[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.42 # Kurmapurana 2.42: dvicatvāriṃśo'dhyāyaḥ Kūrmapurāṇa 2.42 - **Language:** Sanskrit ## Contents - [2.42.24](https://indike.org/pramana/in.purana.kurma.2.42.24) — 1 part ### dvicatvāriṃśo'dhyāyaḥ ### [2.42.1](https://indike.org/pramana/in.purana.kurma.2.42.1) sūta uvāca anyacca tīrthapravaraṃ japyeśvarasamīpataḥ / nāmnā pañcanadaṃ puṇyaṃ sarvapāpapraṇāśanam // ### [2.42.2](https://indike.org/pramana/in.purana.kurma.2.42.2) trirātropoṣitastatra pūjayitvā maheśvaram / sarvapāpaviśuddhātmā rudraloke mahīyate // ### [2.42.3](https://indike.org/pramana/in.purana.kurma.2.42.3) anyacca tīrthapravaraṃ śaṅkarasyāmitaujasaḥ / mahābhairavamityuktaṃ mahāpātakanāśanam // ### [2.42.4](https://indike.org/pramana/in.purana.kurma.2.42.4) tīrthānāṃ ca paraṃ tīrthaṃ vitastā paramā nadī / sarvapāpaharā puṇyā svayameva girīndrajā // ### [2.42.5](https://indike.org/pramana/in.purana.kurma.2.42.5) tīrthaṃ pañcatapaṃ nāma śaṃbhoramitatejasaḥ / yatra devādidevena cakrārthaṃ pūjito bhavaḥ // ### [2.42.6](https://indike.org/pramana/in.purana.kurma.2.42.6) piṇḍadānādikaṃ tatra pretyānantaphalapradam / mṛtastatrāpi niyamād brahmaloke mahīyate // ### [2.42.7](https://indike.org/pramana/in.purana.kurma.2.42.7) kāyāvarohaṇaṃ nāma mahādevālayaṃ śubham / yatra māheśvarā dharmā munibhiḥ saṃpravartitāḥ // ### [2.42.8](https://indike.org/pramana/in.purana.kurma.2.42.8) śrāddhaṃ dānaṃ tapo homa upavāsastathākṣayaḥ / parityajati yaḥ prāṇān rudralokaṃ sa gacchati // ### [2.42.9](https://indike.org/pramana/in.purana.kurma.2.42.9) anyacca tīrthapravaraṃ kanyātīrthamiti śrutam / tatra gatvā tyajet prāṇāṃllokān prāpnoti śāśvatān // ### [2.42.10](https://indike.org/pramana/in.purana.kurma.2.42.10) jāmadagnyasya tu śubhaṃ rāmasyākliṣṭakarmaṇaḥ / tatra snātvā tīrtha vare gosahasraphalaṃ labhet // ### [2.42.11](https://indike.org/pramana/in.purana.kurma.2.42.11) mahākālamiti khyātaṃ tīrthaṃ trailokyaviśrutam / gatvā prāṇān parityajya gāṇapatyamavāpnuyāt // ### [2.42.12](https://indike.org/pramana/in.purana.kurma.2.42.12) guhyād guhyatamaṃ tīrthaṃ nakulīśvaramuttamam / tatra sannihitaḥ śrīmān bhagavān nakulīśvaraḥ // ### [2.42.13](https://indike.org/pramana/in.purana.kurma.2.42.13) himavacchikhare ramye gaṅgādvāre suśobhane / devyā saha mahādevo nityaṃ śiṣyaiśca saṃvṛtaḥ // ### [2.42.14](https://indike.org/pramana/in.purana.kurma.2.42.14) tatra snātvā mahādevaṃ pūjayitvā vṛṣadhvajam / sarvapāpairvimucyeta mṛtastajjñānamāpnuyāt // ### [2.42.15](https://indike.org/pramana/in.purana.kurma.2.42.15) anyacca devadevasya sthānaṃ puṇyatamaṃ śubham / bhīmeśvaramiti khyātaṃ gatvā muñcati pātakam // ### [2.42.16](https://indike.org/pramana/in.purana.kurma.2.42.16) tathānyaccaṇḍavegāyāḥ saṃbhedaḥ pāpanāśanaḥ / tatra snātvā ca pītvā ca mucyate brahmahatyayā // ### [2.42.17](https://indike.org/pramana/in.purana.kurma.2.42.17) sarveṣāmapi caiteṣāṃ tīrthānāṃ paramā purī / nāmnāvārāṇasī divyā koṭikoṭyayutādhikā // ### [2.42.18](https://indike.org/pramana/in.purana.kurma.2.42.18) tasyāḥ purastānmāhātmyaṃ bhāṣitaṃ vo mayā tviha / nānyatra labhyate muktiryogināpyekajanmanā // ### [2.42.19](https://indike.org/pramana/in.purana.kurma.2.42.19) ete prādhānyataḥ proktā deśāḥ pāpaharā nṛṇām / gatvā saṃkṣālayet pāpaṃ janmāntaraśataiḥ kṛtam // ### [2.42.20](https://indike.org/pramana/in.purana.kurma.2.42.20) yaḥ svadharmān parityajya tīrthasevāṃ karoti hi / na tasya phalate tīrthamahi loke paratra ca // ### [2.42.21](https://indike.org/pramana/in.purana.kurma.2.42.21) prāyaścittī ca vidhurastathā pāpacaro gṛhī / prakuryāt tīrthasaṃsevāṃ ye cānye tādṛśā janāḥ // ### [2.42.22](https://indike.org/pramana/in.purana.kurma.2.42.22) sahāgnirvā sapatnīko gacchet tīrthāni yatnataḥ / sarvapāpavinirmukto yathoktāṃ gatimāpnuyāt // ### [2.42.23](https://indike.org/pramana/in.purana.kurma.2.42.23) ṛṇāni trīṇyapākṛtya kuryād vā tīrthasevanam / vidhāya vṛttiṃ putrāṇāṃ bhāryāṃ teṣu nidhāya ca // ### [2.42.24](https://indike.org/pramana/in.purana.kurma.2.42.24) prāyaścittaprasaṅgena tīrthamāhātmyamīritam / yaḥ paṭhecchṛṇuyād vāpi mucyate sarvapātakaiḥ // ### [2.42.24.p1](https://indike.org/pramana/in.purana.kurma.2.42.24.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge dvicatvāriṃśo 'dhyāyaḥ ## Linked texts (1) - [Skanda Purāṇa (Kumāra Kavi)](https://indike.org/pramana/in.purana.skandapurana.61.81) — Kumāra Kavi, Sanskrit --- Source: [https://indike.org/pramana/in.purana.kurma.2.42](https://indike.org/pramana/in.purana.kurma.2.42) · Pramāṇa