Linga 146
Liṅga 146
- Language
- Sanskrit
Contents
- 146.33 — 1 part
146.1
sanatkumāra uvāca
pañcabrahmāṇi me nandiśrāvadya gaṇasattama !
śreyaḥkāraṇabhūtāni pavitrāṇi śarīriṇām
146.2
nandikeśvara uvāca
śivasyaiva svarūpāṇi pañcabrahmāhvayāni te
pravakṣyāmi yathātattvaṃ padmayoneḥ sutottama !
146.3
sarvalokaikasaṃharttā sarvalokaikarakṣitā
sarvalokaikanirmātā pañcabrahmātmakaḥ śivaḥ
146.4
sarveṣāmeva lokānāṃ yadupādānakāraṇam
naimittakāraṇañcāpiḥ sa śivaḥ pañcadhā smṛtaḥ
146.5
mūrttayaḥ pañca vikhyātāḥ pañcabrahmāhvayāḥ parāḥ
sarvalokaśaraṇyasya śivasya paramātmanaḥ
146.6
kṣetrajñaḥ prathamā mūrttiḥ śivasya parameṣṭhinaḥ
bhoktā prakṛtivargasya bhogyasyeśrāmasaṃjñitaḥ
146.7
syāṇīstatpuruṣākhyā ca dvitīyā mūrttirucyate
prakṛtiḥ sā hi vijñeyā paramātmaguhātmikā
146.8
aghorākhyā tṛtīyā ca sambhormūrtti rgarīyasī
buddheḥ sā mūrtti rityāhu dharmmādyaṣṭāṅgasaṃyutā
146.9
caturthī vāmadevākhyā mūttiḥ śambhorgarīyasī
ahaṅkārātmakatvena vyāpya sarvaṃ vyavasthitā
146.10
sadyojātāhvayā śambhoḥ pañcamī mūttiṃrucyate
manastvātmakatvena sthitā sarvaśarīriṣu
146.11
īśānaḥ paramo devaḥ parameṣṭhī sanātanaḥ
śrotnendriyātmakatvena sarvabhūteṣvavasthitaḥ
146.12
sthitastatpuruṣo devaḥ śarīreṣu śarīriṇām
tvagindriyātmakatvena tattvavidbhirudāhṛtaḥ
146.13
aghoro'pi mahādevaścakṣurātmatayā budhaiḥ
kīrttitaḥ sarvabhūtānāṃ śarīreṣu vyavasthitaḥ
146.14
jihvendriyātmakatvena vāmadevo'pi viśrutaḥ
aṅgabhājāmaśeṣāṇāmaṅgeṣu paridhiṣṭhitaḥ
146.15
ghrāṇendriyātmakatvena sadyojātaḥ smṛto budhaiḥ
prāṇabhājāṃ samastānāṃ viṣayeṣu vyavasthitaḥ
146.16
sarveṣveva śarīreṣu prāṇabhājāṃ pratiṣṭhitaḥ
vāgindriyātmakatvena budhairīśāna ucyate
146.17
pāṇīndriyātmakatvena sthitastatpuruṣo budhaiḥ
ucyate vigraheṣveva sarvavigrahadhāriṇām
146.18
sarvavigrahiṇāṃ dehe aghoro'pi vyavasthitaḥ
pādendriyātmakatvena kīrttitastattvavedibhiḥ
146.19
pāyvindriyātmakatvena vāmadevo vyavasthitaḥ
sarvabhūtanikāyānāṃ kāyeṣu munibhiḥ smṛtaḥ
146.20
upasthātmatayā devaḥ sadyojātaḥ sthitaḥ prabhuḥ
dṛśyate vedaśāstrajñairdeheṣu prāṇadhāriṇām
146.21
īśānaṃ prāṇināṃ devaṃ śabdatanmātrarūpiṇam
ākāśajanakaṃ prāhurmu nirvandārakaprajāḥ
146.22
prāhustatpuruṣaṃ devaṃ sparśa tanmātrakārakam
samīrajanakaṃ prāhurbhagavantaṃ munīśvarāḥ
146.23
rūpatanmātrakaṃ devamaghoramapi ghorakam
prāhurvedavido mukhyā janakaṃ jātavedasaḥ
146.24
rasattanmātrarūpatvāt prathitaṃ tattvavedibhiḥ
vāmadevamapāṃ prāhurjanakatvena saṃsthitam
146.25
sadyojātaṃ mahādevaṃ gandhatanmātrarūpiṇam
bhūmnyātmānaṃ praśaṃsanti sarvatattvārthavedinaḥ
146.26
ākāśātmānamīśānaṃ ādidevaṃ munīśvarāḥ
parameṇa mahattvena sambhūtaṃ prāḍuruttamam
146.27
prabhuṃ tatpuruṣaṃ devaṃ pavanaṃ pavanātmakam
samastalokavyāpitvāt prathitaṃ sūrayo viduḥ
146.28
athārvitatayā khyātamaghoraṃ dahanātmakam
kathayanti mahātmānaṃ vedavākyārthavedinaḥ
146.29
toyātmakaṃ mahādevaṃ vāmadevaṃ manoramam
jagatsañjīvanatvena kathitaṃ munayo viduḥ
146.30
viśvaṃbharātmakaṃ devaṃ sadyojātaṃ jagadgurum
carācaraikabharttāraṃ paraṃ kavivarā viduḥ
146.31
pañcabrahmātmakaṃ sarvaṃ jagat sthāvarajaṅgamam
śivānandaṃ tadityāhurnayatattvadarśinaḥ
146.32
pañcaviṃśatitattvātmā prapañce yaḥ pradṛśyate
pañcabrahmātmakatvena sa śivo jñāyatāṃ gataḥ
146.33
pañcaviṃśatitattvātmā pañcabrahmātmakaḥ śivaḥ
śreyo'rthibhirato nityaṃ cintanīyaḥ prayatnataḥ
146.33.p1
ityādi mahāpurāṇe śrīlaiṅge uttarārddhe pañca brahmakathanaṃ nāma caturddaśo'dhyāyaḥ || 14
Linked texts (1)
- Liṅgapurāṇa — Vyāsa, Sanskrit