[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.38 # Kurmapurana 2.38: aṣṭatriṃśo'dhyāyaḥ Kūrmapurāṇa 2.38 - **Language:** Sanskrit ## Contents - [2.38.40](https://indike.org/pramana/in.purana.kurma.2.38.40) — 1 part ### aṣṭatriṃśo'dhyāyaḥ ### [2.38.1](https://indike.org/pramana/in.purana.kurma.2.38.1) sūta uvāca eṣā puṇyatamā devī devagandharvasevitā / narmadā lokavikhyātā tīrthānāmuttamā nadī // ### [2.38.2](https://indike.org/pramana/in.purana.kurma.2.38.2) tasyāḥ śṛṇudhvaṃ māhātmyaṃ mārkaṇḍeyena bhāṣitam / yudhiṣṭhirāya tu śubhaṃ sarvapāpapraṇāśanam // ### [2.38.3](https://indike.org/pramana/in.purana.kurma.2.38.3) yudhiṣṭhira uvāca śrutāstu vividhā dharmāstvatprasādānmahāmune / māhātmyaṃ ca prayāgasya tīrthāni vividhāni ca // ### [2.38.4](https://indike.org/pramana/in.purana.kurma.2.38.4) narmadā sarvatīrthānāṃ mukhyā hi bhavateritā / tasyāstvidānīṃ māhātmyaṃ vaktumarhasi sattama // ### [2.38.5](https://indike.org/pramana/in.purana.kurma.2.38.5) mārkaṇḍeya uvāca narmadā saritāṃ śreṣṭhā rudradehād viniḥ sṛtā / tārayet sarvabhūtāni sthāvarāṇi carāṇi ca // ### [2.38.6](https://indike.org/pramana/in.purana.kurma.2.38.6) narmadāyāstu māhātmyaṃ purāṇe yanmayā śrutam / idānīṃ tatpravakṣyāmi śṛṇuṣvaikamanāḥ śubham // ### [2.38.7](https://indike.org/pramana/in.purana.kurma.2.38.7) puṇyā kanakhale gaṅgā kurukṣetre sarasvatī / grāme vā yadi vāraṇye puṇyā sarvatra narmadā // ### [2.38.8](https://indike.org/pramana/in.purana.kurma.2.38.8) tribhiḥ sārasvataṃ toyaṃ saptāhena tu yāmunam / sadyaḥ punāti gāṅgeyaṃ darśanādeva nārmadam // ### [2.38.9](https://indike.org/pramana/in.purana.kurma.2.38.9) kaliṅgadeśapaścārdhe parvate 'marakaṇṭake / puṇyā ca triṣu lokeṣu ramaṇīyā manoramā // ### [2.38.10](https://indike.org/pramana/in.purana.kurma.2.38.10) sadevāsuragandharvā ṛṣayaśca tapodhanāḥ / tapastaptvā tu rājendra siddhiṃ tu paramāṃ gatāḥ // ### [2.38.11](https://indike.org/pramana/in.purana.kurma.2.38.11) tatra snātvā naro rājan niyamastho jitendriyaḥ / upoṣya rajanīmekāṃ kulānāṃ tārayecchatam // ### [2.38.12](https://indike.org/pramana/in.purana.kurma.2.38.12) yojanānāṃ śataṃ sāgraṃ śrūyate sariduttamā / vistāreṇa tu rājendra yojanadvayamāyatā // ### [2.38.13](https://indike.org/pramana/in.purana.kurma.2.38.13) ṣaṣṭitīrthasahasrāṇi ṣaṣṭikoṭyastathaiva ca / parvatasya samantāt tu tiṣṭhantyamarakaṇṭake // ### [2.38.14](https://indike.org/pramana/in.purana.kurma.2.38.14) brahmacārī śucirbhūtvā jitakrodho jitendriyaḥ / sarvahiṃsānivṛttastu sarvabhūtahite rataḥ // ### [2.38.15](https://indike.org/pramana/in.purana.kurma.2.38.15) evaṃ sarvasamācāro yastu prāṇān samutsṛjet / tasya puṇyaphalaṃ rājan śṛṇuṣvāvahito nṛpa // ### [2.38.16](https://indike.org/pramana/in.purana.kurma.2.38.16) śatavarṣasahasrāṇi svarge modati pāṇḍava / sapsarogaṇasaṃkīrṇo divyastrīparivāritaḥ // ### [2.38.17](https://indike.org/pramana/in.purana.kurma.2.38.17) divyagandhānuliptaśca divyapuṣpopaśobhitaḥ / krīḍate devaloke tu daivataiḥ saha modate // ### [2.38.18](https://indike.org/pramana/in.purana.kurma.2.38.18) tataḥ svargāt paribhraṣṭo rājā bhavati dhārmikaḥ / gṛhaṃ tu labhate 'sau vai nānāratnasamanvitam // ### [2.38.19](https://indike.org/pramana/in.purana.kurma.2.38.19) stambhairmaṇimayairdivyairvajravaidūryabhūṣitam / ālekhyavāhanaiḥ śubhrairdāsīdāsasamanvitam // ### [2.38.20](https://indike.org/pramana/in.purana.kurma.2.38.20) rājarājeśvaraḥ śrīmān sarvastrījanavallabhaḥ / jīved varṣaśataṃ sāgraṃ tatra bhogasamanvitaḥ // ### [2.38.21](https://indike.org/pramana/in.purana.kurma.2.38.21) agnipraveśe 'tha jale athavānaśane kṛte / anivartikā gatistasya pavanasyāmbare yathā // ### [2.38.22](https://indike.org/pramana/in.purana.kurma.2.38.22) paścime parvatataṭe sarvapāpavināśanaḥ / hrado jaleśvaro nāma triṣu lokeṣu viśrutaḥ // ### [2.38.23](https://indike.org/pramana/in.purana.kurma.2.38.23) tatra piṇḍapradānena saṃdhyopāsanakarmaṇā / daśavarṣāṇi pitarastarpitāḥ syurna saṃśayaḥ // ### [2.38.24](https://indike.org/pramana/in.purana.kurma.2.38.24) dakṣiṇe narmadākūle kapilākhyā mahānadī / saralārjunasaṃcchannā nātidūre vyavasthitā // ### [2.38.25](https://indike.org/pramana/in.purana.kurma.2.38.25) sā tu puṇyā mahābhāgā triṣu lokeṣu viśrutā / tatra koṭiśataṃ sāgraṃ tīrthānāṃ tu yudhiṣṭhira // ### [2.38.26](https://indike.org/pramana/in.purana.kurma.2.38.26) tasmiṃstīrthe tu ye vṛkṣāḥ patitāḥ kālaparyayāt / narmadātoyasaṃspṛṣṭāste yānti paramāṃ gatim // ### [2.38.27](https://indike.org/pramana/in.purana.kurma.2.38.27) dvitīyā tu mahābhāgā viśalyakaraṇī śubhā / tatra tīrthe naraḥ snātvā viśalyo bhavati kṣaṇāt // ### [2.38.28](https://indike.org/pramana/in.purana.kurma.2.38.28) kapilā ca viśalyā ca śrūyate rājasattama / īśvareṇa purā proktā lokānāṃ hitakāmyayā // ### [2.38.29](https://indike.org/pramana/in.purana.kurma.2.38.29) anāśakaṃ tu yaḥ kuryāt tasmiṃstīrthe narādhipa / sarvapāpaviśuddhātmā rudralokaṃ sa gacchati // ### [2.38.30](https://indike.org/pramana/in.purana.kurma.2.38.30) tatra snātvā naro rājannaśvamedhaphalaṃ labhet / ye vasantyuttare kūle rudraloke vasanti te // ### [2.38.31](https://indike.org/pramana/in.purana.kurma.2.38.31) sarasvatyāṃ ca gaṅgāyāṃ narmadāyāṃ yudhiṣṭhira / samaṃ snānaṃ ca dānaṃ ca yathā me śaṅkaro 'bravīt // ### [2.38.32](https://indike.org/pramana/in.purana.kurma.2.38.32) parityajati yaḥ praṇān parvate 'marakaṇṭake / varṣakoṭiśataṃ sāgraṃ rudraloke mahīyate // ### [2.38.33](https://indike.org/pramana/in.purana.kurma.2.38.33) narmadāyāṃ jalaṃ puṇyaṃ phenormisamalaṅkṛtam / pavitraṃ śirasā vandya sarvapāpaiḥ pramucyate // ### [2.38.34](https://indike.org/pramana/in.purana.kurma.2.38.34) narmadā sarvataḥ puṇyā brahmahatyāpahāriṇī / ahorātropavāsena mucyate brahmahatyayā // ### [2.38.35](https://indike.org/pramana/in.purana.kurma.2.38.35) jāleśvaraṃ tīrthavaraṃ sarvapāpavināśanam / tatra gatvā niyamavān sarvakāmāṃllabhennaraḥ // ### [2.38.36](https://indike.org/pramana/in.purana.kurma.2.38.36) candrasūryoparāge tu gatvā hyamarakaṇṭakam / aśvamedhād daśaguṇaṃ puṇyamāpnoti mānavaḥ // ### [2.38.37](https://indike.org/pramana/in.purana.kurma.2.38.37) eṣa puṇyo girivaro devagandharvasevitaḥ / nānādrumalatākīrṇo nānāpuṣpopaśobhitaḥ // ### [2.38.38](https://indike.org/pramana/in.purana.kurma.2.38.38) tatra saṃnihito rājan devyā saha maheśvaraḥ / brahmā viṣṇustathā cendro vidyādharagaṇaiḥ saha // ### [2.38.39](https://indike.org/pramana/in.purana.kurma.2.38.39) pradakṣiṇaṃ tu yaḥ kuryāt parvataṃ hyamarakaṇṭakam / pauṇḍarīkasya yajñasya phalaṃ prāpnoti mānaḥ // ### [2.38.40](https://indike.org/pramana/in.purana.kurma.2.38.40) kāverī nāma vipulā nadī kalpaṣanāśinī / tatra snātvā mahādevamarcayed vṛṣabhadhvajam / saṃgame narmadāyāstu rudraloke mahīyate // ### [2.38.40.p1](https://indike.org/pramana/in.purana.kurma.2.38.40.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge aṣṭātriśo 'dhyāyaḥ ## Linked texts (7) - [Revākhaṇḍa (Vāyupurāṇa)](https://indike.org/pramana/in.purana.vayu.revakhanda.21.5) — Sanskrit - [Yoginītantra](https://indike.org/pramana/in.sampradaya.general.sakta.yoginitantra.30.32) — Sanskrit - [Revākhaṇḍa (Skandapurāṇa)](https://indike.org/pramana/in.purana.skanda.revakhanda.61.1) — Sanskrit - [Southern recension](https://indike.org/pramana/in.lit.mahabharata.vyasa*southern.12.375.9_11162) — Sanskrit - [Varāhapurāṇa](https://indike.org/pramana/in.purana.varaha.120.18) — Vyāsa, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.21.5.21.4.p1) — Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p237.3) — Mitramiśra, Sanskrit --- Source: [https://indike.org/pramana/in.purana.kurma.2.38](https://indike.org/pramana/in.purana.kurma.2.38) · Pramāṇa