Pramāṇa · Search · About · API

Linga 17: atha caturdaśo'dhyāyaḥ

Liṅga 17

Language
Sanskrit

Contents

atha caturdaśo'dhyāyaḥ

17.1

sūta uvāca
tatastasmin gate kalpe pītavarṇe svayambhuvaḥ
punaranyaḥ pravṛttastu kalpo nāmnāsitastu saḥ

17.2

ekārṇave tadāvṛtte divye varṣasahasrake
sraṣṭukāmaḥ prajā brahmā cintayāmāsa duḥkhitaḥ

17.3

tasya cintayamānasya putrakāmasya vai prabhoḥ
kṛṣṇaḥ samabhavadvarṇo dhyāyataḥ parameṣṭhinaḥ

17.4

athāpaśyanmahātejāḥ prādurbhūtaṃ kumārakam
kṛṣṇavarṇaṃ mahāvīryyaṃ dīpyamānaṃ svatejasā

17.5

kṛṣṇāmbaradharoṣṇīṣaṃ kṛṣṇayajñopavītinam
kṛṣṇena maulinā yuktaṃ kṛṣṇasraganulepanam

17.6

sa taṃ dṛṣṭvā mahātmānamaghoraṃ ghoravikramam
vavande devadeveśamaṅga taṃ kṛṣṇapiṅgalam

17.7

prāṇāyāmaparaḥ śrīmān hṛdi kṛtvā maheśvaram
manasā dhyānayuktena prapannastu tameśvaram

17.8

aghorastu tato brahmā brahmarūpaṃ vyacintayat
tathā vai dhyāyamānasya brahmaṇaḥ parameṣṭhinaḥ

17.6-2

pradadau darśanaṃ devo hyaghoro ghoravikramaḥ
athāsya pārśvataḥ kṛṣṇāḥ kṛṣṇasraganulepanāḥ

17.10

catvārastu mahātmānaḥ sambabhūvuḥ kumārakāḥ
kṛṣṇaḥ kṛṣṇaśikhaścaiva kṛṣṇāsyaḥ kṛṣṇavastradhṛk

17.11

tato varṣasahasrantu yogataḥ parameśvaram
upāsitvā mahāyogaṃ śiṣyebhyaḥ pradaduḥ punaḥ

17.12

yogena yogasampannāḥ praviśya manasā śivam
amalaṃ nirguṇaṃ sthānaṃ praviṣṭā viśvamīśvaram

17.13

evametena yogena ye'pi cānye manīṣiṇaḥ
cintayanti mahādevaṃ gantāro rudramavyayam

17.13.p1

ityādi mahāpurāṇe śrīlaiṅge aghorotpattivarṇanaṃ nāma caturdaśo'dhyāyaḥ || 14

Linked texts (3)