Pramāṇa · Search · About · API

Linga 15: atha dvādaśo'dhyāyaḥ

Liṅga 15

Language
Sanskrit

Contents

atha dvādaśo'dhyāyaḥ

15.1

sūta uvāca
tatastriṃśattamaḥ kalpo rakto nāma prakīrttitaḥ
brahmā yatra mahātejā raktavarṇamadhārayat

15.2

dhyāyataḥ putrakāmasya brahmaṇaḥ parameṣṭhinaḥ
prādurbhūto mahātejāḥ kumāro raktabhūṣaṇaḥ

15.3

raktamālyāmbaradharo raktanetraḥ pratāpavān
sa taṃ dṛṣṭvā mahātmānaṃ kumāraṃ raktavāsasam

15.4

paraṃ dhyānaṃ samāśritya bubudhe devamīśvaram
sa taṃ praṇamya bhagavān brahmā paramayantritaḥ

15.5

vāmadevaṃ tato brahmā brahma vai samacintayat
tathā stuto mahādevo brahmaṇā parameśvaraḥ

15.6

pratītahṛdayaḥ sarvva idamāha pitāmaham
dhyāyatā putrakāmena yasmātte'haṃ pitāmaha !

15.7

dṛṣṭaḥ paramayā bhaktyā sutaśca brahmapūrvakam
tasmādjñānabalaṃ prāpya kalpe kalpe prayatnataḥ

15.8

vetsyase māṃ prasaṃkhyātaṃ lokadhātāramīśvaram
tatastasya mahātmānaścatvāraste kumārakāḥ

15.9

sambabhūvurmahātmāno viśuddhā brahmavarcasaḥ
virajāśca vibāhuśca viśoko viśvabhāvanaḥ

15.10

brahmaṇya brahmaṇastulyā vorā adhyavasāyinaḥ
raktāmbaradharāḥ sarve raktamālyānulepanāḥ

15.11

raktakuṅkumaliptāṅgā raktabhasmānulepanāḥ
tato varṣasahasrānte brahmatve 'dhyavasāyinaḥ

15.12

śṛṇvantaśca mahātmāno brahma taddāmadaivikam
anugrahārthaṃ lokānāṃ śiṣyāṇāṃ hitakāmyayā

15.13

dharmopadeśamakhilaṃ kṛtvā te brahmaṇaḥ priyāḥ
punareva mahādevaṃ praviṣṭā rudramavyayam

15.14

ye'pi cānye dvijaśreṣṭhā yuñjānā vāmamīśvaram
prapaśyanti mahādevaṃ tadbhaktāstat parāyaṇāḥ

15.15

te sarve pāvanirmuktā vimalā brahmacāriṇaḥ
rudralokaṃ gamiṣyanti punarāvṛttidurlabham

15.15.p1

ityādi mahāpurāṇe śrīlaiṅge vāmadevamāhātmya nāma dvādaśo'dhyāyaḥ || 12

Linked texts (4)