[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.35 # Kurmapurana 2.35: pañcatriṃśo'dhyāyaḥ Kūrmapurāṇa 2.35 - **Language:** Sanskrit ## Contents - [2.35.38](https://indike.org/pramana/in.purana.kurma.2.35.38) — 1 part ### pañcatriṃśo'dhyāyaḥ ### [2.35.1](https://indike.org/pramana/in.purana.kurma.2.35.1) sūta uvāca anyat pavitraṃ vipulaṃ tīrthaṃ trailokyaviśrutam / rudrakoṭiriti khyātaṃ rudrasya parameṣṭhinaḥ // ### [2.35.2](https://indike.org/pramana/in.purana.kurma.2.35.2) purā puṇyatame kāle devadarśanatatparāḥ / koṭibrahmarṣayo dāntāstaṃ deśamagaman param // ### [2.35.3](https://indike.org/pramana/in.purana.kurma.2.35.3) ahaṃ drakṣyāmi giriśaṃ pūrvameva pinākinam / anyo 'nyaṃ bhaktiyuktānāṃ vyāghāto jāyate kila // ### [2.35.4](https://indike.org/pramana/in.purana.kurma.2.35.4) teṣāṃ bhaktiṃ tadā dṛṣṭvā giriśo yogināṃ guruḥ / koṭirūpo 'bhavad rudro rudrakoṭistataḥ smṛtaḥ // ### [2.35.5](https://indike.org/pramana/in.purana.kurma.2.35.5) te sma sarve mahādevaṃ haraṃ giriguhāśayam / paśyantaḥ pārvatīnāthaṃ hṛṣṭapuṣṭadhiyo 'bhavan // ### [2.35.6](https://indike.org/pramana/in.purana.kurma.2.35.6) anādyantaṃ mahādevaṃ pūrvamevāhamīśvaram / dṛṣṭavāniti bhaktyā te rudranyastadhiyo 'bhavan // ### [2.35.7](https://indike.org/pramana/in.purana.kurma.2.35.7) athāntarikṣe vimalaṃ paśyanti sma mahattaram / jyotistatraiva te sarve 'bhilaṣantaḥ paraṃ padam // ### [2.35.8](https://indike.org/pramana/in.purana.kurma.2.35.8) etat sadeśādhyuṣitaṃ tīrthaṃ puṇyatamaṃ śubham / dṛṣṭvā rudraṃ samabhyarcya rudrasāmīpyamāpnuyāt // ### [2.35.9](https://indike.org/pramana/in.purana.kurma.2.35.9) anyacca tīrthapravaraṃ nāmnā madhuvanaṃ smṛtam / tatra gatvā niyamavānindrasyārdhāsanaṃ labhet // ### [2.35.10](https://indike.org/pramana/in.purana.kurma.2.35.10) athānyatpuṣpanagarī deśaḥ puṇyatamaḥ śubhaḥ / tatra gatvā pitṝn pūjya kulānāṃ tārayecchatam // ### [2.35.11](https://indike.org/pramana/in.purana.kurma.2.35.11) kālañjaraṃ mahātīrthaṃ loke rudro maheśvaraḥ / kālaṃ jaritavān devo yatra bhaktipriyo haraḥ // ### [2.35.12](https://indike.org/pramana/in.purana.kurma.2.35.12) śveto nāma śive bhakto rājarṣipravaraḥ purā / tadāśīstannamaskāraḥ pūjayāmāsa śūlinam // ### [2.35.13](https://indike.org/pramana/in.purana.kurma.2.35.13) saṃsthāpya vidhinā liṅgaṃ bhaktiyogapuraḥ saraḥ / jajāpa rudramaniśaṃ tatra saṃnyastamānasaḥ // ### [2.35.14](https://indike.org/pramana/in.purana.kurma.2.35.14) sa taṃ kālo 'tha dīptātmā śūlamādāya bhīṣaṇam / netumabhyāgato deśaṃ sa rājā yatra tiṣṭhati // ### [2.35.15](https://indike.org/pramana/in.purana.kurma.2.35.15) vīkṣya rājā bhayāviṣṭaḥ śūlahastaṃ samāgatam / kālaṃ kālakaraṃ ghoraṃ bhīṣaṇaṃ caṇḍadīdhitim // ### [2.35.16](https://indike.org/pramana/in.purana.kurma.2.35.16) ubābhyāmatha hastābhyāṃ spṛṭvāsau liṅgamaiśvaram / nanāma śirasā rudraṃ jajāpa śatarudriyam // ### [2.35.17](https://indike.org/pramana/in.purana.kurma.2.35.17) japantamāha rājānaṃ namantamasakṛd bhavam / ehyehīti puraḥ sthitvā kṛtāntaḥ prahasanniva // ### [2.35.18](https://indike.org/pramana/in.purana.kurma.2.35.18) tamuvāca bhayāviṣṭo rājā rudraparāyaṇaḥ / ekamīśārcanarataṃ vihāyānyaṃ niṣūdaya // ### [2.35.19](https://indike.org/pramana/in.purana.kurma.2.35.19) ityuktavantaṃ bhagavānabravīd bhītamānasam / rudrārcanarato vānyo madvaśe ko na tiṣṭhati // ### [2.35.20](https://indike.org/pramana/in.purana.kurma.2.35.20) evamuktvā sa rājānaṃ kālo lokaprakālanaḥ / babandha pāśai rājāpi jajāpa śatarudriyam // ### [2.35.21](https://indike.org/pramana/in.purana.kurma.2.35.21) athāntarikṣe vimalaṃ dīpyamānaṃ tejorāśiṃ bhūtabhartuḥ purāṇam / jvālāmālāsaṃvṛtaṃ vyāpya viśvaṃ prādurbhūtaṃ saṃsthitaṃ saṃdadarśa // ### [2.35.22](https://indike.org/pramana/in.purana.kurma.2.35.22) tanmadhye 'sau puruṣaṃ rukmavarṇaṃ devyā devaṃ candralekhojjvalāṅgam / tejorūpaṃ paśyati smātihṛṣṭo mene cāsmannātha āgacchatīti // ### [2.35.23](https://indike.org/pramana/in.purana.kurma.2.35.23) āgacchantaṃ nātidūre 'tha dṛṣṭvā kālo rudraṃ devadevyā maheśam / vyapetabhīrakhileśaikanāthaṃ rājarṣistaṃ netumabhyājagāma // ### [2.35.24](https://indike.org/pramana/in.purana.kurma.2.35.24) ālokyāsau bhagavānugrakarmā devo rudro bhūtabhartā purāṇaḥ / ekaṃ bhaktaṃ matparaṃ māṃ smarantaṃ dehītīmaṃ kālamūce mameti // ### [2.35.25](https://indike.org/pramana/in.purana.kurma.2.35.25) śrutvā vākhyaṃ gopaterugrabhāvaḥ kālātmāsau manyamānaḥ svabhāvam / baddhvā bhaktaṃ punarevātha pāśaiḥ kruddho rudramabhidudrāva vegāt // ### [2.35.26](https://indike.org/pramana/in.purana.kurma.2.35.26) prekṣyāyāntaṃ śailaputrīmatheśaḥ so 'nvīkṣyānte viśvamāyāvidhijñaḥ / sāvajñaṃ vai vāmapādena mṛtyuṃ śvetasyainaṃ paśyato vyājaghāna // ### [2.35.27](https://indike.org/pramana/in.purana.kurma.2.35.27) mamāra so 'tibhīṣaṇo maheśapādaghātitaḥ / rarāja devatāpatiḥ sahomayā pinākadhṛk // ### [2.35.28](https://indike.org/pramana/in.purana.kurma.2.35.28) nirīkṣya devamīśvaraṃ prahṛṣṭamānaso haram / nanāma sāmbamavyayaṃ sa rājapuṅgavastadā // ### [2.35.29](https://indike.org/pramana/in.purana.kurma.2.35.29) namo bhavāya hetave harāya viśvasaṃbhave / namaḥ śivāya dhīmate namo 'pavargadāyine // ### [2.35.30](https://indike.org/pramana/in.purana.kurma.2.35.30) namo namo namo 'stu te mahāvibhūtaye namaḥ / vibhāgahīnarūpiṇe namo narādhipāya te // ### [2.35.31](https://indike.org/pramana/in.purana.kurma.2.35.31) namo 'stu te gaṇeśvara prapannaduḥ khanāśana / anādinityabhūtaye varāhaśṛṅgadhāriṇe // ### [2.35.32](https://indike.org/pramana/in.purana.kurma.2.35.32) namo vṛṣadhvajāya te kapālamāline namaḥ / namo mahānaṭāya te namo vṛṣadhvajāya te // ### [2.35.33](https://indike.org/pramana/in.purana.kurma.2.35.33) athānugṛhya śaṅkaraḥ praṇāmatatparaṃ nṛpam / svagāṇapatyamavyayaṃ sarūpatāmatho dadau // ### [2.35.34](https://indike.org/pramana/in.purana.kurma.2.35.34) sahomayā sapārṣadaḥ sarājapuṅgavo haraḥ / munīśasiddhavanditaḥ kṣaṇādadṛśyatāmagāt // ### [2.35.35](https://indike.org/pramana/in.purana.kurma.2.35.35) kāle maheśābhihate lokanāthaḥ pitāmahaḥ / ayācata varaṃ rudraṃ sajīvo 'yaṃ bhavatviti // ### [2.35.36](https://indike.org/pramana/in.purana.kurma.2.35.36) nāsti kaścidapīśāna doṣaleśo vṛṣadhvaja / kṛtāntasyaiva bhavatā tatkārye viniyojitaḥ // ### [2.35.37](https://indike.org/pramana/in.purana.kurma.2.35.37) sa devadevavacanād devadeveśvaro haraḥ / tathāstvityāha viśvātmā so 'pi tādṛgvidho 'bhavat // ### [2.35.38](https://indike.org/pramana/in.purana.kurma.2.35.38) ityetat paramaṃ tīrthaṃ kālañjaramiti śrutam / gatvābhyarcya mahādevaṃ gāṇapatyaṃ sa vindati // ### [2.35.38.p1](https://indike.org/pramana/in.purana.kurma.2.35.38.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge pañcatriṃśo 'dhyāyaḥ --- Source: [https://indike.org/pramana/in.purana.kurma.2.35](https://indike.org/pramana/in.purana.kurma.2.35) · Pramāṇa