[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.44 # Kurmapurana 2.44: catuścatvāriṃśo'dhyāyaḥ Kūrmapurāṇa 2.44 - **Language:** Sanskrit ## Contents - [2.44.148](https://indike.org/pramana/in.purana.kurma.2.44.148) — 3 parts ### catuścatvāriṃśo'dhyāyaḥ ### [2.44.1](https://indike.org/pramana/in.purana.kurma.2.44.1) kūrma uvāca ataḥ paraṃ pravakṣyāmi pratisargamanuttamam / prākṛtaṃ hi samāsena śṛṇudhvaṃ gadato mama // ### [2.44.2](https://indike.org/pramana/in.purana.kurma.2.44.2) gate parārdhadvitaye kālo lokaprakālanaḥ / kālāgnirbhasmasāt kartuṃ karoti nikilaṃ matim // ### [2.44.3](https://indike.org/pramana/in.purana.kurma.2.44.3) svātmanyātmānamāveśya bhūtvā devo maheśvaraḥ / dahedaśeṣaṃ brahmāṇḍaṃ sadevāsuramānuṣam // ### [2.44.4](https://indike.org/pramana/in.purana.kurma.2.44.4) tamāviśya mahādevo bhagavānnīlalohitaḥ / karoti lokasaṃhāraṃ bhīṣaṇaṃ rūpamāśritaḥ // ### [2.44.5](https://indike.org/pramana/in.purana.kurma.2.44.5) praviśya maṇḍalaṃ sauraṃ kṛtvāsau bahudhā punaḥ / nirdahatyakhilaṃ lokaṃ saptasaptisvarūpadhṛk // ### [2.44.6](https://indike.org/pramana/in.purana.kurma.2.44.6) sa dagdhvā sakalaṃ sattvamastraṃ brahmaśiro mahat / devatānāṃ śarīreṣu kṣipatyakhiladāhakam // ### [2.44.7](https://indike.org/pramana/in.purana.kurma.2.44.7) dagdheṣvaśeṣadeveṣu devī girivarātmajā / ekāsā sākṣiṇī śaṃbhostiṣṭhate vaidikī śrutiḥ // ### [2.44.8](https://indike.org/pramana/in.purana.kurma.2.44.8) śiraḥ kapālairdevānāṃ kṛtastragvarabhūṣaṇaḥ / ādityacandrādigaṇaiḥ pūrayan vyomamaṇḍalam // ### [2.44.9](https://indike.org/pramana/in.purana.kurma.2.44.9) sahasranayano devaḥ sahasrākṛtiriśvaraḥ / sahasrahastacaraṇaḥ sahasrārcirmahābhujaḥ // ### [2.44.10](https://indike.org/pramana/in.purana.kurma.2.44.10) daṃṣṭrākarālavadanaḥ pradīptānalalocanaḥ / triśūlī kṛttivasano yogamaiśvaramāsthitaḥ // ### [2.44.11](https://indike.org/pramana/in.purana.kurma.2.44.11) pītvā tatparamānandaṃ prabhūtamamṛtaṃ svayam / karoti tāṇḍavaṃ devīmālokya parameśvaraḥ // ### [2.44.12](https://indike.org/pramana/in.purana.kurma.2.44.12) pītvā nṛttāmṛtaṃ devī bhartuḥ paramamaṅgalā / yogamāsthāya devasya dehamāyāti śūlinaḥ // ### [2.44.13](https://indike.org/pramana/in.purana.kurma.2.44.13) saṃtyaktvā tāṇḍavarasaṃ svecchayaiva pinākadhṛk / jyotiḥ svabhāvaṃ bhagavān dagdhvā brahmāṇḍamaṇḍalam // ### [2.44.14](https://indike.org/pramana/in.purana.kurma.2.44.14) saṃsthiteṣvatha deveṣu brahmaviṣṇupinākiṣu / guṇairaśeṣaiḥ pṛthivīvilayaṃ yāti vāriṣu // ### [2.44.15](https://indike.org/pramana/in.purana.kurma.2.44.15) sa vāritattvaṃ saguṇaṃ grasate havyavāhanaḥ / tejastu guṇasaṃyuktaṃ vāyau saṃyāti saṃkṣayam // ### [2.44.16](https://indike.org/pramana/in.purana.kurma.2.44.16) ākāśe saguṇo vāyuḥ pralayaṃ yāti viśvabhṛt / bhūtādau ca tathākāśaṃ līyate guṇasaṃyutam // ### [2.44.17](https://indike.org/pramana/in.purana.kurma.2.44.17) indriyāṇi ca sarvāṇi taijase yānti saṃkṣayam / vaikārike devagaṇāḥ pralaṃya yānti sattamāḥ // ### [2.44.18](https://indike.org/pramana/in.purana.kurma.2.44.18) vaikārikastaijasaśca bhūtādiśceti sattamāḥ / trividho 'yamahaṅkāro mahati pralaṃya vrajet // ### [2.44.19](https://indike.org/pramana/in.purana.kurma.2.44.19) mahāntamebhiḥ sahitaṃ brahmāṇamatitejasam / avyaktaṃ jagato yoniḥ saṃharedekamavyayam // ### [2.44.20](https://indike.org/pramana/in.purana.kurma.2.44.20) evaṃ saṃhṛtya bhūtāni tattvāni ca maheśvaraḥ / viyojayati cānyonyaṃ pradhānaṃ puruṣaṃ param // ### [2.44.21](https://indike.org/pramana/in.purana.kurma.2.44.21) pradhānapuṃsorajayoreṣa saṃhāra īritaḥ / maheśvarecchājanito na svayaṃ vidyate layaḥ // ### [2.44.22](https://indike.org/pramana/in.purana.kurma.2.44.22) guṇasāmyaṃ tadavyaktaṃ prakṛtiḥ parigīyate / pradhānaṃ jagato yonirmāyātattvamacetanam // ### [2.44.23](https://indike.org/pramana/in.purana.kurma.2.44.23) kūṭasthaścinmayo hyātmā kevalaḥ pañcaviṃśakaḥ / gīyate munibhiḥ sākṣī mahānekaḥ pitāmahaḥ // ### [2.44.24](https://indike.org/pramana/in.purana.kurma.2.44.24) evaṃ saṃhārakaraṇī śaktirmāheśvarī dhruvā / pradhānādyaṃ viśeṣāntaṃ dahed rudra iti śrutiḥ // ### [2.44.25](https://indike.org/pramana/in.purana.kurma.2.44.25) yogināmatha sarveṣāṃ jñānavinyastacetasām / ātyantikaṃ caiva layaṃ vidadhātīha śaṅkaraḥ // ### [2.44.26](https://indike.org/pramana/in.purana.kurma.2.44.26) ityeṣa bhagavān rudraḥ saṃhāraṃ kurute vaśī / sthāpikā mohanī śaktirnārāyaṇa iti śrutiḥ // ### [2.44.27](https://indike.org/pramana/in.purana.kurma.2.44.27) hiraṇyagarbhā bhagavān jagat sadasadātmakam / sṛjedaśeṣaṃ prakṛtestanmayaḥ pañcaviṃśakaḥ // ### [2.44.28](https://indike.org/pramana/in.purana.kurma.2.44.28) sarvajñāḥ sarvagāḥ śāntāḥ svātmanyevavyavasthitāḥ / śaktayo brahmaviṇvīśā bhuktimuktiphalapradāḥ // ### [2.44.29](https://indike.org/pramana/in.purana.kurma.2.44.29) sarveśvarāḥ sarvavandyāḥ śāśvatānantabhoginaḥ / ekamevākṣaraṃ tattvaṃ puṃpradhāneśvarātmakam // ### [2.44.30](https://indike.org/pramana/in.purana.kurma.2.44.30) anyāśca śaktayo divyāḥ santi tatra sahasraśaḥ / ijyante vividhairyajñaiḥ śakrādityādayo 'marāḥ // ### [2.44.31](https://indike.org/pramana/in.purana.kurma.2.44.31) ekaikasya sahasrāṇi dehānāṃ vai śatāni ca / kathyante caiva māhātmyācchaktirekaiva nirguṇāḥ // ### [2.44.32](https://indike.org/pramana/in.purana.kurma.2.44.32) tāṃ tāṃ śaktiṃ samādhāya svayaṃ devo maheśvaraḥ / karoti dehān vividhān grasate caiva līlayā // ### [2.44.33](https://indike.org/pramana/in.purana.kurma.2.44.33) ijyate sarvayajñeṣu brāhmaṇairvedavādibhiḥ / sarvakāmaprado rudra ityeṣā vaidikī śrutiḥ // ### [2.44.34](https://indike.org/pramana/in.purana.kurma.2.44.34) sarvāsāmeva śaktīnāṃ brahmaviṣṇumaheśvarāḥ / prādhānyena smṛtā devāḥ śaktayaḥ paramātmanaḥ // ### [2.44.35](https://indike.org/pramana/in.purana.kurma.2.44.35) ādyaḥ parastād bhagavān paramātmā sanātanaḥ / gīyate sarvaśaktyātmā śūlapāṇirmaheśvaraḥ // ### [2.44.36](https://indike.org/pramana/in.purana.kurma.2.44.36) enameke vadantyagniṃ nārāyaṇamathāpare / indrameke pare viśvān brahmāṇamapare jaguḥ // ### [2.44.37](https://indike.org/pramana/in.purana.kurma.2.44.37) brahmaviṣṇavagnivaruṇāḥ sarve devāstatharṣayaḥ / ekasyaivātha rudrasya bhedāste parikīrtitāḥ // ### [2.44.38](https://indike.org/pramana/in.purana.kurma.2.44.38) yaṃ yaṃ bhedaṃ samāśritya yajanti parameśvaram / tat tad rūpaṃ samāsthāya pradadāti phalaṃ śivaḥ // ### [2.44.39](https://indike.org/pramana/in.purana.kurma.2.44.39) tasmādekataraṃ bhedaṃ samāśrityāpi śāśvatam / ārādhayanmahādevaṃ yāti tatparamaṃ padam // ### [2.44.40](https://indike.org/pramana/in.purana.kurma.2.44.40) kintu devaṃ mahādevaṃ sarvaśaktiṃ sanātanam / ārādhayed vai giriśaṃ saguṇaṃ vātha nirguṇam // ### [2.44.41](https://indike.org/pramana/in.purana.kurma.2.44.41) mayā prokto hi bhavatāṃ yogaḥ prāgeva nirguṇaḥ / ārurukṣustu saguṇaṃ pūjayet parameśvaram // ### [2.44.42](https://indike.org/pramana/in.purana.kurma.2.44.42) pinākinaṃ trinayanaṃ jaṭilaṃ kṛttivāsasam / padmāsanasthaṃ rukmābhaṃ cintayed vaidikī śrutiḥ // ### [2.44.43](https://indike.org/pramana/in.purana.kurma.2.44.43) eṣa yogaḥ samuddiṣṭaḥ sabījo munisattamāḥ / tasmāt sarvān parityajya devān brahmapurogamān / ārādhayed virūpākṣamādimadhyāntasaṃsthitam // ### [2.44.44](https://indike.org/pramana/in.purana.kurma.2.44.44) bhaktiyogasamāyuktaḥ svadharmanirataḥ śuciḥ / tādṛśaṃ rūpamāsthāya samāyātyantikaṃ śivam // ### [2.44.45](https://indike.org/pramana/in.purana.kurma.2.44.45) eṣa yogaḥ samuddiṣṭaḥ sabījo 'tyantabhāvane / yathāvidhi prakurvāṇaḥ prāpnuyādaiśvaraṃ padam // ### [2.44.46](https://indike.org/pramana/in.purana.kurma.2.44.46) atrāpyaśakto 'tha haraṃ viṣṇuṃ bahmāṇamarcayet / atha cedasamarthaḥ syāt tatrāpi munipuṅgavāḥ / tato vāyvagniśakrādīn pūjayed bhaktisaṃyutaḥ // ### [2.44.47](https://indike.org/pramana/in.purana.kurma.2.44.47) ye cānye bhāvane śuddhe prāgukte bhavatāmiha / athāpi kathito yogo nirbojaśca sabījakaḥ // ### [2.44.48](https://indike.org/pramana/in.purana.kurma.2.44.48) jñānaṃ taduktaṃ nirbojaṃ pūrvaṃ hi bhavatāṃ mayā / viṣṇuṃ rudraṃ virañciṃ ca sabījaṃ bhāvayed budhaḥ / sathavāgnyādikān devāṃstatparaḥ saṃyatendriyaḥ // ### [2.44.49](https://indike.org/pramana/in.purana.kurma.2.44.49) pūjayet puruṣaṃ viṣṇuṃ caturmūrtidharaṃ harim / anādinidhanaṃ devaṃ vāsudevaṃ sanātanam // ### [2.44.50](https://indike.org/pramana/in.purana.kurma.2.44.50) nārāyaṇaṃ jagadyonimākāśaṃ paramaṃ padam / talliṅgadhārī niyataṃ tadbhaktastadapāśrayaḥ / eṣa eva vidhirbrāhme bhāvane cāntike mataḥ // ### [2.44.51](https://indike.org/pramana/in.purana.kurma.2.44.51) ityetat kathitaṃ jñānaṃ bhāvanāsaṃśrayaṃ param / indradyumnāya munaye kathitaṃ yanmayā purā // ### [2.44.52](https://indike.org/pramana/in.purana.kurma.2.44.52) avyaktātmakamevedaṃ cetanācetanaṃ jagat / tadīśvaraḥ paraṃ brahma tasmād brahmamayaṃ jagat // ### [2.44.53](https://indike.org/pramana/in.purana.kurma.2.44.53) sūta uvāca etāvaduktvā bhagavān virarāma janārdanaḥ / tuṣṭuvurmunayo viṣṇuṃ śakreṇa saha mādhavam // ### [2.44.54](https://indike.org/pramana/in.purana.kurma.2.44.54) munaya ūcuḥ namaste kūrmarūpāya viṣṇave paramātmane / nārāyaṇāya viśvāya vāsudevāya te namaḥ // ### [2.44.55](https://indike.org/pramana/in.purana.kurma.2.44.55) namo namaste kṛṣṇāya govindāya namo namaḥ / mādhavāya namastubhyaṃ namo yajñeśvarāya ca // ### [2.44.56](https://indike.org/pramana/in.purana.kurma.2.44.56) sahasraśirase tubhyaṃ sahasrākṣāya te namaḥ / namaḥ sahasrahastāya sahasracaraṇāya ca // ### [2.44.57](https://indike.org/pramana/in.purana.kurma.2.44.57) oṃ namo jñānarūpāya paramātmasvarūpiṇe / ānandāya namastubhyaṃ māyātītāya te namaḥ // ### [2.44.58](https://indike.org/pramana/in.purana.kurma.2.44.58) namo gūḍhaśarīrāya nirguṇāya namo 'stu te / puruṣāya purāṇāya sattāmātrasvarūpiṇe // ### [2.44.59](https://indike.org/pramana/in.purana.kurma.2.44.59) namaḥ sāṃkhyāya yogāya kevalāya namo 'stu te / dharmajñānādhigamyāya niṣkalāya namo namaḥ // ### [2.44.60](https://indike.org/pramana/in.purana.kurma.2.44.60) namostu vyomatattvāya mahāyogeśvarāya ca / parāvarāṇāṃ prabhave vedavedyāya te namaḥ // ### [2.44.61](https://indike.org/pramana/in.purana.kurma.2.44.61) namo buddhāya śuddhāya namo yuktāya hetave / namo namo namastubhyaṃ māyine vedhase namaḥ // ### [2.44.62](https://indike.org/pramana/in.purana.kurma.2.44.62) namo 'stu te varāhāya nārasiṃhāya te namaḥ / vāmanāya namastubhyaṃ hṛṣīkeśāya te namaḥ // ### [2.44.63](https://indike.org/pramana/in.purana.kurma.2.44.63) namo 'stu kālarudrāya kālarūpāya te namaḥ / svargāpavargadātre ca namo 'pratihatātmane // ### [2.44.64](https://indike.org/pramana/in.purana.kurma.2.44.64) namo yogādhigamyāya yogine yogadāyine / devānāṃ pataye tubhyaṃ devārtiśamanāya te // ### [2.44.65](https://indike.org/pramana/in.purana.kurma.2.44.65) bhagavaṃstvatprasādena sarvasaṃsāranāśanam / asmābhirviditaṃ jñānaṃ yajjñātvāmṛtamaśnute // ### [2.44.66](https://indike.org/pramana/in.purana.kurma.2.44.66) śrutāstu vividhā dharmā vaṃśā manvantarāṇi ca / sargaśca pratisargaśca brahmāṇyasyāsya vistaraḥ // ### [2.44.67](https://indike.org/pramana/in.purana.kurma.2.44.67) tvaṃ hi sarvajagatsākṣī viśvo nārāyaṇaḥ paraḥ / trātumarhasyanantātmaṃstvameva śaraṇaṃ gatiḥ // ### [2.44.68](https://indike.org/pramana/in.purana.kurma.2.44.68) sūta uvāca etad vaḥ kathitaṃ viprā yogamokṣapradāyakam / kaurmaṃ purāṇamakhilaṃ yajjagāda gadādharaḥ // ### [2.44.69](https://indike.org/pramana/in.purana.kurma.2.44.69) asmin purāṇe lakṣmyāstu saṃbhavaḥ kathitaḥ purā / mohāyāśeṣabhūtānāṃ vāsudevena yojanam // ### [2.44.70](https://indike.org/pramana/in.purana.kurma.2.44.70) prajāpatīnāṃ sargastu varṇadharmāśca vṛttayaḥ / dharmārthakāmamokṣāṇāṃ yathāvallakṣaṇaṃ śubham // ### [2.44.71](https://indike.org/pramana/in.purana.kurma.2.44.71) pitāmahasya viṣṇośca maheśasya ca dhīmataḥ / ekatvaṃ ca pṛthaktvaṃ ca viśeṣaścopavarṇitaḥ // ### [2.44.72](https://indike.org/pramana/in.purana.kurma.2.44.72) bhaktānāṃ lakṣaṇaṃ proktaṃ samācāraśca śobhanaḥ / varṇāśramāṇāṃ kathitaṃ yathāvadiha lakṣaṇam // ### [2.44.73](https://indike.org/pramana/in.purana.kurma.2.44.73) ādisargastataḥ paścādaṇḍāvaraṇasaptakam / hiraṇyagarbhasargaśca kīrtito munipuṅgavāḥ // ### [2.44.74](https://indike.org/pramana/in.purana.kurma.2.44.74) kālasaṃkhyāprakathanaṃ māhātmyaṃ ceśvarasya ca / brahmaṇaḥ śayanaṃ cāpsu nāmanirvacanaṃ tathā // ### [2.44.75](https://indike.org/pramana/in.purana.kurma.2.44.75) varāhavapuṣā bhūyo bhūmeruddharaṇaṃ punaḥ / mukhyādisargakathanaṃ munisargastathāparaḥ // ### [2.44.76](https://indike.org/pramana/in.purana.kurma.2.44.76) vyākhyato rudrasargaśca ṛṣisargaśca tāpasaḥ / dharmasya ca prajāsargastāmasāt pūrvameva tu // ### [2.44.77](https://indike.org/pramana/in.purana.kurma.2.44.77) brahmaviṣṇuvivādaḥ syādantardehapraveśanam / padmodbhavatvaṃ devasya mohastasya ca dhīmataḥ // ### [2.44.78](https://indike.org/pramana/in.purana.kurma.2.44.78) darśanaṃ ca maheśasya māhātmyaṃ viṣṇuneritam / divyadṛṣṭipradānaṃ ca brahmaṇaḥ parameṣṭhinaḥ // ### [2.44.79](https://indike.org/pramana/in.purana.kurma.2.44.79) saṃstavo devadevasya brahmaṇā parameṣṭhinā / prasādo giriśasyātha varadānaṃ tathaiva ca // ### [2.44.80](https://indike.org/pramana/in.purana.kurma.2.44.80) saṃvādo viṣṇunā sārdhaṃ śaṅkarasya mahātmanaḥ / varadānaṃ tathāpūrvamantardhānaṃ pinākinaḥ // ### [2.44.81](https://indike.org/pramana/in.purana.kurma.2.44.81) vadhaśca kathito viprā madhukaiṭabhayoḥ purā / avatāro 'tha devasya brahmaṇo nābhipaṅkajāt // ### [2.44.82](https://indike.org/pramana/in.purana.kurma.2.44.82) ekībhāvaśca devasya viṣṇunā kathitastataḥ / vimoho brahmaṇaścātha saṃjñālābho harestataḥ // ### [2.44.83](https://indike.org/pramana/in.purana.kurma.2.44.83) tapaścaraṇamākhyātaṃ devadevasya dhīmataḥ / prādurbhāvo maheśasya lalāṭāt kathitastataḥ // ### [2.44.84](https://indike.org/pramana/in.purana.kurma.2.44.84) rudrāṇāṃ kathitā sṛṣṭirbrahmaṇaḥ pratiṣedhanam / bhūtiśca devadevasya varadānopadeśakau // ### [2.44.85](https://indike.org/pramana/in.purana.kurma.2.44.85) antardhānaṃ ca rudrasya tapaścaryāṇḍajasya ca / darśanaṃ devadevasya naranārīśarīratā // ### [2.44.86](https://indike.org/pramana/in.purana.kurma.2.44.86) devyā vibhāgakathanaṃ devadevāt pinākinaḥ / devyāstu paścāt kathitaṃ dakṣaputrītvameva ca // ### [2.44.87](https://indike.org/pramana/in.purana.kurma.2.44.87) himavadduhitṛtvaṃ ca devyā māhātmyameva ca / darśanaṃ divyarūpasya vaiśvarūpasya darśanam // ### [2.44.88](https://indike.org/pramana/in.purana.kurma.2.44.88) nāmnāṃ sahasraṃ kathitaṃ pitrā himavatā svayam / upadeśo mahādevyā varadānaṃ tathaiva ca // ### [2.44.89](https://indike.org/pramana/in.purana.kurma.2.44.89) bhṛgvādīnāṃ prajāsargo rājñāṃ vaṃśasya vistaraḥ / prācetasatvaṃ dakṣasya dakṣayajñavimardanam // ### [2.44.90](https://indike.org/pramana/in.purana.kurma.2.44.90) dadhīcasya ca dakṣasya vivādaḥ kathitastadā / tataśca śāpaḥ kathito munīnāṃ munipuṅgavāḥ // ### [2.44.91](https://indike.org/pramana/in.purana.kurma.2.44.91) rudrāgatiḥ prasādaśca antardhānaṃ pinākinaḥ / pitāmahasyopadeśaḥ kīrtyate rakṣaṇāya tu // ### [2.44.92](https://indike.org/pramana/in.purana.kurma.2.44.92) dakṣasya ca prajāsargaḥ kaśyapasya mahātmanaḥ / hiraṇyakaśipornāśo hiraṇyākṣavadhastathā // ### [2.44.93](https://indike.org/pramana/in.purana.kurma.2.44.93) tataśca śāpaḥ kathito devadāruvanaukasām / nigrahaścāndhakasyātha gāṇapatyamanuttamam // ### [2.44.94](https://indike.org/pramana/in.purana.kurma.2.44.94) prahrādanigrahaścātha baleḥ saṃyamanaṃ tataḥ / bāṇasya nigrahaścātha prasādastasya śūlinaḥ // ### [2.44.95](https://indike.org/pramana/in.purana.kurma.2.44.95) ṛṣīṇāṃ vaṃśavistāro rājñāṃ vaṃśāḥ prakīrtitāḥ / vasudevāt tato viṣṇorutpattiḥ svecchayā hareḥ // ### [2.44.96](https://indike.org/pramana/in.purana.kurma.2.44.96) darśanaṃ copamanyorvai tapaścaraṇameva ca / varalābho mahādevaṃ dṛṣṭvā sāmbaṃ trilocanam // ### [2.44.97](https://indike.org/pramana/in.purana.kurma.2.44.97) kailāsagamanaṃ cātha nivāsastatra śārṅgiṇaḥ / tataśca kathyate bhītirdvārivatyā nivāsinām // ### [2.44.98](https://indike.org/pramana/in.purana.kurma.2.44.98) rakṣaṇaṃ garuḍenātha jitvā śatrūn mahābalān / nārādāgamanaṃ caiva yātrā caiva garutmataḥ // ### [2.44.99](https://indike.org/pramana/in.purana.kurma.2.44.99) tataśca kṛṣṇāgamanaṃ munīnāmāgatistataḥ / naityakaṃ vāsudevasya śivaliṅgārcanaṃ tathā // ### [2.44.100](https://indike.org/pramana/in.purana.kurma.2.44.100) mārkaṇḍeyasya ca muneḥ praśnaḥ proktastataḥ param / liṅgārcananimittaṃ ca liṅgasyāpi saliṅginaḥ // ### [2.44.101](https://indike.org/pramana/in.purana.kurma.2.44.101) yathātmyakathanaṃ cātha liṅgāvirbhāva eva ca / brahmaviṣṇostathā madhye kīrtito munipuṅgavāḥ // ### [2.44.102](https://indike.org/pramana/in.purana.kurma.2.44.102) mohastayostu kathito gamanaṃ cordhvato 'pyadhaḥ / saṃstavo devadevasya prasādaḥ parameṣṭhinaḥ // ### [2.44.103](https://indike.org/pramana/in.purana.kurma.2.44.103) antardhānaṃ ca liṅgasya sāmbotpattistataḥ param / kīrtitā cāniruddhasya samutpattirdvijottamāḥ // ### [2.44.104](https://indike.org/pramana/in.purana.kurma.2.44.104) kṛṣṇasya gamane buddhirṛṣīṇāmāgatistathā / anuvaśāsitaṃ ca kṛṣṇena varadānaṃ mahātmanaḥ // ### [2.44.105](https://indike.org/pramana/in.purana.kurma.2.44.105) gamanaṃ caiva kṛṣṇasya pārthasyāpi ca darśanam / kṛṣṇadvaipāyanasyoktā yugadharmāḥ sanātanāḥ // ### [2.44.106](https://indike.org/pramana/in.purana.kurma.2.44.106) anugraho 'tha pārthasya vārāṇasīgatistataḥ / pārāśaryasya ca munervyāsasyādbhutakarmaṇaḥ // ### [2.44.107](https://indike.org/pramana/in.purana.kurma.2.44.107) vāraṇasyāśca māhātmyaṃ tīrthānāṃ caiva varṇanam / tīrthayātrā ca vyāsasya devyāścaivātha darśanam / udvāsanaṃ ca kathitaṃ varadānaṃ tathaiva ca // ### [2.44.108](https://indike.org/pramana/in.purana.kurma.2.44.108) prayāgasya ca māhātmyaṃ kṣetrāṇāmatha kīrtinam / phalaṃ ca vipulaṃ viprā mārkaṇḍeyasya nirgamaḥ // ### [2.44.109](https://indike.org/pramana/in.purana.kurma.2.44.109) bhuvanānāṃ svarūpaṃ ca jyotiṣāṃ ca niveśanam / kīrtyante caiva varṣāṇi nadīnāṃ caiva nirṇayaḥ // ### [2.44.110](https://indike.org/pramana/in.purana.kurma.2.44.110) parvatānāṃ ca kathanaṃ sthānāni ca divaukasām / dvīpānāṃ pravibhāgaśca śvetadvīpopavarṇanam // ### [2.44.111](https://indike.org/pramana/in.purana.kurma.2.44.111) śayanaṃ keśavasyātha māhātmyaṃ ca mahātmanaḥ / manvantarāṇāṃ kathanaṃ viṣṇormāhātmyameva ca // ### [2.44.112](https://indike.org/pramana/in.purana.kurma.2.44.112) vedaśākhāpraṇayanaṃ vyāsānāṃ kathanaṃ tataḥ / avedasya ca vedānāṃ kathanaṃ munipuṅgavāḥ // ### [2.44.113](https://indike.org/pramana/in.purana.kurma.2.44.113) yogeśvarāṇāṃ ca kathā śiṣyāṇāṃ cātha kīrtanam / gītāśca vividhāguhyā īśvarasyātha kīrtitāḥ // ### [2.44.114](https://indike.org/pramana/in.purana.kurma.2.44.114) varṇāśramāṇāmācārāḥ prāyaścittavidhistataḥ / kapālitvaṃ ca rudrasya bhikṣācaraṇameva ca // ### [2.44.115](https://indike.org/pramana/in.purana.kurma.2.44.115) pativratāyāścākhyānaṃ tīrthānāṃ ca vinirṇayaḥ / tathā maṅkaṇakasyātha nigrahaḥ kīrtyate dvijāḥ // ### [2.44.116](https://indike.org/pramana/in.purana.kurma.2.44.116) vadhaśca kathito viprāḥ kālasya ca samāsataḥ / devadāruvane śaṃbhoḥ praveśo mādhavasya ca // ### [2.44.117](https://indike.org/pramana/in.purana.kurma.2.44.117) darśanaṃ ṣaṭkulīyānāṃ devadevasya dhīmataḥ / varadānaṃ ca devasya nandine tu prakīrtitam // ### [2.44.118](https://indike.org/pramana/in.purana.kurma.2.44.118) naimittikastu kathitaḥ pratisargastataḥ param / prākṛtaḥ pralayaścordhvaṃ sabījo yoga eva ca // ### [2.44.119](https://indike.org/pramana/in.purana.kurma.2.44.119) evaṃ jñātvā purāṇasya saṃkṣepaṃ kīrtayet tu yaḥ / sarvapāpavinirmukto brahmaloke mahīyate // ### [2.44.120](https://indike.org/pramana/in.purana.kurma.2.44.120) evamuktvā śriyaṃ devīmādāya puruṣottamaḥ / saṃtyajya kūrmasaṃsthānaṃ svasthānaṃ ca jagāma ha // ### [2.44.121](https://indike.org/pramana/in.purana.kurma.2.44.121) devāśca sarve munayaḥ svāni sthānāni bhejire / praṇamya puruṣaṃ viṣṇuṃ gṛhītvā hyamṛtaṃ dvijāḥ // ### [2.44.122](https://indike.org/pramana/in.purana.kurma.2.44.122) etat purāṇaṃ paramaṃ bhāṣitaṃ kūrmarūpiṇā / sākṣād devādidenena viṣṇunā viśvayoninā // ### [2.44.123](https://indike.org/pramana/in.purana.kurma.2.44.123) yaḥ paṭhet satataṃ martyo niyamena samāhitaḥ / sarvapāpavinirmukto brahmaloke mahīyate // ### [2.44.124](https://indike.org/pramana/in.purana.kurma.2.44.124) likhitvā caiva yo dadyād vaiśākhe māsi suvrataḥ / viprāya vedaviduṣe tasya puṇyaṃ nibodhata // ### [2.44.125](https://indike.org/pramana/in.purana.kurma.2.44.125) sarvapāpavinirmuktaḥ sarvaiśvaryasamanvitaḥ / bhuktvā ca vipulānsvarge bhogāndivyānsuśobhanān // ### [2.44.126](https://indike.org/pramana/in.purana.kurma.2.44.126) tataḥ svargāt paribhraṣṭo viprāṇāṃ jāyate kule / pūrvasaṃskāramāhātmyād brahmavidyāmavāpnuyāt // ### [2.44.127](https://indike.org/pramana/in.purana.kurma.2.44.127) paṭhitvādhyāyamevaikaṃ sarvapāpaiḥ pramucyate / yor'thaṃ vicārayet samyak sa prāpnoti paraṃ padam // ### [2.44.128](https://indike.org/pramana/in.purana.kurma.2.44.128) adhyetavyamidaṃ nityaṃ vipraiḥ parvaṇi parvaṇi / śrotavyaṃ ca dvijaśreṣṭhā mahāpātakanāśanam // ### [2.44.129](https://indike.org/pramana/in.purana.kurma.2.44.129) ekatastu purāṇāni setihāsāni kṛtsnaśaḥ / ekatra cedaṃ paramametadevātiricyate // ### [2.44.130](https://indike.org/pramana/in.purana.kurma.2.44.130) dharmanaipuṇyakāmānāṃ jñānanaipuṇyakāminām / idaṃ purāṇaṃ muktvaikaṃ nāstyanyat sādhanaṃ param // ### [2.44.131](https://indike.org/pramana/in.purana.kurma.2.44.131) yathāvadatra bhagavān devo nārāyaṇo hariḥ / kathyate hi yathā viṣṇurna tathānyeṣu suvratāḥ // ### [2.44.132](https://indike.org/pramana/in.purana.kurma.2.44.132) brāhmī paurāṇikī ceyaṃ saṃhitā pāpanāśanī / atra tat paramaṃ brahma kīrtyate hi yathārthataḥ // ### [2.44.133](https://indike.org/pramana/in.purana.kurma.2.44.133) tīrthānāṃ paramaṃ tīrthaṃ tapasāṃ ca paraṃ tapaḥ / jñānānāṃ paramaṃ jñānaṃ vratānāṃ paramaṃ vratam // ### [2.44.134](https://indike.org/pramana/in.purana.kurma.2.44.134) nādhyetavyamidaṃ śāstraṃ vṛṣalasya ca sannidhau / yo 'dhīte sa tu mohātmā sa yāti narakān bahūn // ### [2.44.135](https://indike.org/pramana/in.purana.kurma.2.44.135) śrāddhe vā daivike kārye śrāvaṇīyaṃ dvijātibhiḥ / yajñānte tu viśeṣeṇa sarvadoṣaviśodhanam // ### [2.44.136](https://indike.org/pramana/in.purana.kurma.2.44.136) mumukṣūṇāmidaṃ śāstramadhyetavyaṃ viśeṣataḥ / śrotavyaṃ cātha mantavyaṃ vedārthaparibṛṃhaṇam // ### [2.44.137](https://indike.org/pramana/in.purana.kurma.2.44.137) jñātvā yathāvad viprendrān śrāvayed bhaktisaṃyutān / sarvapāpavinirmukto brahmasāyujyamāpnuyāt // ### [2.44.138](https://indike.org/pramana/in.purana.kurma.2.44.138) yo 'śraddadhāne puruṣe dadyāccādhārmike tathā / sa pretya gatvā nirayān śunāṃ yoniṃ vrajatyadhaḥ // ### [2.44.139](https://indike.org/pramana/in.purana.kurma.2.44.139) namaskṛtvā hariṃ viṣṇuṃ jagadyoniṃ sanātanam / adhyetavyamidaṃ śāstraṃ kṛṣṇadvaipāyanaṃ tathā // ### [2.44.140](https://indike.org/pramana/in.purana.kurma.2.44.140) ityājñā devadevasya viṣṇoramitatejasaḥ / pārāśaryasya viprarṣervyāsasya ca mahātmanaḥ // ### [2.44.141](https://indike.org/pramana/in.purana.kurma.2.44.141) śrutvā nārāyaṇād divyāṃ nārado bhagavānṛṣiḥ / gautamāya dadau pūrvaṃ tasmāccaiva parāśaraḥ // ### [2.44.142](https://indike.org/pramana/in.purana.kurma.2.44.142) parāśaro 'pi bhagavāna gaṅgādvāre munīśvarāḥ / munibhyaḥ kathayāmāsa dharmakāmārthamokṣadam // ### [2.44.143](https://indike.org/pramana/in.purana.kurma.2.44.143) brahmaṇā kathitaṃ pūrvaṃ sanakāya ca dhīmate / sanatkumārāya tathā sarvapāpapraṇāśanam // ### [2.44.144](https://indike.org/pramana/in.purana.kurma.2.44.144) sanakād bhagavān sākṣād devalo yogavittamaḥ / avāptavān pañcaśikho devalādidamuttamam // ### [2.44.145](https://indike.org/pramana/in.purana.kurma.2.44.145) sanatkumārād bhagavān muniḥ satyavatīsutaḥ / lebhe purāṇaṃ paramaṃ vyāsaḥ sarvārthasaṃcayam // ### [2.44.146](https://indike.org/pramana/in.purana.kurma.2.44.146) tasmād vyāsādahaṃ śrutvā bhavatāṃ pāpanāśanam / ūcivān vai bhavadbhiśca dātavyaṃ dhārmike jane // ### [2.44.147](https://indike.org/pramana/in.purana.kurma.2.44.147) tasmai vyāsāya gurave sarvajñāya maharṣaye / pārāśaryāya śāntāya namo nārāyaṇātmane // ### [2.44.148](https://indike.org/pramana/in.purana.kurma.2.44.148) yasmāt saṃjāyate kṛtsanaṃ yatra caiva pralīyate / namastasmai sureśāya viṣṇave kūrmarūpiṇe // ### [2.44.148.p1](https://indike.org/pramana/in.purana.kurma.2.44.148.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge catuścatvāriṃśo 'dhyāyaḥ ### [2.44.148.p2](https://indike.org/pramana/in.purana.kurma.2.44.148.p2) uparivibhāgaḥ samāptaḥ ### [2.44.148.p3](https://indike.org/pramana/in.purana.kurma.2.44.148.p3) iti śrīkūrmapurāṇaṃ samāptam ## Linked texts (1) - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.92.p18) — Hemādri, Sanskrit --- Source: [https://indike.org/pramana/in.purana.kurma.2.44](https://indike.org/pramana/in.purana.kurma.2.44) · Pramāṇa