Pramāṇa · Search · About · API

Kurmapurana (Ananta Gokhale) 12

Kūrmapurāṇa (Ananta Gokhale) 12

Language
Sanskrit

12.p1

ūnaviṃśo'dhyāyaḥ | sūta uvāca | etānutpādya putrāṃstu prajāsantānakāraṇāt | kaśyapaḥ putrakāmastu cacāra sumahattapaḥ

12.p2

tasyaivantapato'tyarthaṃ prādurbhūtau sutāvimau | vatsaraścāsitaścaiva tāvubhau brahmavādinau || vatsarā naidhruvo jajñe raibhyaśca† sumahāvaśāḥ | raibhyasya‡ jajñire śūdrāḥ§ putrā dyutimatāṃ varāḥ || cyavanasya sutā bhāryā¶ naidhruvasya mahātmanaḥ | sumedhā janayāmāsa putrānvai kuṇḍapāyinaḥ|| || asitasyaikaparṇāyāṃ brahmiṣṭhaḥ samapadyata | nāmnā vai devalaḥ putro yogācāryo mahātapāḥ || śāṇḍilyaḥ paramaḥ†† śrīmān sarvvatattvārthavicchuciḥ‡‡ | prasādātpārvatīśasya yogamuktamavāptavān§§ || śāṇḍilyo naidhruvo raibhyaḥ¶¶ trayaḥ putrāstu kāśyapāḥ

12.p3

naraprakṛtayo viprā pulastyasya vadāmi vaḥ || tṛṇavindoḥ sutā viprā nāmnā ailavilā smṛtā | pulastyāya tu rājarṣistāṅkanyāṃ pratyapādayat || ṛṣistvailavilastasyāṃ viśravāḥ samapadyata | tasya patnyaścatasrastu paulastyakulavarddhikāḥ || puṣpotkaṭā ca vākā† ca kaikasī‡ devavarṇinī§ | rūpalāvaṇyasampannāstāsāñca śṛṇuta prajāḥ || jyeṣṭhaṃ vaiśravaṇantasya suṣuve devavarṇinī¶ | kaikasyajanayatputraṃ rāvaṇaṃ rākṣasādhipam || kumbhakarṇaṃ sūparṇakhāntathaiva ca vibhīṣaṇam | puṣpotkaṭāpyajanayatputrānviśravasaḥ śubhān || mahodaraṃ prahastañca mahāpārśvaṃ kharantathā | kumbhīnasīntathā kanyāṃ vākāyāḥ sṛjate|| prajāḥ || triśirādūṣaṇaścaiva vidyujjihvo mahābalaḥ | ityete krūrakarmmāṇaḥ paulastyā rākṣasā daśa || sarvve tapobalotkṛṣṭārudrabhaktāḥ subhīṣaṇāḥ

12.p4

pulahasya mṛgāḥ putrāḥ sarvve vyālāśca daṃṣṭriṇaḥ || bhūtāḥ piśācā ṛkṣāśca† śūkarā hastinastathā | anapatyaḥ kratustasmin smṛto vaivasvate'ntare | marīceḥ kaśyapaḥ putraḥ svayameva prajāpatiḥ || bhṛgorathābhavacchukro‡ daityācāryo mahātapāḥ | svādhyāyayoganirato harabhakto mahādyutiḥ || atreḥ putro'bhavadvahniḥ sodaryyastasya naidhruvaḥ§ | kṛśāśvasya tu viprarṣeḥ¶ ghṛtācāmiti naḥ śrutam || sa tasyāñjanayāmāsa|| svastyātreyānamahaujasaḥ | vedavedāṅganiratāntapasā hatakilbiṣān || nāradastu vasiṣṭhāya dadau devīmarundhatīm | ūrddharetāstu tatraiva śāpādṛkṣasya nāradaḥ || haryyaśveṣu tu naṣṭeṣu māyayā nāradasya tu†† | śaśāpa nāradaṃ dakṣaḥ krodhasaṃraktalocanaḥ

12.p5

yasmānmama sutāḥ sarvve bhavatā māyayā dvija | kṣayanītāstvaśeṣeṇa nirapatyo bhaviṣyasi || arundhatyāṃ vasiṣṭhastu śaktimutpādyatsrutam | śakteḥ parāśaraḥ śrīmān sarvvajñastapatāṃ varaḥ || ārādhya devadeveśamīśānantripurāntakam | lebhe tvapratimaṃ putraṅkṛṣṇadvaipāyanaṃ prabhum || dvaipāyanācchuko jajñe bhagavāneva śaṅkaraḥ | aṃśāṃśenāvatīryyorvyāṃ svaṃ prāpa paramaṃ padam || śukasyāsyābhavan putrāḥ pañcātyantatapasvinaḥ | bhūriśravāḥ prabhuḥ śambhuḥ kṛṣṇo gauraśca pañcamaḥ || kanyā kīrttimatī caiva yogamātā dhṛtavratāḥ | ete'trivaṃśāḥ kathitāḥ brahmaṇā brahmavādinām || ata ūrddhaṃ nibodhadhvaṅgaśyapādrājasantatim

12.p6

iti śrīkūrmapurāṇe ṛṣivaṃśe ekonaviṃśo'dhyāyaḥ

Linked texts (9)