[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.36 # Kurmapurana 2.36: ṣaṭtriṃśo'dhyāyaḥ Kūrmapurāṇa 2.36 - **Language:** Sanskrit ## Contents - [2.36.57](https://indike.org/pramana/in.purana.kurma.2.36.57) — 1 part ### ṣaṭtriṃśo'dhyāyaḥ ### [2.36.1](https://indike.org/pramana/in.purana.kurma.2.36.1) sūta uvāca idanamanyate paraṃ sthānaṃ guhyād guhyatamaṃ mahat / mahādevasya devasya mahālayamiti śrutam // ### [2.36.2](https://indike.org/pramana/in.purana.kurma.2.36.2) tatra devādidevena rudreṇa tripurāriṇā / śilātale padaṃ nyastaṃ nāstikānāṃ nidarśanam // ### [2.36.3](https://indike.org/pramana/in.purana.kurma.2.36.3) tatra puśupatāḥ śāntā bhasmoddhūlitavigrahāḥ / upāsate mahādevaṃ vedādhyayanatatparāḥ // ### [2.36.4](https://indike.org/pramana/in.purana.kurma.2.36.4) snātvā tatra padaṃ śārvaṃ dṛṣṭvā bhaktipuraḥ saram / namaskṛtvātha śirasā rudrasāmīpyamāpnuyāt // ### [2.36.5](https://indike.org/pramana/in.purana.kurma.2.36.5) anyacca devadevasya sthānaṃ śaṃbhormahātmanaḥ / kedāramiti vikhyātaṃ siddhānāmālayaṃ śubham // ### [2.36.6](https://indike.org/pramana/in.purana.kurma.2.36.6) tatra snātvā mahādevamabhyarcya vṛṣaketanam / pītvā caivodakaṃ śuddhaṃ gāṇapatyamavāpnuyāt // ### [2.36.7](https://indike.org/pramana/in.purana.kurma.2.36.7) śrāddhadānādikaṃ kṛtvā hyakṣyaṃ labhate phalam / dvijātipravarairjuṣṭaṃ yogibhiryatamānasaiḥ // ### [2.36.8](https://indike.org/pramana/in.purana.kurma.2.36.8) tīrthaṃ plakṣāvataraṇaṃ sarvapāpavināśanam / tatrābhyarcya śrīnivāsaṃ viṣṇuloke mahīyate // ### [2.36.9](https://indike.org/pramana/in.purana.kurma.2.36.9) anyaṃ magadharājasya tīrthaṃ svargagatipradam / akṣayaṃ vindati svargaṃ tatra gatvā dvijottamaḥ // ### [2.36.10](https://indike.org/pramana/in.purana.kurma.2.36.10) tīrthaṃ kanakhalaṃ puṇyaṃ mahāpātakanāśanam / yatra devena rudreṇa yajño dakṣasya nāśitaḥ // ### [2.36.11](https://indike.org/pramana/in.purana.kurma.2.36.11) tatra gaṅgāmupaspṛśya śucirbhāvasamanvitaḥ / mucyate sarvapāpaistu brahmalokaṃ labhenmṛtaḥ // ### [2.36.12](https://indike.org/pramana/in.purana.kurma.2.36.12) mahātīrthamiti khyātaṃ puṇyaṃ nārāyaṇapriyam / tatrābhyarcya hṛṣīkeśaṃ śvetadvīpaṃ nigacchati // ### [2.36.13](https://indike.org/pramana/in.purana.kurma.2.36.13) anyacca tīrthapravaraṃ nāmnā śrīparvataṃ śubham / tatra prāṇān parityajya rudrasya dayito bhavet // ### [2.36.14](https://indike.org/pramana/in.purana.kurma.2.36.14) tatra sannihito rudro devyā saha maheśvaraḥ / snānapiṇḍādikaṃ tatra kṛtamakṣayyamuttamam // ### [2.36.15](https://indike.org/pramana/in.purana.kurma.2.36.15) godāvarī nadī puṇyā sarvapāpavināśanī / tatra snātvā pitṝn devāṃstarpayitvā yathāvidhi / sarvapāpavisuddhātmā gosahasraphalaṃ labhet // ### [2.36.16](https://indike.org/pramana/in.purana.kurma.2.36.16) pavitrasalilā puṇyā kāverī vipulā nadī / tasyāṃ snātvodakaṃ kṛtvā mucyate sarvapātakaiḥ / trirātropoṣitenātha ekarātroṣitena vā // ### [2.36.17](https://indike.org/pramana/in.purana.kurma.2.36.17) dvijātīnāṃ tu kathitaṃ tīrthānāmiha sevanam / yasya vāṅmanaso śuddhe hastapādau ca saṃsthitau / alolupo brahmacāro tīrthānāṃ phalamāpnuyāt // ### [2.36.18](https://indike.org/pramana/in.purana.kurma.2.36.18) svāmitīrthaṃ mahātīrthaṃ triṣu lokeṣu viśrutam / tatra sannihito nityaṃ skando 'maranamaskṛtaḥ // ### [2.36.19](https://indike.org/pramana/in.purana.kurma.2.36.19) snātvā kumāradhārāyāṃ kṛtvā devāditarpaṇam / ārādhya ṣaṇmukhaṃ devaṃ skandena saha modate // ### [2.36.20](https://indike.org/pramana/in.purana.kurma.2.36.20) nadī trailokyavikhyātā tāmraparṇoti nāmataḥ / tatra snātvā pitṝn bhaktyā tarpayitvā yathāvidhi / pāpakartṝnapi pitṝstārayennātra saṃśayaḥ // ### [2.36.21](https://indike.org/pramana/in.purana.kurma.2.36.21) candratīrthamiti khyātaṃ kāveryāḥ prabhave 'kṣayam / tīrthaṃ tatra bhaved vastuṃ mṛtānāṃ svargatirdhruvā // ### [2.36.22](https://indike.org/pramana/in.purana.kurma.2.36.22) vindhyapāde prapaśyanti devadevaṃ sadāśivam / bhaktyā ye te na paśyanti yamasya sadanaṃ dvijāḥ // ### [2.36.23](https://indike.org/pramana/in.purana.kurma.2.36.23) devikāyāṃ vṛṣo nāma tīrthaṃ siddhaniṣevitam / tatra snātvodakaṃ datvā yogasiddhiṃ ca vindati // ### [2.36.24](https://indike.org/pramana/in.purana.kurma.2.36.24) daśāśvamedhikaṃ tīrthaṃ sarvapāpavināśanam / daśānāmaśvamedhānāṃ tatrāpnoti phalaṃ naraḥ // ### [2.36.25](https://indike.org/pramana/in.purana.kurma.2.36.25) puṇḍarīkaṃ mahātīrthaṃ brāhmaṇairupasevitam / tatrābhigamya yuktātmā pauṇḍarīkaphalaṃ labhet // ### [2.36.26](https://indike.org/pramana/in.purana.kurma.2.36.26) tīrthebhyaḥ paramaṃ tīrthaṃ brahmatīrthamiti śrutam / brahmāṇamarcayitvā tu brahmaloke mahīyate // ### [2.36.27](https://indike.org/pramana/in.purana.kurma.2.36.27) sarasvatyā vinaśanaṃ plakṣaprastravaṇaṃ śubham / vyāsatīrthaṃ paraṃ tīrthaṃ mainākaṃ ca nagottamam / yamunāprabhavaṃ caiva sarvapāpaviśodhanam // ### [2.36.28](https://indike.org/pramana/in.purana.kurma.2.36.28) pitṝṇāṃ duhitā devī gandhakālīti viśrutā / tasyāṃ snātvā divaṃ yāti mṛto jātismaro bhavet // ### [2.36.29](https://indike.org/pramana/in.purana.kurma.2.36.29) kuberatuṅgaṃ pāpaghnaṃ siddhacāraṇasevitam / prāṇāṃstatra parityajya kuberānucaro bhavet // ### [2.36.30](https://indike.org/pramana/in.purana.kurma.2.36.30) umātuṅgamiti khyātaṃ yatra sā rudravallabhā / tatrābhyarcya mahādevīṃ kosahasraphalaṃ labhet // ### [2.36.31](https://indike.org/pramana/in.purana.kurma.2.36.31) bhṛgutuṅge tapastaptaṃ śrāddhaṃ dānaṃ tathā kṛtam / kulānyubhayataḥ sapta punātīti śrutirmama // ### [2.36.32](https://indike.org/pramana/in.purana.kurma.2.36.32) kāśyapasya mahātīrthaṃ kālasarpiriti śrutam / tatra śrāddhāni deyāni nityaṃ pāpakṣayecchayā // ### [2.36.33](https://indike.org/pramana/in.purana.kurma.2.36.33) daśārṇāyāṃ tathā dānaṃ śrāddhaṃ homastathā japaḥ / akṣayaṃ cāvyayaṃ caiva kṛtaṃ bhavati sarvadā // ### [2.36.34](https://indike.org/pramana/in.purana.kurma.2.36.34) tīrthaṃ dvijātibhirjuṣṭaṃ nāmnā vai kurujāṅgalam / dattvā tu dānaṃ vidhivad brahmaloke mahīyate // ### [2.36.35](https://indike.org/pramana/in.purana.kurma.2.36.35) vaitaraṇyāṃ mahātīrthe svarṇavedyāṃ tathaiva ca / dharmapṛṣṭhe ca sarasi brahmaṇaḥ parame śubhe // ### [2.36.36](https://indike.org/pramana/in.purana.kurma.2.36.36) bharatasyāśrame puṇye puṇye śrāddhavaṭe śubhe / mahāhrade ca kauśikyāṃ dattaṃ bhavati cākṣayam // ### [2.36.37](https://indike.org/pramana/in.purana.kurma.2.36.37) muñjapṛṣṭhe padaṃ nyastaṃ mahādevena dhīmatā / hitāya sarvabhūtānāṃ nāstikānāṃ nidarśanam // ### [2.36.38](https://indike.org/pramana/in.purana.kurma.2.36.38) alpenāpi tu kālena naro dharmaparāyaṇaḥ / pāpmānamutsṛjatyāśu jīrṇāṃ tvacamivoragaḥ // ### [2.36.39](https://indike.org/pramana/in.purana.kurma.2.36.39) nāmnā kanakanandeti tīrthaṃ trailokyaviśrutam / udīcyāṃ muñjapṛṣṭhasya brahmarṣigaṇasevitam // ### [2.36.40](https://indike.org/pramana/in.purana.kurma.2.36.40) tatra snātvā divaṃ yānti saśarīrā dvijātayaḥ / dattaṃ cāpi sadā śrāddhamakṣayaṃ samudāhṛtam / ṛṇaistribhirnaraḥ snātvā mucyate kṣīṇakalmaṣaḥ // ### [2.36.41](https://indike.org/pramana/in.purana.kurma.2.36.41) mānase sarasi snātvā śakrasyārdhāsanaṃ labhet / uttaraṃ mānasaṃ gatvā siddhiṃ prāpnotyanuttamām // ### [2.36.42](https://indike.org/pramana/in.purana.kurma.2.36.42) tasmānnirvartayecchrāddhaṃ yathāśakti yathābalam / kāmān salabhate divyān mokṣopāyaṃ ca vindati // ### [2.36.43](https://indike.org/pramana/in.purana.kurma.2.36.43) parvato himavānnāma nānādhātuvibhūṣitaḥ / yojanānāṃ sahasrāṇi so 'śītistvāyato giriḥ / siddhacāraṇasaṃkīrṇo devarṣigaṇasevitaḥ // ### [2.36.44](https://indike.org/pramana/in.purana.kurma.2.36.44) tatra puṣkariṇī ramyā suṣumnā nāma nāmataḥ / tatra gatvā dvijo vidvān brahmahatyāṃ vimuñcati // ### [2.36.45](https://indike.org/pramana/in.purana.kurma.2.36.45) śrāddhaṃ bhavati cākṣayyaṃ tatra dattaṃ mahodayam / tārayecca pitṝn samyag daśa pūrvān daśāparān // ### [2.36.46](https://indike.org/pramana/in.purana.kurma.2.36.46) sarvatra himavān puṇyo gaṅgā puṇyā samantataḥ / nadyaḥ samudragāḥ puṇyāḥ samudraśca viśeṣataḥ // ### [2.36.47](https://indike.org/pramana/in.purana.kurma.2.36.47) badaryāśramamāsādya mucyate kalikalmaṣāt / tatra nārāyaṇo devo nareṇāste sanātanaḥ // ### [2.36.48](https://indike.org/pramana/in.purana.kurma.2.36.48) akṣayaṃ tatra dānaṃ syāt japyaṃ vāpi tathāvidham / mahādevapriyaṃ tīrthaṃ pāvanaṃ tad viśeṣataḥ / tārayecca pitṝn sarvān dattvā śrāddhaṃ samāhitaḥ // ### [2.36.49](https://indike.org/pramana/in.purana.kurma.2.36.49) devadāruvanaṃ puṇyaṃ siddhagandharvasevitam / mahādevena devena tatra dattaṃ mahad varaṃ // ### [2.36.50](https://indike.org/pramana/in.purana.kurma.2.36.50) mohayitvā munīn sarvān punastaiḥ saṃprapūjitaḥ / prasanno bhagavānīśo munīndrān prāha bhāvitān // ### [2.36.51](https://indike.org/pramana/in.purana.kurma.2.36.51) ihāśramavare ramye nivasiṣyatha sarvadā / madbhāvanāsamāyuktāstataḥ siddhimavāpsyatha // ### [2.36.52](https://indike.org/pramana/in.purana.kurma.2.36.52) ye 'tra māmarcayantīha loke dharmaparā janāḥ / teṣāṃ dadāmi paramaṃ gāṇapatyaṃ hi śāśvatam // ### [2.36.53](https://indike.org/pramana/in.purana.kurma.2.36.53) atra nityaṃ vasiṣyāmi saha nārāyaṇena ca / prāṇāniha narastyaktvā na bhūyo janma vindati // ### [2.36.54](https://indike.org/pramana/in.purana.kurma.2.36.54) saṃsmaranti ca ye tīrthaṃ deśāntaragatā janāḥ / teṣāṃ ca sarvapāpāni nāśayāmi dvijottamāḥ // ### [2.36.55](https://indike.org/pramana/in.purana.kurma.2.36.55) śrāddhaṃ dānaṃ tapo homaḥ piṇḍanirvapaṇaṃ tathā / dhyānaṃ japaśca niyamaḥ sarvamatrākṣayaṃ kṛtam // ### [2.36.56](https://indike.org/pramana/in.purana.kurma.2.36.56) tasmāt sarvaprayatnena draṣṭavyaṃ hi dvijātibhiḥ / devadāruvanaṃ puṇyaṃ mahādevaniṣevitam // ### [2.36.57](https://indike.org/pramana/in.purana.kurma.2.36.57) yatresvaro mahādevo viṣṇurvā puruṣottamaḥ / tatra sannihitā gaṅgātīrthānyāyatanāni ca // ### [2.36.57.p1](https://indike.org/pramana/in.purana.kurma.2.36.57.p1) itī śrīkūrmapurāṇe ṣaṭsāhastryāṃ saṃhitāyāmuparivibhāge ṣaṭtriśo 'dhyāyaḥ ## Linked texts (4) - [Vāyupurāṇa](https://indike.org/pramana/in.purana.vayu.2.15.89) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.2.13.98) — Vyāsa, Sanskrit - [Yoginītantra](https://indike.org/pramana/in.sampradaya.general.sakta.yoginitantra.29.104) — Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.10.p9) — Vācaspatimiśra, Sanskrit --- Source: [https://indike.org/pramana/in.purana.kurma.2.36](https://indike.org/pramana/in.purana.kurma.2.36) · Pramāṇa