[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.7 # Kurmapurana 2.7: saptamo'dhyāyaḥ Kūrmapurāṇa 2.7 - **Language:** Sanskrit ## Contents - [2.7.32](https://indike.org/pramana/in.purana.kurma.2.7.32) — 1 part ### saptamo'dhyāyaḥ ### [2.7.1](https://indike.org/pramana/in.purana.kurma.2.7.1) īśvara uvāca śṛṇudhvamṛṣayaḥ sarve prabhāvaṃ parameṣṭhinaḥ / yaṃ jñātvā puruṣo mukto na saṃsāre patet punaḥ // ### [2.7.2](https://indike.org/pramana/in.purana.kurma.2.7.2) parāt parataraṃ brahma śāśvataṃ niṣkalaṃ dhruvam / nityānandaṃ nirvikalpaṃ taddhāma paramaṃ mama // ### [2.7.3](https://indike.org/pramana/in.purana.kurma.2.7.3) ahaṃ brahmavidāṃ brahmā svayaṃbhūrviśvatomukhaḥ / māyāvināmahaṃ devaḥ purāṇo hariravyayaḥ // ### [2.7.4](https://indike.org/pramana/in.purana.kurma.2.7.4) yogināmasmyahaṃ śaṃbhuḥ strīṇāṃ devī girīndrajā / ādityānāmahaṃ viṣṇurvasūnāmasmi pāvakaḥ // ### [2.7.5](https://indike.org/pramana/in.purana.kurma.2.7.5) rudrāṇāṃ śaṅkaraścāhaṃ garuḍaḥ patatāmaham / airāvato gajendrāṇāṃ rāmaḥ śastrabhṛtāmaham // ### [2.7.6](https://indike.org/pramana/in.purana.kurma.2.7.6) ṛṣīṇāṃ ca vasiṣṭho 'haṃ devānāṃ ca śatakratuḥ / śilpināṃ viśvakarmāhaṃ prahlādo 'smyamaradviṣām // ### [2.7.7](https://indike.org/pramana/in.purana.kurma.2.7.7) munīnāmapyahaṃ vyāso gaṇānāṃ ca vināyakaḥ / vīrāṇāṃ vīrabhadro 'haṃ siddhānāṃ kapilo muniḥ // ### [2.7.8](https://indike.org/pramana/in.purana.kurma.2.7.8) parvatānāmahaṃ merurnakṣatrāṇāṃ ca candramāḥ / vajraṃ praharaṇānāṃ ca vratānāṃ satyamasmyaham // ### [2.7.9](https://indike.org/pramana/in.purana.kurma.2.7.9) ananto bhogināṃ devaḥ senānīnāṃ ca pāvakiḥ / āśramāṇāṃ ca gārhasthamīśvarāṇāṃ maheśvaraḥ // ### [2.7.10](https://indike.org/pramana/in.purana.kurma.2.7.10) mahākalpaśca kalpānāṃ yugānāṃ kṛtamasmyaham / kuberaḥ sarvayakṣāṇāṃ gaṇeśānāṃ ca vīrakaḥ // ### [2.7.11](https://indike.org/pramana/in.purana.kurma.2.7.11) prajāpatīnāṃ dakṣo 'haṃ nirṛtiḥ sarvarakṣasām / vāyurbalavatāmasmi dvīpānāṃ puṣkaro 'smyaham // ### [2.7.12](https://indike.org/pramana/in.purana.kurma.2.7.12) mṛgendrāṇāṃ ca siṃho 'haṃ yantrāṇāṃ dhanureva ca / vedānāṃ sāmavedo 'haṃ yajuṣāṃ śatarudriyam // ### [2.7.13](https://indike.org/pramana/in.purana.kurma.2.7.13) sāvitrī sarvajapyānāṃ guhyānāṃ praṇavo 'smyaham / sūktānāṃ pauruṣaṃ sūktaṃ jyeṣṭhasāma ca sāmasu // ### [2.7.14](https://indike.org/pramana/in.purana.kurma.2.7.14) sarvavedārthaviduṣāṃ manuḥ svāyaṃbhuvo 'smyaham / brahmāvartastu deśānāṃ kṣetrāṇāmavimuktakam // ### [2.7.15](https://indike.org/pramana/in.purana.kurma.2.7.15) vidyānāmātmavidyāhaṃ jñānānāmaiśvaraṃ param / bhūtānāmasmyahaṃ vyoma sattvānāṃ mṛtyureva ca // ### [2.7.16](https://indike.org/pramana/in.purana.kurma.2.7.16) pāśānāmasmyahaṃ māyā kālaḥ kalayatāmaham / gatīnāṃ muktirevāhaṃ pareṣāṃ parameśvaraḥ // ### [2.7.17](https://indike.org/pramana/in.purana.kurma.2.7.17) yaccānyadapi loke 'smin sattvaṃ tejobalādhikam / tatsarvaṃ pratijānīdhvaṃ mama tejovijṛmbhitam // ### [2.7.18](https://indike.org/pramana/in.purana.kurma.2.7.18) ātmānaḥ paśavaḥ proktāḥ sarve saṃsāravartinaḥ / teṣāṃ patirahaṃ devaḥ smṛtaḥ paśupatirbudhaiḥ // ### [2.7.19](https://indike.org/pramana/in.purana.kurma.2.7.19) māyāpāśena badhnāmi paśūnetān svalīlayā / māmeva mocakaṃ prāhuḥ paśūnāṃ vedavādinaḥ // ### [2.7.20](https://indike.org/pramana/in.purana.kurma.2.7.20) māyāpāśena baddhānāṃ mocako 'nyo na vidyate / māmṛte paramātmānaṃ bhūtādhipatimavyayam // ### [2.7.21](https://indike.org/pramana/in.purana.kurma.2.7.21) caturviṃśatitattvāni māyā karma guṇā iti / ete pāśāḥ paśupateḥ kleśāśca paśubandhanāḥ // ### [2.7.22](https://indike.org/pramana/in.purana.kurma.2.7.22) mano buddhirahaṅkāraḥ khānilāgnijalāni bhūḥ / etāḥ prakṛtayastvaṣṭau vikārāśca tathāpare // ### [2.7.23](https://indike.org/pramana/in.purana.kurma.2.7.23) śrotraṃ tvakcakṣuṣī jihvā ghrāṇaṃ caiva tu pañcamam / pāyūpasthaṃ karau pādau vāk caiva daśamī matā // ### [2.7.24](https://indike.org/pramana/in.purana.kurma.2.7.24) śabdaḥ sparśaśca rūpaṃ ca raso gandhastathaiva ca / trayoviṃśatiretāni tattvāni prākṛtāni tu // ### [2.7.25](https://indike.org/pramana/in.purana.kurma.2.7.25) caturviṃśakamavyaktaṃ pradhānaṃ guṇalakṣaṇam / anādimadhyanidhanaṃ kāraṇaṃ jagataḥ param // ### [2.7.26](https://indike.org/pramana/in.purana.kurma.2.7.26) sattvaṃ rajastamaśceti guṇatrayamudāhṛtam / sāmyāvasthitimeteṣāmavyaktaṃ prakṛtiṃ viduḥ // ### [2.7.27](https://indike.org/pramana/in.purana.kurma.2.7.27) sattvaṃ jñānaṃ tamo 'jñānaṃ rajo miśramudāhṛtam / guṇānāṃ buddhivaiṣamyād vaiṣamyaṃ kavayo viduḥ // ### [2.7.28](https://indike.org/pramana/in.purana.kurma.2.7.28) dharmādharmāviti proktau pāśau dvau bandhasaṃjñitau / mayyarpitāni karmāṇi nibandhāya vimuktaye // ### [2.7.29](https://indike.org/pramana/in.purana.kurma.2.7.29) avidyāmasmitāṃ rāgaṃ dveṣaṃ cābhiniveśakam / kleśākhyānacalān prāhuḥ pāśānātmanibandhanān // ### [2.7.30](https://indike.org/pramana/in.purana.kurma.2.7.30) eteṣāmeva pāśānāṃ māyā kāraṇamucyate / mūlaprakṛtiravyaktā sā śaktirmayi tiṣṭhati // ### [2.7.31](https://indike.org/pramana/in.purana.kurma.2.7.31) sa eva mūlaprakṛtiḥ pradhānaṃ puruṣo 'pi ca / vikārā mahadādīni devadevaḥ sanātanaḥ // ### [2.7.32](https://indike.org/pramana/in.purana.kurma.2.7.32) sa eva bandhaḥ sa ca bandhakartā sa eva pāśaḥ paśavaḥ sa eva / sa veda sarvaṃ na ca tasya vettā tamāhuragryaṃ puruṣaṃ purāṇam // ### [2.7.32.p1](https://indike.org/pramana/in.purana.kurma.2.7.32.p1) iti śrīkūrmapurāṇe ṣaṭsāhastryāṃ saṃhitāyāmuparivibhāge (īśvaragītāsu) saptamo 'dhyāyaḥ ## Linked texts (2) - [Liṅgapurāṇa](https://indike.org/pramana/in.purana.linga.2.13.7) — Vyāsa, Sanskrit - [Vedāntasāravīraśaivacintāmaṇi](https://indike.org/pramana/in.sampradaya.saiva.virasaiva.vedantasaravirasaivacintamani.1.77) — Niṣṭhura Nañjanācārya 1700, Sanskrit --- Source: [https://indike.org/pramana/in.purana.kurma.2.7](https://indike.org/pramana/in.purana.kurma.2.7) · Pramāṇa