[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.34 # Kurmapurana 2.34: catustriṃśo'dhyāyaḥ Kūrmapurāṇa 2.34 - **Language:** Sanskrit ## Contents - [2.34.76](https://indike.org/pramana/in.purana.kurma.2.34.76) — 1 part ### catustriṃśo'dhyāyaḥ ### [2.34.1](https://indike.org/pramana/in.purana.kurma.2.34.1) ṛṣaya ūcuḥ tīrthāni yāni loke 'smin viśrutāni māhanti ca / tāni tvaṃ kathayāsmākaṃ romaharṣaṇa sāṃpratam // ### [2.34.2](https://indike.org/pramana/in.purana.kurma.2.34.2) romaharṣaṇa uvāca śṛṇudhvaṃ kathayiṣye 'haṃ tīrthāni vividhāni ca / kathitāni purāṇeṣu munibhirbrahmavādibhiḥ // ### [2.34.3](https://indike.org/pramana/in.purana.kurma.2.34.3) yatra snānaṃ japo homaḥ śrāddhadānādikaṃ kṛtam / ekaikaśo muniśreṣṭhāḥ punātyāsaptamaṃ kulam // ### [2.34.4](https://indike.org/pramana/in.purana.kurma.2.34.4) pañcayojanavistīrṇaṃ brahmaṇaḥ parameṣṭhinaḥ / prayāgaṃ prathitaṃ tīrthaṃ tasya māhātmyamīritam // ### [2.34.5](https://indike.org/pramana/in.purana.kurma.2.34.5) anyacca tīrthapravaraṃ kurūṇāṃ devavanditam / ṛṣīṇāmāśramairjuṣṭaṃ sarvapāpaviśodhanam // ### [2.34.6](https://indike.org/pramana/in.purana.kurma.2.34.6) tatra snātvā viśuddhātmā dambhamātsaryavarjitaḥ / dadāti yatkiñcidapi punātyubhayataḥ kulam // ### [2.34.7](https://indike.org/pramana/in.purana.kurma.2.34.7) gayātīrthaṃ paraṃ guhyaṃ pitṝṇāṃ cāti vallabham / kṛtvā piṇḍapradānaṃ tu na bhūyo jāyate naraḥ // ### [2.34.8](https://indike.org/pramana/in.purana.kurma.2.34.8) sakṛd gayābhigamanaṃ kṛtvā piṇḍaṃ dadāti yaḥ / tāritāḥ pitarastena yāsyanti paramāṃ gatim // ### [2.34.9](https://indike.org/pramana/in.purana.kurma.2.34.9) tatra lokahitārthāya rudreṇa paramātmanā / śilātale padaṃ nyastaṃ tatra pitṝn prasādayet // ### [2.34.10](https://indike.org/pramana/in.purana.kurma.2.34.10) gayābhigamanaṃ kartuṃ yaḥ śakto nābhigacchati / śocanti pitarastaṃ vai vṛthā tasya pariśramaḥ // ### [2.34.11](https://indike.org/pramana/in.purana.kurma.2.34.11) gāyanti pitaro gāthāḥ kīrtayanti maharṣayaḥ / gayāṃyāsyatiyaḥ kaścit so 'smān saṃtārayiṣyati // ### [2.34.12](https://indike.org/pramana/in.purana.kurma.2.34.12) yadi syāt pātakopetaḥ svadharmarativarjitaḥ / gayāṃ yāsyati vaṃśyo yaḥ so 'smān saṃtārayiṣyati // ### [2.34.13](https://indike.org/pramana/in.purana.kurma.2.34.13) eṣṭavyā bahavaḥ putrāḥ śīlavanto guṇānvitāḥ / teṣāṃ tu samavetānāṃ yadyeko 'pi gayāṃ vrajet // ### [2.34.14](https://indike.org/pramana/in.purana.kurma.2.34.14) tasmāt sarvaprayatnena brāhmaṇastu viśeṣataḥ / pradadyād vidhivat piṇḍān gayāṃ gatvā samāhitaḥ // ### [2.34.15](https://indike.org/pramana/in.purana.kurma.2.34.15) dhanyāstu khalu te martyā gayāyāṃ piṇḍadāyinaḥ / kulānyubhayataḥ sapta samuddhṛtyāpnuyāt param // ### [2.34.16](https://indike.org/pramana/in.purana.kurma.2.34.16) anyacca tīrthapravaraṃ siddhāvāsamudāhṛtam / prabhāsamiti vikhyātaṃ yatrāste bhagavān bhavaḥ // ### [2.34.17](https://indike.org/pramana/in.purana.kurma.2.34.17) tatra snānaṃ tapaḥ śrāddhaṃ brāhmaṇānāṃ ca pūjanam / kṛtvā lokamavāpnoti brahmaṇo 'kṣayyamuttamam // ### [2.34.18](https://indike.org/pramana/in.purana.kurma.2.34.18) tīrthaṃ traiyambakaṃ nāma sarvadevanamaskṛtam / pūjayitvā tatra rudraṃ jyotiṣṭomaphalaṃ labhet // ### [2.34.19](https://indike.org/pramana/in.purana.kurma.2.34.19) suvarṇākṣaṃ mahādevaṃ samabhyarcya kapardinam / brāhmaṇān pūjayitvā tu gāṇapatyaṃ labhed dhruvam // ### [2.34.20](https://indike.org/pramana/in.purana.kurma.2.34.20) someśvaraṃ tīrthavaraṃ rudrasya parameṣṭhinaḥ / sarvavyādhiharaṃ puṇyaṃ rudrasālokyakāraṇam // ### [2.34.21](https://indike.org/pramana/in.purana.kurma.2.34.21) tīrthānāṃ paramaṃ tīrthaṃ vijayaṃ nāma śobhanam / tatra liṅgaṃ maheśasya vijayaṃ nāma viśrutam // ### [2.34.22](https://indike.org/pramana/in.purana.kurma.2.34.22) ṣaṇmāsān niyatāhāro brahmacārī samāhitaḥ / uṣitvā tatra viprendrā yāsyanti paramaṃ padam // ### [2.34.23](https://indike.org/pramana/in.purana.kurma.2.34.23) anyacca tīrthapravaraṃ pūrvadeśe suśobhanam / ekāmraṃ devadevasya gāṇapatyaphalapradam // ### [2.34.24](https://indike.org/pramana/in.purana.kurma.2.34.24) dattvātra śivabhaktānāṃ kiñcicchaśvanmahīṃ śubhām / sārvabhaumo bhaved rājā mumukṣurmokṣamāpnuyāt // ### [2.34.25](https://indike.org/pramana/in.purana.kurma.2.34.25) mahānadījalaṃ puṇyaṃ sarvapāpavināśanam / grahaṇe samupaspṛśya mucyate sarvapātakaiḥ // ### [2.34.26](https://indike.org/pramana/in.purana.kurma.2.34.26) anyā ca virajā nāma nadī trailokyaviśrutā / tasyāṃ snātvā naro viprā brahmaloke mahīyate // ### [2.34.27](https://indike.org/pramana/in.purana.kurma.2.34.27) tīrthaṃ nārāyaṇasyānyannāmnā tu puruṣottamam / tatra nārāyaṇaḥ śrīmānāste paramapūruṣaḥ // ### [2.34.28](https://indike.org/pramana/in.purana.kurma.2.34.28) pūjayitvā paraṃ viṣṇuṃ snātvā tatra dvijottamaḥ / brāhmaṇān pūjayitvā tu viṣṇulokamavāpnuyāt // ### [2.34.29](https://indike.org/pramana/in.purana.kurma.2.34.29) tīrthānāṃ paramaṃ tīrthaṃ gokarṇaṃ nāma viśrutam / sarvapāpaharaṃ śaṃbhornivāsaḥ parameṣṭhinaḥ // ### [2.34.30](https://indike.org/pramana/in.purana.kurma.2.34.30) dṛṣṭvā liṃṅgaṃ tu devasya gokarṇeśvaramuttamam / īpsitāṃllabhate kāmān rudrasya dayito bhavet // ### [2.34.31](https://indike.org/pramana/in.purana.kurma.2.34.31) uttaraṃ cāpi gokarṇaṃ liṅgaṃ devasya śūlinaḥ / mahādevasyārcayitvā śivasāyujyamāpnuyāt // ### [2.34.32](https://indike.org/pramana/in.purana.kurma.2.34.32) tatra devo mahādevaḥ sthāṇurityabhiviśrutaḥ / taṃ dṛṣṭvā sarvapāpebhyo mucyate tatkṣaṇānnaraḥ // ### [2.34.33](https://indike.org/pramana/in.purana.kurma.2.34.33) anyat kubjāmramatulaṃ sthānaṃ viṣṇormahātmanaḥ / saṃpūjya puruṣaṃ viṣṇuṃ śvetadvīpe mahīyate // ### [2.34.34](https://indike.org/pramana/in.purana.kurma.2.34.34) yatra nārāyaṇo devo rudreṇa tripurāriṇā / kṛtvā yajñasya mathanaṃ dakṣasya tu visarjitaḥ // ### [2.34.35](https://indike.org/pramana/in.purana.kurma.2.34.35) samantād yojanaṃ kṣetraṃ siddharṣigaṇavanditam / puṇyamāyatanaṃ viṣṇostatrāste puruṣottamaḥ // ### [2.34.36](https://indike.org/pramana/in.purana.kurma.2.34.36) anyat kokāmukhaṃ viṣṇostīrthamadbhutakarmaṇaḥ / mṛto 'tra pātakairmukto viṣṇusārūpyamāpnuyāt // ### [2.34.37](https://indike.org/pramana/in.purana.kurma.2.34.37) śālagrāmaṃ mahātīrthaṃ viṣṇoḥ prītivivardhanam / prāṇāṃstatra narastyaktvā hṛṣīkeṣaṃ prapaśyati // ### [2.34.38](https://indike.org/pramana/in.purana.kurma.2.34.38) aśvatīrthamiti khyātaṃ siddhāvāsaṃ supāvanam / āste hayaśirā nityaṃ tatra nārāyaṇaḥ svayam // ### [2.34.39](https://indike.org/pramana/in.purana.kurma.2.34.39) tīrthaṃ trailokyavikhyātaṃ brahmaṇaḥ parameṣṭhinaḥ / puṣkaraṃ sarvapāpaghnaṃ mṛtānāṃ brahmalokadam // ### [2.34.40](https://indike.org/pramana/in.purana.kurma.2.34.40) manasā saṃsmared yastu puṣkaraṃ vai dvijottamaḥ / pūyate pātakaiḥ sarvaiḥ śakreṇa saha modate // ### [2.34.41](https://indike.org/pramana/in.purana.kurma.2.34.41) tatra devāḥ sagandharvāḥ sayakṣoragarākṣasāḥ / upāsate siddhasaṅghā brahmaṇaṃ padmasaṃbhavam // ### [2.34.42](https://indike.org/pramana/in.purana.kurma.2.34.42) tatra strātvā bhavecchuddho brahmāṇaṃ parameṣṭhinam / pūjayitvā dvijavarān brahmāṇaṃ saṃprapaṣyati // ### [2.34.43](https://indike.org/pramana/in.purana.kurma.2.34.43) tatrābhigamya deveśaṃ puruhūtamaninditam / surūpo jāyate martyaḥ sarvān kāmānavāpnuyāt // ### [2.34.44](https://indike.org/pramana/in.purana.kurma.2.34.44) saptasārasvataṃ tīrthaṃ brahmādyaiḥ sevitaṃ param / pūjayitvā tatra rudramaśvamedhaphalaṃ labhet // ### [2.34.45](https://indike.org/pramana/in.purana.kurma.2.34.45) yatra maṅkaṇako rudraṃ prapannaḥ parameśvaram / ārādhayāmāsa haraṃ pañcakṣaraparāyaṇaḥ // ### [2.34.46](https://indike.org/pramana/in.purana.kurma.2.34.46) namaḥ śivāyeti muniḥ japan pañcākṣaraṃ param / ārādhayāmāsa śivaṃ tapasā govṛṣadhvajam // ### [2.34.47](https://indike.org/pramana/in.purana.kurma.2.34.47) prajajvālātha tapasā munirmaṅkaṇakastadā / nanarta harṣavegena jñātvā rudraṃ samāgatam // ### [2.34.48](https://indike.org/pramana/in.purana.kurma.2.34.48) taṃ prāha bhagavān rudraḥ kimarthaṃ nartitaṃ tvayā / dṛṣṭvāpi devamīśānaṃ nṛtyati sma punaḥ punaḥ // ### [2.34.49](https://indike.org/pramana/in.purana.kurma.2.34.49) so 'nvīkṣya bhagavānīśaḥ sagarvaṃ garvaśāntaye / svakaṃ dehaṃ vidāryāsmai bhasmarāśimadarśayat // ### [2.34.50](https://indike.org/pramana/in.purana.kurma.2.34.50) paśyemaṃ maccharīrotthaṃ bhasmarāśiṃ dvijottama / māhātmyametat tapasastvādṛśo 'nyo 'pi vidyate // ### [2.34.51](https://indike.org/pramana/in.purana.kurma.2.34.51) yat sagarvaṃ hi bhavatā nartitaṃ munipuṅgava / na yuktaṃ tāpasasyaitat tvattopyatrādhiko hyaham // ### [2.34.52](https://indike.org/pramana/in.purana.kurma.2.34.52) ityābhāṣya muniśreṣṭhaṃ sa rudraḥ kila viśvadṛk / āsthāya paramaṃ bhāvaṃ nanarta jagato haraḥ // ### [2.34.53](https://indike.org/pramana/in.purana.kurma.2.34.53) sahasraśīrṣā bhūtvā sahasrākṣaḥ sahasrapāt / daṃṣṭrākarālavadano jvālāmālī bhayaṅkaraḥ // ### [2.34.54](https://indike.org/pramana/in.purana.kurma.2.34.54) so 'nvapaśyadaśeṣasya pārśve tasya triśūlinaḥ / viśālalocanamekāṃ devīṃ cāruvilāsinīm / sūryāyutasamaprakhyāṃ prasannavadanāṃ śivām // ### [2.34.55](https://indike.org/pramana/in.purana.kurma.2.34.55) sasmitaṃ prekṣya viśveśaṃ tiṣṭhantīmamitadyutim / dṛṣṭvā saṃtrastahṛdayo vepamāno munīśvaraḥ / nanāma śirasā rudraṃ rudrādhyāyaṃ japan vaśī // ### [2.34.56](https://indike.org/pramana/in.purana.kurma.2.34.56) prasanno bhagavānīśastryambako bhaktavatsalaḥ / pūrvaveṣaṃ sa jagrāha devī cāntarhitābhavat // ### [2.34.57](https://indike.org/pramana/in.purana.kurma.2.34.57) āliṅgya bhaktaṃ praṇataṃ devadevaḥ svayaṃśivaḥ / na bhetavyaṃ tvayā vatsa prāha kiṃ te dadāmyaham // ### [2.34.58](https://indike.org/pramana/in.purana.kurma.2.34.58) praṇamya mūrdhnā giriśaṃ haraṃ tripurasūdanam / vijñāpayāmāsa tadā hṛṣṭaḥ praṣṭumanā muniḥ // ### [2.34.59](https://indike.org/pramana/in.purana.kurma.2.34.59) namo 'stu te mahādeva maheśvara namo 'stu te / kimetad bhagavadrūpaṃ sughoraṃ viśvatomukham // ### [2.34.60](https://indike.org/pramana/in.purana.kurma.2.34.60) kā ca sā bhagavatpārśve rājamānā vyavasthitā / antarhiteva sahasā sarvamicchāmi veditum // ### [2.34.61](https://indike.org/pramana/in.purana.kurma.2.34.61) ityukte vyājahāramaṃ tathā maṅkaṇakaṃ haraḥ / maheśaḥ svātmano yogaṃ devīṃ ca tripurānalaḥ // ### [2.34.62](https://indike.org/pramana/in.purana.kurma.2.34.62) ahaṃ sahasranayanaḥ sarvātmā sarvatomukhaḥ / dāhakaḥ sarvapāpānāṃ kālaḥ kālakaro haraḥ // ### [2.34.63](https://indike.org/pramana/in.purana.kurma.2.34.63) mayaiva preryate kṛtsnaṃ cetanācetanātmakam / so 'ntaryāmī sa puruṣo hyahaṃ vai puruṣottamaḥ // ### [2.34.64](https://indike.org/pramana/in.purana.kurma.2.34.64) tasya sā paramā māyā prakṛtistriguṇātmikā / procyate munirbhiśaktirjagadyoniḥ sanātanī // ### [2.34.65](https://indike.org/pramana/in.purana.kurma.2.34.65) sa eṣa māyayā viśvaṃ vyāmohayati viśvavit / nārāyaṇaḥ paro 'vyakto māyārūpa iti śrutiḥ // ### [2.34.66](https://indike.org/pramana/in.purana.kurma.2.34.66) evametajjagat sarvaṃ sarvadā sthāpayāmyaham / yojayāmi prakṛtyāhaṃ puruṣaṃ pañcaviṃśakam // ### [2.34.67](https://indike.org/pramana/in.purana.kurma.2.34.67) tathā vai saṃgato devaḥ kūṭasthaḥ sarvago 'malaḥ / sṛjatyaśeṣamevedaṃ svamūrteḥ prakṛterajaḥ // ### [2.34.68](https://indike.org/pramana/in.purana.kurma.2.34.68) sa devo bhagavān brahmā viśvarūpaḥ pitāmahaḥ / tavaitat kathitaṃ samyak straṣṭvatvaṃ paramātmanaḥ // ### [2.34.69](https://indike.org/pramana/in.purana.kurma.2.34.69) eko 'haṃ bhagavān kalo hyanādiścāntakṛd vibhuḥ / samāsthāya paraṃ bhāvaṃ prokto rudro manīṣibhiḥ // ### [2.34.70](https://indike.org/pramana/in.purana.kurma.2.34.70) mama vai sāparā śaktirdevī vidyeti viśrutā / dṛṣṭā hi bhavatā nūnaṃ vidyādehastvahaṃ tataḥ // ### [2.34.71](https://indike.org/pramana/in.purana.kurma.2.34.71) evametāni tattvāni pradhānapuruṣeśvarāḥ / viṣṇurbrahmā ca bhagavān rudraḥ kāla iti śrutiḥ // ### [2.34.72](https://indike.org/pramana/in.purana.kurma.2.34.72) trayametadanādyantaṃ brahmaṇyeva vyavasthitam / tadātmakaṃ tadavyaktaṃ tadakṣaramiti śrutiḥ // ### [2.34.73](https://indike.org/pramana/in.purana.kurma.2.34.73) ātmānandaparaṃ tattvaṃ cinmātraṃ paramaṃ padam / ākāśaṃ niṣkalaṃ brahma tasmādanyanna vidyate // ### [2.34.74](https://indike.org/pramana/in.purana.kurma.2.34.74) evaṃ vijñāya bhavatā bhaktiyogāśrayeṇa tu / saṃpūjyo vandanīyo 'haṃ tatastaṃ paśya śāśvatam // ### [2.34.75](https://indike.org/pramana/in.purana.kurma.2.34.75) etāvaduktvā bhagavāñjagāmādarśanaṃ haraḥ / tatraiva bhaktiyogena rudrāmārādhayanmuniḥ // ### [2.34.76](https://indike.org/pramana/in.purana.kurma.2.34.76) etat pavitramatulaṃ tīrthaṃ brahmarṣisevitam / saṃsevya brāhmaṇo vidvān mucyate sarvapātakaiḥ // ### [2.34.76.p1](https://indike.org/pramana/in.purana.kurma.2.34.76.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge catustriṃśo 'dhyāyaḥ ## Linked texts (2) - [Yoginītantra](https://indike.org/pramana/in.sampradaya.general.sakta.yoginitantra.23.92) — Sanskrit - [Southern recension](https://indike.org/pramana/in.lit.mahabharata.vyasa*southern.12.375.9_8855) — Sanskrit --- Source: [https://indike.org/pramana/in.purana.kurma.2.34](https://indike.org/pramana/in.purana.kurma.2.34) · Pramāṇa