[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.43 # Kurmapurana 2.43: tricatvāriṃśo'dhyāyaḥ Kūrmapurāṇa 2.43 - **Language:** Sanskrit ## Contents - [2.43.59](https://indike.org/pramana/in.purana.kurma.2.43.59) — 1 part ### tricatvāriṃśo'dhyāyaḥ ### [2.43.1](https://indike.org/pramana/in.purana.kurma.2.43.1) sūta uvāca etadākarṇya vijñānaṃ nārāyaṇamukheritam / kūrmarūpadharaṃ devaṃ papracchurmunayaḥ prabhum // ### [2.43.2](https://indike.org/pramana/in.purana.kurma.2.43.2) munaya ūcuḥ kathitā bhavatā dharmā mokṣajñānaṃ savistaram / lokānāṃ sargavistāraṃ vaṃśamanvantarāṇi ca // ### [2.43.3](https://indike.org/pramana/in.purana.kurma.2.43.3) pratisargamidānīṃ no vaktumarhasī mādhava / bhūtānāṃ bhūtabhavyeśa yathā pūrvaṃ tvayoditam // ### [2.43.4](https://indike.org/pramana/in.purana.kurma.2.43.4) sūta uvāca śrutvā teṣāṃ tadā vākyaṃ bhagavān kūrmarūpadhṛk / vyājahāra mahāyogī bhūtānāṃ pratisaṃcaram // ### [2.43.5](https://indike.org/pramana/in.purana.kurma.2.43.5) kūrma uvāca nityo naimittikaścaiva prākṛtātyantikau tathā / caturdhāyaṃ purāṇe 'smin procyate pratisaṃcaraḥ // ### [2.43.6](https://indike.org/pramana/in.purana.kurma.2.43.6) yo 'yaṃ saṃdṛśyate nityaṃ loke bhūtakṣayastviha / nityaḥ saṃkīrtyate nāmnā munibhiḥ pratisaṃcaraḥ // ### [2.43.7](https://indike.org/pramana/in.purana.kurma.2.43.7) brāhmo naimittiko nāma kalpānte yo bhaviṣyati / trailokyasyāsya kathitaḥ pratisargo manīṣibhiḥ // ### [2.43.8](https://indike.org/pramana/in.purana.kurma.2.43.8) mahādādyāṃ viśeṣāntaṃ yadā saṃyāti saṃkṣayam / prākṛtaḥ pratisargo 'yaṃ procyate kālacintakaiḥ // ### [2.43.9](https://indike.org/pramana/in.purana.kurma.2.43.9) jñānādātyantikaḥ prokto yoginaḥ paramātmani / pralayaḥ pratisargo 'yaṃ kālacintāparairdvijaiḥ // ### [2.43.10](https://indike.org/pramana/in.purana.kurma.2.43.10) ātyantikaśca kathitaḥ pralayo 'tra sasādhanaḥ / naimittikamidānīṃ vaḥ kathayiṣye samāsataḥ // ### [2.43.11](https://indike.org/pramana/in.purana.kurma.2.43.11) caturyugasahasrānte saṃprāpte pratisaṃcare / svātmasaṃsthāḥ prajāḥ kartuṃ pratipede prajāpatiḥ // ### [2.43.12](https://indike.org/pramana/in.purana.kurma.2.43.12) tato bhavatyanāvṛṣṭistīvrā sā śatavārṣikī / bhūtakṣayakarī ghorā sarvabhūtakṣayaṅkarī // ### [2.43.13](https://indike.org/pramana/in.purana.kurma.2.43.13) tato yānyalpasārāṇi sattvāni pṛthivītale / tāni cāgre pralīyante bhūmitvamupayānti ca // ### [2.43.14](https://indike.org/pramana/in.purana.kurma.2.43.14) saptaraśmiratho bhūtvā samuttiṣṭhan divākaraḥ / asahyaraśmirbhavati pibannambho gabhastibhiḥ // ### [2.43.15](https://indike.org/pramana/in.purana.kurma.2.43.15) tasya te raśmayaḥ sapta pibantyambu mahārṇave / tenāhāreṇa tā dīptāḥ sūryāḥ sapta bhavantyuta // ### [2.43.16](https://indike.org/pramana/in.purana.kurma.2.43.16) tataste raśmayaḥ sapta sūryā bhūtvā caturdiśam / caturlokamidaṃ sarvaṃ dahanti śikhinastathā // ### [2.43.17](https://indike.org/pramana/in.purana.kurma.2.43.17) vyāpnuvantaśca te viprāstūrdhvaṃ cādhaśca raśmibhiḥ / dīpyante bhāskarāḥ sapta yugāntāgnipratāpinaḥ // ### [2.43.18](https://indike.org/pramana/in.purana.kurma.2.43.18) te sūryā vāriṇā dīptā bahusāhastraraśmayaḥ / khaṃ samāvṛtya tiṣṭhanti nirdahanto vasuṃdharām // ### [2.43.19](https://indike.org/pramana/in.purana.kurma.2.43.19) tatasteṣāṃ pratāpena dahyamānā vasuṃdharā / sādrinadyarṇavadvīpā nisnehā samapadyata // ### [2.43.20](https://indike.org/pramana/in.purana.kurma.2.43.20) dīptābhiḥ saṃtatābhiśca raśmibhirvai samantataḥ / adhaścordhvaṃ ca lagnābhistiryak caiva samāvṛtam // ### [2.43.21](https://indike.org/pramana/in.purana.kurma.2.43.21) sūryāgninā pramṛṣṭānāṃ saṃsṛṣṭānāṃ parasparam / ekatvamupayātānāmekajvālaṃ bhavatyuta // ### [2.43.22](https://indike.org/pramana/in.purana.kurma.2.43.22) sarvalokapraṇāśaśca so 'gnirbhūtvā sukuṇḍalī / caturlokamidaṃ sarvaṃ nirdahatyātmatejasā // ### [2.43.23](https://indike.org/pramana/in.purana.kurma.2.43.23) tataḥ pralīne sarvasmiñ jaṅgame sthāvare tathā / nirvṛkṣā nistṛṇā bhūmiḥ kūrmapṛṣṭhā prakāśate // ### [2.43.24](https://indike.org/pramana/in.purana.kurma.2.43.24) ambarīṣamivābhāti sarvamāpūritaṃ jagat / sarvameva tadarcirbhiḥ pūrṇaṃ jājvalyate punaḥ // ### [2.43.25](https://indike.org/pramana/in.purana.kurma.2.43.25) pātāle yāni sattvāni mahodadhigatāni ca / tatastāni pralīyante bhūmitvamupayānti ca // ### [2.43.26](https://indike.org/pramana/in.purana.kurma.2.43.26) dvīpāṃśca parvatāṃścaiva varṣāṇyatha mahodadhīn / tān sarvān bhasmasāt kṛtvā saptātmā pāvakaḥ prabhuḥ // ### [2.43.27](https://indike.org/pramana/in.purana.kurma.2.43.27) samudrebhyo nadībhyaśca pātālebhyaśca sarvaśaḥ / pibannapaḥ samiddho 'gniḥ pṛthivīmāśrito jvalan // ### [2.43.28](https://indike.org/pramana/in.purana.kurma.2.43.28) tataḥ saṃvartakaḥ śailānatikramya mahāṃstathā / lokān dahati dīptātmā rudratejovijṝmbhitaḥ // ### [2.43.29](https://indike.org/pramana/in.purana.kurma.2.43.29) sa dagdhvā pṛthivīṃ devo rasātalamaśoṣayat / adhastāt pṛthivīṃ dagdhvā divamūrdhvaṃ dahiṣyati // ### [2.43.30](https://indike.org/pramana/in.purana.kurma.2.43.30) yojanānāṃ śatānīha sahasrāṇyayutāni ca / uttiṣṭhanti śikhāstasya vahneḥ saṃvartakasya tu // ### [2.43.31](https://indike.org/pramana/in.purana.kurma.2.43.31) gandharvāṃśca piśācāṃśca sayakṣoragarākṣasān / tadā dahatyasau dīptaḥ kālarudrapracoditaḥ // ### [2.43.32](https://indike.org/pramana/in.purana.kurma.2.43.32) bhūrlokaṃ ca bhuvarlokaṃ svarlokaṃ ca tathā mahaḥ / dahedaśeṣaṃ kālāgniḥ kālo viśvatanuḥ svayam // ### [2.43.33](https://indike.org/pramana/in.purana.kurma.2.43.33) vyāpteṣveteṣu lokeṣu tiryagūrdhvamathāgninā / tat tejaḥ samanuprāpya kṛtsnaṃ jagadidaṃ śanaiḥ / ayoguḍanibhaṃ sarvaṃ tadā caikaṃ prakāśate // ### [2.43.34](https://indike.org/pramana/in.purana.kurma.2.43.34) tato gajakulonnādāstaḍidbhiḥ samalaṅkṛtāḥ / uttiṣṭhanti tadā vyomni ghorāḥ saṃvartakā ghanāḥ // ### [2.43.35](https://indike.org/pramana/in.purana.kurma.2.43.35) kecinnīlotpalaśyāmāḥ kecit kumudasannibhāḥ / dhūmravarṇāstathā kecit kecit pītāḥ payodharāḥ // ### [2.43.36](https://indike.org/pramana/in.purana.kurma.2.43.36) kecid rāsabhavarṇāstu lākṣārasanibhāstathā / śaṅkhakundanibhāścānye jātyañjananibhāḥ pare // ### [2.43.37](https://indike.org/pramana/in.purana.kurma.2.43.37) manaḥ śilābhāstvanye ca kapotasadṛśāḥ pare / indragopanibhāḥ keciddharitālanibhāstathā / indracāpanibhāḥ keciduttiṣṭhanti ghanā divi // ### [2.43.38](https://indike.org/pramana/in.purana.kurma.2.43.38) kecit parvatasaṃkāśāḥ kecid gajakulopamāḥ / kūṭāṅgāranibhāścānye kecinmīnakulodvahāḥ / bahūrūpā ghorūpā ghorasvaraninādinaḥ // ### [2.43.39](https://indike.org/pramana/in.purana.kurma.2.43.39) tadā jaladharāḥ sarve pūrayanti nabhaḥ sthalam / tataste jaladā ghorā rāviṇo bhāskarātmajāḥ / saptadhā saṃvṛtātmānastamagniṃ śamayantyuta // ### [2.43.40](https://indike.org/pramana/in.purana.kurma.2.43.40) tataste jaladā varṣaṃ muñcantīha mahaughavat / sughoramaśivaṃ sarvaṃ nāśayanti ca pāvakam // ### [2.43.41](https://indike.org/pramana/in.purana.kurma.2.43.41) pravṛṣṭe ca tadātyarthamambhasā pūryate jagat / adbhistejobhibhūtatvāt tadāgniḥ praviśatyapaḥ // ### [2.43.42](https://indike.org/pramana/in.purana.kurma.2.43.42) naṣṭe cāgnau varṣaśataiḥ payodāḥ kṣayasaṃbhavāḥ / plāvayanto 'tha bhuvanaṃ mahājalaparistravaiḥ // ### [2.43.43](https://indike.org/pramana/in.purana.kurma.2.43.43) dhārābhiḥ pūrayantīdaṃ codyamānāḥ svayaṃbhuvā / atyantasalilaughaiśca velā iva mahodadhiḥ // ### [2.43.44](https://indike.org/pramana/in.purana.kurma.2.43.44) sādridvīpā tathā pṛthvī jalaiḥ saṃcchādyate śanaiḥ / ādityaraśmibhiḥ pītaṃ jalamabhreṣu tiṣṭhati / punaḥ patati tad bhūmau pūryante tena cārṇavāḥ // ### [2.43.45](https://indike.org/pramana/in.purana.kurma.2.43.45) tataḥ samudrāḥ svāṃ velāmatikrāntāstu kṛtsnaśaḥ / parvatāśca vilīyante mahī cāpsu nimajjati // ### [2.43.46](https://indike.org/pramana/in.purana.kurma.2.43.46) tasminnekārṇave ghore naṣṭe sthāvarajaṅgame / yoganindrāṃ samāsthāya śete devaḥ prajāpatiḥ // ### [2.43.47](https://indike.org/pramana/in.purana.kurma.2.43.47) caturyugasahasrāntaṃ kalpamāhurmaharṣayaḥ / vārāho vartate kalpo yasya vistāra īritaḥ // ### [2.43.48](https://indike.org/pramana/in.purana.kurma.2.43.48) asaṃkhyātāstathā kalpā brahmaviṣṇuśivātmakāḥ / kathitā hi purāṇeṣu munibhiḥ kālacintakaiḥ // ### [2.43.49](https://indike.org/pramana/in.purana.kurma.2.43.49) sāttvikeṣvatha kalpeṣu māhātmyamadhikaṃ hareḥ / tāmaseṣu harasyoktaṃ rājaseṣu prajāpateḥ // ### [2.43.50](https://indike.org/pramana/in.purana.kurma.2.43.50) yo 'yaṃ pravartate kalpo vārāhaḥ sāttviko mataḥ / anye ca sāttvikāḥ kalpā mama teṣu parigrahaḥ // ### [2.43.51](https://indike.org/pramana/in.purana.kurma.2.43.51) dhyānaṃ tapastathā jñānaṃ labdhvā teṣveva yoginaḥ / ārādhya giriśaṃ māṃ ca yānti tat paramaṃ padam // ### [2.43.52](https://indike.org/pramana/in.purana.kurma.2.43.52) so 'haṃ sattvaṃ samāsthāya māyī māyāmayīṃ svayam / ekārṇave jagatyasmin yoganidrāṃ vrajāmi tu // ### [2.43.53](https://indike.org/pramana/in.purana.kurma.2.43.53) māṃ paśyanti mahātmānaḥ suptaṃ kālaṃ maharṣayaḥ / janaloke vartamānāstapasā yogacakṣuṣā // ### [2.43.54](https://indike.org/pramana/in.purana.kurma.2.43.54) ahaṃ purāṇapuruṣo bhūrbhuvaḥ prabhavo vibhuḥ / sahasracaraṇaḥ śrīmān sahasrāṃśuḥ sahasradṛk // ### [2.43.55](https://indike.org/pramana/in.purana.kurma.2.43.55) mantro 'gnirbrāhmiṇā gāvaḥ kuśāśca samidho hyaham / prokṣaṇī ca śruvaścaiva somo ghṛtamathāsmyaham // ### [2.43.56](https://indike.org/pramana/in.purana.kurma.2.43.56) saṃvartako mahānātmā pavitraṃ paramaṃ yaśaḥ / vedo vedyaṃ prabhurgoptā gopatirbrahmaṇo mukham // ### [2.43.57](https://indike.org/pramana/in.purana.kurma.2.43.57) anantastārako yogī gatirgatimatāṃ varaḥ / haṃsaḥ prāṇo 'tha kapilo viśvamūrtiḥ sanātanaḥ // ### [2.43.58](https://indike.org/pramana/in.purana.kurma.2.43.58) kṣetrajñaḥ prakṛtiḥ kālo jagadbījamathāmṛtam / mātā pitā mahādevo matto hyanyanna vidyate // ### [2.43.59](https://indike.org/pramana/in.purana.kurma.2.43.59) ādityavarṇo bhuvanasya goptā nārāyaṇaḥ puruṣo yogamūrtiḥ / māṃ paśyanti yatayo yoganiṣṭhā jñātvātmānamamṛtatvaṃ vrajanti // ### [2.43.59.p1](https://indike.org/pramana/in.purana.kurma.2.43.59.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge tricatvāriṃśo 'dhyāyaḥ ## Linked texts (4) - [Vāyupurāṇa](https://indike.org/pramana/in.purana.vayu.2.38.143) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.3.1.139) — Vyāsa, Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.6.3.32) — Sanskrit - [Vīraśaivānandacandrikā (Maritontadārya)](https://indike.org/pramana/in.sampradaya.saiva.virasaiva.virasaivanandacandrika-maritontadarya.32.4) — Maritontadārya 1725, Sanskrit --- Source: [https://indike.org/pramana/in.purana.kurma.2.43](https://indike.org/pramana/in.purana.kurma.2.43) · Pramāṇa