Linga 149

Liṅga 149

antaryāmī paraḥ kecitkathyite tridaśaḥ prakīrtyate
svayaṃ jyotiḥ svayaṃ vedyaḥ śivaḥ śambhurmaheśvaraḥ

sarveṣāmeva bhūtānāmantaryāmī śivaḥ smṛtaḥ
sarveṣāmeva bhūtānāṃ paratvāt para ucyate

paramātmā śivaḥ śambhuḥ śaṅkaraḥ parameśvaraḥ
prājñataijasaviśvākhyaṃ tasya rūpatrayaṃ viduḥ

suṣuptisvapnajāgrattamavasthātrayameva tat
virāṭ hiraṇyagarbhākhyamavyākṛtapadadvayam

turīyasya śivasyāsya avasthātrayagāminaḥ
hiraṇyagarbhaḥ puruṣaḥ kāla ityeva kīrttitaḥ

tisro'vasthā jagatsṛṣṭisthitisaṃhārahetavaḥ
bhavaviṣṇuviriñcākhyamavasthānayamāśritaḥ

ārādhya bhaktyā muktiñca prāpnuvanti śarīriṇaḥ
karttā kriyā ca kāryyañca karaṇañceti sūribhiḥ

śambhoścatvāri rūpāṇi kīrtyante parameṣṭhinaḥ
pramātā ca pramāṇañca prameya pramitistathā

catvāryyetāni rūpāṇi śivasyaiva na saṃśayaḥ
īśvarāvyākṛtaprāṇavirāṭ bhūtendriyātmakam

śivasyaiva vikāro'yaṃ samudrasyeva vīcayaḥ
īśvaraṃ jagatāmāhurnimittaṃ kāraṇaṃ tathā

Linked texts (1)