[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.8 # Kurmapurana 2.8: aṣṭamo'dhyāyaḥ Kūrmapurāṇa 2.8 - **Language:** Sanskrit ## Contents - [2.8.18](https://indike.org/pramana/in.purana.kurma.2.8.18) — 1 part ### aṣṭamo'dhyāyaḥ ### [2.8.1](https://indike.org/pramana/in.purana.kurma.2.8.1) īśvara uvāca anyad guhyatamaṃ jñānaṃ vakṣye brāhmaṇapuṅgavāḥ / yenāsau tarate janturghoraṃ saṃsārasāgaram // ### [2.8.2](https://indike.org/pramana/in.purana.kurma.2.8.2) ahaṃ brahmamayaḥ śāntaḥ śāśvato nirmalo 'vyayaḥ / ekākī bhagavānuktaḥ kevalaḥ parameśvaraḥ // ### [2.8.3](https://indike.org/pramana/in.purana.kurma.2.8.3) mama yonirmahad brahma tatra garbhaṃ dadhāmyaham / mūlaṃ māyābhidhānaṃ tu tato jātamidaṃ jagat // ### [2.8.4](https://indike.org/pramana/in.purana.kurma.2.8.4) pradhānaṃ puruṣo hyatmā mahān bhūtādireva ca / tanmātrāṇi mahābhūtānīndriyāṇi ca jajñire // ### [2.8.5](https://indike.org/pramana/in.purana.kurma.2.8.5) tato 'ṇḍamabhavaddhaimaṃ sūryakoṭisamaprabham / tasmin jajñe mahābrahmā macchaktyā copabṛṃhitaḥ // ### [2.8.6](https://indike.org/pramana/in.purana.kurma.2.8.6) ye cānye bahavo jīvā manmayāḥ sarva eva te / na māṃ paśyanti pitaraṃ māyayā mama mohitāḥ // ### [2.8.7](https://indike.org/pramana/in.purana.kurma.2.8.7) yāśca yoniṣu sarvāsu saṃbhavanti hi mūrtayaḥ / tāsāṃ māyā parā yonirmāmeva pitaraṃ viduḥ // ### [2.8.8](https://indike.org/pramana/in.purana.kurma.2.8.8) yo māmevaṃ vijānāti bījinaṃ pitaraṃ prabhum / sa dhīraḥ sarvalokeṣu na mohamadhigacchati // ### [2.8.9](https://indike.org/pramana/in.purana.kurma.2.8.9) īśānaḥ sarvavidyānāṃ bhūtānāṃ parameśvaraḥ / oṅkāramūrtirbhagavānahaṃ brahmā prajāpatiḥ // ### [2.8.10](https://indike.org/pramana/in.purana.kurma.2.8.10) samaṃ sarveṣu bhūteṣu tiṣṭhantaṃ parameśvaram / vinaśyatsvavinaśyantaṃ yaḥ paśyati sa paśyati // ### [2.8.11](https://indike.org/pramana/in.purana.kurma.2.8.11) samaṃ paśyan hi sarvatra samavasthitamīśvaram / na hinastyātmanātmānaṃ tato yāti parāṅgatim // ### [2.8.12](https://indike.org/pramana/in.purana.kurma.2.8.12) viditvā sapta sūkṣmāṇi ṣaḍaṅgaṃ ca maheśvaram / pradhānaviniyogajñaḥ paraṃ brahmādhigacchati // ### [2.8.13](https://indike.org/pramana/in.purana.kurma.2.8.13) sarvajñatā tṛptiranādibodhaḥ svatantratā nityamaluptaśaktiḥ / anantaśaktiśca vibhorviditvā ṣaḍāhuraṅgāni maheśvarasya // ### [2.8.14](https://indike.org/pramana/in.purana.kurma.2.8.14) tanmātrāṇi mana ātmā ca tāni sūkṣmāṇyāhuḥ sapta tattvātmakāni / yā sā hetuḥ prakṛtiḥ sā pradhānaṃ bandhaḥ prokto viniyogo 'pi tena // ### [2.8.15](https://indike.org/pramana/in.purana.kurma.2.8.15) yā sā śaktiḥ prakṛtau līnarūpā vedeṣūktā kāraṇaṃ brahmayoniḥ / tasyā ekaḥ parameṣṭhī parastā- nmaheśvaraḥ puruṣaḥ satyarūpaḥ // ### [2.8.16](https://indike.org/pramana/in.purana.kurma.2.8.16) brahmā yogī paramātmā mahīyān vyomavyāpī vedavedyaḥ purāṇaḥ / eko rudro mṛtyuravyaktamekaṃ bījaṃ viśvaṃ deva ekaḥ sa eva // ### [2.8.17](https://indike.org/pramana/in.purana.kurma.2.8.17) tamevaikaṃ prāhuranye 'pyanekaṃ tvekātmānaṃ kecidanyattathāhuḥ / aṇoraṇīyān mahato 'sau mahīyān mahādevaḥ procyate vedavidbhiḥ // ### [2.8.18](https://indike.org/pramana/in.purana.kurma.2.8.18) evaṃ hi yo veda guhāśayaṃ paraṃ prabhuṃ purāṇaṃ puruṣaṃ viśvarūpam / hiraṇmayaṃ buddhimatāṃ parāṃ gatiṃ sa buddhimān buddhimatītya tiṣṭhati // ### [2.8.18.p1](https://indike.org/pramana/in.purana.kurma.2.8.18.p1) iti śrīkūrmapārāṇe ṣaṭsāhastryāṃ saṃhitāyāmuparivibhāge (īśvaragītāsu) aṣṭamo 'dhyāyaḥ --- Source: [https://indike.org/pramana/in.purana.kurma.2.8](https://indike.org/pramana/in.purana.kurma.2.8) · Pramāṇa