[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Kurmapurana](https://indike.org/pramana/in.purana.kurma) › 2.9 # Kurmapurana 2.9: navamo'dhyāyaḥ Kūrmapurāṇa 2.9 - **Language:** Sanskrit ## Contents - [2.9.20](https://indike.org/pramana/in.purana.kurma.2.9.20) — 1 part ### navamo'dhyāyaḥ ### [2.9.1](https://indike.org/pramana/in.purana.kurma.2.9.1) ṛṣaya ūcuḥ niṣkalo nirmalo nityo niṣkriyaḥ parameśvaraḥ / tanno vada mahādeva viśvarūpaḥ kathaṃ bhavān // ### [2.9.2](https://indike.org/pramana/in.purana.kurma.2.9.2) īśvara uvāca nāhaṃ viśvo na viśvaṃ ca māmṛte vidyate dvijāḥ / māyānimittamatrāsti sā cātmānamapāśritā // ### [2.9.3](https://indike.org/pramana/in.purana.kurma.2.9.3) anādinidhanā śaktirmāyāvyaktasamāśrayā / tannimittaḥ prapañco 'yamavyaktādabhavat khalu // ### [2.9.4](https://indike.org/pramana/in.purana.kurma.2.9.4) avyaktaṃ kāraṇaṃ prāhurānandaṃ jyotirakṣaram / ahameva paraṃ brahma matto hyanyanna vidyate // ### [2.9.5](https://indike.org/pramana/in.purana.kurma.2.9.5) tasmānme viśvarūpatvaṃ niścitaṃ brahmavādibhiḥ / ekatve ca pṛthaktve ca proktametannidarśanam // ### [2.9.6](https://indike.org/pramana/in.purana.kurma.2.9.6) ahaṃ tat paramaṃ brahma paramātmā sanātanaḥ / akāraṇaṃ dvijāḥ prokto na doṣo hyātmanastathā // ### [2.9.7](https://indike.org/pramana/in.purana.kurma.2.9.7) anantā śaktayo 'vyakte māyādyāḥ saṃsthitā dhruvāḥ / tasmin divi sthitaṃ nityamavyaktaṃ bhāti kevalam // ### [2.9.8](https://indike.org/pramana/in.purana.kurma.2.9.8) yābhistallakṣyate bhinnamabhinnaṃ tu svabhāvataḥ / ekayā mama sāyujyamanādinidhanaṃ dhruvam // ### [2.9.9](https://indike.org/pramana/in.purana.kurma.2.9.9) puṃso 'bhūdanyayā bhūtiranyayā tattirohitam / anādimadhyaṃ tiṣṭhantaṃ yujyate 'vidyayā kila // ### [2.9.10](https://indike.org/pramana/in.purana.kurma.2.9.10) tadetat paramaṃ vyaktaṃ prabhāmaṇḍalamaṇḍitam / tadakṣaraṃ paraṃ jyotistad viṣṇoḥ paramaṃ padam // ### [2.9.11](https://indike.org/pramana/in.purana.kurma.2.9.11) tatra sarvamidaṃ protamotaṃ caivākhilaṃ jagat / tadeva ca jagat kṛtsnaṃ tad vijñāya vimucyate // ### [2.9.12](https://indike.org/pramana/in.purana.kurma.2.9.12) yato vāco nivartante aprāpya manasā saha / ānandaṃ brahmaṇo vidvān vibheti na kutaścana // ### [2.9.13](https://indike.org/pramana/in.purana.kurma.2.9.13) vedāhametaṃ puruṣaṃ mahānta- mādityavarṇaṃ tamasaḥ parastāt / tad vijñāya parimucyeta vidvān nityānandī bhavati brahmabhūtaḥ // ### [2.9.14](https://indike.org/pramana/in.purana.kurma.2.9.14) yasmāt paraṃ nāparamasti kiñcit yajjyotiṣāṃ jyotirekaṃ divistham / tadevātmānaṃ manyamāno 'tha vidvān ātmānandī bhavati brahmabhūtaḥ // ### [2.9.15](https://indike.org/pramana/in.purana.kurma.2.9.15) tadavyayaṃ kalilaṃ gūḍhadehaṃ brahmānandamamṛtaṃ viśvadhāma / vadantyevaṃ brāhmaṇā brahmaniṣṭhā yatra gatvā na nivarteta bhūyaḥ // ### [2.9.16](https://indike.org/pramana/in.purana.kurma.2.9.16) hiraṇmaye paramākāśatattve yadarciṣi pravibhātīva tejaḥ / tadvijñāne paripaśyanti dhīrā vibhrājamānaṃ vimalaṃ vyoma dhāma // ### [2.9.17](https://indike.org/pramana/in.purana.kurma.2.9.17) tataḥ paraṃ paripaśyanti dhīrā ātmanyātmānamanubhūyānubhūya / svayaṃprabhaḥ parameṣṭhī mahīyān brahmānandī bhagavānīśa eṣaḥ // ### [2.9.18](https://indike.org/pramana/in.purana.kurma.2.9.18) eko devaḥ sarvabhūteṣu gūḍhaḥ sarvavyāpī sarvabhūtāntarātmā / tamevaikaṃ ye 'nupaśyanti dhīrās teṣāṃ śāntiḥ śāśvatī netareṣām // ### [2.9.19](https://indike.org/pramana/in.purana.kurma.2.9.19) sarvānanaśirogrīvaḥ sarvabhūtaguhāśayaḥ / sarvavyāpī ca bhagavān na tasmādanyadiṣyate // ### [2.9.20](https://indike.org/pramana/in.purana.kurma.2.9.20) ityetadaiśvaraṃ jñānamuktaṃ vo munipuṅgavāḥ / gopanīyaṃ viśeṣeṇa yogināmapi durlabham // ### [2.9.20.p1](https://indike.org/pramana/in.purana.kurma.2.9.20.p1) iti śrīkūrmapārāṇe ṣaṭsāhastryāṃ saṃhitāyāmuparivibhāge (īśvaragītāsu) navamo 'dhyāyaḥ ## Linked texts (3) - [Vedāntasāravīraśaivacintāmaṇi](https://indike.org/pramana/in.sampradaya.saiva.virasaiva.vedantasaravirasaivacintamani.2.52) — Niṣṭhura Nañjanācārya 1700, Sanskrit - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v7.c91.31) — P. V. Kane, English - [Kūrmapurāṇa (Ananta Gokhale)](https://indike.org/pramana/in.purana.kurmapurana.40.p2) — Ananta Gokhale, Sanskrit --- Source: [https://indike.org/pramana/in.purana.kurma.2.9](https://indike.org/pramana/in.purana.kurma.2.9) · Pramāṇa