in.purana.kurma.2.33.138) yā nītā rākṣaseśena sītā bhagavatāhṛtā / mayā māyāmayī sṛṣṭā rāvaṇasya vadhāya sā // ### [2.33.139](https://indike.org/pramana/in.purana.kurma.2.33.139) tadarthaṃ bhavatā duṣṭo rāvaṇo rākṣaseśvaraḥ / mayopasaṃhṛtā caiva hato lokavināśanaḥ // ### [2.33.140](https://indike.org/pramana/in.purana.kurma.2.33.140) gṛhāṇa vimalāmenāṃ jānakīṃ vacanānmama / paśya nārāyaṇaṃ devaṃ svātmānaṃ prabhavāvyayam // ### [2.33.141](https://indike.org/pramana/in.purana.kurma.2.33.141) ityuktvā bhagavāṃścaṇḍo viścārcirviśvatomukhaḥ / mānito rāghaveṇāgnirbhūtaiścāntaradhīyata // ### [2.33.142](https://indike.org/pramana/in.purana.kurma.2.33.142) etate pativratānāṃ vaiṃ māhātmyaṃ kathitaṃ mayā / strīṇāṃ sarvāghaśamanaṃ prāyaścittamidaṃ smṛtam // ### [2.33.143](https://indike.org/pramana/in.purana.kurma.2.33.143) aśeṣapāpayuktastu puruṣo 'pi susaṃyataḥ / svadehaṃ puṇyatīrtheṣu tyaktvā mucyeta kilbiṣāt // ### [2.33.144](https://indike.org/pramana/in.purana.kurma.2.33.144) pṛthivyāṃ sarvatīrtheṣu snātvā puṇyeṣu vā dvijaḥ / mucyate pātakaiḥ sarvaiḥ samastairapi pūruṣaḥ // ### [2.33.145](https://indike.org/pramana/in.purana.kurma.2.33.145) vyāsa uvāca ityeṣa mānavo dharmo yuṣmākaṃ kathito mayā / maheśārādhanārthāya jñānayogaṃ ca śāśvatam // ### [2.33.146](https://indike.org/pramana/in.purana.kurma.2.33.146) yo 'nena vidhinā yuktaṃ jñānayogaṃ samācaret / sa paśyati mahādevaṃ nānyaḥ kalpaśatairapi // ### [2.33.147](https://indike.org/pramana/in.purana.kurma.2.33.147) sthāpayed yaḥ paraṃ dharmaṃ jñānaṃ tatpārameśvaram / na tasmādadhiko loke sa yogī paramo mataḥ // ### [2.33.148](https://indike.org/pramana/in.purana.kurma.2.33.148) ya saṃsthāpayituṃ śakto na kuryānmohito janaḥ / sa yogayukto 'pi munirnātyarthaṃ bhagavatpriyaḥ // ### [2.33.149](https://indike.org/pramana/in.purana.kurma.2.33.149) tasmāt sadaiva dātavyaṃ brāhmaṇeṣu viśeṣataḥ / dharmayukteṣu śānteṣu śraddhayā cānviteṣu vai // ### [2.33.150](https://indike.org/pramana/in.purana.kurma.2.33.150) yaḥ paṭhed bhavatāṃ nityaṃ saṃvādaṃ mama caiva hi / sarvapāpavinirmukto gaccheta paramāṃ gatim // ### [2.33.151](https://indike.org/pramana/in.purana.kurma.2.33.151) śrāddhe vā daivike kārye brāhmaṇānāṃ ca sannidhau / paṭheta nityaṃ sumanāḥ śrotavyaṃ ca dvijātibhiḥ // ### [2.33.152](https://indike.org/pramana/in.purana.kurma.2.33.152) yor'thaṃ vicārya yuktātmā śrāvayed brāhmaṇān śucīn / sa doṣakañcukaṃ tyaktvā yāti devaṃ maheśvaram // ### [2.33.153](https://indike.org/pramana/in.purana.kurma.2.33.153) etāvaduktvā bhagavān vyāsaḥ satyavatīsutaḥ / samāśvāsya munīn sūtaṃ jagāma ca yathāgatam // ### [2.33.153.p1](https://indike.org/pramana/in.purana.kurma.2.33.153.p1) itī śrīkūrmapurāṇe ṣaṭsāhastryāṃ saṃhitāyāmuparivibhāge trayastriśo 'dhyāyaḥ ## Linked texts (14) - [Ṣaṭsandarbha](https://indike.org/pramana/in.sampradaya.vaisnava.gaudiya.siddhanta.satsandarbha.1.21.17) — Jīva Gosvāmin 1555, Sanskrit - [Garuḍapurāṇa](https://indike.org/pramana/in.purana.garuda.1.52.16) — Vyāsa, Sanskrit - [Mānava Dharmaśāstra](https://indike.org/pramana/in.niti.dharma.manu.11.164) — Manu & Bhṛgu, Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.169.29) — Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.52.7) — Viṣṇu, Sanskrit - [Mudgalapurāṇa](https://indike.org/pramana/in.purana.upa.surya.mudgala.3.21.36) — Sanskrit - [Śaṅkhasmṛti](https://indike.org/pramana/in.niti.dharma.upasmrti.sankhalikhita.sankha.17.24) — Sanskrit - [Prāyaścittamayūkha](https://indike.org/pramana/in.niti.dharma.prayascitta.bhatta.prayascittamayukha.12.57) — Nīlakaṇṭha Dīkṣita, Sanskrit - [Smṛtimuktāphala](https://indike.org/pramana/in.niti.dharma.nibandha.mahanibandha.smrtimuktaphala.7.123.5) — Vaidyanātha Dīkṣita 1575, Sanskrit - [Madanapārijāta](https://indike.org/pramana/in.niti.dharma.nibandha.mahanibandha.madanaparijata.15.4.16) — Viśveśvarabhaṭṭa, Sanskrit - [Smṛtiviveka](https://indike.org/pramana/in.niti.dharma.nibandha.mahanibandha.smrtiviveka.15.20) — Śūlapāṇi, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.30.79) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.30.79) — Basava, Sanskrit - [Saṃskāraratnamālā (Gopīnātha Dīkṣita Oka)](https://indike.org/pramana/in.niti.dharma.samskara.samskararatnamala.49.p1.8) — Gopīnātha Dīkṣita Oka, Sanskrit --- Source: [https://indike.org/pramana/in.purana.kurma.2.33](https://indike.org/pramana/in.purana.kurma.2.33) · Pramāṇa