[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.37 # Kurmapurana 2.37: saptatriṃśo'dhyāyaḥ Kūrmapurāṇa 2.37 - **Language:** Sanskrit ## Contents - [2.37.164](https://indike.org/pramana/in.purana.kurma.2.37.164) — 1 part ### saptatriṃśo'dhyāyaḥ ### [2.37.1](https://indike.org/pramana/in.purana.kurma.2.37.1) ṛṣaya ūcuḥ kathaṃ dāruvanaṃ prāpto bhagavān govṛṣadhvajaḥ / mohayāmāsa viprendrān sūta vaktumihārhasi // ### [2.37.2](https://indike.org/pramana/in.purana.kurma.2.37.2) sūta uvāca purā dāruvan ramye devasiddhaniṣevite / saputradārā munayastapaśceruḥ sahasraśaḥ // ### [2.37.3](https://indike.org/pramana/in.purana.kurma.2.37.3) pravṛttaṃ vividhaṃ karma prakurvāṇā yathāvidhi / yajanti vividhairyajñaistapanti ca maharṣayaḥ // ### [2.37.4](https://indike.org/pramana/in.purana.kurma.2.37.4) teṣāṃ pravṛttivinyastacetasāmatha śūladhṛk / khyāpayan sa mahādoṣaṃ yayau dāruvanaṃ haraḥ // ### [2.37.5](https://indike.org/pramana/in.purana.kurma.2.37.5) kṛtvā viśvaguruṃ viṣṇuṃ pārśve devo maheśvaraḥ / yayau nivṛttavijñānasthāpanārthaṃ ca śaṅkaraḥ // ### [2.37.6](https://indike.org/pramana/in.purana.kurma.2.37.6) āsthāya vipulaṃ veśamūnaviṃśativatsaraḥ / līlālaso mahābāhuḥ pīnāṅgaścārulocanaḥ // ### [2.37.7](https://indike.org/pramana/in.purana.kurma.2.37.7) cāmīkaravapuḥ śrīmān pūrṇacandranibhānanaḥ / mattamātaṅgagāmano digvāsā jagadīśvaraḥ // ### [2.37.8](https://indike.org/pramana/in.purana.kurma.2.37.8) kuśeśayamayīṃ mālaṃ sarvaratnairalaṅkṛtām / dadhāno bhagavānīśaḥ samāgacchati sasmitaḥ // ### [2.37.9](https://indike.org/pramana/in.purana.kurma.2.37.9) yo 'nantaḥ puruṣo yonirlokānāmavyayo hariḥ / strīveṣaṃ viṣṇurāsthāya so 'nugacchati śūlinam // ### [2.37.10](https://indike.org/pramana/in.purana.kurma.2.37.10) sampūrṇacandravadanaṃ pīnonnatapayodharam / śucismitaṃ suprasannaṃ raṇannupurakadvayam // ### [2.37.11](https://indike.org/pramana/in.purana.kurma.2.37.11) supītavasanaṃ divyaṃ śyāmalaṃ cārulocanam / udārahaṃsacalanaṃ vilāsi sumanoharam // ### [2.37.12](https://indike.org/pramana/in.purana.kurma.2.37.12) evaṃ sa bhagavānīśo devadāruvane haraḥ / cacāra hariṇā bhikṣāṃ māyayā mohayan jagat // ### [2.37.13](https://indike.org/pramana/in.purana.kurma.2.37.13) dṛṣṭvā carantaṃ viśveśaṃ tatra tatra pinākinam / māyayā mohitā nāryo devadevaṃ samanvayuḥ // ### [2.37.14](https://indike.org/pramana/in.purana.kurma.2.37.14) vistrastavastrābharaṇāstyaktvā lajjāṃ pativratāḥ / sahaiva tena kāmārtā vilāsinyaścarantihi // ### [2.37.15](https://indike.org/pramana/in.purana.kurma.2.37.15) ṛṣīṇāṃ putrakā ye syuryuvāno jitamānasāḥ / anvagacchan hṛṣīkeśaṃ sarve kāmaprapīḍitāḥ // ### [2.37.16](https://indike.org/pramana/in.purana.kurma.2.37.16) gāyanti nṛtyanti vilāsabāhyā nārīgaṇā māyinamekamīśam / dṛṣṭvā sapatnīkamatīvakānta- micchantyathāliṅganamācaranti // ### [2.37.17](https://indike.org/pramana/in.purana.kurma.2.37.17) pade nipetuḥ smitamācaranti gāyanti gītāni munīśaputrāḥ / ālokya padmāpatimādidevaṃ bhrūbhaṅgamanye vicaranti tena // ### [2.37.18](https://indike.org/pramana/in.purana.kurma.2.37.18) āsāmathaiṣāmapi vāsudevo māyī murārirmanasi praviṣṭaḥ / karoti bhogān manasi pravṛttiṃ māyānubhūyanta itiva samyak // ### [2.37.19](https://indike.org/pramana/in.purana.kurma.2.37.19) vibhāti viśvāmarabhūtabhartā sa mādhavaḥ strīgaṇamadhyaviṣṭaḥ / aśeṣaśaktyāsanasaṃniviṣṭo yathaikaśaktyā saha devadevaḥ // ### [2.37.20](https://indike.org/pramana/in.purana.kurma.2.37.20) karoti nṛtyaṃ paramaprabhāvaṃ tadā virūḍhaḥ punareva bhūyaḥ / yayau samāruhya hariḥ svabhāvaṃ tadīśavṛttāmṛtamādidevaḥ // ### [2.37.21](https://indike.org/pramana/in.purana.kurma.2.37.21) dṛṣṭvā nārīkulaṃ rudraṃ putrāṇāmapi keśavam / mohayantaṃ muniśreṣṭhāḥ kopaṃ saṃdadhire bhṛśam // ### [2.37.22](https://indike.org/pramana/in.purana.kurma.2.37.22) atīva paruṣaṃ vākyaṃ procurdevaṃ kapardinam / śeṣuśca śāpairvividhairmāyayā tasya mohitāḥ // ### [2.37.23](https://indike.org/pramana/in.purana.kurma.2.37.23) tapāṃsi teṣāṃ sarveṣāṃ pratyāhanyanta śaṅkare / yathādityaprakāśena tārakā nabhasi sthitāḥ // ### [2.37.24](https://indike.org/pramana/in.purana.kurma.2.37.24) te bhagnatapaso viprāḥ sametya vṛṣabhadhvajam / ko bhavāniti deveśaṃ pṛcchanti sma vimohitāḥ // ### [2.37.25](https://indike.org/pramana/in.purana.kurma.2.37.25) so 'bravīd bhagavānīśastapaścartumihāgataḥ / idānīṃ bhāryayā deśe bhavadbhiriha suvratāḥ // ### [2.37.26](https://indike.org/pramana/in.purana.kurma.2.37.26) tasya te vākyamākarṇya bhṛgvādyā munipuṅgavāḥ / ūcurgṛhītvā vasanaṃ tyaktvā bhāryāṃ tapaścara // ### [2.37.27](https://indike.org/pramana/in.purana.kurma.2.37.27) athovāca vihasyeśaḥ pinākī nīlalohitaḥ / saṃprekṣya jagato yoniṃ pārśvasthaṃ ca janārdanam // ### [2.37.28](https://indike.org/pramana/in.purana.kurma.2.37.28) kathaṃ bhavadbhiruditaṃ svabhāryāpoṣaṇotsukaiḥ / tyaktavyā mama bhāryeti dharmajñaiḥ śāntamānasaiḥ // ### [2.37.29](https://indike.org/pramana/in.purana.kurma.2.37.29) ṛṣaya ūcuḥ vyabhicāraratā nāryaḥ saṃtyājyāḥ patineritāḥ / asmābhireṣā subhagā tādṛśī tyāgamarhati // ### [2.37.30](https://indike.org/pramana/in.purana.kurma.2.37.30) mahādeva uvāca na kadācidiyaṃ viprā manasāpyanyamicchati / nāhamenāmapi tathā vimuñcāmi kadācana // ### [2.37.31](https://indike.org/pramana/in.purana.kurma.2.37.31) ṛṣaya ūcuḥ dṛṣṭvā vyabhicarantīha hyasmābhiḥ puruṣādhama / uktaṃ hyasatyaṃ bhavatā gamyatāṃ kṣiprameva hi // ### [2.37.32](https://indike.org/pramana/in.purana.kurma.2.37.32) evamukte mahādevaḥ satyameva mayeritam / bhavatāṃ pratibhātyeṣetyuktvāsau vicacāra ha // ### [2.37.33](https://indike.org/pramana/in.purana.kurma.2.37.33) so 'gacchaddhariṇā sārdhaṃ munindrasya mahātmanaḥ / vasiṣṭhasyāśramaṃ puṇyaṃ bhikṣārtho parameśvaraḥ // ### [2.37.34](https://indike.org/pramana/in.purana.kurma.2.37.34) dṛṣṭvā samāgataṃ devaṃ bhikṣamāṇamarundhatī / vasiṣṭhasya priyā bhāryā pratyudgamya nanāma nam // ### [2.37.35](https://indike.org/pramana/in.purana.kurma.2.37.35) prakṣālya pādau vimalaṃ dattvā cāsanamuttamam / saṃprekṣya śithilaṃ gātramabhighātahataṃ dvijaiḥ / saṃdhayāmāsa bhaiṣajyairviṣṇā vadanā satī // ### [2.37.36](https://indike.org/pramana/in.purana.kurma.2.37.36) cakāra mahatīṃ pūjāṃ prārthayāmāsa bhāryayā / ko bhavān kuta āyātaḥ kimācāro bhavāniti / uvāca tāṃ mahādevaḥ siddhānāṃ pravaro 'smyaham // ### [2.37.37](https://indike.org/pramana/in.purana.kurma.2.37.37) yadetanmaṇḍalaṃ śuddhaṃ bhāti brahmamayaṃ sadā / eṣaiva devatā mahyaṃ dhārayāmi sadaiva tat // ### [2.37.38](https://indike.org/pramana/in.purana.kurma.2.37.38) hatyuktvā prayayau śrīmānanugṛhya pativratām / tāḍayāñcakrire daṇḍairloṣṭibhirmuṣṭibhidvijāḥ // ### [2.37.39](https://indike.org/pramana/in.purana.kurma.2.37.39) dṛṣṭvā carantaṃ giriśaṃ nagnaṃ vikṛtalakṣaṇam / procuretad bhavāṃlliṅgamutpāṭayatu durmate // ### [2.37.40](https://indike.org/pramana/in.purana.kurma.2.37.40) tānabravīnmahāyogī kariṣyāmīti śaṅkaraḥ / yuṣmākaṃ māmake liṅge yadi dveṣo 'bhijāyate // ### [2.37.41](https://indike.org/pramana/in.purana.kurma.2.37.41) ityuktvotpāṭayāmāsa bhagavān bhaganetrahā / nāpaśyaṃstatkṣaṇeneśaṃ keśavaṃ liṅgameva ca // ### [2.37.42](https://indike.org/pramana/in.purana.kurma.2.37.42) tadotpātā babhūvurhi lokānāṃ bhayaśaṃsinaḥ / na rājate sahasrāṃśuścacāla pṛthivī punaḥ / niṣprabhāśca grahāḥ sarve cukṣubhe ca mahodadhiḥ // ### [2.37.43](https://indike.org/pramana/in.purana.kurma.2.37.43) apaśyaccānusūyātreḥ svapnaṃ bhāryā pativratā / kathayāmāsa viprāṇāṃ bhayādākulitekṣaṇā // ### [2.37.44](https://indike.org/pramana/in.purana.kurma.2.37.44) tejasā bhāsayan kṛtsnaṃ nārāyaṇasahāyavān / bhikṣamāṇaḥ śivo nūnaṃ dṛṣṭo 'smākaṃ gṛheṣviti // ### [2.37.45](https://indike.org/pramana/in.purana.kurma.2.37.45) tasyā vacanamākarṇya śaṅkamānā maharṣayaḥ / sarve jagmurmahāyogaṃ brahmāṇaṃ viśvasaṃbhavam // ### [2.37.46](https://indike.org/pramana/in.purana.kurma.2.37.46) upāsyamānamamalairyogibhirbrahmavittamaiḥ / caturvedairmūrtimadbhiḥ sāvitryā sahitaṃ prabhum // ### [2.37.47](https://indike.org/pramana/in.purana.kurma.2.37.47) āsīnamāsane ramye nānāścaryasamanvite / prabhāsahasrakalile jñānaiśvaryādisaṃyute // ### [2.37.48](https://indike.org/pramana/in.purana.kurma.2.37.48) vibhrājamānaṃ vapuṣā sastitaṃ śubhralocanam / caturmukhaṃ mahābāhuṃ chandomayamajaṃ param // ### [2.37.49](https://indike.org/pramana/in.purana.kurma.2.37.49) vilokya vedapuruṣaṃ prasannavadanaṃ śubham / śirobhirdharaṇīṃ gatvā toṣayāmāsurīśvaram // ### [2.37.50](https://indike.org/pramana/in.purana.kurma.2.37.50) tān prasannamanā devaścaturmūrtiścaturmukhaḥ / vyājahāra muniśreṣṭhāḥ kimāgamanakāraṇam // ### [2.37.51](https://indike.org/pramana/in.purana.kurma.2.37.51) tasya te vṛttamakhilaṃ brahmaṇaḥ paramātmanaḥ / jñāpayāñcakrire sarve kṛtvā śirasi cāñjalim // ### [2.37.52](https://indike.org/pramana/in.purana.kurma.2.37.52) ṛṣaya ūcuḥ kaścid dāruvanaṃ puṇyaṃ puruṣo 'tīvaśobhanaḥ / bhāryayā cārusarvāṅgyā praviṣṭo nagna eva hi // ### [2.37.53](https://indike.org/pramana/in.purana.kurma.2.37.53) mohayāmāsa vapuṣā nārīṇāṃ kulamīśvaraḥ / kanyakānāṃ priyā cāsya dūṣayāmāsa putrakān // ### [2.37.54](https://indike.org/pramana/in.purana.kurma.2.37.54) asmābhirvividhāḥ śāpāḥ pradattāśca parāhatāḥ / tāḍito 'smābhiratyarthaṃ liṅgantu vinipātitam // ### [2.37.55](https://indike.org/pramana/in.purana.kurma.2.37.55) antarhitaśca bhagavān sabhāryo liṅgameva ca / utpātāścābhavan ghorāḥ sarvabhūtabhayaṅkarāḥ // ### [2.37.56](https://indike.org/pramana/in.purana.kurma.2.37.56) ka eṣa puruṣo deva bhītāḥ sma puruṣottama / bhavantameva śaraṇaṃ prapannā vayamacyuta // ### [2.37.57](https://indike.org/pramana/in.purana.kurma.2.37.57) tvaṃ hi vetsi jagatyasmin yatkiñcidapi ceṣṭitam / anugraheṇa viśveśa tadasmānanupālaya // ### [2.37.58](https://indike.org/pramana/in.purana.kurma.2.37.58) vijñāpito munigaṇairviśvātmā kamalodbhavaḥ / dhyātvā devaṃ triśūlāṅkaṃ kṛtāñjalirabhāṣata // ### [2.37.59](https://indike.org/pramana/in.purana.kurma.2.37.59) brahmovāca hā kaṣṭaṃ bhavatāmadya jātaṃ sarvārthanāśanam / dhigbalaṃ dhik tapaścaryā mithyaiva bhavatāmiha // ### [2.37.60](https://indike.org/pramana/in.purana.kurma.2.37.60) saṃprāpya puṇyasaṃskārānnidhīnāṃ paramaṃ nidhim / upekṣitaṃ vṛthācārairbhavadbhiriha mohitaiḥ // ### [2.37.61](https://indike.org/pramana/in.purana.kurma.2.37.61) kāṅkṣante yogino nityaṃ yatanto yatayo nidhim / yameva taṃ samāsādya hā bhavadbhirupekṣitam // ### [2.37.62](https://indike.org/pramana/in.purana.kurma.2.37.62) yajanti yajñairvividhairyatprāptyairvedavādinaḥ / mahānidhiṃ samāsādya hā bhavadbhirupekṣitam // ### [2.37.63](https://indike.org/pramana/in.purana.kurma.2.37.63) yaṃ samāsādya devānaimaiśvaryamakhilaṃ jagat / tamāsādyākṣayanidhiṃ hā bhavadbhirupekṣitam // ### [2.37.64](https://indike.org/pramana/in.purana.kurma.2.37.64) yatsamāpattijanitaṃ viśveśatvamidaṃ mama / tadevopekṣitaṃ dṛṣṭvā nidhānaṃ bhāgyavarjitaiḥ // ### [2.37.65](https://indike.org/pramana/in.purana.kurma.2.37.65) yasmin samāhitaṃ divyamaiśvaryaṃ yat tadavyayam / tamāsādya nidhiṃ brāhma hā bhavadbhirvṛthākṛtam // ### [2.37.66](https://indike.org/pramana/in.purana.kurma.2.37.66) eṣa devo mahādevo vijñeyastu maheśvaraḥ / na tasya paramaṃ kiñcit padaṃ samadhigamyate // ### [2.37.67](https://indike.org/pramana/in.purana.kurma.2.37.67) devatānāmṛṣīṇāṃ ca pitṝṇāṃ cāpi śāśvataḥ / sahasrayugaparyante pralaye sarvadehinām / saṃharatyeṣa bhagavān kālo bhūtvā maheśvaraḥ // ### [2.37.68](https://indike.org/pramana/in.purana.kurma.2.37.68) eṣa caiva prajāḥ sarvāḥ sṛjatyekaḥ svatejasā / eṣa cakrī ca vajrī ca śrīvatsakṛtalakṣaṇaḥ // ### [2.37.69](https://indike.org/pramana/in.purana.kurma.2.37.69) yogī kṛtayuge devastretāyāṃ yajña ucyate / dvāpare bhagavān kālo dharmaketuḥ kalau yuge // ### [2.37.70](https://indike.org/pramana/in.purana.kurma.2.37.70) rudrasya mūrtayastistro yābhirviśvamidaṃ tatam / tamo hyagnī rajo brahmā sattvaṃ viṣṇuriti prabhuḥ // ### [2.37.71](https://indike.org/pramana/in.purana.kurma.2.37.71) mūrtiranyā smṛtā cāsya digvāsā vai śivā dhruvā / yatra tiṣṭhati tad brahma yogena tu samanvitam // ### [2.37.72](https://indike.org/pramana/in.purana.kurma.2.37.72) yā cāsya pārśvagā bhāryā bhavadbhirabhivīkṣitā / sā hi nārāyaṇo devaḥ paramātmā sanātanaḥ // ### [2.37.73](https://indike.org/pramana/in.purana.kurma.2.37.73) tasmāt sarvamidaṃ jātaṃ tatraiva ca layaṃ vrajet / sa eva mohayet kṛtsnaṃ sa eva paramā gatiḥ // ### [2.37.74](https://indike.org/pramana/in.purana.kurma.2.37.74) sahasraśīrṣā puruṣaḥ sahasrākṣaḥ sahasrapāt / ekaśṛṅgo mahānātmā purāṇo 'ṣṭākṣaro hariḥ // ### [2.37.75](https://indike.org/pramana/in.purana.kurma.2.37.75) caturvedaścaturmūrtistrimūrtistriguṇaḥ paraḥ / ekamūrtirameyātmā nārāyaṇa iti śrutiḥ // ### [2.37.76](https://indike.org/pramana/in.purana.kurma.2.37.76) ṛtasya garbho bhagavānāpo māyātanuḥ prabhuḥ / stūyate vividhairmantrairbrāhmaṇairdharmamokṣibhiḥ // ### [2.37.77](https://indike.org/pramana/in.purana.kurma.2.37.77) saṃhṛtya sakalaṃ viśvaṃ kalpānte puruṣottamaḥ / śete yogāmṛtaṃ pītvā yat tad viṣṇoḥ paraṃ padam // ### [2.37.78](https://indike.org/pramana/in.purana.kurma.2.37.78) na jāyate na mriyate vardhate na ca viśvasṛk / mūlaprakṛtiravyaktā gīyate vaidikairajaḥ // ### [2.37.79](https://indike.org/pramana/in.purana.kurma.2.37.79) tato niśāyāṃ vṛttāyāṃ sisṛkṣurakhilañjagat / ajasya nābhau tad bījaṃ kṣipatyeṣa maheśvaraḥ // ### [2.37.80](https://indike.org/pramana/in.purana.kurma.2.37.80) taṃ māṃ vitta mahātmānaṃ brahmāṇaṃ viśvato mukham / mahāntaṃ puruṣaṃ viśvamapāṃ garbhamanuttamam // ### [2.37.81](https://indike.org/pramana/in.purana.kurma.2.37.81) na taṃ vidātha janakaṃ mohitāstasya māyayā / devadevaṃ mahādevaṃ bhūtānāmīśvaraṃ haram // ### [2.37.82](https://indike.org/pramana/in.purana.kurma.2.37.82) eṣa devo mahādevo hyanādirbhagavān haraḥ / viṣṇunā saha saṃyuktaḥ karoti vikaroti ca // ### [2.37.83](https://indike.org/pramana/in.purana.kurma.2.37.83) na tasya vidyate kāryaṃ na tasmād vidyate param / sa vedān pradadau pūrvaṃ yogamāyātanurmama // ### [2.37.84](https://indike.org/pramana/in.purana.kurma.2.37.84) sa māyī māyayā sarvaṃ karoti vikaroti ca / tameva muktaye jñātvā vrajeta śaraṇaṃ bhavam // ### [2.37.85](https://indike.org/pramana/in.purana.kurma.2.37.85) itīritā bhagavatā marīcipramukhā vibhum / praṇamya devaṃ brahmāṇaṃ pṛcchanti sma suduḥ khitāḥ // ### [2.37.86](https://indike.org/pramana/in.purana.kurma.2.37.86) munaya ūcuḥ kathaṃ paśyema taṃ devaṃ punareva pinākinam / brūhi viśvāmareśāna trātā tvaṃ śaraṇaiṣiṇām // ### [2.37.87](https://indike.org/pramana/in.purana.kurma.2.37.87) pitāmaha uvāca yad dṛṣṭaṃ bhavatā tasya liṅgaṃ bhuvi nipātitam / talliṅgānukṛtīśasya kṛtvā liṅgamanuttamam // ### [2.37.88](https://indike.org/pramana/in.purana.kurma.2.37.88) pūjayadhvaṃ sapatnīkāḥ sādaraṃ putrasaṃyutāḥ / vaidikaireva niyamairvividhairbrahmacāriṇaḥ // ### [2.37.89](https://indike.org/pramana/in.purana.kurma.2.37.89) saṃsthāpya śāṅkarairmantrairṛgyajuḥ sāmasaṃbhavaiḥ / tapaḥ paraṃ samāsthāya gṛṇantaḥ śatarudriyam // ### [2.37.90](https://indike.org/pramana/in.purana.kurma.2.37.90) samāhitāḥ pūjayadhvaṃ saputrāḥ saha bandhubhiḥ / sarve prāñjalayo bhūtvā śūlapāṇiṃ prapadyatha // ### [2.37.91](https://indike.org/pramana/in.purana.kurma.2.37.91) tato drakṣyatha deveśaṃ durdarśamakṛtātmabhiḥ / yaṃ dṛṣṭvā sarvamajñānamadharmaśca praṇaśyati // ### [2.37.92](https://indike.org/pramana/in.purana.kurma.2.37.92) tataḥ praṇamya varadaṃ brahmāṇamamitaujasam / jagmuḥ saṃhṛṣṭamanaso devadāruvanaṃ punaḥ // ### [2.37.93](https://indike.org/pramana/in.purana.kurma.2.37.93) ārādhayitumārabdhā brahmaṇā kathitaṃ yathā / ajānantaḥ paraṃ devaṃ vītarāgā vimatsarāḥ // ### [2.37.94](https://indike.org/pramana/in.purana.kurma.2.37.94) sthaṇḍileṣu vicitreṣu parvatānāṃ guhāsu ca / nadīnāṃ ca vivikteṣu pulineṣu śubheṣu ca // ### [2.37.95](https://indike.org/pramana/in.purana.kurma.2.37.95) śaivālabhojanāḥ kecit kecidantarjaleśayāḥ / kecidabhrāvakāśāstu pādāṅguṣṭhāgraviṣṭhitāḥ // ### [2.37.96](https://indike.org/pramana/in.purana.kurma.2.37.96) danto 'lūkhalinastvanye hyaśmakuṭṭāstathā pare / śākaparṇāśinaḥ kecit saṃprakṣālā marīcipāḥ // ### [2.37.97](https://indike.org/pramana/in.purana.kurma.2.37.97) vṛkṣamūlaniketāśca śilāśayyāstathā pare / kālaṃ nayanti tapasā pūjayanto maheśvaram // ### [2.37.98](https://indike.org/pramana/in.purana.kurma.2.37.98) tatasteṣāṃ prasādārthaṃ prapannārtiharo haraḥ / cakā bhagavān buddhiṃ prabodhāya vṛṣadhvajaḥ // ### [2.37.99](https://indike.org/pramana/in.purana.kurma.2.37.99) devaḥ kṛtayuge hyasmin śṛṅge himavataḥ śubhe / devadāruvanaṃ prāptaḥ prasannaḥ parameśvaraḥ // ### [2.37.100](https://indike.org/pramana/in.purana.kurma.2.37.100) bhasmapāṇḍuradigdhāṅgo nagno vikṛtalakṣaṇaḥ / ulmukavyagrahastaśca raktapiṅgalalocanaḥ // ### [2.37.101](https://indike.org/pramana/in.purana.kurma.2.37.101) kvacicca hasate raudraṃ kvacid gāyati vismitaḥ / kvacinnṛtyati śṛṅgārī kvacidrauti muhurmuhuḥ // ### [2.37.102](https://indike.org/pramana/in.purana.kurma.2.37.102) āśrame 'bhyāgato bhikṣāṃ yācate ca punaḥ punaḥ / māyāṃ kṛtvātmano rūpaṃ devastad vanamāgataḥ // ### [2.37.103](https://indike.org/pramana/in.purana.kurma.2.37.103) kṛtvā girisutāṃ gaurīṃ pārśvedevaḥ pinākadhṛk / sā ca pūrvavad deveśī devadāruvanaṃ gatā // ### [2.37.104](https://indike.org/pramana/in.purana.kurma.2.37.104) dṛṣṭvā samāgataṃ devaṃ devyā saha kapardinam / praṇemuḥ śirasā bhūmau toṣayāmāsurīśvaram // ### [2.37.105](https://indike.org/pramana/in.purana.kurma.2.37.105) vaidikairvividhairmantraiḥ sūktairmāheśvaraiḥ śubhaiḥ / atharvaśirasā cānye rudrādyairbrahmabhirbhavam // ### [2.37.106](https://indike.org/pramana/in.purana.kurma.2.37.106) namo devādidevāya mahādevāya te namaḥ / tryambakāya namastubhyaṃ triśūlavaradhāriṇe // ### [2.37.107](https://indike.org/pramana/in.purana.kurma.2.37.107) namo digvāsase tubhyaṃ vikṛtāya pinākine / sarvapraṇatadehāya svayamapraṇatātmane // ### [2.37.108](https://indike.org/pramana/in.purana.kurma.2.37.108) antakāntakṛte tubhyaṃ sarvasaṃharaṇāya ca / namo 'stu nṛtyaśīlāya namo bhairavarūpiṇe // ### [2.37.109](https://indike.org/pramana/in.purana.kurma.2.37.109) naranārīśarīrāya yogināṃ gurave namaḥ / namo dāntāya śāntāya tāpasāya harāya ca // ### [2.37.110](https://indike.org/pramana/in.purana.kurma.2.37.110) vibhīṣaṇāya rudrāya namaste kṛttivāsase / namaste lelihānāya śitikaṇṭhāya te namaḥ // ### [2.37.111](https://indike.org/pramana/in.purana.kurma.2.37.111) aghoraghorarūpāya vāmadevāya vai namaḥ / namaḥ kanakamālāya devyāḥ priyakarāya ca // ### [2.37.112](https://indike.org/pramana/in.purana.kurma.2.37.112) gaṅgāsaliladhārāya śambhave parameṣṭhine / namo yogādhipataye brahmādhipataye namaḥ // ### [2.37.113](https://indike.org/pramana/in.purana.kurma.2.37.113) prāṇāya ca namastubhyaṃ namo bhasmāṅgarāgine / namaste ghanavāhāya daṃṣṭriṇe vahniretase // ### [2.37.114](https://indike.org/pramana/in.purana.kurma.2.37.114) brahmaṇaśca śiro hartre namaste kālarūpiṇe / āgatiṃ te na janīmo gatiṃ naiva ca naiva ca / viśveśvara mahādeva yo 'si so 'si namo 'stu te // ### [2.37.115](https://indike.org/pramana/in.purana.kurma.2.37.115) namaḥ pramathanāthāya dātre ca śubhasaṃpadām / kapālapāṇaye tubhyaṃ namo mīḍhuṣṭamāya te / namaḥ kanakaliṅgāya vāriliṅgāya te namaḥ // ### [2.37.116](https://indike.org/pramana/in.purana.kurma.2.37.116) namo vahnyarkaliṅgāya jñānaliṅgāya te namaḥ / namo bhujaṅgahārāya karṇikārapriyāya ca / kirīṭine kuṇḍaline kālakālāya te namaḥ // ### [2.37.117](https://indike.org/pramana/in.purana.kurma.2.37.117) vāmadeva maheśāna devadeva trilocana / kṣamyatāṃ yatkṛtaṃ mohāt tvameva śaraṇaṃ hi naḥ // ### [2.37.118](https://indike.org/pramana/in.purana.kurma.2.37.118) caritāni vicitrāṇi guhyāni gahanāni ca / brahmādīnāṃ ca sarveṣāṃ durvijñeyo 'si śaṅkara // ### [2.37.119](https://indike.org/pramana/in.purana.kurma.2.37.119) ajñānād yadi vā jñānād yatkiñcitkurute naraḥ / tatsarvaṃ bhagavānena kurute yogamāyayā // ### [2.37.120](https://indike.org/pramana/in.purana.kurma.2.37.120) evaṃ stutvā mahādevaṃ prahṛṣṭenāntarātmanā / ūcuḥ praṇamya giriśaṃ paśyāmastvāṃ yathā purā // ### [2.37.121](https://indike.org/pramana/in.purana.kurma.2.37.121) teṣāṃ saṃstavamākarṇya somaḥ momavibhūṣaṇaḥ / svameva paramaṃ rūpaṃ darśayāmāsa śaṅkaraḥ // ### [2.37.122](https://indike.org/pramana/in.purana.kurma.2.37.122) taṃ te dṛṣṭvātha giriśaṃ devyā saha pinākinam / yathā pūrvaṃ sthitā viprāḥ praṇemurhṛṣṭamānasāḥ // ### [2.37.123](https://indike.org/pramana/in.purana.kurma.2.37.123) tataste munayaḥ sarve saṃstūya ca maheśvaram / bhṛgvaṅgirovasiṣṭhāstu viśvāmitrastathaiva ca // ### [2.37.124](https://indike.org/pramana/in.purana.kurma.2.37.124) gautamo 'triḥ sukeśaśca pulastyaḥ pulahaḥ kratuḥ / marīciḥ kaśyapaścāpi saṃvartaśca mahātapāḥ / praṇamya devadeveśamidaṃ vacanamabruvan // ### [2.37.125](https://indike.org/pramana/in.purana.kurma.2.37.125) kathaṃ tvāṃ devadeveśa karmayogena vā prabho / jñānena vātha yogena pūjayāmaḥ sadaiva hi // ### [2.37.126](https://indike.org/pramana/in.purana.kurma.2.37.126) kena vā devamārgeṇa saṃpūjyo bhagavāniha / kiṃ tat sevyamasevyaṃ vā sarvametad bravīhi naḥ // ### [2.37.127](https://indike.org/pramana/in.purana.kurma.2.37.127) devadeva uvāca etad vaḥ saṃpravakṣyāmi gūḍhaṃ gahanamuttamam / brahmaṇe kathitaṃ pūrvamādāveva maharṣayaḥ // ### [2.37.128](https://indike.org/pramana/in.purana.kurma.2.37.128) sāṃkhyayogo dvidhā jñeyaḥ puruṣāṇāṃ hi sādhanam / yogena sahitaṃ sāṃkhyaṃ puruṣāṇāṃ vimuktidam // ### [2.37.129](https://indike.org/pramana/in.purana.kurma.2.37.129) na kevalena yogena dṛśyate puruṣaḥ paraḥ / jñānaṃ tu kevalaṃ samyagapavargaphalapradam // ### [2.37.130](https://indike.org/pramana/in.purana.kurma.2.37.130) bhavantaḥ kevalaṃ yogaṃ samāśritya vimuktaye / vihāya sāṃkhyaṃ vimalamakurvanta pariśramam // ### [2.37.131](https://indike.org/pramana/in.purana.kurma.2.37.131) etasmāt kāraṇād viprānṛṇāṃ kevaladharmiṇām / āgato 'hamimaṃ deśaṃ jñāpayan mohasaṃbhavam // ### [2.37.132](https://indike.org/pramana/in.purana.kurma.2.37.132) tasmād bhavadbhirvimalaṃ jñānaṃ kaivalyasādhanam / jñātavyaṃ hi prayatnena śrotavyaṃ dṛśyameva ca // ### [2.37.133](https://indike.org/pramana/in.purana.kurma.2.37.133) ekaḥ sarvatrago hyātmā kevalaścitimātrakaḥ / ānando nirmalo nityaṃ syādetat sāṃkhyadarśanam // ### [2.37.134](https://indike.org/pramana/in.purana.kurma.2.37.134) etadeva paraṃ jñānameṣa mokṣo 'tra gīyate / etat kaivalyamamalaṃ brahmabhāvaśca varṇitaḥ // ### [2.37.135](https://indike.org/pramana/in.purana.kurma.2.37.135) āśritya caitat paramaṃ tanniṣṭhāstatparāyaṇāḥ / paśyanti māṃ mahātmāno yatayo viśvamīśvaram // ### [2.37.136](https://indike.org/pramana/in.purana.kurma.2.37.136) etat tat paramaṃ jñānaṃ kevalaṃ sannirañjanam / ahaṃ hi vedyo bhagavān mama mūrtiriyaṃ śivā // ### [2.37.137](https://indike.org/pramana/in.purana.kurma.2.37.137) bahūni sādhanānīha siddhaye kathitāni tu / teṣāmabhyadhikaṃ jñānaṃ māmakaṃ dvijapuṅgavāḥ // ### [2.37.138](https://indike.org/pramana/in.purana.kurma.2.37.138) jñānayogaratāḥ śāntā māmeva śaraṇaṃ gatāḥ / ye hi māṃ bhasmaniratā dhyāyanti satataṃ hṛdi // ### [2.37.139](https://indike.org/pramana/in.purana.kurma.2.37.139) madbhaktiparamā nityaṃ yatayaḥ kṣīṇakalmaṣāḥ / nāśayāmyacirāt teṣāṃ ghoraṃ saṃsārasāgaram // ### [2.37.140](https://indike.org/pramana/in.purana.kurma.2.37.140) praśāntaḥ saṃyatamanā bhasmoddhūlitavigrahaḥ / brahmacaryarato nagno vrataṃ pāśupataṃ caret // ### [2.37.141](https://indike.org/pramana/in.purana.kurma.2.37.141) nirmitaṃ hi mayā pūrvaṃ vrataṃ pāśupataṃ param / guhyād guhyatamaṃ sūkṣmaṃ vedasāraṃ vimuktaye // ### [2.37.142](https://indike.org/pramana/in.purana.kurma.2.37.142) yad vā kaupīnavasanaḥ syād vaikavasano muniḥ / vedābhyāsarato vidvān dhyāyet paśupatiṃ śivam // ### [2.37.143](https://indike.org/pramana/in.purana.kurma.2.37.143) eṣa pāśupato yogaḥ sevanīyo mumukṣubhiḥ / bhasmacchannairhi satataṃ niṣkāmairiti viśrutiḥ // ### [2.37.144](https://indike.org/pramana/in.purana.kurma.2.37.144) vītarāgabhayakrodhā manmayā māmupāśritāḥ / bahavo 'nena yogena pūtā madbhāvamāgatāḥ // ### [2.37.145](https://indike.org/pramana/in.purana.kurma.2.37.145) anyāni caiva śāstrāṇi loke 'smin mohanānitu / vedavādaviruddhāni mayaiva kathitāni tu // ### [2.37.146](https://indike.org/pramana/in.purana.kurma.2.37.146) vāmaṃ pāśupataṃ somaṃ lākulaṃ caiva bhairavam / asevyametat kathitaṃ vedavāhyaṃ tathetaram // ### [2.37.147](https://indike.org/pramana/in.purana.kurma.2.37.147) vedamurtirahaṃ viprā nānyaśāstrārthavedibhiḥ / jñāyate matsvarūpaṃ tu muktvā vedaṃ sanātanam // ### [2.37.148](https://indike.org/pramana/in.purana.kurma.2.37.148) sthāpayadhvamidaṃ mārgaṃ pūjayadhvaṃ maheśvaram / acirādaiśvaraṃ jñānamutpatsyati na saṃśayaḥ // ### [2.37.149](https://indike.org/pramana/in.purana.kurma.2.37.149) mayi bhaktiśca vipulā bhavatāmastu sattamāḥ / dhyātamātro hi sānnidhyaṃ dāsyāmi munisattamāḥ // ### [2.37.150](https://indike.org/pramana/in.purana.kurma.2.37.150) ityuktvā bhagavān somastatraivāntaradhīyata / to 'pi dāruvane tasmin pūjayanti sma śaṅkaram / brahmacaryaratāḥ śāntā jñānayogaparāyaṇāḥ // ### [2.37.151](https://indike.org/pramana/in.purana.kurma.2.37.151) sametya te mahātmāno munayo brahmavādinaḥ / vitenire bahūn vādānnadhyātmajñānasaṃśrayān // ### [2.37.152](https://indike.org/pramana/in.purana.kurma.2.37.152) kimasya jagato mūlamātmā cāsmākameva hi / ko 'pi syāt sarvabhāvānāṃ heturīśvara eva ca // ### [2.37.153](https://indike.org/pramana/in.purana.kurma.2.37.153) ityevaṃ manyamānānāṃ dhyānamārgāvalambinām / āvirāsīnmahādevī devī girivarātmajā // ### [2.37.154](https://indike.org/pramana/in.purana.kurma.2.37.154) koṭisūryapratīkāśā jvālāmālāsamāvṛtā / svabhābhirvimalābhistu pūrayantī nabhastalam // ### [2.37.155](https://indike.org/pramana/in.purana.kurma.2.37.155) tāmanvapaśyan girijāmameyāṃ jvālāsahasrāntarasanniviṣṭām / praṇemurekāmakhileśapatnīṃ jānanti te tat paramasya bījam // ### [2.37.156](https://indike.org/pramana/in.purana.kurma.2.37.156) asamākameṣā parameśapatnī gatistathātmā gaganābhidhānā / paśyantyathātmānamidaṃ ca kṛtsnaṃ tasyāmathaite munayaśca viprāḥ // ### [2.37.157](https://indike.org/pramana/in.purana.kurma.2.37.157) nirīkṣitāste parameśapatnyā tadantare devamaśeṣahetum / paśyanti śaṃbhuṃ kavimīśitāraṃ rudraṃ bṛhantaṃ puruṣaṃ purāṇam // ### [2.37.158](https://indike.org/pramana/in.purana.kurma.2.37.158) ālokya devīmatha devamīśaṃ praṇemurānandamavāpuragryam / jñānaṃ tadaiśaṃ bhagavatprasādā- dāvirbabhau janmavināśahetu // ### [2.37.159](https://indike.org/pramana/in.purana.kurma.2.37.159) iyaṃ hi sā jagato yonirekā sarvātmikā sarvaniyāmikā ca / māheśvarīśaktiranādisiddhā vyomābhidhānā divi rājatīva // ### [2.37.160](https://indike.org/pramana/in.purana.kurma.2.37.160) asyā mahatparameṣṭhī parastā- nmaheśvaraḥ śiva eko 'tha rudraḥ / cakāra viśvaṃ paraśaktiniṣṭhāṃ māyāmathāruhya sa devadevaḥ // ### [2.37.161](https://indike.org/pramana/in.purana.kurma.2.37.161) eko devaḥ sarvabhūteṣu gūḍho māyī rudraḥ sakalo niṣkalaśca / sa eva devī na ca tadvibhinna- metajjñātvā hyamṛtatvaṃ vrajanti // ### [2.37.162](https://indike.org/pramana/in.purana.kurma.2.37.162) antarhito 'bhūd bhagavānatheśo devyā bhargaḥ saha devādidevaḥ / ārādhayanti sma tameva devaṃ vanaukasaste punareva rudram // ### [2.37.163](https://indike.org/pramana/in.purana.kurma.2.37.163) etad vaḥ kathitaṃ sarvaṃ devadevaviceṣṭitam / devadāruvane pūrvaṃ purāṇe yanmayā śrutam // ### [2.37.164](https://indike.org/pramana/in.purana.kurma.2.37.164) yaḥ paṭhecchṛṇuyānnityaṃ mucyate sarvapātakaiḥ / śrāvayed vā dvijān śāntān sa yāti paramāṃ gatim // ### [2.37.164.p1](https://indike.org/pramana/in.purana.kurma.2.37.164.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge saptatriṃśo 'dhyāyaḥ ## Linked texts (3) - [Padmapurāṇa](https://indike.org/pramana/in.purana.padma.4.13.4) — Vyāsa, Sanskrit - [Skanda Purāṇa (Kumāra Kavi)](https://indike.org/pramana/in.purana.skandapurana.60.17) — Kumāra Kavi, Sanskrit - [Kriyāsāra (ed. Mallikārjuna Śāstrī)](https://indike.org/pramana/in.sampradaya.saiva.virasaiva.kriyasara*sastri1910.2.127) — Sanskrit --- Source: [https://indike.org/pramana/in.purana.kurma.2.37](https://indike.org/pramana/in.purana.kurma.2.37) · Pramāṇa